味觉旅行 寻找台湾的味道
2021-05-14

讲起台湾菜,你第一时间会谂起咩?鲁肉饭?珍珠奶茶?定系麻辣火锅?愈谂愈多,愈谂愈饿,咁就唔好谂咁多啦,即刻去搵食啦!香港都有唔少台湾料理,今日就同大家介绍其中两间。

稻埕饭店   (铜锣湾尖沙咀)    

去过台湾嘅朋友,实有去过大稻埕,喺港口边踩下单车,逛下巿集……呢间餐厅正正以呢个景点为灵感,取名稻埕饭店,装修富有台湾色彩,另外亦以台湾直送台稉米同卤水酱埕作概念,制作菜式,为香港人带嚟回忆中嘅台湾味道。另外值得一提嘅系呢度采用电子落单,重有部猫喵自助送餐机,有够CUTE呢。

鹅不是鸭肉

说穿了即系卤水鹅片,白卤水汁以古早秘方浸制,选用十几款材料精熬而成,师傅仲特地过咗去台湾学配方架。白卤水冇黑卤水咁咸,清新啲,能够带出食物嘅原味多啲。鹅片肉质细嫩,阵阵肉香。


卤肉台稉米饭

看似简单嘅卤肉饭,其实都相当讲究。米系选用台湾直送嘅台稉 9 号米,米粒透明饱满,带有黏性,秘制卤肉嘅汁渗晒落去,啖啖油香。橙黄色嘅溏心蛋绝对系画龙点睛之作,生熟度刚好,满满蛋香。


满满骨胶原猪手 

想要靓靓嘅女士,成日都要补充骨胶原。呢道猪手就啱晒喇,胶原蛋白够晒多,肉质虽厚但软腍,燘到入晒味,几好送饭。


黑糖珍珠舒芙蕾班戟配抹茶冰淇淋

我都唔想用邪恶去形容呢个甜品,但当上到枱面,望住佢大大份,劲多cream,重有黑糖浆同黑糖珍珠,真系冇法子唔话佢邪恶。不过咁喎,愈邪恶嘅嘢通常愈好食,舒芙蕾班戟厚身,口感软身但实净,珍珠烟韧,啲cream就好软滑,而且冇想像中咁甜腻,原来系师傅自己打发嘅,冇加到糖,同朋友share嘅话都可以放心食。另外有抹茶蕨饼同雪糕伴碟,作为饭後甜品相当丰富。


米水系列

介绍完邪恶嘅嘢,当然都会介绍返啲健康嘢畀大家啦,冇咁大罪恶感嘛。饮品建议可选米水,有热有冻,都系以台中直送台稉 9 号米煲煮 15 分钟而成,有助改善食慾、强健体质等。原味纯米水色泽浓浊,带有浓浓米香。另外草莓优格米水则以真‧士多啤梨果肉打成酱,加原味yogurt制作,呢个米香味就相对淡啲,不过有果肉食到都几开心。



牛大人台湾火锅吃到饱  (旺角观塘) 

打边炉无分季节,想打就打。呢间人气台式任食火锅店提供9种正宗台湾锅底,全部都系以全天然食材制作,建议大家可以落料打边炉之前,先饮饮个汤呀!另外,餐厅提供多款牛肉种类同埋台湾直送食材选择,设有自助火锅配料区、酱料区同饮品区。

药膳牛蒡锅
愈嚟愈多人锺意药膳汤底,养身嘛。呢个药膳牛蒡锅以先烧後炖嘅牛腿骨熬制,配新鲜牛蒡同多种名贵药材,仲有芫荽添!汤底味道清甜,营养价值仲十足!牛蒡有降血糖、血脂等功用,兼且可以瘦身添,女士们听到是咪蠢蠢欲动先?


牛大人红烧牛骨锅

同样都系以先烧後炖嘅牛腿骨熬制而成,散发住阵阵浓郁嘅烧牛骨香味,浓甜可口,牛骨汤底再渌埋牛肉,牛味浓到呢~绝对系牛魔王嘅首选。加上慢炖烹煮可以释放到牛骨内嘅营养物质,做到热量低而蛋白质丰富。


牛夫人秘方麻辣锅

呢个汤底就专为麻辣控而设啦,以辣乾、大红袍花椒、郫县豆瓣同三十几种中药材,加埋先烤後煮嘅牛骨熬成,相当足料。难怪味道既有牛骨嘅清香,而又不失层次多变嘅麻辣香,收尾仲有回甜添。辣度设有大、中、小辣拣,够晒弹性。


台湾凤梨鸡锅

讲到台湾嘅经典古早锅,就要数到台湾凤梨鸡锅喇。以凤梨搭配苦瓜熬制嘅鸡汤,味道清甜带微酸,苦味反而冇乜喎,值得一试。


牛妈秘制卤鸭舌

多款火锅配料均由台湾直送,特别推介秘制卤鸭舌,以最传统嘅方法制作,先汆水、後过河,再加入台湾秘制嘅卤水配料一齐烹调,非常入味,肉质爽滑弹牙。



心动不如行动!有兴趣就快啲约埋三五知己去叹下美食!快啲bookmark定啦!

*以上图片只供参考,所有食品以实物为准. 食品供应因餐厅而异



关键字
大厨招牌菜
台湾菜
火锅
旺角
观塘
铜锣湾
尖沙咀
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
本月热门
【2021生日优惠】持续更新!7月寿星半价叹和牛烧肉套餐
2021-07-09
【恭喜张家朗、何诗蓓】多间餐厅立即推出限时优惠一览
3天前
榴槤Buffet真的很兴奋~ 九龙区酒店7、8月限定榴槤盛宴
2021-06-30
投奔盛夏 7-8月份下午茶推介
2021-07-08
6月份好评餐厅十强
2021-07-06