充满格调 高质西式私房菜及扒房推介
2021-05-26

唔少人食饭都锺意食埋个环境,特别系食西餐,环境有格调食得舒服,连食物嘅味道都好啲。香港地食西餐选择数之不尽,随时拣都拣到头痛,今次介绍以下呢两间西餐厅,无论食物定装潢都好有特色,啱晒情侣约会及朋友小聚!


G Place(尖沙咀) 

中式私房菜就听得多,西式其实都唔少,但原来喺尖沙咀山林道尽头一条小巷中,竟然藏有呢间咁有特色嘅西餐厅。正正因为餐厅位置较隐蔽,一行到门口就有种远离烦嚣嘅感觉,室内放满古典装饰品,充满古典气息,适合打卡。食物选择方面贵精不贵多,每款都由大厨诚心诚意制成,而且每道菜都会用心介绍返畀食客听。温馨一提由於系私房菜关系只接受订座呀。


松叶蟹肉沙律配椰菜花慕丝

作为一道出色嘅前菜,当然要成功打开大家嘅味蕾。呢味松叶蟹肉沙律配椰菜花慕丝,大厨特意选用鲜味嘅日本松叶蟹肉配以樱桃萝卜制成沙律,底层配上混入高汤打成嘅椰菜花慕丝,蟹肉嘅鲜甜配上椰菜花嘅清甜,真系令人愈食愈开胃。


龙虾汤

龙虾汤系食西餐时常见嘅汤品,不过好多时坊间都会整得过咸。餐厅用大量嘅龙虾熬制,最後将龙虾连肉及壳打碎,十分足料,啖啖都系香浓嘅龙虾鲜味之余咸味恰到好处。


火炙原只西班牙红虾配薯茸

识食嘅朋友都知道,西班牙红虾被誉为海虾之王,皆因佢比起其他海虾更鲜甜及带有浓浓虾味。餐厅选取King Size级数嘅西班牙红虾,足足接近两只手掌咁长,坊间真系好少可食到,大厨先将红虾烤焗再轻轻炙烧令虾肉更香口,肉质爽口弹牙,而且只只都肥美饱满充满虾膏,一入口虾嘅鲜味及香味充满晒成个口腔。


西班牙烧乳猪仔

西班牙乳猪仔先用香草及啤酒腌制一日,再慢煮8小时,最後放入焗炉烤焗,绝对系心机之作。因为用啤酒腌制令乳猪表皮有发酵作用,烤焗出嚟嘅乳猪仔皮脆肉嫩,仲带有阵阵麦味。


矿加西汁烩羊膝

羊膝比起平时常食嘅羊架肉质更嫩滑多汁,大厨将羊膝慢煮5小时,再配以用红酒及烧汁制成嘅秘制酱汁,同羊肉淡淡嘅羊骚味真系非常夹。


The Grill Room(铜锣湾尖沙咀 

饿咗咁耐出街搵嘢食,当然要搵间好食嘅,对自己好啲。咁就要搵餐锯下扒啦。呢间喺铜锣湾同尖沙咀都有分店嘅西式扒房,主打法国同澳洲嘅菜式,主力供应炭烧食物同多款肉类,喺酱汁同配菜配搭方面,都落咗唔少心机。


烧斧头扒配杂菌、杂菜、黑松露薯蓉 (限量发售)

嚟到扒房当然要锯扒,1.5公斤重嘅安格斯斧头扒嚟自美国,厨师利用烧扒炉,烧香斧头扒嘅表面,同时锁紧内里嘅肉汁,再用焗炉慢慢煮至客人要求嘅熟度。当然,5成熟系最推介嘅,肉质又嫩滑、肉味又香,配埋香浓红酒牛肉汁同香草酱更可以提升味道层次。


红酒烩羊膝配自家制烧烤汁配黑松露薯蓉

厨师利用红酒、杂菜同香草,以慢火将嚟自纽西兰嘅羊膝烩大约三粒钟,直至肉质变得软嫩後,就再将烩羊膝嘅肉汁慢火煮至浓缩,混合埋自家制嘅甜酸烧烤汁,搽返上羊膝度,最後放入焗炉烧香。食落啖啖羶香,系惹味嘅。


盐味焦糖汁烧猪腩肉配青苹果沙律

肉食兽嘅选择仲有猪肉,猪腩肉嚟自荷兰,厨师以蒜片、百里香、红椒粉同橄榄油腌制,再以焗炉80度低火煮12个钟,最後用平底锅慢火将猪皮烘脆,淋上盐味焦糖汁。所以外皮香甜脆口,肉质仍然可以保持嫩滑。餐厅特意以青苹果沙律做配菜,减低猪腩嘅油腻感,有心思呢。


三文鱼他他配香草乳酪汁

厨师以刺身级嘅挪威三文鱼同烟燻三文鱼做主调,将乳酪、乾葱同刁草加入,调成他他酱。面头只温泉蛋绝对系画龙点睛之作,配埋烘得香脆嘅多士,整体感觉清新爽脆,系开胃前菜啊。


慢煮三文鱼配香草乳酪汁伴小麦米

另一道三文鱼嘅菜式,同样都系选用刺身级嘅挪威三文鱼柳,涂上香草同乳酪,以70 度慢火烹煮,利用火枪轻轻烧一烧三文鱼柳嘅表面,鱼油即刻出晒嚟,香味倍增,系加分位啊。配搭开胃嘅中东米沙律,感觉健康。


心动不如行动!有兴趣就快啲约埋三五知己去叹下美食!快啲bookmark定啦!


*以上图片只供参考,所有食品以实物为准. 食品供应因餐厅而异


关键字
大厨招牌菜
西式
西餐
尖沙咀
铜锣湾
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
本月热门
【随时更新】零食速报 每周新款零食、酒品点评
6天前
【2021生日优惠】持续更新!7月寿星半价叹和牛烧肉套餐
2021-07-09
榴槤Buffet真的很兴奋~ 九龙区酒店7、8月限定榴槤盛宴
2021-06-30
尖沙咀新开烧肉Omakase 专人烧日本A5和牛+特级宝盒钻石肉
2021-06-28
投奔盛夏 7-8月份下午茶推介
2021-07-08