聞名元朗嘅車仔麵舖，最近跨區去到尖沙咀開分店呀，開飯仔都即刻走咗去試一試，即刻同大家打返份報告先：

湯底繼續都係濃底。而根據元朗店嘅經驗，佢哋嘅辣，即使係微辣或者少辣，即使落完個湯底隻色都唔係好大變化，但已經係等於人哋嘅五小辣三小辣咁款，嚟到尖咀，辣度依舊，慢慢喺喉嚨度滲出。

車仔麵配料有好多款，分咗經典類素菜類同小食類，其中豬腸、豬皮、蘿蔔基本上係食車仔麵必食嘅配料！豬皮同蘿蔔索晒湯底啲汁，好鬼入味。

豬腸都洗得幾乾淨，腍身，用鹵汁調製過。魷魚就都幾爽口。

至於唔係太多車仔麵舖有嘅流心蛋，流心效果都有嘅，唔算好強，未必可以滿足到流心控，同埋冇乜味，同車仔麵嘅感覺亦都唔多襯。

嘢飲方面，菠蘿冰都幾甜下，嗯，係糖水嗰隻甜。

$37嚟講，三餸一麵嘅料係幾足下，但麵底略嫌細咗少少，如果大食嘅朋友建議要加底，至於十餸麵係仍然存在嘅，60蚊碗。新店價錢稍稍比元朗嘅貴少少，味道感覺唔爭太遠，但係環境相對闊落啲、舒服啲，不過就冇咁有風味喇。Btw，開飯仔九點後去食，就唔使排隊喇。

永年士多
地址：尖沙咀加拿分道46號地下7-8號舖

文、相：Kar