等到啦！嚟自倫敦嘅牛油果主題餐廳，即將要喺香港開業喇！作為全球首間嘅海外分店，餐廳菜式同倫敦店一樣，都係以牛油果做主打，由前菜、沙律到主菜甚至甜品，樣樣都以牛油果入饌，其餘食材亦多以健康有營嘅superfood為主，夠晒健康！

呢度嘅牛油果，主力選用秘魯或者墨西哥國內可持續種植方法栽培而成嘅品種，營養價值高，有成20種維他命、礦物質等。

咁多款菜式，以兩款特色漢堡最為吸引！綠色嘅「包」面，係去咗核嘅牛油果嚟，一款配以紅扁豆同炸蕃薯餅，另一款則配上龍蝦同芒果熱情果醬，前者嘅蕃薯甜身帶焦香，後者則啖啖酸甜。牛油果質感軟滑清新，值得一試。

而Smashed Chilli Avo則將多士換成甜薯，搽上牛油果醬，再配埋辣椒同椰子乳酪，味道清甜中又帶有微微嘅辣。

牛油果控就必須要試呢個終極牛油果多士（The Ultimate Avo Toast）喇！又牛油果蓉，又牛油果片，仲有牛油果lime jam，一個牛油果有幾款唔同texture可以一次過食晒係大滿足嘅，鍾意點樣配搭都得，加多隻黃薑水波蛋，成個擺盤仲有啲all day breakfast嘅feel咁好豐富。

鱈魚蘑菇牛油果 Risotto則喺面頭唧上一層牛油果foam，輕盈軟滑嘅口感減輕Risotto嘅膩度，必須要講嘅係，烤過嘅鱈魚超香，係全碟嘅精髓，甚至仲搶fo過牛油果科科。

記得要留quota喺度食埋甜品，同樣都係加入咗牛油果㗎！抹茶班戟加咗自家製嘅牛油果醬，綠上加綠！兼且仲可以自行選擇想配鹹定甜味嘅餡料。

而牛油果朱古力brownie亦相當有驚喜，一大塊brownie方磚中， 原來內藏牛油果肉喺中間，即使係甜，都有幾種唔同層次嘅甜啊。

各位牛油果控是咪睇到好想食呢？9月16日先至開業啊留意返，等多幾日啦。到時應該仲會有多款牛油果cocktails添呀。

Avobar
地址：尖沙咀梳士巴利道18號Victoria Dockside K11 Musea B2樓B201-4號舖

文：Kar
相、片：Tom Li