炸雞翼一向都係唔少人嘅comfort food，呢間以炸雞翼為主打嘅專門店，就更加長期得到大家嘅寵愛。不過佢哋並無因此而偷懶，反而仲好勤力咁不停研發新口味。今日起仲全線分店推出3款全新口味嘅雞翼，同埋雞翼尖添。
佢哋採用波蘭無激素嘅雞翼，無添加生長荷爾蒙、抗生素同防腐劑，肉味鮮嫩。幾款新口味中，最特別，最多人聽到就想試嘅一定係香茅黑糖珍珠瑜伽雞翼！黑糖珍珠呢家嘢，大家可以話對佢又愛又恨，耐唔耐係會心癢癢好想食，但每次食親都會有罪惡感；黑糖珍珠放喺飲品度係唔錯，但每次配搭各種食物例如pizza、火鍋湯底等都總係有種中伏嘅危機感。今次配落雞翼度又會係點呢？
開估！用得黑糖煮，味道當然會甜甜地啦，但又唔會死甜喎，因為佢哋巧妙地加埋香茅落去煮，令到甜味中仲有陣小清新嘅香。而珍珠口感偏軟糯，夾埋一齊食有多重口感，試得過喎。
夏天係會想食多啲清新酸甜嘅嘢，橙香紅酒大廚雞翼亦係咁樣誕生。醬汁參考經典法式名菜，自家調製紅酒橙醬，味道微酸，仲刻意放多幾條橙皮絲，增加口感，趁熱食係最好食架。
鍾意辣香嘅朋友應該會幾鍾意呢款新加坡明哥脆香雞翼，靈感源自新加坡炒辣蟹，將蒜頭、香茅同自家調醬汁炒香，鹹鹹地又有啲啲辣。
雞翼尖更加係佢哋第一次推出呢~ 雖然暫時就係得一款香辣避風塘蒜炒味，一兜大約有15隻，但係都夠頂癮咯。逐隻逐隻尖慢慢吮，脆卜卜嘅雞皮，沾滿香辣料，比起原本嘅避風塘雞翼更加入味，更加辣，佐酒一流！
文、相、片：Kar