春天应该系一个粉红色嘅季节,有人气甜品café就推出咗一系列嘅粉红色主题蛋糕,同埋4款全新fresh crepe,女生们好难抗拒呢。
(左) 特浓士多啤梨香蕉朱古力 $68、(右) 焦糖鸡蛋布丁 $78
4款全新fresh crepe口味包括抹茶六重奏、焦糖鸡蛋布丁、特浓士多啤梨香蕉朱古力,同埋士多啤梨Mont Blanc。全部嘅crepe饼皮都系由café自家调制嘅浆粉所制,好有诚意。
抹茶六重奏 $78
叫得抹茶六重奏,当然就系有6款唔同嘅抹茶味道同口感啦。软身嘅饼皮系抹茶味走唔甩啦,即叫即制㗎,入面卷住嘅有自家制抹茶海绵蛋糕、抹茶朱古力脆脆、抹茶软芝士忌廉同抹茶酱,顶头再洒多层抹茶粉,啖啖都系抹茶嘅浓香甘涩,但有时软身,有时硬脆,好有惊喜。
士多啤梨Mont Blanc $88
至於士多啤梨Mont Blanc嗰只,饼皮当然就系粉红色,士多啤梨味啦,内馅有士多啤梨酱、蛋白饼、白朱古力脆脆,仲有粒粒真‧士多啤梨果肉呢!面层嘅士多啤梨mont blanc软滑香甜,啖啖丰富口感。
另外仲有多款春日粉色主题蛋糕,堂食又得,买走返屋企都得。士多啤梨蒙布朗蛋糕微甜,玫瑰慕丝蛋糕外表够煞食,食落仲有阵阵玫瑰清香,特别推介樱花海绵卷同玫瑰荔枝蛋糕,前者松软带花香,後者清甜。
(左) 玫瑰慕丝蛋糕 $58、(右) 士多啤梨蒙布朗蛋糕 $78
(左) 樱花海绵卷 $68、(右) 玫瑰荔枝蛋糕 $68
文、相、片:Kar