九龙湾泰菜推泰式小食及啤酒放题 港篮球员兼老板:香港人都要加油
2020-02-25

「好多朋友都问我点解会喺呢个时候开咗一间餐厅出嚟,好多人都知道开饮食系好困难,我而家好深切咁感受到。 」本身系香港职业篮球员,三分球神射手嘅刘子礼,最近喺九龙湾开咗间泰国菜餐厅,仲推出2.5小时嘅泰式小食任食放题!

刘子礼做咗运动员接近11年,去过好多唔同地方比赛,而泰国嘢系佢好深刻好锺意嘅菜式,佢表示自己特别锺意食芒果糯米饭,喜欢质感黏黏嘅感觉。佢更试过同朋友喺短短几日trip期间夹埋食咗成23碟糯米饭!所以开咗呢间泰菜餐厅时,子礼亦希望自己嘅餐厅可以有啲有特色嘅芒果糯米饭,最後就出现咗呢个坊间少见嘅三色糯米饭,绿色系斑兰叶,紫色系蝶豆花,普通嗰个就系白糯米。三款口感同样黏糯烟韧,淋埋椰味香浓嘅椰浆味道唔错。

至於放题,每日下午茶时段,$78就可以任食两个半钟嘅小食啦,9款小食包括串烧菠萝、烧猪颈肉、香茅猪扒、香茅鸡翼、泰式炸鱼饼、炸虾饼、炸春卷、泰式凤爪沙律同埋自创泰式pizza包。全部都系由正宗泰国厨师炮制。

串烧菠萝轻轻加盐再烧,表层有微微焦香,咬落多汁,拮下一粒拮下一粒系会几想encore嘅。

炸虾饼同炸鱼饼都有浓郁嘅香茅味,中间仲酿入咗唔同嘅香料添;泰式凤爪沙律仲系无骨嘅添,方便进食,甜甜酸酸又带微辣,愈食愈开胃。

香茅鸡翼系原只连埋鸡翼尖咁上,大大只好吸睛,啱晒锺意吮骨嘅朋友。

Pizza包一个三层,中间夹住以红酒炒香过嘅猪肉、蕃茄洋葱等,再加埋热溶嘅mozzarella芝士,面包软身,食落系几香嘅,不过就几饱肚,唔食得多。

 烧猪颈肉、香茅猪扒

 炸春卷


另外,本身每位客人都会免费送支大支装嘅泰国胜狮啤酒,不过叫得呢个小食任食,鸡翼猪扒炸鱼饼咁样样都咁啱送酒,一支边够酒鬼饮吖?加$38就可以连啤酒都系无限任饮喇!

同场推介两款唔包喺任食内,但同样值得一试嘅单点小食:沾满面包糠嘅泰式炸虾多士,同埋满满牛油蒜香嘅金砖包。

由运动员跳进饮食业,子礼不讳言自己系新手,仲要遇上疫症肆虐,佢当然都担心餐厅嘅生意,但佢依然抱有乐观嘅态度:「始终未来系冇人会知,我觉得大家都要支持落去,可能秉承返我运动员,我觉得好多嘢都要坚持,你唔坚持好多嘢你都唔知结果会系点,希望呢度会愈做愈好,甚至系香港会愈嚟愈好。香港人都要加油!」

泰式小食X泰国啤酒放题
供应时间:每日下午14:30 - 17:15


泰传奇   
地址:九龙湾展贸径1号E-Max 国际展贸中心2楼21-23号舖


文:Kar
相、片:Tom Li


关键字
九龙湾
泰国菜
小食
任食
放题
啤酒
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
4天前
全城抗炎!送上门懒人煮食包及套餐大合集2.0 花胶炖汤/火锅/铁板烧
2020-10-07
牛大人火锅姊妹店!旺角新开台式烧肉吃到饱 任食澳洲 M5 和牛、SRF极黑牛霜降牛肉眼
2020-10-19
【即睇10月生日】酒店半价放题 Tiffany & Co.旗舰店导赏
2020-10-06
高级意大利菜餐厅尖沙咀重开 拥无敌海景 即席炮制经典芝士黑松露意粉+抵食3道菜午餐
2020-10-12