间间西餐都系锯扒、间间中菜点心都系虾饺烧卖？又唔一定嘅，有啲餐厅会喺传统菜式中加入自家创作，进行变奏，甚至系尝试你完全冇谂过嘅配搭口味，撞下撞下又work out到啲惊喜出嚟。

Flames （黄埔）　

随住铁路嘅发展，而家愈嚟愈多人入黄埔搵食。呢个喺九龙区嚟讲相对安静嘅小区，暗藏咗多间美食餐店。呢间西餐厅以黑白灰为主色调，简约装修适合朋友聚会，坐低就有种轻松自在嘅感觉。餐厅主打炭烧鸡，更有多款自家制甜品。

葡式香辣春鸡

深受客人欢迎嘅葡式香辣春鸡，鸡皮烧至脆卜卜，入口鸡肉依然嫩滑，加埋自家制嘅Peri Peri葡式辣酱，层次自然更丰富。外脆内嫩系有原因嘅，师傅特意选用900克嘅春鸡制作，大细刚好系最易令腌料入味嘅size。单系腌肉，已经用上红椒粉、辣椒粉、姜、蒜、柠檬汁同新鲜蕃茄蓉等多种食材，腌制24个钟後再以慢火蒸焗至半熟，最後以大火烧脆鸡皮，知佢咩料啦！

蟹肉巴马臣芝士脆脆蕃茄忌廉汁通粉

芝士控必叫嘅蟹肉巴马臣芝士脆脆蕃茄忌廉汁通粉，芝士咸香中渗出啖啖蟹肉鲜甜。师傅解释选用通粉系因为通粉容易包住酱汁，而且将蟹肉、洋葱、蒜蓉香草同蕃茄忌廉汁一齐烹调，可以令蟹肉同蕃茄忌廉汁融为一体，口感够晒rich。

烧香脆乳猪配西班牙饭西兰花苗

同样都系腌制24个钟嘅烧香脆乳猪，以慢火蒸熟後再以猛火烧脆猪皮，配埋番茄、百里香，同埋上汤煮嘅西班牙饭，份量十足，而且重系原只上枱，食得到油脂香亦完全保留到肉汁，肉质亦相当嫩滑，油香重渗埋落啲饭度𠻹。

CAKE SHAKE

既系饮品又系甜品嘅Cake Shake，系餐厅嘅重点推介，将自家制嘅蛋糕变成奶昔，大大杯，插满各式各样嘅朱古力饼同零食，重有大量棉花糖铺面，完全系愈邪恶愈兴奋嘅朋友，打卡一流。

点心到 MIX·大排档 （旺角） 

室内有冷气嘅大排档，唔止有打冷、小炒嘅菜式，重有即叫即蒸嘅点心，部分更系自创嘅𠻹。菜式制作颇有新意，系有别於传统嘅广东菜餐厅。老板同师傅都系由澳洲回流，集合同吸收西式嘅烹调技巧，融入中菜，的确带出唔少惊喜。

秋葵野菌扒豆腐

几乎每枱都会点嘅秋葵野菌扒豆腐，制作上都要唔少功夫。下层系将鸡蛋加入豆浆蒸熟，静待凝固；上层淡绿色嘅则以菠菜打蓉，再加落豆浆度蒸完再炸而成。豆腐外脆内滑，配埋野菌同秋葵酱汁，味道几有惊喜。

英式芥末牛柳粒

呢道菜式嘅灵感嚟自师傅以前喺澳洲生活嘅经验，英式芥末牛柳粒亦系选取澳洲牛脊条制作，肉质腍啲滑啲，配搭自家调制嘅芥末汁，微辣中带微甜，送饭一流。

避风塘濑尿虾

师傅特别选用班马濑尿虾，因为肉够多，而且好多时都会有膏。而蒜绝对系避风塘菜式嘅重点，呢度嘅蒜蓉每日都会新鲜炸起，吹乾备用，每碟都会加入劲量嘅蒜。濑尿虾肉新鲜爽弹，蒜香咸辣兼备。好啱配啤酒。

炭烧山楂鸭丝包

小炒以外，呢度亦有多款自创点心供应。好似炭烧山楂鸭丝包，外层加入竹炭粉制作，内馅有山楂同烟燻鸭丝，阵阵烟燻香味过後，就渗出丝丝山楂酸香，层次多变。师傅更解释呢个咁创新嘅配搭，系因为考虑到包点通常易食滞，所以就加入山楂帮手开胃啦。

榴槤雪媚娘

榴槤迷千祈唔好错过呢个甜品，个名好优雅嘅榴槤雪媚娘，其实即系榴槤糯米糍。选用泰国D24榴槤蓉制作，外皮薄身烟韧，内馅口感creamy，接近入口即溶，榴槤香味重有悠长嘅余韵呢~ 

心动不如行动！有兴趣就快啲约埋三五知己去叹下美食！快啲bookmark定啦！

*以上图片只供参考，所有食品以实物为准. 食品供应因餐厅而异