中环高质人气酒吧回归 5款夏日清甜蜂蜜酒/鸡尾酒推介
2021-06-18

无论你系咪啤酒迷,中环呢间中西fusion酒吧餐厅都值得去朝个圣,因为佢哋无论酒水定食物,都充满特色同创意,配搭坊间少见。最近更联乘本地酒厂推出几款最啱夏天饮嘅清甜蜂蜜酒。

餐厅之前开喺卑利街时已经好旺人气,而家搬咗大舖重开,人气有增无减。新店保留旧日香港嘅装潢主题、打卡位「鬼佬凉茶」霓虹灯等。饮酒前先填填肚,特别推介法式焦糖女儿红狮头鹅肝炖蛋配牛油多士,卖相同一般焦糖炖蛋无异,系侧边配多咗几片薄脆同多士。焦糖脆片底下,系软滑嘅鹅肝酱,满口浓郁油脂香,仲渗有少少酒香,配多士食当然perfect池,但就咁空口食亦无不可。

「酒肉朋友」们可以点选煎封软嫩美国顶级甘香牛臀西冷配慢烤日本椰菜及川味香辣淡忌廉汁。一片片粉嫩色嘅西冷口感软腍兼有弹性,肉味重。汁底微微香辣带甜,就连侧边嘅菇菌同椰菜点咗汁後都特别入味。

一场嚟到,当然要饮酒。蜂蜜酒(mead)如何?有说蜂蜜酒系世界上最古老嘅酒之一,系古代皇室贵族嘅饮品,亦系中古欧洲新人结婚後,蜜月期间会饮嘅酒。不过因为蜂蜜酒制作过程复杂,需时又长,香港亦唔多酒厂会将佢放做常设酒款。难得最近有本地酒厂使用香港原料酿造咗几款蜂蜜酒,一於要试试。

城酿嘅啤酒花龙眼蜜蜂蜜酒「蜜月」,以冷泡方法将啤酒花融入本地蜂农嘅龙眼蜜酿制,比一般嘅啤酒少咗一份甘涩,但带有清新气息,同时多咗蜜糖嘅香甜,饮落非常舒服。即使平时唔多饮酒,或者怕啤酒苦嘅朋友仔,都绝对可以一试。

另有两款全新口味嘅夏日限定蜂蜜酒,一款系加入苦瓜,同冲绳县独有嘅冲绳香檬制作嘅冲绳香檬苦瓜蜂蜜酒「蜜月冲绳」,一款系同餐厅何兰正合酿嘅西洋菜蜂蜜酒「菜蜜」。前者喺阵阵蜜甜中,隐隐渗有酸涩甘苦;後者酿制时加入本地百花蜂蜜、西洋菜同蜜枣,好似完美还原咗喺茶记饮嘅菜蜜味道,非常甜香。

除咗蜂蜜啤酒外,大家亦可试试加入蜂蜜酒调制嘅蜂蜜鸡尾酒。由本地酒厂无名氏嘅毡酒同城酿蜂蜜酒做基底,分别调出感觉清新嘅Gin & Mead,同埋清甜得嚟又有啲微辣嘅姜柠蜜。

何兰正
地址: 中环云咸街29号东方有色大厦2楼


文、相、片:Kar

关键字
中环
酒吧
精酿啤酒
饮食潮流
开饭仔为大家发掘香港这个美食之都的最新美食资讯,分享饮食潮流文化。
餐厅资料
本月热门
【2021生日优惠】持续更新!10月寿星半价叹自助晚餐/免费放题
2021-09-30
【随时更新】零食速报 每周新款零食、酒品点评
2021-10-15
4间大闸蟹食店集合!米芝莲食府大闸蟹宴+最平$368任食大闸蟹
2021-10-06
9月份好评餐厅十强
2021-10-08
初秋甜蜜蜜!10月份下午茶提案
2021-10-07