两星期限定!尖东酒店任食正宗泰国皇室菜
2018-04-09

尖沙咀呢间酒店嘅自助餐一向受欢迎,尤其是固定嘅榴槤甜品区,吸引一众榴槤迷长期帮衬。由4月12日起,餐厅限时推出泰式皇室主题菜式,当中部分菜式更深得泰国皇室喜爱。

有别於一般嘅泰菜,今次餐厅推出嘅泰菜系正宗泰国皇室料理及泰北菜,好架势!而负责烹调菜式嘅厨师Jack Pinkkang掌厨超过20年,曾经喺2013-2015年期间被获选为泰国驻港总领事馆及已故泰皇嘅大女儿乌汶叻公主嘅御用厨师。

首先介绍乌汶叻公主非常热爱嘅杂菜海鲜脆杯,入面有海鲜、鸡肉、粟米、萝卜等配料,加埋外层脆杯,层次好丰富,通常乌汶叻公主睇戏、睇表演时特别喜爱食呢款小食,一口bite-size,方便进食又唔会麻烦。

除咗杂菜海鲜脆杯,乌汶叻公主亦喜爱呢款泰式宫廷甜品──红宝石,斋睇卖相红宝石似乎几烟烟韧韧,但食落却好爽口,原来系以红色糯米皮包裹马蹄,难得口感咁清爽,再加埋海底椰、大树菠萝、椰奶、斑兰、茉莉叶去煮成。

香脆蟹肉蛋包睇落好靓,外层以网蛋包着,内馅有蟹、鸡、芫荽、蒜蓉、胡椒粉、洋葱及自家磨花生。厨师将蛋浆放入唧袋,然後喺滚油上面唧入蛋浆,令蛋浆快速受热而变成网蛋,呢个工序非常考厨师掌握嘅速度、力度。

泰式味浓嘅传统酸辣椰汁鸡汤,入面有鸡肉、蘑菇、香料及其他配料,有少许冬荫功嘅酸辣之余,香茅味亦香。

配料多多嘅泰式浸石斑鱼,厨师先将石斑鱼炸起,再以酸咖喱汤、泰国白花、酸子等一同煮滚。汤汁分量比一般煮鱼为多,师傅建议可跟泰国当地人食法,一边食鱼,一边饮埋啲汁当汤水饮。石斑鱼肉鲜甜亦几吸汤,仲带点微酸,食落几开胃。

估唔到呢款清迈香肠亦有惊喜,香肠以猪肉、肉碎、泰国辣椒、辣姜、香茅、辣椒粉及柠檬叶做成。本来以为味道好似冬荫功咁酸酸辣辣,点知味道都几辛辣,但未至於辣得眼泪直飙,送饭一流。

大大只嘅咖喱炒蟹用咗香而不辣嘅咖喱、三色椒等一同炒香,无论系蟹钳、蟹脚都有好多蟹肉,肉质肥美又鲜甜,喜爱拆蟹嘅人一定要试。

酸子粉大虾用泰式酸豆酱炒大虾,味道酸甜,鲜味更为突出,而且虾肉够弹牙。

除咗限定泰国皇室菜式,仲有其他一向受欢迎嘅自助餐菜式,有蟹脚、龙虾钳、小龙虾、青口、虾及墨鱼仔等冰冻海鲜,品嚐最原始嘅鲜美。

餐厅内嘅寿司吧可食到三文鱼、吞拿鱼、八爪鱼等4-5款刺身及寿司。另有刺身丼,由三文鱼、八爪鱼、三文鱼籽、玉子、青瓜、蟹籽、紫菜等而组成,分量细,啱晒各位样样想试啲嘅buffet迷。

另一边,有原只吊起嘅(左)烤鸭,厨师将逐片鸭肉做成北京烤鸭;又有(右)印度菜厨房嘅两款印度烤饼。

榴槤迷必食嘅榴槤甜品区,有(左)炸榴槤,卖相好似炸响铃咁,入面有榴槤雪糕,但口感好似冰火咁突出;(右)榴槤芝士蛋糕,口感绵密,而且榴槤味好重,yummy。

不嗜榴槤嘅甜品控又唔使担心,除咗榴槤,甜品区亦有各款奶冻、cupcake、芝士蛋糕、朱古力、Movenpick雪糕等等,总有一款啱你心意嘅!


泰国皇家风味自助餐
供应期:4月12-26日
价钱:(星期一至五午餐)成人$368/位、小童$258/位;(星期一至四晚餐)成人$678/位、小童$498/位;(星期五至日晚餐)成人$708/位、小童$528/位;另设加一


The Market
地址: 尖沙咀科学馆道17号唯港荟2楼


文:Joy

关键字
自助餐
泰国
泰式皇室菜
泰国公主
期间限定
榴槤
尖沙咀
尖东
饮食潮流
开饭仔为大家发掘香港这个美食之都的最新美食资讯,分享饮食潮流文化。
餐厅资料
本月热门
【随时更新】便利店寻宝 每周新品速报
3天前
给自己一个休息时间 10-11月下午茶推介
2019-10-25
鼎王来了!味道服务媲美台湾 必食麻辣鸭血锅及员工教路秘制鼎王饭(有片)
2019-11-01
秋风起!5间大闸蟹放题食店集合
4天前
粮尾打气!5间湾仔平价饭堂推介
2019-10-24