真正飲茶嘅靈魂，其實就係嗰部冒住蒸氣嘅手推點心車！點心車一到，大家即刻舉手叫停，嗰種爭住揀點心、睇住蒸籠開蓋嗰吓散發陣陣香氣，真係夠晒人情味同懷舊feel。今次就幫大家精選幾間香港依然保留住手推點心車服務嘅老派茶樓，懷念傳統港式飲茶文化～
多款懷舊點心 海連茶樓
圖：荃灣區內少有仍然保留人手推點心車、花碼文化嘅地道選擇。環境雖然懷舊，不過都算乾淨企理，客人多但翻枱快，唔使等太耐。茶樓每日用心蒸製多款點心，款式夠晒經典，價錢亦非常實惠。點心方面推介臘味糯米包，以燒賣皮包住甜糯鹹香嘅糯米飯，創新又飽肚；雞扎材料豐富，有雞肉、豬肉、魚肚同芋頭，肉香同湯汁都超吸引；蝦餃燒賣皮薄餡靚，扎實唔散；叉燒腸質感滑溜細緻；鹹魚肉餅飯粒粒分明，梅菜香氣突出。甜品如西米布甸亦有水準，奶蛋味香濃，帶有舊日甜品嘅溫柔味道。
最有懷舊氣氛 六安居
圖：Food Mad
前身為「蓮香居」，雖然改咗名，不過茶樓保留昔日風貌，依舊係大圓檯、搭枱文化、人手推點心車，熱鬧非常。早上茶市時段人流多，但整體出品穩定，氣氛帶點舊香港情懷，仲有啲熟客同店員之間有講有笑，好有人情味。餐廳每日提供自家製點心，點心車來回樓層之間穿梭，想食咩可以直接問阿姐，或者走埋去睇吓車上有咩精選。招牌推介包括山竹牛肉、鮮竹卷吸盡豬肉肉汁，仲有鴨腳扎同柴魚花生粥等等～
近百年歷史老店 蓮香樓 
圖：呢間老字號已有接近百年歷史，係香港少數依然堅持人手推點心車仔嘅茶樓之一。木窗、水墨畫、滿場圓檯，舊式茶樓氣氛滿滿，坐低飲啖普洱、等住點心車駛過，真係有種穿越返60年代嘅感覺。店內點心款式選擇多，鮮蝦餃皮Q餡靚，蝦肉飽滿彈牙；山竹牛肉冇加馬蹄，單一牛肉香氣夠晒懷舊；咖喱魷魚用港式甜香咖喱煮成，魷魚唔韌、薯仔夠粉；炸春卷酥脆唔油膩，放凍咗都保持爽口。
古早味茶樓 中央飯店
圖：深水埗區內歷史悠久嘅舊式茶樓代表之一，店外掛上紅色霓虹招牌，滿滿六、七十年代懷舊氣息。飯店至今仍然保留人手推點心車文化，仲有唔少老香港風味點心，連蔡瀾先生都曾推薦過，絕對係老茶客心中嘅寶地。懷舊點心款式應有盡有，包括好少見到嘅鵪鶉蛋燒賣、雞扎、山竹牛肉、雞絲粉卷同乾蒸燒賣；甜點心就有沙翁、香氣濃郁嘅芝麻糕同蓮蓉焗西米布甸，香滑蛋味中混合細緻嘅蓮蓉，同焦香布甸一齊食，層次豐富，出爐即食更加加分。
傳統大酒樓 倫敦大酒樓
圖：夜嵐123
坐落鬧市之中，依然保留傳統推車點心服務，仲有現場煎炸檔口，一入去就聞到煎腸粉、芋角香氣，難怪好多街坊都話呢度係童年回憶嘅載體。餐廳實行自由搵位，場內熱鬧中有序，點心阿姐會不時推住大蒸籠車巡場，配合出面嘅點心櫃自取系統，無論係等車抑或自己攞都一樣咁有氣氛。人氣點心選擇夠晒經典，例如煎腸粉蝦米夠香、外脆內滑；芋角、芋頭糕油香鬆化；雞扎分量十足，餡料足料夠飽肚；魚翅餃、豆苗餃皮薄餡靚，傳統足本。最搶手就係椰皇燉鮮奶，基本上每枱都會叫，椰香濃郁，蛋白滑溜，甜而不膩，收尾一流。
文：Yanica
編：Cathy
