今年各位日式拉面控真系好忙啊，由年头到年尾大大话话都唔少日式拉面相继抵港。今次就到呢间自2015年起荣获东京米芝莲必比登推介、2019及2020更连续两年勇夺米芝莲一星拉面殊荣嘅「金色不如帰」进驻中环，各位拉面控又多一间要bookmark啦！

金色不如帰由主厨及创办人山本敦之先生主理，当中最出名就系佢地嘅汤底！汤底坚持自家熬制，而且绝对唔加味精，主打用新鲜大蚬熬成嘅「黄金汤头」贝汁汤，另外再配埋用100% 北海道产上乘特制小麦粉自家制成嘅拉面，吸晒咸鲜嘅汤底～

贝汁酱油拉面($128)

秘制蚬汤由每日新鲜运送嘅大蚬熬制而成，混合豚骨汤及清鱼汤，汤底咸香带鲜，而且仲要加上三款厨师自家制酱料，包括黑松露酱、牛肝菌粉及牛肝菌油，味道就更丰富喇。低温慢煮豚肉片亦腍身入味。

贝汁盐味拉面($128)

贝汁盐味拉面同酱油唔同嘅系，盐味加咗秘制嘅白松露油，食落有阵阵松露香气。除咗秘制白松露油，拉面表面仲会放上一小撮香草、牛肝菌酱及烟肉碎。

白豚骨拉面($115)

想食返经典啲嘅口味，呢个白豚骨拉面就啱晒。豚骨汤底经过最少8小时慢火熬制，汤底同时加入日本酱油及鱼介，配上炸紫洋葱粒及以秘制酱油预先腌制嘅豚肉，汤底好浓厚！

烟熏黑椒豚骨拉面($115)

呢款就以白豚骨拉面为基础，加咗自家制黑胡椒酱油、烟熏豚肉碎及脆炸牛篣条。黑胡椒酱油加入黑胡椒及多种秘制配料，制成特浓胡椒酱油，重口味人士最爱！

豚骨辛拉面($115)

而爱辣嘅开饭仔就可以试试豚骨辛拉面，加入自家制特调辛辣酱油及辣豚肉碎，自家制辣豚肉碎预先以多种辣粉，辣椒粒及韭菜混合炒制，食落宁舍开胃～

吉列芝士豚肉棒($70)

豚肉中心酿入大量芝士，再经高温炸至金黄色。口感香脆，锺意点芥末酱或沙律酱食都得～

京葱味噌豆腐

豆腐炸香後，加上大量京葱及味噌制成嘅酱汁，味道带甜，又几有新鲜感。

金色不如帰

地址: 中环港景街1号国际金融中心商场3楼3020号舖

文、相、片: Yanica