【鼠年開飯】步步「糕」昇新年新款糕點圖鑑+優惠

好快就到農曆新年喇！又係一年一度一日三餐都食糕嘅日子喇！餐餐都食糕，梗要搵多幾款口味嘅糕先冇咁悶啦~ 今年有唔少餐廳同酒店都有新款糕品呀~ 睇下有冇揀啱邊款？早啲入貨仲有優惠添呀。

薑蜜白玉丹年糕國金軒

國金軒今年新推出嘅呢款薑蜜白玉丹年糕，食落有冬薑、薑蜜嘅微辣，同時又有蜜糖嘅滋潤感，富有層次。而且加入粒粒海底椰，特別有嚼頭，兼且仲有清熱潤肺之效，新年食咁多煎炸熱氣嘢，有得中和返啦~

元貝淮山糕翠亨邨

呢款元貝淮山糕全城獨家㗎！以高纖鮮淮山、爽甜沙葛配生曬蝦米製作糕點，食落好有口感，仲唔使怕愈食愈膩添~切成方形粒炒香，加埋辣醬就好惹味啦~

Sanrio可愛年糕奇華餅家

Sanrio粉絲就開心啦，呢間餅家今年再次推出好可愛嘅Sanrio孖裝年糕禮盒，有印有Hello Kitty嘅「迷你亞嫲糖年糕」，同My Melody嘅「迷你椰汁糖年糕」，咬落夠晒煙韌！買禮盒仲附送限量版嘅Sanrio 環保袋添~講開又講，另外仲有6款糖果禮盒呢~

麻辣蘿蔔糕大師姐X 大班樓

辣椒醬、蘿蔔糕絕對係天作之合！呢兩個品牌今年攜手合作，推出麻辣蘿蔔糕！辣醬以青花椒、二荊條等多款辣椒煮成，辣度十足，再配埋川味臘腸、臘肉嘅蘿蔔糕，以辣醬帶出蘿蔔嘅鮮甜，麻辣控聽到都流晒口水喇。

健康全素糕點 Green Common

要健康過年一啲都唔難！近年好興嘅Omnipork新豬肉，呢間素食餐廳就用咗嚟製作全素糕點，好似新豬肉XO醬紅藜麥蘿蔔糕咁，除咗以新豬肉代替傳統豬肉之外，仲加入健康嘅紅藜麥，純素XO醬則以香菇、金針菇、辣椒等製成，熱量較低呢！而桃膠胎菊馬蹄糕聞落就有淡淡嘅香味，甜而不膩，仲可以滋陰養顏添~

四款全新糕點 L’hotel Group

呢個集團今年首次推出賀年糕點，而且一係唔出，一出就出成四款！分別有瑤柱臘味XO醬蘿蔔糕、五香臘味芋頭糕、如心金糖年糕及桂花燕窩馬蹄糕，特別推介女士必食嘅桂花燕窩馬蹄糕，好味之餘又有得養顏。

至尊奶黃糕聖安娜

上年大受歡迎嘅至尊奶黃糕今年再度登場，仲升咗級添~ 以椰絲代替椰奶，椰香比往年更濃郁，口感亦更軟糯。鍾意椰香嘅朋友仲可以揀埋黃金榚，椰汁甜度剛好。

米芝蓮二星糕點新同樂魚翅酒家優惠餐飲券

新年想食好啲嘅，不妨試下呢間米芝蓮二星餐廳嘅糕品吖，瑤柱臘味蘿蔔糕夠晒香口，套裝可選配多盒鮮椰汁年糕、桂花紅豆糕或者五香臘味芋頭糕。如果咩都想試啲嘅，四式錦盒就滿足到啦~ 四款齊晒。而家經OpenRice購買餐飲券仲有66折優惠添！

文：Kiko
編：Kar