巴黎铁塔从来都系浪漫嘅代表之一,去唔到巴黎,又唔想过大海睇A货,仲可以嚟尖沙咀呢间Cafe。事关佢地10月会推出呢个全新巴黎铁塔主题Tea Set,铁塔造型双层架上摆满精致茶点,啱哂放上Instagram呃Like之余,仲可以同朋友嚟个悠闲滋味嘅Tea Time。
铁塔跟返法国国旗颜色,上面再有两层花型透明架用嚟装二人分嘅茶点,一上枱唔好讲咁多,当然系要疯狂Selfie一番先啦。
茶点以法式甜品为主,最啱各位钟意甜品当正餐嘅甜姐儿。咁多精致茶点唔知点开始?店主教路上层可以「由浅入深」,即系先食黄色嘅芒果热情慕斯配芒果果酱,最後到深色嘅75%朱古力慕斯配榛子朱古力脆底。
芒果热情慕斯配芒果果酱带自然果酸,相当清新。而粉红色嘅野草莓慕士配杏仁饼乾底一样酸甜有致,士多啤梨果酱够Refreshing,有唤醒味蕾嘅作用。
75%朱古力慕斯配榛子朱古力脆底名副其实,浓浓嘅可可香味慢慢融化喺口中,脆底亦唔会过甜抢走风头。造型有少少似迷你版嘅Chocolate Dome,不过就略嫌淋面做得唔够精致。
中间可以食返件咸点黑松露芝士挞,咸甜交错无咁容易觉得腻。芝士挞嘅挞底够脆,里面嘅芝士亦够滑,淡淡奶香配合上面画龙点睛嘅黑松露相得益彰。或者亦可以先食法式柠檬挞,以柠檬嘅酸香一洗味蕾。放喺顶嘅薄荷叶令柠檬挞有少少凉同涩嘅After Taste,非常讨好。
自制泡芙配吉士酱嘅吉士酱柔滑有云呢嗱香味,可惜可能因为影相摆得太耐,泡芙皮口感变得过实,要扣分。最後野生草莓果酱配马卡龙质地非常酥软,女孩子们记得小心啲拎起。
因为成个Tea Set以法式甜品为主,所以建议配返杯咖啡。呢杯玫瑰Latte顺口得嚟,咖啡香同玫瑰香糅合更怡人,最重要嘅系有玫瑰花瓣点缀,又可以继续自拍吖嘛。
White Button Cafe & Dessert呢个巴黎铁塔Tea Set将会喺10月1号开始供应,同时摩天轮主题Tea Set亦会转为以咸点为主,例如黑松露蛋沙律、烟三文鱼多士同芝士条等。约多两个朋友一齐去,咁咪可以一次过试哂铁塔同摩天轮两个浪漫Tea Set,兼一齐呃Like罗。
随时接收最新资讯
赞好OpenRice专页!