香港人鍾意食甜品，香港嘅甜品店就愈開愈多，繼冬甩專門店、法式泡芙專門店之後，而家有全港第一間嘅churros專門店呀！



呢間餐廳將西班牙嘅傳統小食玩到出神入化，化成日式churros之外，仲有鹹嘅churros食！夠晒新鮮吧？



先講甜嘅，首推一定係永遠大愛嘅抹茶味。撒滿抹茶粉嘅churros，有兩條仲搽埋一層抹茶朱古力醬喺面，香香甜甜得嚟又唔會太膩，而且條churro好脆口，就算影相影耐咗先食都仲係好脆，咬落又有少少煙韌，同埋都幾乾爽，就算用手拎住食都唔會搞到成手油。



擺咁耐都咁脆，原來係因為所有churros都係用日本麵粉整成，每朝打好粉糰之後，到接到落單先至即叫即炸，用大豆油炸嘅，炸完仲會吹涼少少先至搽醬。

另外仲有士多啤梨、焦糖海鹽、tiramisu味等等，總係有啲貪心仔會想一次過食晒4隻味，但個胃又冇咁大喎，一碟齊晒4款味，捲到好似成粒冬甩咁嘅Churros Tapas就啱晒。



呢款藍莓churros呢，就淨係得外賣先有得食嘅。上面嗰層同樣都係藍莓朱古力醬嚟。

至於鹹食方面，就將平時食開嘅all day breakfast同熱狗嗰塊包，全部變晒做churros！熱狗有得揀原味、芝士味或者wasabi味！開飯仔就最鍾意wasabi味嘞，唔哽㗎放心。



食完churros都口渴㗎嘞，飲品嚟講，最多人揀嘅應該係呢杯邪惡到爆嘅爆谷芝士奶昔！啲popcorn記得盡快食呀，放耐咗就會腍喇，夾埋幼滑嘅cream同微酸嘅yogurt奶昔一齊食，係nice嘅。

如果想罪惡感細啲嘅，建議叫Detox Water，用鮮果浸過夜㗎，所以就咁飲啲水嘅果味都好清香。有士多啤梨加羅勒、青瓜加奇異果同藍莓加鮮橙揀，夠晒健康。

Joō de Rolls
地址： 尖沙咀彌敦道100號The ONE 4樓L408號舖



文、相、片：Kar


其他新店介紹：
旺中新店2.0 14款12吋勁長韓國窩夫、靚靚呃like手工特飲
韓風吹到嚟 浮誇鮮果沙冰店生果成座山咁高（有片）
遊日必食人氣蜜瓜包 登陸銅鑼灣開分店！




隨時接收最新資訊
讚好OpenRice專頁！