活力餐廳
位於牛頭角道10-15號嘅活力餐廳，同火場嘅位置相當接近，受住濃煙同封路嘅影響，生意額當然下跌，但係老闆仍然相當關心一眾消防員，一朝早就打電話畀員工，請佢哋要煲粥，準備麵包、三文治、炒麵、檸茶奶茶汽水等等小食同飲品送畀消防員，負責人仲話自己唔係做到好多，不過係好少嘅付出。
新記茶餐廳
平時主要都係做街坊生意嘅茶餐廳，火警發生嘅第一晚，有好多消防員入去借電話打畀屋企人，老闆娘娥姐當然好樂意借出電話啦。而因為封路等等嘅問題，佢哋喺第二日就已經開始暫停營業。不過娥姐依然堅持每日返去舖頭開舖，為嘅就係為好勞累嘅消防員預備湯飯、奶茶咖啡，仲切埋西瓜畀消防員消暑降溫。開舖嘅另一個原因，就係希望能夠為消防員提供一個小小嘅地方，可以坐低休息一下。
明輝茶餐廳
圖：Google Map寶湖金宴
火場嘅高溫，加上呢幾日咁熱嘅天氣，消防員進進出出火場其實真係好辛苦。呢間酒樓就開放廚房畀一班自發性嘅義工入去攞冰，而且係免費任攞，貨倉部嘅李先生仲出力幫手托冰，運去消防員嘅物資站。
興旺糖水美食
Photos by Aries Hang
街坊茶餐廳，火災期間梁老闆兩位千金見到消防員「挨杯麵」充飢，所以就同梁老闆提議送飯盒。由火災升級至四級火開始開始，每日不辭勞苦亦唔計成本，暫停生意，全日免費派發飯盒、生果同飲品到災場畀消防員。而且怕佢地會悶，所以貼心地準備咗唔同飯盒，例如餐蛋、豉椒排骨及茄汁魚等。
好人好事喺各大WhatsApp群組散播開去之後，唔少消防員都非常感謝梁老闆，仲大讃佢地嘅揚州炒飯出色。有熟客亦指梁老闆都係「即叫即煮」，非一般茶餐廳。
叙苑粉麵茶餐廳
Photos by mx8034
專做附近得寶花園、淘大花園街坊生意嘅港式茶餐廳，提供冰粒之外，仲係太子爺還親自送冰過去。
別府駅前料理、牛涮鍋、鴻星海鮮酒家
 |  |  |
位於九龍灣淘大商場嘅呢幾間連鎖店，亦一樣幫手將餐廳嘅冰粒免費捐出。
八福
Photos by yuchiro
同樣位於受影響嘅得寶商場嘅日本菜餐廳，雖然生意受阻，但依然立刻自發性地捐贈冰粒去災場封鎖線。
超級自助壽司店
<Photos by OpenRiceHK
呢間喺淘大附近嘅家庭式日式小店，亦係「有力出力」嘅好心人之一。佢地借出冰櫃嚟擺市民同餐廳捐贈嘅冰粒，等有需要嘅時候再由義工運送到災場。
最後，雖然唔係餐廳，但亦要多謝埋捷安冰粒、蕭邦冰粒同德保雪粒三間冰廠。有市民想自費捐出亦車80袋冰粒，捷安冰粒知道原因後決定免費送出。蕭邦冰粒就喺接到熱心市民電話查詢之後，連續兩日加班製冰，無上限供應冰粒到災場附近，司機仲親力親為幫手運冰。德保雪粒亦有免費送上冰粒。冰粒幫火災現場降溫之餘，亦令消防員有冰凍飲品，一點清涼卻感覺窩心。
喺火災期間，其實附近唔少餐廳都受到牽連需要暫停營業。但唔少餐廳唔單止無半句怨言，而且仲落手落腳，努力去幫一班偉大嘅消防員打氣。或者呢啲就係香港人嘅可愛之處，大家守望相助，喺消防員冒生命危險為市民保衛家園嘅時候，餐廳、小店同各位義工就係佢地最強大嘅後盾。衷心向所有喺呢場火災勞苦功高嘅各位致敬！
參考資料：
潘小濤Facebook，明報(1)、(2)，蘋果日報(1)、(2)、(3)，Resistance Live Media (1)、(2)
文：Kar、Cathy
隨時接收最新資訊
讚好OpenRice專頁！