爺爺雞飯 (金百利中心)

營業中

休息中

喺銅鑼灣金百利等緊朋友收工嘅時候發現有間爺爺雞飯，再上網睇吓有咩食，原來主打是新加坡、馬來西嘅嘅嘢食，好耐無食過星馬嘅菜式，就向朋友提議試吓。上到餐廳睇到裝修好精美，座位都好舒適，最重要係價錢好大眾化！食星馬菜我自己覺得最緊要係海南雞同肉骨茶，所以就點咗半隻酮學雞+肉骨茶同椒鹽豆腐。酮學雞嘅雞肉鮮甜嫰滑，配上黑醬油、酸辣醬、薑蓉一齊食好開胃。肉骨茶配料亦好豐富，三大支骨排，而且仲有個大大嘅黑蒜，藥材味香濃，飲到停唔到口！椒鹽豆腐係即炸，入口香脆。每樣都好好味，最最最重要係價錢真係好抵食！食餐飯唔使吓吓都要離開香港嘅，香港都有好多平靚正嘅嘢食！

今日同屋企人到Sogo感謝祭購物一輪，想揾間餐廳填肚同休息，醒起Sogo對面有好多野食，見呢間價錢唔錯入黎試試。圖中呢個餐係下午茶餐，先＄48味道不錯，河粉分量都多，香茅雞翼調味ok,包熱飲，我簡左泰式奶茶，都幾好飲。 屋企人叫左肉骨茶下午茶（～＄58） 原煲上，有好大隻原個蒜頭係入面，燉得好淋好入味，排骨有3-4舊，湯係適中唔係好濃藥材味既肉骨茶，都ok。餐牌最平幾下午茶好似係大碗海南雞飯＄38。仲有好多唔同茶餐可以簡。鋪頭細細座位算寬落舒適，如果係附近行想平平地食一餐可以去試下。

「無骨海南雞配馬來肉骨茶午餐 」午餐有海南雞又有肉骨茶，一次過滿足兩個願望！啱晒心多多乜都想試嘅我。雞：覺得肉有少少雪味，要加啲薑蓉比較好。雞肉整得嫩滑，就算雞胸肉部份都嫩滑。皮好肥，有油香。雞油飯：飯有雞湯味，但就食唔到咩香茅味。肉骨茶：湯有濃郁嘅藥膳味。入邊有兩大嚿肉，仲有金菇腐竹冬菇、同埋豆腐卜、材料都算豐富。排骨嘅肉質地好硬！軟骨部份都好硬。環境：★★☆☆☆ 食物： ★★★☆☆ 推介指數： ★★★☆☆

下午茶時段，大件夾抵食。見今日咁凍，好想飲個熱湯嗌咗個海南雞飯餐跟餐有一個帶少少藥膳味嘅熱湯，暖胃一流。我最鐘意食海南雞飯，對個油飯都有少少講究。呢個油飯夠乾身，而食得出油香同香茅味，加分！連配菜果三條豆都唔馬虎，不但夠爽脆，又有麻油香如果多幾條配菜就更好雞肥瘦適中，但雞胸唔夠滑，如果鐘意食滑雞我會建議加$10轉雞脾位跟餐泰式奶茶唔洗加錢仲有呢個飯係酮友友好，因為油飯可以加錢轉椰菜花飯啊生酮人又多個選擇

好嘔心 束雞毛多到放左入口好似食緊菜咁有口感 仲要收左係雞翼入面 即刻反胃 🤮🤢🤢🤮🙄我係夜晚去食的 一個人叫左個海南雞飯$76埋單 完全唔掂 😣雞肉味都正常 你食到啲毛之前都一切正常食到之後所有嘢都想嘔返晒出嚟 唔建議去 好差

從來都沒有去金百利樓上的餐廳，因為沒有朋友介紹，可能果D餐廳唔可以坐太耐，所以一直冇留意。最近約朋友去銅鑼灣食飯，朋友話試吓去這間，我哋在平日2點後去，避過午餐繁忙時間，2點後唔多客人，所以我哋坐好耐都得，由於係非繁忙時間，所以我哋二人坐四人座位，好闊落。我們點咗兩個餐share 食：無骨海南雞飯拼馬來肉骨茶（$98）因為想食海南雞又想食肉骨茶，所以這味就有齊兩個味道，海南雞好滑，雖然雞的份量少咗啲，仲有肉骨茶，好濃味，都食到好飽😋。新加坡叻沙（$62）味道不辣，我哋食唔到太辣，所以辣嘅味道對我們來說剛剛好，蝦好新鮮，其他材料都好多。餐飲叫咗凍泰式奶茶及凍檸檬茶，朋友說泰式奶茶茶味夠濃，我就飲凍檸茶，都有茶味，檸檬都有三片。

因事上星期中午時間喺銅鑼灣出沒，之前留意到有間喺金百利上樓星馬菜，仲要好似幾抵食。但見其他人嘅食評有講話有味精，有少少猶疑，仲係到諗緊去唔去之際，聽到同𨋢有人話去食海南雞，一出到街就望下佢哋行去邊嗰方向。心諗連喺呢頭返工嘅朋友都去食，未必講到咁差丫，於是乎就跟咗上去金百利。海南雞飯點餐冇幾耐個海南雞飯就到，唔知係咪睇過其他人嘅食評，覺得雞飯上到檯第一眼覺得有啲hea嘅，可能係我先入爲主咗。先食件雞睇下點。又唔差喎，雞肉滑，味道都好。雞油飯有光澤，有淡淡嘅雞味。另外嗰雞湯幾又驚喜，除左應有嘅雞味之外，仲有幾重嘅藥材味，應該係黨參嗰啲。比較少係啲跟餐雞湯到飲到。喜愛度(5分為滿分): 4海南雞飯拼肉骨茶之後上檯嘅喺雞飯拼肉骨茶，碟雞個賣相好過淨海南雞飯嗰碟。味道亦都同上面一樣正路。可能係拼肉骨茶，嗰餐係配白飯而唔係雞油飯。肉骨茶喺馬來西亞嘅口味，藥材味夠，甘中帶甜。有齊油炸鬼，豆卜嗰啲。肉排有兩件，夠淋夠入味。整體唔錯👍🏻。喜愛度(5分為滿分): 4咖央多士最後就係咖央多，嗰片牛油好厚，好邪惡😈。加埋層咖央醬，味道平衡得幾好唔會太甜。唯獨多士本身唔夠熱令到份咖央多有少少扣分。喜愛度(5分為

今日整完頭好鬼死餓，於是同一齊整頭嘅朋友經過見到呢間叫做爺爺雞飯嘅餐廳就貪得意走入去食😂兩個大餓鬼見到樣樣都想食就唔諗啦一於叫個個二人餐，貪佢乜都有唔洗諗實填得飽個肚！🐣胡麻雞絲粉皮前菜嚟講佢做到開胃嘅作用😋胡麻汁甜甜地帶起嫩滑雞絲嘅咸味，涼涼地嘅粉皮撈埋個汁𠽌一聲就溜左入口，我地三兩下手勢就清左呢碟😅🍤彈彈蝦餅呢個蝦餅外面炸到脆口，入面係打到起哂膠嘅彈牙蝦肉好有咬口，配埋泰式雞醬，係個出色嘅小食。🍞咖央多士呢間嘅多士係誠意同邪惡之作，烤到脆面嘅麵包塗左咖央醬再夾住一塊同麵包差唔多厚嘅牛油，一食落去成口都係牛油香味同埋咖央嘅甜👍🏻🐥🍚爺爺海南雞鋪頭名叫得爺爺雞飯點可以唔食佢嘅海南雞飯，雖然佢係配一個白飯，但係一啖嫩滑到皮肉都動L嘅海南雞再輪流點甜醬油、甜辣醬同埋蔥油再配口白飯，都已經夠哂豐富😋食白飯比起雞油飯又少啲罪疚感嘅😜🥣馬來肉骨茶佢呢度嘅肉骨茶用料足，味道濃郁，有冬菇支竹豆卜，仲有4舊排骨同埋一整個蒜頭，所以佢個湯真係入左口都會回甘一整餐👍🏻☕️紅棗黑糖薑茶食左啲咁重口嘅一餐嘆返杯養生薑茶清一清滯，飲完呢杯茶為成餐畫左個完美嘅句號🫶🏻

爺爺雞飯是一家位於銅鑼灣的小吃店，提供了美味的雞飯和其他傳統港式美食。我很高興能夠品嚐他們的招牌菜——爺爺雞飯。首先，讓我來談談他們的雞肉。爺爺雞飯的雞肉非常嫩滑，入口即化。每塊雞肉都經過精心烹調，保持了肉質的鮮嫩，並且不帶有任何雞皮或雞骨的雜質。雞肉的味道鮮美，搭配著他們特製的醬汁，更顯得香嫩可口。接下來是他們的飯食。爺爺雞飯的飯粒飽滿而有彈性，每一口都散發著淡淡的香氣。飯粒之間完美地分開，不會黏在一起。這讓我很驚訝，因為他們的飯食看似簡單，但卻能夠做到這樣的水準。除了雞肉和飯食，爺爺雞飯的配菜也相當出色。他們提供了豐富的蔬菜和醃製的咸菜，這些配菜豐富了整體口感，同時增加了飯食的層次感。我特別喜歡他們的青瓜片，清脆爽口。除了爺爺雞飯，他們還提供了一系列的港式小吃，例如燒賣和魚蛋湯。我試了他們的燒賣，每個燒賣都鮮嫩多汁，味道鮮美。魚蛋湯則是熱騰騰的，湯底清澈，魚蛋彈牙可口。

同朋友食lunch，見食評都OK就試下叫左肉骨茶同檳城椰香咖哩飯，配熱飲泰奶同馬來咖啡 食物份量足，味道都不過不失 。另外唯一係咖啡同普通咖啡加奶精無別，唔覺係'馬來' 咖啡 。但最大問題係食完飯隔左一陣 我地2個都成個口都好乾好口渴 知道肯定有味精。我諗都唔會再去了。

 銅鑼灣金百利多餐廳選擇, 今次就揀左間新加坡菜, 叫”爺爺雞飯”。餐廳主打海南雞飯🐓Lunch Set亦算抵食, 有d餐係有飯有麵, 滿足兩個願望, 就算兩個人share都冇問題🤩 🍗香茅豬扒煎蛋飯 $58雖然係主打海南雞飯, 但最後都係決定左食豬扒飯, 唔知呢個飯係咪越南菜, 但豬扒香茅味醃得好入味, 豬扒厚身唔柴有肉汁。煎蛋特別叫左要熟蛋🍳配上蔥油醬油一齊食好香口, 呢個配搭一流唔會出錯。伴碟仲有少少四季豆, 係有用蒜頭炒過, 唔係就咁用水煮熟, 所以都食晒😆Lunch Set有包飲品, 加左$7轉左杯紅棗黑糖薑茶☕️非常足料。 

三個女仔可以嗌二人餐，份量好多。二人餐包1份前菜/沙律，2份小食，2份主食，2杯飲料和2份甜食。我們選了胡麻雞絲粉皮，彈彈蝦餅，咖央多士，海南雞飯，沙薑雞飯，還有2份小食。選擇多，份量也多。質素四平八穩，性價比正常。可再光顧。服務態度不太理想。可改善。剛進餐廳時有3張枱共12個位是吉的，但店員不讓進，說是員工晚飯位置。可是一直都見不到員工在坐，而且有可能會有12個員工會同時在晚餐時間一起放飯嗎？一直在外呆等了很耐，店員才讓我們進來坐那張一直都丟空的位置上。

我地已經幫襯咗第四次嘅外賣，最鐘意食佢地個「爺爺無骨海南雞」再加一碗「雞油香飯」，次次個食物質素都keep得好好👍🏻，啲豉油同酸汁都調較得好好味！！我地次次都叫一隻海南雞，個雞都好大份，好滑，好冧。🥰🥰全屋企人都幾鐘意食☺️，次次買翻黎都好快清囇啲嘢食，食得好開心，哈哈哈😄🫶🏻。我地今次都有再嗌多個「新加坡叻沙」同「雞湯菜苗」，兩樣都唔錯架，下次會再黎幫襯，可能下次再試下其他嘅小食先！！😼

原先見到呢度有咁多好評就一於試下既心態呢間店係食新加坡馬來菜佢餐牌上有單點菜，二人餐同四人餐，但先提提大家，二人餐同四人餐只有前菜主菜同甜品，而係唔包飯的我地叫左幾樣野，先講海南雞飯，雞皮厚，肉un兼薄,一d都唔滑，反而側邊幾粒蒜蓉豆角幾好食，以為叫做爺爺雞飯，雞飯係招牌菜就好食之後喇沙一樣咁失望，我唔食油麵，所以叫米粉，只講個湯底，淡味，完沙嗲牛肉雞肉串，個汁幾好食，但d串燒係烚既，濕既蝦餅就正正常常最差真係飲品，斑斕咖啡完全冇咖啡果，好想知點可以整到有色但冇味斑斕冰就有好淡淡既斑斕味加上呢度有個服務員既態度令我唔會再返黎食，以後都係睇清楚食評先揀餐飯

突然放工想去CWB, 見到金百利中心有間“爺爺雞飯“，都好耐冇食星加玻菜，就試吓啦！本身無乜期望嘅，睇睇menu有個二人餐，幾抵喎，$298，有一個前菜沙律，兩個小食，兩個主菜，兩杯飲品，兩個甜品喎！主食叫咗海南雞和肉骨菜，有驚喜喎！小食叫咗話梅巴樂和咖吔多士，都整得好好味！最後嘅甜品係椰汁班蘭糕和芝麻料，原來係熱㗎，我最愛呢！樣樣嘢嘅份量都好足，唯獨係個餐唔跟飯，要另叫，不過叫一個飯都夠哂，因為其他食物實在好足料！真係喜出望外呢～