sune619的個人專頁

相信港人對兆萬「劣食之塔」的暱稱都不陌生，兆萬樓上各層各戶不乏的都是放題餐廳，因為質素參差，自出社會工作後也甚少到兆萬覓食。早些日子，從朋友口中得知原來有些餐廳已經轉手，食物水準及餐廳經營大有改善。上周便膽粗粗地跟朋友相約到兆萬老店舖「神戶屋」一試究竟。剛到餐廳能見到餐廳格局與早年大抵相同，牆壁及卡位後貼有充滿日本風味的風景海報，墨綠色的皮椅，整體環境說不上非常雅致，但大致舒適乾淨。剛入座職員便熱情地招待，向我們介紹入座時間及價錢各項。放題包括職人料理一份，我與朋友選擇了日式和牛壽喜燒，其餘還有雞煲及海鮮蒸鍋等。日式和牛壽喜燒的味道不過不失，火鍋肥牛片與其他火鍋菜帶點壽喜燒醬油味湯底，味道咸香易入口，推薦喜歡壽喜燒火鍋的人一試。隨即上菜的是餐廳按人數準備的刺身拼盤，賣相令人喜出望外，擺盤尤其精緻，以乾冰襯托，突出刺身的鮮艷色澤。刺身種類多，其中以三文魚及鮮蝦最為新鮮，三文魚帶點油脂，入口鮮味十足，性價比高👍🏻！其他刺身則表現平穩，水準平均一致。另外我們也點了生蠔、長腳蟹及鮑魚拼盤。值得讚賞的是，「神戶屋」的食物種類的確很多，竟然連生蠔及鮑魚等均有提供，能滿足客人想多吃不同種類的需求。生蠔海水味略重，鮮味不太突出，欣賞處理過後腥味不重，口感滑，能滿足想吃生蠔的慾望！而鮑魚及長腳蟹沒有多餘的調味，反而襯托出原本海鮮的鮮香，完全沒有雪藏味，絕對值得一試！除了刺身外，相信炸物亦是一大重點。比起數年前多了許多炸物款，淨是韓式炸雞已經有三款不同口味，其中包括甜辣口味、芝士味及蜜糖芥末味。個人最喜歡甜辣味，竟然與出面韓國餐廳分不出高下，甜味適中，適合喜歡韓國炸雞的你！另外，炸鮮奶及炸天婦羅亦非常惹味，炸粉恰到好處，口感脆薄，不是翻炸亦沒有油饐味，值得讚賞！來到重點推薦！原來廚房廚師曾經是中餐大廚，有幸與職員寒暄幾句後，廚師大展身手，炒了幾道中菜，當中包括三色椒甜酸醬炸青口，黃金流沙炒蟹以及蒸大閘蟹。每一款菜都媲美街外的中菜館，可以見到每一款海鮮都極為新鮮，烹調的過程絕不馬虎，並不因為是放題任食敷衍了事，當中以三色椒甜酸醬青口最為優秀，連不喜歡吃海鮮的朋友都讚不絕口！除了上述的重點推介外，另外亦散叫了各樣小食，鰻魚串及豉椒炒牛柳粒等等，食物品質全部都在期望以上，大力推薦大家可以按自己喜歡的口味隨意點選！拍心口保證「劣食之塔」已經名存實亡⋯起碼「神戶屋」值得以賦予優秀餐廳之名銜！…查看更多

去開觀塘搵有咩食，喺社交平台見到有foodie介紹呢間米線就去食，先講總結：味道冇特別，俾人趕走先係令我要留低呢篇食評嘅原因。睇返電話相簿18:02仲喺apm log on睇緊嘢，睇完就慢慢行去呢間食嘢，坐低時舖頭仲未坐滿，未有人排隊。簡單講吓我哋叫咗咩，麻藥蛋、招牌花膠雞米線、胡椒豬肚雞米線，1杯熱檸水同1杯柚子蜜。18:30碟麻藥蛋到，嚟到望到個色已經覺得同我認知嘅麻藥蛋有啲出入，食落覺得係…一般溏心蛋，唔鹹，冇乜味。持平講句係有d溏心。然後我睇返story係18:35影到2碗米線到，手花膠雞米線加咗錢轉雞髀，係幾滑嘅，但普遍嚟講，所有嘢都係冇特別，雞湯冇特別好味，雞就可以喇，花膠都叫ok la～米線質地偏硬，個人覺得可以淋少少。胡椒豬肚雞米線，個湯嘅胡椒味超濃，濃到我有少少頂唔順，不過我覺得呢個係口味問題，有啲人好鍾意嘅話係ok嘅。食完其實我哋都有共識，冇特別，唔難食，但應該唔會encore。好喇，食完諗住飲埋杯嘢，但未飲完個女職員已經同我哋講：「你哋張枱俾咗人㗎喇」叫我哋快啲走😊真心大開眼界，若佢係好聲好氣話：「出面有好多人等緊，介唔介意埋埋張單？」我哋都好樂意～但唔係，佢係話「你張枱已經俾咗人」咁我唯有一下飲埋杯嘢再埋單走人。睇返電話，被趕走後出去影咗張相，都係19:04 🙂有人排隊等，你想快啲做多幾轉生意，我都唔介意，重點係，我諗我由入座要走前後連1個鐘都冇，唔係霸住你張枱，仲要趕我走，等緊嘅就係客，食完就唔係客？…查看更多

早幾日同朋友去咗呢間喺黃埔嘅韓國餐廳食嘢，首先地點好方便，黃埔站A出口一出就望到～👍🏻見佢寫住lunch 八折優惠，近來真係好多餐廳都難捱～～btw 食過先知佢值唔值得再嚟！呢間韓國餐廳除咗有一般嘅韓國嘢食，仲會有韓燒～我同朋友基本上都毫無懸念揀咗Set C！因為貪佢咩都有～咁就咩都可以試吓😋😋同大部分韓國餐廳一樣，先會上啲前菜以前冇特別鍾意食醃蘿蔔，但呢間幾好味，忍唔住一夾再夾～～我哋食比較早嘅時間，最初冇咩人，老闆娘仲同我哋傾咗陣偈，非常Nice～又好緊張我哋鍾唔鍾意啲食物等～～唔知點解好加分，覺得好親切☺️我哋嘅Set C 上菜了～～望到覺得好豐富😋有牛有豬仲有啲配菜～個人覺得最特別係有2嚿芝士俾你包肉食，同埋仲有雪耳！！真心第一次燒雪耳😆口感脆脆哋幾特別～～侍應好好，俾多隻碟我哋，話如果食唔切，可以先放啲肉喺碟再慢慢燒～ 咁我哋都將一半嘅肉先放碟再慢慢燒慢慢食特別一讚嘅個牛肋骨，超入味同腍～ 好好味🥹🥹真心想encore!!! 其他肉都好味～不過有1、2片隨住個板越來越熱，可能會有少少燒得over咗，呢個就關自己事～ 但普遍唔同嘅肉都係正！我哋另仲叫咗啲嘢食，不過朋友講我先知，有個意外收穫，原來10月內經IG book枱可以用優惠價加錢有醬油蟹😋😋😋實不相暪，之前去韓國都冇食過醬油蟹，香港更少機會食，所以呢次係我第一次食～ 真係有驚艷到我，啲膏超多，要食返啖飯中和一下～～ 但成隻蟹肉質都好鮮，多肉，唔會得個殼！喂～原來食醬油蟹係咁嘅！下次再食過先得～～蟹蓋除咗有蟹膏仲有蛋黃，撈埋飯食超想加飯😂omg 突然發覺平時唔特別鍾意食蟹，係我未食到好食嘅蟹🤪 （同埋見唔見到啲膏先！）喺咩都想試嘅情況吓，叫咗個海鮮煎餅同牛肉炒粉絲，煎餅好厚實、足料，雖然唔平，但同朋友一致認同對得住個價錢～牛肉炒粉絲都爽口！最緊要係……當食唔晒打包，第二日食嘅時候都覺得仲係好好味😋總結：值得encore~ 希望佢可以做落去喇👍🏻…查看更多

近來想食少啲精製澱粉，所以食串燒都係個幾好嘅選擇，喺太和呢間既係餐廳，又係酒吧～食物超多選擇！一張串燒紙係超密密麻麻，咩都有得食😋😋首先每枱都有杯花生奉上，幾開心，飲嘢至正，同埋我哋對住電視位，睇波係一流！然後揀咗一輪，我哋想咩都試啲，首先喺另外個menu點咗碟生蝦刺身，都有啲試吓先嘅感覺，但覺得都幾唔錯👍🏻個汁有少少辣～黑松露薯條有啲驚喜，無諗住個面有咁多黑松露，再有黑松露醬點嚟食！黑松露愛好者必點！雙重享受🤤🤤🤤（唔好意思，仲有茄汁㗎，但俾我ignore咗🤪）串燒叫咗A5極品和牛串、鹽燒牛舌芯、炭燒豬頸肉、雞肉軟骨棒、原條茄子燒、韭菜燒、蒲燒鰻魚串、燒羊架、孜然燒羊腩～雖然和牛串要過百，但都要講真心值得食！！入口即溶好正🥹🥹🥹串燒大部分都中上質素，無嘢係唔好味，同埋唔會燒到鞋同韌～～另外，雞肉軟骨棒配咗生雞蛋、羊架配薄荷醬點，感覺好細心！！再者，有韭菜燒食真係好開心，有時有啲串燒店都唔一定有，而我其實幾鍾意，推介必點！飲品叫咗杯手工啤 - IPA同Cider，味道幾易入口，Apple Cider唔會有陣死甜味，有陣甜味得嚟幾fresh ～男朋友揸咗車就無飲酒精飲品（呀！呢度對出就有咪錶位泊車，好方便👍🏻），蜂蜜生薑梳打同薄荷梳打都幾好，仲好大杯😆👍🏻CP值超高！！…查看更多

間中都會去大埔四圍搵吓嘢食，呢間小店喺一條較靜嘅內街，我諗唔係本區人都未必識去，但印象中佢喺大埔都有啲名氣。我同男朋友係其中一日平日夜晚去食，到達餐廳時只係6點幾，但樓下已經坐滿，所以侍應安排我哋坐樓上，而我哋食緊嗰陣都陸續有人坐埋上去，走時落到樓下仍然有唔少客人。👍🏻Dinner set都好多選擇，所以我哋都無懸念地淨係睇set menu，簡單而言都係前菜+主菜+飲品，額外可以加小食同甜品。前菜煙三文魚凱撒沙律：細細個已經有3塊煙三文魚，唔係hea你就咁俾1塊就算，醬汁唔算好多，係健康嘅感覺👍🏻而啲沙律菜都無好苦嘅味道～鮮打法式龍蝦湯：呢個要加$18先有，但我哋見好似好勁咁，當然就要試吓喇！飲落好濃，仲有啲龍蝦肉😋😋但份量同比例調得幾好，唔會太膩。主菜香城和牛漢堡薯條：和牛有得揀幾成熟，我哋揀5成，食落好juicy，最緊要係組裝得好好，我哋切開share都唔會散晒👍🏻好難得！薯條要特別讚吓，好脆口同埋落咗啲香料好惹味，忍唔住係咁食完再食🤤🤤63度溫泉蛋伊比利亞火腿卡邦尼意粉：見到有溫泉蛋通常都覺得係有忌廉嘅卡邦尼，但呢碟意粉又唔覺有忌廉味，而係有好濃嘅蛋香味😋特別一提係意粉質感好正，比一般意粉粗，但都係因為咁，感覺比較易掛汁；而呢個意粉蛋香味都較重。小食
額外叫咗個蜂蜜柚子雞翼，一碟有六隻，甜度同酸度都適中😋😋飲品水果乾洛神花花茶：酸酸哋幾好味皇胎菊花茶：飲完自己嗰杯，再飲呢杯就特別覺呢杯好清，唔甜，可以清清喉嚨。特別一提成壺嘅份量都唔少，而且有得坐熱，所以個人幾喜歡，感覺好養生😌總結：再來大埔都可以encore呢間，真係唔錯嘅Cafe～…查看更多

由於男朋友鍾意食牛（其實我都ok嘅）😆🤣，所以間中都會搵啲食牛嘅餐廳，呢間印象中好耐以前食過覺得ok所以去開荃灣就食呢間！呢間餐廳主打食石燒牛，揀咗唔同部分同Gram數，佢會燒咗大約一成上碟畀你，由你自己決定燒到幾熟再食，好處係有得自己控制，唔好就係自己燒得唔好都只能怪自己。🤣基本有6個部位可選：平鐵牛扒、上腰西冷、牛側腹扒、橫隔膜腹肉（封門柳）、腹心肉、小牛柳。封門柳係best seller，另外我對牛側腹扒都有興趣，因為脂肪較多同時肉味都重。如果唔想食太肥，腹心肉就相對無咁多脂肪而肉味都好濃。原來想食牛側腹扒，但當日有特別嘅貨返：和牛封門柳，所以我哋就揀咗呢個嘅200g！！😎（每款牛都有3種重量可揀！）可以加幾十蚊變套餐，喺 沙律 / 湯 / 飯 / 薯條 / 汽水 5樣揀3樣，我哋揀咗沙律、薯條、汽水。先講配菜，沙律雖小但有菜有麵包粒，而且唔算好多醬，唔會太肥，畢竟牛脂肪相對高嘅牛，都會偏膩；薯條好脆，非常欣賞；汽水係罐裝，我哋揀咗Zero，感覺罪惡感低啲🤭如果怕啲油煙彈到件衫，仲可以著上餐廳供應嘅圍裙，我哋嗰日都著淺色衫，所以都著咗隔一隔！好！來重點！和牛封門柳上碟時，已經係豐富嘅炸炸聲🤤侍應好好咁幫我哋移開埋張紙，而且佢哋會另外上一隻碟畀我哋擺牛，呢個動作十分重要！因為之前喺其他地方食過，大部分都無畀呢隻碟，喺咁熱嘅石板上面，牛容易煮過咗龍～（尤其是我哋比較鍾意食5成熟，超容易煮過龍！）味道：脂肪夠，肉味重，而且唔會太韌，真心覺得好正🤩🤩值得一食！唔知貨源仲有幾多，大家去到時有啲話記得點呢個，值呀！另外我哋叫咗個和牛帶子丼，由於海鮮丼已經本身有飯，而且跟前菜、沙律、湯，所以我哋牛嘅套餐就無叫湯～今次係南瓜湯，都幾濃同熱辣辣，不錯！個丼就一半帶子一半牛，帶子鮮甜，和牛每塊唔算好大塊，但叫做每件都係入口好快溶嘅口感，唔算好膩，配合返海鮮丼就幾夾！個人覺得女仔食呢個就好夠，男仔淨食呢個set可能只係7成飽。如果好似我哋2個人share，叫一個丼同一個石燒牛都係幾唔錯嘅選擇！最後，由於為食同想試多啲嘢嘅緣故，我哋又叫咗2串串燒：鹽燒白鱔串同羊西冷串。本身男朋友都有concern白鱔未必間間燒得好，但來到時都無失望，皮燒得好脆，魚質唔會太韌；羊西冷都唔錯，不過個人口味接受到再羶啲！另外，留意到佢哋可以單買啲牛返去自己煎，大家自己睇吓價錢，其實都唔算貴，我哋都話自己買塊返去煎都好😋！埋單時仲送coupon畀我哋下次用，即係吸引我哋再去😆😆…查看更多

間中就想同男朋友食好啲，又唔想食來食去嗰幾間/大集團，所以都幾鍾意周圍發掘下新嘢。厚福街不嬲都多嘢食，但之前經常都係食地舖啲餐廳，上次嚟過呢棟食嘢就發現全棟都各有唔同餐廳，而家每一層係一間餐廳，所以撳lift時已經知自己去邊間，唔會去錯～今次就食下呢間有五星級大廚坐陣嘅西餐廳，見佢餐牌都幾吸引🤤好期待！除咗恆常Menu之外仲有個廚師推介，2個人左揀右揀，最終揀咗2個main course同1個小食😋但講嘢食前講下環境，餐廳偏向有情調，所以燈光唔算光猛嗰種，情侶來食都幾有feel㗎👍🏻每枱都有呢個燈，可以調較你鍾意嘅色溫，而12月餐廳都有啲聖誕佈置，簡單而有氣氛！點完菜，先來個前菜～呢個唔係點嘅，不過都好認真，有2款包同1個長條形鹹餅，特別一讚牛角色好鬆軟，同埋細細個，唔會有罪疚感😜黑松靈薯條👉🏻都可以話係我機率會揀嘅小食來～～薯條係幼身款，讚賞嘅係熱辣辣，而且好脆，唔係嗰啲預先炸好淋晒嗰啲，食到停唔到手！慢煮羊髀扒👉🏻通常都係食羊架一支支，呢個羊髀扒係圓形嘅厚身扒，唔知係咪煮法定香料嘅關係，唔會好有羊羶味，啱晒怕咗陣味嘅朋友👍🏻我自己就唔介意再羶啲，不過點十要讚肉質煮得剛剛好，不論生熟定咬口方面都拿挰得唔錯！波士頓龍蝦意大利麵👉🏻先講講意粉，用咗龍蝦湯去煮，味道稍濃，但對我來講覺得幾惹味～～龍蝦就更加無得彈，男朋友大讚個鉗剝咗殼好細心！重點係肉質滑嫩，唔會好鞋（好多時食龍蝦都會係偏鞋口🥹）最初覺得羊應該貴啲，但原來係我睇輕咗個龍蝦！大家有機會都去食下喇～～😋😋溫馨一提，我哋算早食，食完見到都滿滿地人，大家最好book咗枱先呀！…查看更多

近日發現咗元朗有晚新開嘅日式燒肉店，門口已經好有日本嘅感覺，仲見到佢新張期間有折，就走咗入去試下😁裝修幾唔錯，首先要講嘅係連toilet都算幾新淨同乾淨，唔係得個外表Ok，toilet好污糟嗰種，希望佢要keep住👍🏻👍🏻另外，每張枱上面都有個抽氣，咁就唔驚食完成身燒肉味。同埋佢會畀咗一小碟牛嘅油脂，可以搽喺個爐度，呢個細位都加分！講返嘢食，今次採取高攻策略，一下食個最貴嘅18CM和牛肉眼（趁試業7折豪一豪！）侍應攞嚟時都會好提醒話因為油脂較重，建議逐塊燒，咁就唔會overcooked～由於油脂重，所以都幾搶火。個人覺得靚嘅牛唔使太熟，每面燒一陣就Ok～結果都係我哋好鍾意嘅熟度😋😋😋正！另外叫咗碟薩摩雞腿肉，好嫩口。額外一提，和牛同雞腿肉我哋都係叫鹽燒，仲有汁燒同韓式，可以因應個人口味選擇。想試下燒海鮮，叫咗2隻北海道元貝，好大隻，無影到相，但上碟時仲會畀一杯仔牛油溶液畀我哋搽，感覺好高級🤣好鍾意！燒海鮮要啲時間，因為隔住個殼，等佢燒到咁上下再搽啲牛油上去燒，一流～～枝豆，個人幾鍾意食，加上想有啲菜，不過相比塊和牛、元貝，就真係基本嘢嚟😂😂飲品叫咗忌廉綠豆紅豆冰同烏龍茶燒酎，前者好邪惡，不過個人覺得呢個比例，綠茶嘅回甘係balance到紅豆同忌廉；後者就酒味較少，茶味好出，好易入口～～但都要小心😈因為咁先易出事。最後甜品時間，諗住簡單食個雪糕作結，但佢個雪糕都唔簡單🥹🤤，首先，個碗都係凍嘅，所以雪糕無咁容易溶，呢個位已經好加分！！因我係好怕雪糕好快溶，但又唔想趕頭趕命咁食～～而呢度嘅雪糕仲要配丸子，口感煙韌，同雪糕原來幾襯！！總結，呢間值得回頭！推介～～～…查看更多

作為喜愛邊爐嘅人類，梗係要去下唔同地方打邊爐，今次呢間火鍋撚喺唔同地區都有分店，不過感覺少來港島區，所以特意book中環店，食完又可以行下。作為freelancer嘅好處就係可以早啲嚟早啲食早啲享受～所以基本上喺大家未放工嘅時間我已經到咗，來到時好似無人好靜咁，但其實一路食就一直入座。呢度風格好有舊中國嘅感覺，門口有個士兵，有啲懷舊嘅燈籠、字畫等，用嘅碟、茶壺都好懷舊中國feel，幾正！特別一提，舖頭嘅playlist都係80年代，甚至更舊嘅歌，真係好復古！講返嘢食先，呢度唔係任叫，睇落好似唔抵，但其實食得多就覺得寧願食好啲，食得夠就得，呢度係用QR code落單，嘢食選擇都幾多，肉、海鮮、餃、丸、菜都好齊全，而作為食肉獸梗係點唔同嘅肉喇～先講講個湯底，本身一見到胡椒豬肚湯就心心眼，但原來西環店先有，留名等下次有機會再試！然後本身想食沙嗲湯，但因為有麻辣，唔食得辣嘅我怕食唔到，所以要咗個雙拼，加多個白湯鍋。沙嗲湯叫咗小辣，但一食就feel到個辣味，係惹味嘅。素湯就好足料，有黨參、龍眼肉、紅棗，湯底好清甜。火鍋撚御用手切肥牛（半份）每塊都算大件，同埋味道都唔錯。日本A4級特級霜降和牛（小）沒有比較沒有傷害，望到啲油花已經心心眼，手切肥牛係好味，呢個就係好好好好味！同埋佢有個溫馨小提示就係「只需灼6秒」，為免淥衰塊靚牛，特登較timer計時，6秒可能仲會有少少紅色，睇大家嘅接受程度，唔想太生就可以灼多一下，但其實呢啲靚牛都唔怕。雖然呢塊牛相對手切係比較薄，但其實呢種油花重嘅牛唔使太厚，咁樣一片片食仲滋味，同埋都好夠。真心推介！羊肉片唔知大家鍾唔鍾意食羊肉，我都幾鍾意，仲要覺得有少少羶先感覺到食緊羊！呢隻羊肉片拿挰得幾好，有啲羶味而唔會覺得好大陣味而接受唔到，而羊肉片我係推介落喺沙嗲湯底，濃味撞濃味係幾正。餃子拼盤有四款唔同餃，應該係雲吞、韮菜餃、魚皮餃，仲有一款都係蝦，但又唔知叫咩餃。啲餃嘅皮比較薄，我哋用夾放落鍋時有一隻會夾到個皮，而餃嘅size係幾好，唔算勁大隻，但因為皮薄，啲料好足！丸拼盤共有五款丸，貢丸、蝦丸、豬肉丸、魚蛋、芝心丸，想特別一提蝦丸，淥之前明顯見到啲蝦肉，真材實料！！最後埋單時送咗個甜品 - 腐竹蛋糖水沙冰！！配以一個懷舊特色小杯，加埋係沙冰嘅texture，本身已經覺得好特別，飲落又覺得唔會好凍同好甜，呢個size又幾好，鍾意呢個驚喜！…查看更多

已經幾年無去過旅行，好多時都係靠食物止下癮，不過都唔係間間有嗰種味道～呢間舖係上網搵到，雖然係旺角區，但就比最旺嗰排舖頭行多少少路仔，但都叫做可以同朋友靜靜地食嘢傾下偈咁～首先幾鍾意佢呢幅牆嘅英文字 Do small things with great love～ 同埋坐低感覺都舒服嘅，加上嗰日出面落雨，有個舒服嘅地方坐下真係好緊要🥹講下嘢食先，朋友好鍾意台式火鍋，所以梗係要試下呢度招牌 臭臭鍋，佢係一人份量，但超級足料！牛肉/臭豆腐/米血糕/鴨血/滷大腸/貢丸/蜆，同其他配菜等…其實都諗緊一個人食應該好飽？😆😆同埋佢會用個細爐仔盛住，所以慢慢食都仲係熱辣辣🔥味道雖然叫唔辣，但可能係用沙嗲湯，都會有少少辣味，不過可接受！另外仲叫咗個鹽酥雞滷肉飯，好香脆好酥軟，食落脆卜卜，超正！！另外叫咗個台灣腸同手撕雞，唔算好出色，但都係合格以上，只能夠話個鍋太搶fo😁飲品我叫咗爆檸四季春，睇相都見到有4-5塊檸檬，篤都需要啲力先得，而我叫咗3分甜，唔太甜就啱我口味～～最後要講，雖然好似行多少少，但我覺得呢間嘢係值得行過嚟食，價錢+味道+足料，絕對係CP值高😋…查看更多

近期終於可以出街食飯，梗係要食啲好嘢喇～今次嚟到呢間喺旺角嘅放題，地點就腳，大家各自放工去都好方便！嘢食分類都幾多，除咗好飽肚嘅飯麵無咩點叫之外，其他都有叫到，重點講下我覺得必點嘅嘢食！刺身利申：有希靈魚嘅放題，我都覺得唔會太差，因為佢識揀，哈哈！除此之外，我覺得有頭甜蝦都係唔可以唔叫嘅，好大隻好甜～另外驚嘉嘅係泰式生蝦，即係平時叫都唔平，所以今次真係狂叫！！回本！燒物牛舌易入口，雞軟骨送汽水超正derr~而蒜香一口牛都俾到驚嘉我，牛味好濃好肉質幾好～～當然唔少得我至愛燒菠蘿，佢燒到有啲焦香，好甜好好味！炸物都係日本常見嘅天婦羅，幾香口。值得一提係有炸榴連，我就唔食嘅，但朋友食得好開心...... 🙈所以愛吃榴連嘅朋友要留意！總括而言，又有魚生、串燒、炸物、邊爐，連韓國嘢都有，CP值好高！…查看更多

呢一日同男朋友一早嚟到，以為平日所以無乜人，但原來係我哋早，因為慢慢都坐滿人！門口一入就有個好大嘅ironman，上到去食嘢嗰層又有，雖然好似同個名無咩關係，但feel到老細應該好鍾意Ironman😆一開頭以為唔多嘢食，但其實係好多種類同款式，首先要大讚飲品除咗一貫嘅冰凍汽水/盒裝飲品外，仲有冷泡茶同花茶！花茶有好多材料畀你mix and match，今次我哋揀咗檸檬、綠茶、無花果，味道清清地幾好～～我哋個套餐包埋可以斟酒飲，有梅酒、清酒同啤酒，咁啱而家有做緊rose hoegaarden，甜甜哋幾啱我，係唔啱男朋友口味😛之後就要講下嘢食，例牌拎少少熟食同刺身warm up下，有薯塊、洋蔥圈、麥樂雞等炸物，仲有湯、點心，日本嘢方面有刺身、壽司、茶碗蒸，對於有選擇困難症嘅人嚟講係幾慘🤣🤣🤣🤣我就食得好開心喇！燒肉肉類都係離不開豬牛雞，不過有唔同味道係幾用特別，例如韓式、印度等，仲有雞軟骨、鴨胸等，咩都攞啲燒啲，個人特別推介雞軟骨同埋韓式雞扒😋打邊爐雖然係攞個細煲但都唔馬虎，任你揀一個湯底定駌鴦鍋，我就揀咗壽喜燒同豬骨湯，都係咩都攞啲嚟淺嚐下，特別一提有台灣腸幾開心～～而本來應該係屬於邊爐嘅日式長餃子都畀我攞埋去燒肉🤣個人嚟講特別推介燒肉！有啲就咁食已經好正，同埋新發現原來點蒜鹽都好滋味，另外都可以喺出面攞燒肉汁～總括而言係一餐抵食夾大件嘅放題之旅！…查看更多

喺禁堂食之前，有一日難得早放所以試下食唔食到呢間人氣蛋包飯，好好彩未夠6點，所以好快有位👏🏻之前只係喺京都食過STAR蛋包飯，東京滿天星就未食過，今日可以滿足下思鄉嘅感覺～～Menu其實都幾多嘢揀，我同男朋友就各自揀咗一款蛋包飯，再為食地叫咗個小食😝😝最後當然唔少得甜品喇！忌廉蟹肉餅話就話係「小食」，但其實都唔少，兩塊蟹肉餅唔只唔細塊，而且切開就睇到係滿滿蟹肉。有半塊都沾咗茄醬，我一開始就想試下佢原有味道，於是就食無醬嗰部分，脆炸口感加滿滿蟹肉👍🏻如果食埋醬就層次多啲，不過都係會再濃味啲，睇你個人口味鍾意邊個多啲，我就覺得原本嘅口感啱我多啲。蒲燒鰻魚蛋包飯上碟時見到側邊無嘢就以為份量少？其實係隻碟真係幾大😹😹😹而食物只係集中喺中間。原條鰻魚唔駛講喇，見到已經超開心，而且都煮得剛好，質地味道都正！蛋包飯入面嘅飯用茄汁炒，酸酸甜甜食得好開心！日式咖哩吉列豬扒蛋包飯我幾鍾意日本甜甜地嘅咖哩，配埋吉列豬扒就更正😋😋所以我幾鍾意呢一個，而呢個蛋包飯嘅飯仲要都係用埋咖哩醬汁去炒，令件事更統一，無得頂！朱古力香蕉梳乎厘班戟食完主菜食甜品是基本，本身以為呢間只係出名食蛋包飯喇，但個梳乎厘嚟到時覺得個樣一啲都唔失禮，食落仲好有驚喜！梳乎厘超鬆軟，朱古力醬唔算好膩，所以都唔會越食越辛苦，加上有香蕉呢個perfect match，喺我心目中，呢個應該係店內最好嘅班戟，沒有之一！（雖然其實我未食過其他😂）走嘅時候大概都係7點零，門口已經要排隊等食，好慶幸早放可以食到！…查看更多

朋友上網睇完片好想食韓式熱狗，咁啱搵到呢一間韓式熱狗店，仲要喺旺角，地點超方便梗係要試下喇！不過因為佢係外賣店，我哋又想坐低慢慢食，就買咗外賣返屋企食（好在朋友住附近！）我哋咩都想試，所以叫咗一個阿里郎熱狗棒、一個薯條熱狗棒、年糕香腸串、芝士波同埋細嘅炒年糕。簡單點評一下同朋友都係喜歡阿里郎熱狗多過薯條熱狗棒，口感幾好，包住香腸嘅外層唔自太厚，不過如果現場食再加糖會更出色！而薯條熱狗棒其實都唔差，只係外賣返到去有少少淋咗，想像脆口食會好正🤤只能夠講唔係舖頭問題，而係我哋下次要即場食試真啲！年糕香腸串加埋醬汁好惹味，份量好足！個人幾喜愛～炒年糕就有啲辣，不過對唔食辣嘅我嚟講，又未到食唔到，同埋覺得細份都有好多！好抵食呀👍🏻👍🏻以為芝士波細細嚿，點知都幾大嚿🤣所以食到最後都好飽嚕，重點係芝士波都係好足料又好味，叫咗咁多嘢加埋都只係百零蚊，所以呢間都真係大件夾抵食～…查看更多

突然有個好耐冇見既中同係ig dm我，仲話一齊食飯，聚下舊、傾下計都好。還掂得閒就約左放工係北角等，見面之後沿英皇道行，行到呢間「炯記燒味」，佢就停咗落黎，係咁望個餐牌。「你想食茶記？」我問。「呢間好x 好食㗎！不如就食呢間啦！」然後就一個箭步入咗去。我忍唔住笑咗出黎，因為佢真係同以前一啲都冇變。坐低冇耐中同就想叫呢個炯記二人套餐，話可以一次過試齊佢三大招牌：手撕雞、醬皇豬手同鵝油撈粗。我望一望個餐牌，原來仲包兩款小食（雞腎同雲耳）、油菜、例湯同野飲。正當我猶豫食唔食得晒既同時，佢已經落緊單，仲問我飲咩…餐廳好快就上晒菜，每碟都好企理，我地都不約而同拎手機出黎係咁影。小食（麻辣雞腎、酸辣雲耳）雞腎幾有嚼勁，我好鍾意佢麻，但又唔係好辣，簡直Perfect池。雲耳就爽口既，酸酸辣辣都幾開胃。鹽焗手撕雞首先，雞有雞味！肉質出奇地嫩滑，一啲都唔老，真係好少食手撕雞係會有咁既口感。份量就一大碟，然後碟上面全部都係雞。冬菇醬皇豬手豬手超級入味，越嚼越香，真係食到人jap jap聲（利申平時唔會）。而豬皮就算好厚既位置食落都好嫩。側邊啲冬菇更加唔洗講，幾乎俾我一個清晒。鵝油撈粗我當初以為會好油好膩，但食落唔覺得膩之餘，仲幾鬼香。同埋因為佢係撈粗，所以啲甜豉油、鵝油好充分咁掛晒係啲「粗」上面！應該係掛晒係啲「麵」上面至啱。 整餐飯食得好開心，佢冇Sell我保險，冇叫我買樓，冇問我借錢 …但就俾咗個紅色炸彈我 … 不過都戥佢開心既！…查看更多