小肥牛的個人專頁

鋪頭外面既設計幾有心思，木既擺設增添中式氣氛。內裡都好配合，暗暗既燈光加蓆地而坐，好有風味。當然最配合既係張地蓆有蝨，我同我同事坐左五分鐘塊面同手就有一粒粒紅點，完全覺得自己回到古時咁。話時話，腳痛記住REQUEST坐地下，唔係隨時要行三四層樓先有得食。野食唔錯， D牛都幾OK。一個午餐$58-128，一人用...幾塊肉加幾塊「薄切磨菇」同1/4舊粟米，一碗小飯同一碗湯。男仔至少要$108餐先OK，如果唔係會嫌少左D。或者想食少D當減肥認真唔錯。 埋單之後落番樓下，個收銀俾左好多卡片我地。本來仲以為係派卡片，點知一睇先知係績分卡，仲要係一張吸左一個印仔。真係俾佢吹啤。正路當然問佢「點解唔可以係同一張上面吸」啦，個女仔又東拉西扯，係度遊花園。大佬，你幾時見人吸印仔係一人一張吸一次嫁，咁個人的話不如加埋姓名電話身份證號碼上去啦。無錯，十個印係可以即時食你兩個免費午餐，咁你派得印仔就應該預左要俾嫁啦。又要人儲，又唔俾人一齊食。依家呢，就要每人吸多四個先有得送囉(即係食多四十個餐)。咁你唔駛開二人四人八人台啦，全單人位BAR台啦笨。 算，都唔想同佢打大交。吹到漲一漲咁返到OFFICE，派埋「印仔卡」俾D同事。一睇，，頂，個EXPIRY DATE吸左今日。真係咁唔想人地用你既績分卡就出聲啦，分十張一張張吸之餘仲要即日EXPIRE。你咁威不如叫小林尊一日去食你六個餐啦。火滾到即時打返去「問」個位小姐，當然又俾人係咁舞。廢話少講，即刻出絕招「叫　你　老　細　聽！」。老細當然唔係度。FINE，留個電話算數，都預左佢唔回。點知一分鐘都無個電話就響，老細回CALL。心中當然讚一句「做老細果然係唔同D」。即時當然大吐苦水啦。「你地呀，十個人去食就一張吸一個，吸左十張俾我。玩野咩….」「SORRY, 我地唔同賣野飲既鋪頭，依度成條街都係咁做。」吓，唔係化?條街間間我都食過，無一間有得吸印仔「優惠」D客。咁你都幾用心良苦咁度個咁既做法俾D食客。OK，算。同佢講個EXPIRY DATE問題。「個個係張卡開始有效既日期，唔係EXPIRY DATE。一個月內黎張卡都有效。」吓，EXPIRY DATE 唔係有效日期??小妹點都叫完成左香港6+7+3既小中大學課程，唔通真係我睇錯?再睇，「EXPIRY DATE」隔離寫「有效期至」。無可能錯啦。「老細，佢個度寫有效期至喎！」「無可能，你張卡假既。」假既?三十分鐘前你同埋個WAITER親手俾我喎，你當自己D績分卡係人仔呀。咁大工程去做張假卡呃你個幾十蚊既午餐?即時明白到同佢講都係嘥氣。CUT線。 作為食客，食物重要之餘服務都好重要。當知道叫五個餐都俾一人一份前菜一碗湯個刻真係好BUY佢，不過之後既一切都係一場鬧劇。算，發洩完畢。多謝觀賞。點解話佢係山寨店﹖ GOOGLE下或者去過台北既朋友都會知……引用某個BLOG︰「我們也被山寨了。」再睇下佢個LOGO同手上張績分卡的LOGO...........明白了。難怪會俾人話張卡係假既。PS　其實我地都無可能換番張卡，佢根本無俾番張正單我地……哈哈哈……可能張單未「山寨」到！…查看更多

鋪仔細細，五臟俱全！Ｄ餸既味道好OK，最受歡迎既係麵根，個人首推蘿蔔同東菇。超多人買外賣，不過我公司比較遠，所以都係企係度，倦就倦Ｄ，但係碗麵好食抵番哂！我最鍾意價錢均真，麵底分大中細，＄５﹣＄１０，食幾多叫幾多，再＄５一個餸。Lunch 最好12.45前去到，咁就唔使企係後巷食啦！…查看更多

有史而來食過最差既雲南米線！$18三餸麵，可以要酸辣湯底。從來無諗過會係香港食到咁既米線 -- 所謂酸辣，只不過係清湯底加D酸菜同辣椒油！真係好無誠意囉！三個餸係蘿蔔、片頭同龍蝦丸。蘿蔔淡而無味，片頭好硬，龍蝦丸連街邊檔都不如……另加一個魚皮，一D都唔脆，爭D咬爛D牙！老公叫左牛腩做餸，全碗有兩舊咁大把，仲要硬到不得了 最令人髮指既係，有D米線係未熟透……超失望，我唔會再去 …查看更多

依間係一間超水準既車仔麵鋪！去食野，不外乎兩個要求﹣﹣食得招積，坐得舒適！先講後者，我從來未試過食車仔麵食得咁自在。自動門出入，唔使食野前掂到人人都摸過既手柄。直入之後先到盡頭櫃檯買野食，攞麵後再坐低，有卡位有長檯。兩樣Ｄ位都好闊下，最令人驚喜係長檯底下有凳仔俾客人放袋，鬼咁細心。由入門口到坐低既流程都好順暢，值得大讚！　Ｄ野好唔好食﹖咪就係車仔麵囉，有成廿幾三十種餸，應該有既都有啦，無諗過有既係薯餅同薯條，唔通係下午茶時間留低﹖Anyway，覺得古怪咪唔好要囉。廿蚊有找三個餸，飲野另計。攞左面可以係櫃檯自助加調味同炸菜，好過Ｄ加條蔥都要收錢既車仔麵鋪啦！餐餐都奶菜咖啡o個Ｄ可以飲豆漿汽水，俾左錢自己攞，唔使等人服侍，啱哂心急一族！嗱，作為一間廿蚊有找既麵鋪，我真係無complain …查看更多

今日諗住近近地去附近食，所以去左扒王。食到一肚火成間鋪Ｄwaiters都超緊張，燥到爆，快步傳菜，行過地下都震，以為自己去左畢打街食飯！叫左個$2xx牛扒同$1xx 鱈魚。Waiter傳菜既時候以威嚇既口吻問我地係唔係叫左肉眼扒，我地有Ｄ猶疑（佢有成十幾種扒，佢話肉眼扒，我點知係唔係我叫o個個)，佢不斷重複講肉眼扒喎、肉眼扒喎。我見佢地對其他客人都係咁，拎住Ｄ碟好似係咁問人係唔係叫左佢手上既野！身為waiter，唔係應該知道客人點左Ｄ咩既咩﹖再唔係睇番落單都得，駛唔駛咁惡呀﹖仲要唔係一個既問題，係個個waiter都係咁。無他既，上樑不正下樑歪，個經理係個客面前大大聲話Ｄ伙記無擺好一隻要洗既碟，並且收我隻碟既時候都無等我答就收左，又要整到張餐紙飛開哂！俾成三百幾蚊，大排檔都不如！講番野食，咸到不得了！係唔落Ｄ汁都已經好咸！完全係overpriced!全間野得個景靚，但背景配Ｄ九唔八既雜錦音樂。千祈唔好諗住黎享受個浪漫燭光晚餐！如果食得咁受氣，我寧願去快餐店買個扒餐好過，起碼收銀員都會同我講「多謝！」！…查看更多

味道不錯，唯等候時間較長。樓面只有兩個人，明顯做到踢哂腳。今餐食左︰1. Chicken Tikka(薄荷中炸雞)辣辣地，幾開胃，不過唔覺有薄荷味。2. Goa Fish Curry(椰汁咖哩魚)依個唔辣，不過我最初以為自己食緊雞，應該係個煮法令魚既質感唔同左。夾係薄餅食一流！3. Stir Fried Mixed Vegetables(蒜茸炒通菜)俾個名fake左，通菜原來係指雜菜，咩菜都有d咁。唔算好多油，而且椰菜花豆角炒到脆脆地，幾好食。4. Phad Thai(泰色炒金邊粉)甜甜辣辣，金邊粉好似幼身既河粉，易入口。5. Taj Special Naan(新德里特色烤餅)比起普通烤餅甜d，一客四塊。6. 飲品叫左青檸梳打同椰青，前者解火，後者清甜。…查看更多

食完之後都唔知其實雲南菜係食咩。兩個人叫左個$48氣鍋雞湯，果然細size就係超微形，一個人飲都太少。仲有個水煮牛肉，一般水準。另叫一個雜菌小籠包，唔覺得有咩特別，好似都無咩雜菌味。最後叫左個高力豆沙做甜品，即叫即整成晚覺得最好食就係依樣。略嫌侍應反應慢，同埋張單d項目會同叫左既唔同，不過價錢就一樣，要多留意。…查看更多

上個星期再去，食物質素並無改善，食物質素每況愈下。最慘一入去既時候一口氣飲完杯茶，叫到走既時候都無人加番。…查看更多

牛肉麵︰蘿蔔多多，牛肉少少蒜香肉清︰肉白無味，得豉油少蒜台灣炒米粉︰多油左，濃味由剛開鋪到依家，平均一個星期去一次，食物質素愈來愈差。…查看更多

每次有人問我尖沙咀有咩地方可以食耐d，又唔太貴既，我都會去依間印度餐廳。無他既，好食之餘仲任坐唔嬲吖麻，叫個椰青食下都用左成大半個鐘啦(無錯，佢會俾埋個匙你刮d椰肉黎食)！講番野食，d薄餅唔錯。上星期五一行十一個人上去，叫哂八款薄餅黎試，包括洋蔥、芝士、原味、雞肉、羊肉等等，我就最鍾意食原味喇。最好叫多個蝦餅，食完個彈牙蝦餅再留番d甜酸醬點薄餅，咁就very good啦！肉食方面，可以試下印度煮法既雞，侍應仲會因應你可以承受既辣既程度推介食物。通常肉食同炒菜都係細細盤。另外值得一提既係明爐蒸魚，少少酸魚肉易入口，伴碟既菜同秀珍菇都可以食。入面燈光暗暗地，長期播放印度電視。比較唔好就係全店准許吸煙。入去重慶既時候，你只要同人講去Everest Club，就會有人帶到你上去。試過幾次都係八點幾開始多人，打電話訂定位安全d。…查看更多

去過三次打邊爐，覺得食物水準同服務質素都唔錯。講下個湯底先，既無小X羊咁「濃味」，又唔會好似清湯咁，點都有D湯料搞下。試過皮蛋芫茜同鴛鴦都唔錯，尋晚叫左個貴少少既銀蘿栗米豬骨鍋，好足料，淡湯夠味。不過如果個鍋大D仲好，因為開頭好多大骨唔係好夠位放生料。D配料係九時後入座全部半價，無縮細夠食乾乾淨淨。肥牛依D重點野就無特價，不過2-5位入座即送一碟手切肥牛，講質素梗係俾錢O個碟好食D啦！侍應都好勤力，成日會問你要唔要加湯(當個煲啱啱黎都照問，ER……)。D料都出得快，唔會只見湯底滾，不見肥牛落。仲有樣好野就係唔會趕客走，慢慢食歎電視食下水都得，最後仲有生果盆送TIM。平日都有得揀位坐，係星期五要等下位，不過都係幾張檯，可以接受啦。…查看更多

話說成家人大年初三一齊去海天食晚飯，差d中左赤口……明明已經訂左檯，去到都等左三四個字。終於有得坐，點知d侍應明明行過身邊都見唔到你咁，完全係被遺棄。唔知係唔係o個晚特別多人，加上我地唔係叫d賀年套餐，每個菜既出場時間都差三四個字。麻煩d侍應跟下單，幾次都遊魂無左件事。最慘係個啫啫雞煲，d蒜頭仲多過d雞肉。依度既最大好處係可以係隔離信和泊車。唔怕煩泊車既，其實銅鑼灣灣仔都有好多選擇………查看更多

星期五夜晚十一點幾，去左旺角小肥羊打邊爐，諗住大食一餐，點知俾個侍應激到紮紮跳！d碗碟洗得唔乾淨不在話下，仲要食左個呃錢既龍'等'拼盆！個女侍應係咁sell個$108既龍'等'拼盆，又話好多菜，d龍'等'又靚，分開叫一定無咁抵。我個friend問佢會唔會好多菜但係每款菜得一棵，個侍應話一定唔會！一直對依類拼盆無咩好感，不過大家都話試下，唯有順應民意。等左成廿分鐘，個龍'等'拼盆終於出場。好似龍'等'既骨有三「細」舊，好似切剩既魚肉咁，其他就係普通既魚片！菜係有五款，每款都有三、四棵，又係亂咁擺埋一堆！分開叫三種菜再加碟脆肉鯇都唔使$108啦，簡直係被騙！唯一可取係個內蒙古肥牛同白蘿蔔。之前試過銅鑼灣同尖沙咀既小肥羊，覺得食物質素同服務態度都好好多，估唔到旺角依家差咁遠。…查看更多