hello你好嗎的個人專頁

試過坊間大大小小嘅甜品鋪，芋泥通常只係配角，就算甜品主角係芋泥，都硬係會加啲其他嘢，對於鐘意食芋泥嘅人嚟講會覺得唔夠滿足。今日第一次試糖町，叫左個芋泥撈芋泥。呢個係全碗都係粉紫色，全碗都係芋泥，上層係稀啲，下面係杰哦。一齊食個稀杰度啱啱好，甜度都啱啱好，份量足，食完真係好開心！美中不足係地點唔係好方便，喺啲比較少人位置，唔經過都唔知有間鋪係專食芋泥（其實經過都未必留意到）。我果日去就只有一枱客，唔知其他時段會唔會多人啲，希望佢維持到！下次經過會再去試其他芋泥甜品。…查看更多

星期六落去食lunch，單點，嗌左碟豬肉。食左咁多次，第一次係薄到見到碟底，就咁數只有六片，薄到咁真係第一次見。另外間嘢疑似縮減成本，芝麻醬之前食咁多次都好杰好好味，今次係水汪汪，應該加左1份水，唔係好掂。仲有就係連墊枱紙都無埋…而家好多鋪（唔止呢間）都打環保旗號，又唔俾飲筒又無墊枱紙，實質係慳左成本或將成本轉嫁落消費者身上……查看更多

海街丼喺東港城開左都好耐，但一係忘記咗佢嘅存在，一係就經過都無諗過入去。今日食生日飯諗緊食咩突然諗起海街丼，於是決定book位。一直以為無乜人幫襯，點知比想像中多人。㨂左個二人餐，星期一至四$499，非常抵食。有刺食，有海膽，有丼飯等等等等。全部都好食，同埋分量好夠食，兩人食都幾飽！另外就係兩位女侍應都非常nice！會再去幫襯~…查看更多

嗌咗個黑米雞蛋腸粉，賣相相當出色，紫紫地色皺皺地，好吸引。食落去其實唔係好食得出黑米同普通白米有咩分別，同埋都唔夠雞蛋味。不過腸粉質地同口感係可以嘅，同埋個醬汁好得，我除左無要辣椒，其他醬汁都有落，非常好味，為左個醬汁我下次會再幫襯~…查看更多

可能因為係平日下午茶時段，我一個人包場咁濟，好好坐！雖然午餐有85折（2點後入座），但想食南瓜飯所以都係叫左個下午茶。南瓜飯香甜，有幾粒合桃喺面又有啲粟米粒喺入面襯托多左少少口感，咖啡都可以。…查看更多

去經常幫襯嘅塚田食lunch，叫咗個唔係第一次食嘅天婦羅丼。之前食過唔止一次，出嚟嘅成品係同餐牌一樣嘅。餐牌幅相係咁👇🏻今日俾我碗飯係咁👇🏻首先，佢無左相入面嘅秋葵同雜菜天婦羅，而雜菜天婦羅係成碗飯我最鐘意食嘅（之前食過呢間整得好食）。其次，佢將無咗果兩樣換咗做筍同蟹柳，賣相已經差好遠，仲要我本身對筍係敏感，唔食得...搵個侍應嚟問，佢問完廚房，話天婦羅丼有5樣嘢就係啱架啦🙄如果我係第一次食呢個飯，可能會覺得無乜嘢，因為講真價錢唔算貴；但我之前食過而之前覺得好食，所以今次就覺得失望。…查看更多

今日去外賣早餐，㨂左「香煎雞扒公仔麵」配火腿奄列加波蘿油。拎起份外賣已覺怪怪地，個波蘿油係壓左喺個長方形盒入面，下面放左舊奄列... 返到屋企打開就知瀨嘢，舊菠蘿包底係濕嘅，因為有啲蛋汁，而面頭最正果啲皮係全——淋，淋得好緊要，同埋扁左，見到都唔係好想食...；雞扒話係香煎，但似蒸雞扒多過似煎雞扒...如果真係要㨂菠蘿油，堂食好嘞，千祈千祈唔好外賣，或者問下阿姐可唔可以用袋裝住個包而唔入盒!!!!!同埋公仔麵㨂肉丁似乎穩陣啲!!…查看更多

麥當勞呢排有Hershey’s朱古力雪糕食，今日記起就去試下。個人認為朱古力味非常濃郁，好好食，有機會會再食過！另外呢間鋪甜品站嘅姨姨超nice，見過佢幾次，次次整啲新地都好完美，個尖端真係喺正中間👍🏻；對小朋友又熱情；感覺佢好鐘意呢份工作…查看更多

朋友告知這間火煱店不錯，今天下午去試試，但就唔係食火煱，而係食set lunch！入到去望望火煱價錢，對我嚟講算貴，但再睇午餐牌，唔貴喎，最平五十幾。叫咗個鹽酥雞肉燥飯，雞比想像中大碟好多好多好多。跟餐配菜好食，湯足料好飲，仲有杯菊花茶或酸梅湯。七十幾蚊抵食！…查看更多

第一次食串燒放題，睇openrice comment以為好多嘢食，去到見到任攞區唔太多種類。不過都唔緊要嘅，因為全部肉都夠飽，俾太多你㨂都未必有肚食！攞咗食物返去放上爐，見啲串燒轉下轉下係過隱嘅。但係！需時超耐，啲肉好耐至熟，同埋一次其實係放唔到太多串，個個窿放係唔可能，串同串會撞。所以，玩係開頭覺得好玩，但等咁耐至食到一串，我自己會寧願去食韓燒或日燒。嘢食嚟講，個人覺得雞翼係最好食，雞翼應該係無調味，原汁原味咁燒，好食！牛舌都幾好！另外，紙包飲品同罐裝汽水都係任飲，仲有牛奶公司雪糕食。…查看更多

想食lunch buffet，㨂咗好耐，最終因爲呢間有長腳蟹又有openrice 75折，所以㨂佢！一入門口，感覺非常麻麻，食物區唔大，座位區光線不足，佢唔係暗暗地浪漫feel，而家感覺唔夠電果隻feel。但行完一圈，印象改變，食物區雖然唔大但款式算多。有即煮粥同面，海南雞飯，即切羊脾同牛肉，沙律，煙三文魚，Pama ham，仲有原條蒸魚，等等等等。海鮮：我主要去食嘅長腳蟹，唔算肥美，但勝在鮮甜，唔咸，食咗好多。螺幾大隻，味道ok。蜆就完全無味。青口唔記得食。魚生：超出我想像，好多款，有三文魚，希靈魚，熟蝦，帶子，蟹柳，鮑片，北寄貝，仲有一隻唔知咩魚。講真未試過lunch buffet有咁多款魚生供應！雪糕：Movenpick，好多，有成十一隻味！甜品：得一張甜品枱好似好細，但原來都好多款，味道都唔錯。想講呢度啲侍應全部唔係後生仔女，但可能因為咁，全部都好有笑容同禮貌！仲有就係好奇怪但非常好嘅就係，呢度啲食客全部唔似去食buffet。啲人出去攞嘢食嘅次數好少，蟹腳，魚生，雪糕，全部唔駛等一出去即攞到。…查看更多

今次係第二次到呢間餐廳食飯。記得上次啲天婦羅麻麻地，其實覺得呢個價錢食啲唔太熱又唔太脆嘅天婦羅唔太抵，不過因為呢度坐得舒服又少人，所以再嚟。今次都係叫左個六百幾蚊嘅餐再加少少散叫食物。因為無乜點食個餐，所以唔評論。散叫就叫左個天婦羅稻庭烏冬仲有紅豆餅。首先今次啲天婦羅好過上次好多好多，夠熱，夠脆，又唔太油，幾好。至於個烏冬夠滑，湯汁都唔錯。所以呢個今次我comment係好嘅。因見紅豆餅受好評但上次食唔到，所以今次再叫。未嚟之前以為有咩特別滿心期待，嚟到原來個樣係叮噹燒餅咁。雖然係即整同個餅脆脆地，不過下次唔會再叫，因為實在太普通，無咩賣點值得再試。總括嚟講，今次餐飯ok。…查看更多

喺淘大行完街行去港鐵站，經過東海堂，見個飲品list幾吸引。雖然心諗面包鋪賣飲品未必好飲，可能咖啡會淡咖啡味或者勁甜，但因為賣相好又唔貴姑且一試。㨂左杯冰黑糖水晶炭燒咖啡，見佢放好多冰以為淡。拎左杯咖啡搭埋港鐵隔左差唔多十五分鐘至飲第一啖。OK喎，咖啡味仍在，唔淡，仲有炭燒味。黑糖水晶唔甜有口感。仲要特價$15，我覺得好飲呀！下次經過有信心再飲！…查看更多

東港城夏麵館做左都幾耐逢星期一至四晚七折. 但係咁耐都未試過特價去食, 反而之前無做特價就有食過, 今日唔知食咩就姑且去試一試. 唔知係咪因為有折, 都要等位差唔多三十分鐘.叫左幾樣野, 首先係花雕醉雞, 記得之前未做特價前o黎食過, 幾入味幾好食架. 但今次... 一D都唔入味.. 麻麻地.第二係香糟魚片, O係好多其他餐廳都食過糟溜魚片, 雖然個名有D唔同, 但應該都係同一樣野. 點知, 我第一次見呢味菜係有魚皮. 1, 我唔食魚皮o既; 2, 魚鯹鯹地...; 3, 無酒香味. 呢三個致命點令我勁想成碟唔食, 但剩咁多係唔o岩, 所以最後都好勉強咁食晒佢...第三係涼菜五小碟. 呢碟一o黎已覺唔妥. 個燻蛋超核突... d醬整到一忽忽外, 蛋黃好似俾人搞過咁... 於是我地叫伙記幫我地換過隻蛋. 呢間餐廳最抵讚係伙記有禮貌, 同佢講完佢真係follow up幫我地換過. 但, 換番o黎隻蛋雖然係整齊d, 但都唔太靚. 1, 蛋黃熟o既程度係似自己o係屋企用水淥蛋; 2, 隻蛋除左最出面果層係有少少醬油味外, 蛋黃o既味係外加醬油而得o黎, 唔係製作時加落去o既, 其餘蛋白剩係得蛋白味...最後仲有小籠包同鍋貼, 呢兩個不過不失啦..唔知係咪叫得做夏"麵"館, 其實只有麵好食, 其他全部麻麻地呢, 而偏偏我地就係無食麵, 所以覺得咁唔好食呢.定係因為佢俾七折你, 價錢降低左, 所以將個水準都降低埋呢...?…查看更多

第一次幫襯, 揀左星期四晚去, 七點左右, 室內已經坐滿, 室外就o岩o岩開. 因為天氣唔熱, 坐室外都ok. 一張八人枱俾我地兩個人坐晒, 勁闊~唔知呢間餐廳有無招牌菜架呢, 我地點果D有啲好食, 有啲就麻麻. 講真係有少少失望.…查看更多