一間上樓西餐扒房,我同老公分別叫咗一個午餐,加咗個廚師餐湯,另外聽餐廳經理講叫咗一份廚師推介甜品Share,各自都係$58,好合理。餐湯係蕃茄蓉湯,上菜嘅時候,擺盤好精美,加咗一圈Olive Oil同一啲燒藜麥。蕃茄蓉湯比較厚身,似歐洲嘅濃湯,間中食到煙煙韌韌嘅感覺,個啲就係燒藜麥,配搭嘅感覺又幾特別!燒烤雞胸肉配無花果雜菜沙律$188 雞胸肉烤得剛剛好!加上雞胸肉應該有先慢煮過再Grill!面帶金黃脆邊,但內裡多汁唔乾(食雞胸最怕又乾又柴,但佢無!)配上雜菜沙律,加上新鮮無花果酸酸甜甜,配搭得剛剛好。燒新西蘭肉眼扒配烤蔬菜$188肉眼扒叫咗七成熟,上菜時煎得剛剛好,Grill Mark 非常之靚。燒得剛剛好嘅肉眼加上配搭嘅酸酸汁,十分驚喜。問返經理,個汁係Porcini Sauce ,係廚房自己用咗紅酒調較出嚟,外間每一個味道都唔同,而The Grill Room嘅係會偏酸甜。但正正係一點酸甜,調和返塊扒嘅油膩感,肉眼油脂嘅罪惡感即刻冇晒。 終於嚟到我心目中,全餐最驚艷嘅 — 甜品。廚師推介甜品係熱情果朱古力Mousse蛋糕!一啖落去,先係熱情果醬嘅獨特酸甜打返開你食甜品嘅胃,之後就係佔蛋糕三分二嘅朱古力Mousse,一個字,「夾」!真係忍唔住食完一口又一口!環境方面,餐廳座落一棟服務式住宅入面,好近地鐵站。雖然環境唔算大,但勝在Cozy同Relaxed!入面仲有梳化位,約埋三五知己食個飯傾下計都唔錯。最欣賞嘅係開放式廚房,你會見到晒廚師喺入面備菜同煮食嘅過程,好食嘅又可以對廚師俾個Like!…查看更多
The Grill Room (The Humphreys)
2024-06-21
以上食評乃用戶個人意見 , 並不代表OpenRice之觀點。
讚好
用餐途徑
堂食