Ric Gor的個人專頁

晚上黎開沙田大圍同朋友聚舊，出嚟搵啲嘢食好多鋪頭都閂咗門。經過見到呢間食意大利嘅餐廳好似幾高檔，而價錢又幾平民，所以決定幫襯下。餐廳嘅環境都幾有格調，有啲浪漫嘅氣氛，適合情人或者朋友三五知己。好彩今日唔算人多，唔使等位。餐廳嘅款式幾多，有沙律、薄餅、粉麵飯同埋特色甜品等等，但係主打海鮮同埋扒類，不過今次就未有食，下次有機會先再食。巴拿馬火腿配埋哈密瓜作為小食係唔錯嘅選擇，蜜瓜冰涼，拌巴拿馬火腿，賣相都幾吸引，輕輕地唔會食完就已經飽曬。幾鍾意個巴拿馬火腿，幾香，咬落有口感。黑松露野菌意大利飯啲飯身黏性嘅程度適中，份量都幾大。一個人食曬都會幾飽。因為呢間係意大利餐廳，所以諗住試個意大利飯。配埋法國鵝肝，真係可以話係意大利法國美食大融合。意粉中我最鍾意都係卡邦尼忌廉意粉們，今次配埋溫泉蛋。可能對有啲人嚟講係有啲肥膩，但係我覺得卡邦尼忌廉再加啲煙肉整成意粉，配搭一流。價錢方面，每個人200蚊，以咁嘅環境格調同埋食意大利餐嚟講，都係幾抵食嘅。…查看更多

去日本之前搵下好嘢食，要食日本嘢做定熱身。今次嚟到深水埗一間叫做御品千之味嘅日式餐廳，聽朋友講話幾好味，今次決定試下。餐廳環境唔算好大，但坐落去都幾寬敞，重點係好快就有位。見到啲海鮮魚生好吸引，有定食嘅選擇，定食包主菜、沙律、玉子、甜品同埋麵豉湯或者飲品，但係我就畀另一個御品丼吸引左。御品丼做緊半價129蚊，有海膽魚子同埋吞拿魚碎，另外附送麵豉湯同埋沙律，望到都幾吸引。海膽份量都幾多，好新鮮，賣相亦都幾光鮮，另外仲有魚籽。魚籽嘅口感唔錯，再加埋吞拿魚碎，層次味道豐富。另外仲有麵豉湯，麵豉湯有味得嚟唔算太鹹，作為前菜係唔錯嘅選擇。仲有沙律，沙律有三文魚籽同埋新鮮蔬菜，連埋番茄好豐富。除此之外仲有其他半價既餐，例如海膽帆立貝丼、釧路丼等等，下次有機會都想試下。不過今次一個人好難食太多嘢。最後埋單一百四十幾蚊，呢個價錢如果唔係深水埗都食唔到咁平，好豐富嘅一餐，整體都幾滿意。…查看更多

一直都好鍾意打邊爐，因為可以一邊食一邊吹水！見呢間網上評價不錯決定一試。餐廳位於佐敦，近地鐵站行大約五分鐘，招牌大大個路癡都搵到！ 打邊爐成日比人一種熱氣的感覺，呢間邊爐反而令人覺得好養生！ 因為佢d 湯底選擇都係比較“住家媽媽湯”feel 的，例如蟲草花膠燉雞鍋、香茅花甲野菌鍋… 揀左價格相宜的牛肝菌昆布湯底。值得一讚的係個湯底係可以飲的～我平時最鍾意飲湯所以呢個湯底真係好正！ 另外就係呢個湯底係完全無味精的，所以可以品嚐到食材的鮮味。打邊爐之前朋友叫了一個鱆紅魚刺身，清甜新鮮可以一試。我最喜歡的邊爐配菜有以下幾款：（1） 響鈴新鮮炸起的響鈴上菜時仲有少少熱，口感鬆脆（2） 牛三拼老闆話d 片片牛肉都係手切的，很有口感。我就最鍾意d牛肉粒，很有牛的鮮味！ （3） 金沙牛丸&黑松露豬肉丸呢個係我朋友堅持order 的，我一向不太喜歡“丸類”食物，因為個味好假，但係呢個肉丸我真係要大力推介，佢係手打肉丸，裡面釀左鹹蛋／黑松露，好驚喜！！我覺得呢個係必點。其他 食物包括午餐肉拼盤同蔬菜拼盤，雖然都係好好食，不過味道同其他邊爐鋪差不多。都係上述三種食物同湯底比較正！…查看更多

喺尖東放工後，好想食漢堡包，同事就推介左我去seafood stand 食burger。佢位於安達中心嘅地鋪，面積唔大，但有開放式廚房，可以欣賞到煮食過程。店舖張貼住幾種餐牌，包括有漢堡包套餐、沙律、薯條、洋蔥圈、雞翼等小食。最驚喜嘅係漢堡包套餐連薯條同汽水，只需要$40至$60，相當抵食。我同朋友就叫咗兩個漢堡包套餐、沙律、洋蔥圈同埋雞翼。最欣賞嘅係安格斯牛肉漢堡，牛肉厚身得嚟有口感，肉質嫩滑，咬落去充滿肉汁，加上軟熟嘅麵包，十分滋味。牛油果吉到牛肉漢堡嘅牛扒10分香脆，牛油果嘅份量再多d。套餐附送嘅薯條，新鮮出爐熱辣辣，味道本身唔係唔咸，可以自己鹽、茄汁、芥末等調味。每一個套餐都會送一罐汽水。三文魚薯仔沙律夠清新，食咁多炸嘢，要有d菜中和下，健康啲。炸洋蔥圈滋味香口得嚟望落金黃色，賣相唔錯。最後就係水牛城雞翼，紅色嘅雞翼望落好似好辣，但其實只係有少少香辣嘅味道，加上sour cream，味道酸中帶辣，恰到好處。兩晚食咗咁多野重複每人都只需要$100。喺尖沙咀可以食到咁平民化嘅漢堡包，係幾正嘅。…查看更多

自從石門站隔離開咗新商場有好多新餐廳今日就試咗sell地道風味嘅香港茶餐廳。餐廳門口好似電影海報咁精緻。入面嘅裝修都好精緻，色彩繽紛，充滿香港特色。餐牌上有好多野食選擇，常餐、碟頭飯、小菜等等。我同朋友今次想試小菜。每個小菜都奉送例湯，白飯同熱飲，加錢可以轉特飲。黃金色嘅椒鹽豬扒賣相吸引，望落乾身之餘十分香脆，豬扒夠厚身所以有口感，而椒鹽香口惹味，增加食慾。通菜牛肉係一個有菜又有肉健康嘅選擇，通菜份量算多，煮得夠軟，加埋牛肉就更加多元化。最後我哋點咗檸檬菜蜜，檸檬可樂，咁就一餐飽飽嘅家常便飯喇！每位$80，價錢實惠，有機會可以試下其他款式。…查看更多

難得平日放假，仲要咁啱同朋友一齊放假，於是就你約咗啦去旺角睇戲同埋食飯。睇完戲肚餓到打晒鼓，就即刻好想食放題醫飽個肚。今次試兆萬中心嘅極上帝王水產。餐廳嘅環境寧靜啱三五知己聚腳傾計座位都算寬敞坐得幾舒服。食物嘅種類繁多，落單嘅紙有十幾廿張，目不暇給。餐紙有幾款推介菜式，不過另外要加錢。首先要食嘅當然係刺身啦。刺身種類繁多有三文魚、油甘魚、吞拿魚等等，而且都有三四種嘅選擇，如玻璃蝦、虎蝦等等。我哋最鍾意嘅就係蝦，味道十分新鮮鮮甜。另外拖羅蓉杯同三文魚子杯都係值得推介嘅食物。一個迷你嘅杯盛著飯同拖羅蓉或三文魚子，勝在份量唔太多得嚟，已經可以品嘗到佢哋嘅新鮮美味。蠔係我最喜愛嘅食物之一，當然就唔可以錯過啦！分別有芝士焗蠔同埋炸蠔選擇，焗蠔嘅芝士香味濃郁，唔會太膩。而炸蠔香脆，蠔肉多汁又熱辣辣！最後仲有自取飲品櫃。午市放題每人都係＄150左右，難得放假可以食放題，Hea足成個下晝，的確十分寫意。…查看更多

東南亞嘅食物總係我嘅最愛。今次試嘅係一間旺角嘅東南亞餐廳。我同朋友兩個係週日嘅晚上去，啱啱有個卡位。餐廳嘅環境比起一般茶餐廳唔算非常嘈吵，可以傾下偈，不過由於有兩隻餓鬼，我哋都拿拿林點食物。餐廳嘅餐牌顯示有三款二人餐，價錢由二百幾至到近四百。不過我同朋友決定散叫，因為比較有彈性。海南雞可以揀半隻定一隻，我哋揀咗半隻。雞肉食落嘅質感鮮甜香滑，唔會好乾身，算係我食過入面既海南雞比較好食嘅。個人鍾意去皮咁食，因為比較健康，半隻海南雞價錢係128蚊，分量夠兩三人食用。金磚豆腐非常好味，一共八件，有泰式酸辣醬點。金磚豆腐新鮮炸起，熱辣辣，外皮鬆脆、內裏香滑，款式比較特別。就算出面啲泰式或者東南亞餐廳都冇乜見有呢一款小菜，所以黎呢度可以考慮點呢款，價錢58蚊。冬陰功湯作為前菜係唔錯嘅選擇，幫助開胃。冬陰功辣得黎唔算難接受，有海鮮嘅成份，包括幾隻蝦，賣相吸引。同樣係可以揀半碗同埋一碗，我哋揀咗半碗，價錢78蚊。最後埋單250蚊左右，有齊湯、主菜同埋小菜，又可以試到餐廳嘅招牌海南雞，都算係幾滿足。…查看更多

觀塘工廈一直都有唔少隱世美食餐廳。今次呢間係朋友介紹先識黎，係一間食自家製pizza嘅餐廳，黎開觀塘所以決定試一試。餐廳嘅環境寧靜，雖然位於工廈入面，但係坐落都幾有空間感。餐廳採用自助式嘅設計，見到餐牌上有咩想食嘅出去收銀處俾錢落單，另外嘢飲就自便喺個架到拎。今次點意大利式腸pizza，材料有意大利腸、蘑菇、燈籠椒、芝士同埋香草，材料豐富，食落有層次，賣相色彩繽紛都幾吸引。pizza嘅分量大，有14吋，分成八小件兩個人share食到超級飽。pizza係熱辣辣嘅，小心注意，但係要趁熱食先好食。另外點左黑松露蘑菇意粉，黑松露同蘑菇嘅配搭之前都食過，都係我嘅最愛。最鍾意黑松露嘅味道十分香口，意粉採用幼身意粉，質感ok，唔會黏埋一舊，食落都幾爽口。飲品款式都幾多，由於夏日炎炎揀咗款冰鎮檸檬茶罐裝飲品。埋單二百幾蚊除開一個人都係百幾蚊但係食到超級飽，豐富得黎算係幾抵食。…查看更多

好耐都未有打邊爐，今日突然有呢個念頭。雖然天氣有啲熱，但橫掂係室內冇有怕，一於同個friend打邊爐！呢間火鍋店係第一次既，火鍋店嘅環境唔算非常大，但係坐得寬敞，有幾部電視睇都算係咁。星期日夜晚嚟到，雖然冇訂位，但係好好彩唔使等。火鍋店嘅鍋底有唔同款式嘅雞煲，有重慶雞煲鑒胡椒雞煲等等，而最好就係可以揀唔辣。不過食雞煲就梗係要食辣㗎啦。不過同行嘅朋友始終鍾意傳統火鍋，所以今次點咗皮蛋鍋底，清香得嚟唔會好咸。我地點左手打四寶丸，分別有牛丸、蝦丸、墨魚丸同埋黑墨丸，每款肉丸兩件。其寶可以專點某一種丸，但係四寶丸咩都試下係唔錯嘅選擇。的丸都幾大粒爽口彈牙。另外點咗自家製響鈴，一共六件。雖然明知好邪惡，但係見到隔離枱點又忍唔住想食。其實仲有芝士響鈴，叫做「自創爆芝響鈴」，幾特別，下次有機會都會試。另外點左生蠔，一共五件。生蠔好大嚿，不過啱啱攞出嚟仍然硬身，要解凍擺一陣先至好放落去。野飲方面，個人比較喜歡傳統罐裝嘢飲，冰涼暢快。…查看更多

同屋企人喺醫院覆完診之後，即刻喺附近搵好嘢食。喺OpenRice 到search下，原來發現河畔附近有好多好嘢食。佢想食日本菜，於是我哋就揀咗和氣食堂啦。閒日八點半鐘，都坐得幾full，好彩仲有一張枱，唔使等位就可以入座啦。大盛刺身丼用料十分豐富，有三文魚，油甘魚，拖羅蓉，海膽同埋大蝦，賣相吸引。我最鍾意就係拖羅蓉嘅清新口感，而海膽亦味道新鮮，送飯一流。一開始見到一碗cream狀嘅食物，都唔知原來就係白咖喱烏冬，攪勻之後先見到啡色嘅咖喱同埋烏冬。日式咖喱甜得來唔會辣，加上白色嘅泡泡cream，口感十分獨特，最啱配埋香口而肉質鮮嫩嘅炸雞。脆脆三文魚片香口得嚟脆卜卜，係開胃嘅小食。燒日本廣島號蠔有兩款煮法，分別係芝士同埋蒜蓉，芝士嘅香濃蒜蓉嘅刺激，各有特色。兩個人加埋400蚊都唔駛，算抵食，夠哂「和気」！…查看更多

ASAP 一向都係我喺第一城食野嘅心水餐廳之一。返完通宵後，即刻同同事食lunch 醫肚先返屋企補眠。假日中午通常要等位，不過咁啱好彩今日唔駛等位就入得。餐牌上好多野食都好吸引，不過受到餓意同睡意夾擊嘅我哋，就叫咗最邪惡嘅吉列同埋咖哩喇！🤤🤤栗米湯加北海道牛奶令個湯更滑更creamy，夠特別。外面攝氏35度高溫，梗係要飲杯凍朱古力涼下醒神下。咖哩吉列豚肉滑多蓋飯，豚肉熱辣辣得嚟夠肉味，外皮烤得香口唔膩，加上醒胃嘅茄汁同滑蛋撈飯，成件事好March！咖哩吉列牛肉撈烏冬都唔錯，吉列皮有少少「林」，不過香嘅牛肉味搭夠，咖哩撈煙韌嘅烏冬，，又係好快就食哂落肚喇！午餐連加一每人100蚊左右，可以食到質素頗高嘅午餐，算係咁。…查看更多

夜晚喺城門操完龍舟，去到屋企附近搵野食、不過時間太夜，第一城宵夜冇咩選擇，就去金禾閣坐低食宵夜。金禾閣係第一城唯一開到凌晨嘅茶餐聽，所以就算去到12點都有唔少住喺度嘅居民幫襯，喺度食宵夜。乾炒牛河都算大碟，不過牛肉份量唔多，河粉就夠多喇！穫氣就一般般，唔算太咸或者太多油。我朋友就點咗咸魚雞粒炒飯，可以炒得唔夠耐，有d飯仲係凍凍哋，而且味道比較淡，不過飯嘅份量真係好多，一個人都未必食得哂！兩個人加埋$100有找，而且食到飽哂，算抵食，不過味道就麻麻地，有改良嘅空間。…查看更多

難得佛誕有假放，而且係史上最熱嘅佛誕，所以就入馬灣，去沙灘游下水消暑。夜晚就去到沙灘隔離嘅cafe Roma 睇住夜景食西餐。餐廳有室外同室內用餐區域，因為天氣太熱，我哋預先訂咗室內靠窗嘅位置所以可以一邊涼冷氣一邊欣賞外面嘅夜景。一大張雙面印刷嘅menu，精美得嚟又易睇。先嚟嘅係黑松露鴨胸扁意粉，黑松露係我嘅至愛，香味十分濃郁，鴨胸有嚼勁，而且煙燻味同黑松露味好夾，十分美味。鍾意食黑松露嘅朋友必試！跟住就係叫無肉不歡嘅薄餅，薄广餅餅底好薄，不過冇想像中咁脆，餡料有辣肉腸，牛肉粒，蕃茄芝士等，不過味道略微較淡，唔夠豐富。最後就係肉眼扒拼薯條，肉眼扒煮至約6成熟，牛肉味向口感恰到好處，而且十安士份量夠二人分享，值得推介。晚餐二人約$600，可以喺如斯美景外享用浪漫而美味嘅晚餐放回零部件你一個難忘嘅用餐體驗。附送青馬大橋夜景照一張：…查看更多

喺週日嘅中午，我同朋友嚟到位於d2 place嘅呢間little break cafe。 呢度裝修有文青氣息，可以打卡影相，位置係地舖，容易搵到﹐地鐵站行過去一分鐘，非常方便。係朋友推介我哋嚟食嘅，今次第一次試都幾滿意。週日嘅menu有大概八個套餐，每個套餐160蚊左右。套餐啲名好吸引，唔同食材組成食物嘅名稱，令到胃口大開。首先點左一個飽肚啲嘅大蝦珍珠帶子龍蝦忌廉汁扁麵，聽個名都非常吸引。有三隻大蝦，非常爽口彈牙，帶子大大粒，好有口感，忌廉汁香濃，配麵一流，而麵嘅份量可以接受。除咗麵之外，仲叫咗個脆炸軟殼蟹松露野菌意大利飯。炸軟殼蟹大大份，賣相吸引，配埋黑松露野菌飯，值得推介。無論你係唔係鍾意食黑松露，都會畀啲香味令你無法抗拒！因為係幾個朋友 share食物嘅關係，叫咗啲容易分嘅食物。藜麥煙三文魚千島沙律醬薄餅就適合不過啦。薄餅薄身，除咗三文魚之外仲有啲香橙，望落去色彩繽紛，加上有沙律汁，賣相一流，三文魚好新鮮。加15蚊配黑松露沙律醬炸薯條。身為薯條迷，最鍾意都係厚身薯條。呢一度嘅薯條就滿足到我啦。另外套餐跟一杯嘢飲，平均每人埋單180蚊到，性價比唔錯，唯一唔好就係食嘢有限時，想坐耐啲嘅朋友就要注意下啦。…查看更多

到鳳凰山睇完日出後，我哋就落咗去長沙沙灘同陽光玩遊戲。玩到肚餓就係呢間位於海邊嘅西餐廳到食晏。可能係假期嘅關係，人數都幾多，我諗如果唔多人嘅話，就可以坐沙灘旁嘅位置，可以一邊吹吹海風，一邊飽覽長沙沙灘嘅風景。🏖我哋點咗Wagyu Beef Salad, House cured salmon 同埋fish and chips Barramundi. 玩到口乾，當然要整返杯cocktail歎下啦。🍸Mojito 酒精味唔太濃，但勝在夠清新同夠凍，簡直透心涼。而high tide 就比較甜，唔太啱我嘅口味。和牛沙律入面嘅和牛雖然唔多得小塊，但真係有和牛嘅質素，充滿牛肉香味之餘，亦入口即溶。沙律菜略嫌比較苦澀，好在有沙律醬中和一下。👍🏾而三文魚沙律，三文魚片數量好多，滑得來又唔肥膩，十分配合夏日之中，身處海邊嘅氣氛。☺️主菜就係用盲槽炸起嘅魚柳加薯塊，最驚喜嘅地方係魚柳十分大塊，外皮薄而香脆入邊嘅肉萬物雪白咬落又熱又或充滿與嘅香味同事未質素相當之高，值得推介。🌟🌟呢個午餐＄800有找，既可以享受沙灘海景外國嘅風情同埋美食係一個多元化得意高質素嘅享受。下次再嚟呢個沙灘可以再試其他嘅菜式。😋…查看更多