Wanda_為食妹's Profile

近排食得太多熱氣野，想食D清淡既食物。同男友叫左及第粥、菜乾豬骨粥、油炸鬼同豬肝腸。菜乾豬骨粥鹹左D，及第粥好野味，整體D粥都煮得好綿。豬肝腸既豬肝好爽，剛熟，好味。係香港想食到咁有水準既粥品已買少見少。…Read More

行經過，見咁夜仲好多人去食，建議男友去呢間食，因為附近既食店，空空無幾。見到二人餐只係$140,有三款湯可選，我地一齊揀左鹹蛋芥菜肉片湯，咖哩牛腩煲同馬蹄魷魚蒸肉餅。估唔到佢黎左一大碗湯，有4小碗，味道唔錯，食材新鮮，份量好足。咖哩牛腩煲煲得好冧，唔黏牙，好多件，而且好大塊，啖啖肉，至少唔會菜多肉少。馬蹄魷魚蒸肉餅好大份，豬肉好新鮮，不過有點鹹，食唔到有魷魚，有點失色。飯後仲有2碗甜品，今次係腐竹糖水，店員話唔一定有，要睇下該日派曬未。原來理工學生去食會有優惠。…Read More

放左工諗住去許留山食D野，唔想外賣，因為腳仔軟想坐住食。打算坐住飲楊枝西米撈($39)，佢話只有外賣，堂食只有特飲不足十款，每款要$42，選擇太少。舉左手好耐，個待應寧願招呼入面既客都唔理我，之後係廚房做緊野既人見我舉左咁耐手於是過黎想服務我，比果位待應趕返入廚房。我叫左杯超多西米芒，佢叫我加$22試新甜品，見人食，得小小一杯仔，份量太少了。杯野又話係大杯，我又唔覺，似中杯，入面有西米、椰汁、芒果粒。整杯都太甜，啖啖糖，想唔肥都幾難。本身想買返杯楊枝西米撈外賣回家，最終都係打消念頭。…Read More

返工時放飯正好係下午茶時間，見到豬仔包餐幾吸引，F2餐:豬仔包+榨菜肉絲米粉配熱飲(選左奶茶)。豬仔包外脆內嫩，好大個，入面有成塊豬扒，好大件，彈牙又多汁，配上惹味熟洋蔥，簡單得黎好惹味。由於下午茶當正餐食，單食一個包唔夠飽，所以選呢個配搭，米粉賣相如水牌一樣，可惜成碗都好鹹。奶茶夠濃，飲完唔會肚痾，合格。媽說那裡的咖啡也不錯，有機會再試。…Read More

同男友行街，一路上都搵唔到甜品店，終於都比我地見到一間，附近甜品店真係唔多，而且人流少。店鋪暗暗、陳陳舊舊的，但都入去一試。叫左芋頭紫米露、喳咋同涼粉黑糯米，全部要凍的。芋頭紫米露，成碗水咁，稀到不得了，一向食開紫米露係黏黏的，呢碗芋頭歸芋頭，紫米歸紫米…紫米口感好粗糙，好難入口，芋頭硬硬地，冇芋頭味，甜度尚可。喳咋太甜，食落酸酸的，有點變味，似隔夜買唔曬返煲再賣，仲驚見有成個一蚊銀咁大既焦物，太得人驚。涼粉黑糯米，太稀，同芋頭紫米露差唔多情況。味道同質素咁差劣，而且價錢偏貴，平均一碗要接近$30黎換一碗難以入口既甜品，真係以後都唔會光顧。…Read More

平時點幾經過果間好多人去食，特別係OL,應該新開無耐。今日去左試食，入左去覺得裝修得幾靚，店面四面貼滿食物及價錢，明碼實價，食物款式少，免加一，茶位每人$4。2人叫左5碟，$14-21,叫左楊枝甘露、牛肉腸、燒賣、粉菓同雞扎。楊枝甘露好稀，料少，好普通。牛肉腸，腸粉皮夠滑不太厚，但牛肉料粉太厚。燒賣唔錯，夠大粒，份量足，有成條蝦在內。粉菓較普通，但材料幾新鮮，胡椒粉放得唔多。雞扎唔錯，裡面有片豬肚、豬皮同雞扒肉，件雞扒肉幾好味。PS:果度好迫，每個位以及對面位既空間好有限，食野時食物無乜地方放，特別係一次黎三至四樣食物，食得好有壓迫感。食物整體好味，味道調得好，唔太油、唔甜，較健康。…Read More

今次去食，選擇多左好多。飲品方面:黑糖薑茶(罐裝)，味道唔錯，同親自煲既無分別。熱綠茶飲落似水，無綠茶味。今次唔敢飲奶茶，怕拉肚子。食物方面:豬骨拉麵味道普通，但出乎意料咁咸，係極咸。炸物都係咁正，今次多左朱古力棒棒，外軟內包住朱古力漿，味道一流;魚塊年糕，食唔出係魚塊，但口感好正，外面彈牙，入面芝士都好彈牙;蔗蝦好彈牙，但多食會覺咸。吉列蠔食落發現內裡全是綠色物體，即內臟，好濃香，但咁仲叫吉列「蠔」?日式鰻魚炒飯炒得好香，好夠火侯，但好油膩，而且唔係好食到鰻魚，內裡既三文魚反而多，有點莫名其妙。三文魚刺身同帶子刺身最正，好鮮，三文魚肥瘦適中，帶子好鮮甜，象拔蚌好爽但好腥。燒雞翼唔太熟，中間出血。今次醬汁茄子太油膩，冇醬汁。Wasabi芥蘭好正，淡淡既Wasabi味，芥蘭好爽脆。馬拉盞通菜夠惹味，辣辣的，通菜份量夠多，但食到底部好咸。PS:今次整體肉類好咸。食得好滯，但滿有新鮮感，菜式增加左，新款既味道唔錯。今次先發現原來有自助甜品---雪糕。有我鐘意食既紅豆味(有紅豆粒)及芝麻味。…Read More

行完山去食早餐。叫左蛋白麥皮、蛋治及奶茶;通粉、煎蛋配魚柳及奶茶。蛋白麥皮得一小件蛋白，麥皮少，淡而無味。蛋治蛋滑皮新鮮，只有呢個好味。奶茶極難飲，難以入口，鹼味好重。通粉硬了點。煎蛋賣相唔錯，蛋黃好漏。魚柳焦了點，但幾嫩滑。但論早餐黎講貴左D，食唔飽都要呢個價。…Read More

行經過入去買左杯凍朱古力咖啡。果度太多人，而且入面條路好窄，沿路可行既空間好有限，店外星巴克範圍偏暗，所以行路要好小心。買左杯，等差不多3分鐘，本身想係自助櫃再加點朱古力粉，可惜個樽口太細，好難倒，易改善。朱古力同咖啡味道好夾，而且唔太甜，上層有件cream,整體好夾，而且賣相好。本身腸胃比較敏感，平時唔敢買咖啡或奶茶係街上度飲，因為驚食材唔乾淨而會拉肚子。但自從試過係星巴克買完杯咖啡，飲完之後冇事而對佢既咖啡質素有信心，今次都唔例外。邊行邊飲邊睇維港景色，簡直係賞心怡目。…Read More

今次叫左星期六既日餐:鮮茄斑腩飯配奶茶($39);翡翠雲耳豬頸肉($55)配套餐(加$10，配白飯加熱飲)。鮮茄斑腩飯，意想唔到咁難食，番茄好生，冇乜煮過，有些少紅椒，配上酸甜排骨既汁，好酸，同番茄好唔夾，斑腩炸得太乾太硬，各有各既味，完全唔合格。本身諗住佢會用番茄煮成茄醬或用現成茄醬配鮮茄，再配埋斑腩，應該會幾惹味同開胃，所以先試下叫呢個餐，點知煮到咁，真係大跌眼鏡，完全係意料之外咁難食。翡翠雲耳豬頸肉，即西芹洋蔥木耳豬頸肉，整碟食材尚算新鮮，而且幾惹味，送飯一流，不過芡汁較厚。職員遞上熱奶茶時講左句"小心熱呀"，幾細心。呢間茶餐廳燈光好明亮，整體環境舒服乾淨，可惜內冇設洗手間。餐款缺少左2人餐及4人餐配搭，宜改善。每碟菜要轉套餐都要加$10，每碟菜平均要$60，另加$轉餐，就有點貴，不過轉餐既餸，量冇減少。是日套餐質素好參差，鮮茄斑腩以後唔會再試，一次難忘。…Read More

食完別府覺得仲未見飽，所以去食甜品。店裡古色古香，好懷舊，一入店就聞到好香既窩夫味。於是我地不約而同咁叫左窩夫類。抹茶紅豆窩夫，紅豆份量夠，而且紅豆好大粒好綿。雪糕比較硬，旁邊有件cream,三者合而為一味道剛好。蘋果玉桂窩夫既蘋果醬整得好，黏黏的，蘋果肉煮得綿中帶脆，少少酸，惹味，可惜完全食唔出有玉桂味，今次配左朱古力雪糕，味道幾夾。整體窩夫甜品賣相好靚，份量好足，共有四塊，件件夠厚而外脆內嫩，少食不錯，食足成份就太甜太漏，食完好飽但好口渴，因為紅豆偏甜，雪糕都係，窩夫多食就會覺其實都幾甜。愈食愈有種感覺係好想飲水同好飽，之後就會食得愈黎愈慢。…Read More

今日三人去銅鑼灣經過試食。叫左二人餐，部分飲品買一送一，所以另叫左款飲品，再加薄餅，本想叫四人餐，但未免太多。前菜豆腐胡麻沙律，賣相不錯，但味道比較清淡，嫌醬不夠多及濃，反而洋蔥帶出整個沙律味道，喜歡清清淡淡的人適合食。三文魚粟米千島薄餅值得一讚，薄餅餅薄而脆，醬多芝士夠，賣相不錯。五加刺，即五種刺身，比較腥，有點不鮮，特別係北寄貝及鮮蝦。炸蠔好多汁，裡里有二小粒蠔。野菜鍋普普通通，麵條頗有彈性但分量太少。松葉蟹膏海鮮炒飯，好油，食不出半點蟹膏，但材料同飯一樣比例，分量夠，一拎出黎時香噴噴，多食會好漏。飲品方面，柚子梳打不過不失;青蘋果乳酸係藥水調出黎既，好膠。整體都可以，但個沙律同杯青蘋果乳酸飲品就唔係我杯茶。…Read More

今晚行開太子金魚街，又累又餓，於是同男友入去食晚飯。叫左芝士多士套餐，焗咖哩雞扒飯($45)，焗海鮮飯($55)，配熱奶茶。芝士多士單叫要$26,配熱飲要$33(即熱飲加$7)！焗飯配熱飲，熱飲要加$16(正價)。經店員建議後，叫左芝士多士套餐(配熱奶茶)，二個上述的焗飯，另加杯熱奶茶，埋單總共要成$159，熱飲偏貴。熱奶茶澀左D，奶唔夠滑。芝士多士賣相可以，多士外有一大塊牛油，炸得金黃，內有啖啖芝士，但偏油，食左塊冇咁油既一小部分，炸得夠軟，其餘油淋淋既部分比男友全包。油淋淋既部分男友話係糖漿，見到唔開胃，好似食油落肚咁。焗飯望落好足料。焗海鮮飯，白汁芝士夠creamy,海鮮預左係急凍，冇乜鮮味;炸魚塊有口感，但唔新鮮而且好腥;蛋飯偏硬，最唔新鮮既食材反而係洋蔥，變左味。焗咖哩雞扒飯，咖哩偏辣，雞扒煎得太乾身，冇雞味。…Read More

今日同阿媽行經過試下味。平日下午茶平均每款平$2，免加一，茶位每人$3。今次叫左6樣餸，分量好足料，食得好飽。蝦餃塊皮比較軟，冇口感，一咬即化，蝦肉夠多。香芋鴨扎值得一讚，香芋夠香夠綿夠入味，隻鴨掌夠大隻，食得好滿足。潮州粉菓蒸得過火，入面整體變左啡色，粉皮冇乜口感。叫左個淮山椰子雞炖湯，貼住寫大點，下午茶時段應係$16，但計$18，同店員講但話應該係咁計。個湯清清甜甜，似係分開煮熟，再放入去炖，炖得不夠火候，只有清甜，不夠入味。鳳爪排骨飯幾夠分量，特別係鳳爪，夠入味，飯頗滿，偏硬。牛肉腸唔錯，塊皮夠軟而且不易散，值得一試。不過呢，整體偏甜，所以少食為妙。…Read More

今次又去光顧，其實去親果頭大多去果間食。今次試左個菠蘿油，食返以前既味道，以前小學時每日都會去買個菠蘿包食，都係好柔軟，好香。今次果菠蘿油好正。套餐由30幾至40幾不等，再配中湯及熱飲。今次揀左白汁焗粟米雞扒飯，冬瓜豬骨湯配熱奶茶。每次焗飯分量都好多，唔會因套餐關係而分量減少，好抵食，而且芝士好多，好creamy,塊雞扒雖然煎得可口，但偏咸，而且冇雞味。…Read More