octoyuen的個人專頁

我今日又嚟到石門呢兩個商場搵嘢食，呢度實在太多選擇啦，喺食晚飯之前想食少少小食，所以就決定試下呢間小小嘅犀牛吐司店🤤首先係畀佢嘅精美外觀吸引咗，整體感覺好台式嘅美感，就連個包裝都係貫徹始終咁精緻💜今次我哋揀咗試嘅嘢係台式吐司最常見嘅芋泥肉鬆蛋吐司，預先切開兩份適合情侶或者朋友一人一半❤️ 開頭以為會係香脆嘅麵包，點知原來佢係行軟熟路線，同芋泥好合拍，但係再加上香口嘅豬肉鬆，就令成個吐司無論味道同口感方面都好有層次感，幾樣簡單嘅嘢加埋，竟然變成食完好有滿足感嘅吐司😁 而且即使係吐司佢都仲有好多款揀，下次我一定會試下其他👍…查看更多

最近各大商場都推出好多優惠，所以今次我都專誠來到屯門市廣場，買嘢兼食好嘢👍今次嚟食屯門市廣場嘅牧羊少年咖啡館嘅下午茶時段，呢度餐廳採用落地玻璃，陽光充足，再加上充滿藝術感嘅裝修擺設，係一個放鬆用餐傾下計嘅好地方，用餐時間係1小時45分鐘，有充裕嘅時間品嚐美食同傾計休息，冇諗過喺大商場入面都有咁休閒嘅地方👍首先想講鮮忌廉黑松露長通粉，平凡嘅外表但一入口真係好有驚喜，鮮忌廉濃郁口感，面頭灑上芝士碎，完美配合菇菌同通粉，清香黑松露香味，值得一讚既係用洋蔥蒜蓉令整個味覺可口感提昇👍炸法國雞翼熱辣辣外皮香脆，入面鎖住滿滿嘅肉汁，伴隨著香草嘅香味滋味無窮😋番薯條脆口香甜，配上乳酪醬啱啱好中和油膩感😎藍莓乳酪口感濃滑又飽肚，配合埋藍莓竟然有啲醒胃，鍾意飲乳酪一定要試，提醒返鍾意飲凍飲嘅記得唔好走冰，因為走冰真係會唔凍ga😆下次會試下其他唔同嘅分店，再有機會分享下😁…查看更多

係一個平日寧靜下午嚟到西營盤，搵到呢一間簡約日式格局嘅小店，原來係一間專食日式三文治嘅快餐店~首先喺簡而精嘅Menu上揀選心儀嘅包，每個包加十蚊就可以升級套餐，有一款小食仲要加埋一杯嘢飲🤩今次我想推介嘅係黑松露炒雙蛋包😋呢度三文治嘅麵包係即叫即焗，外面鬆脆入面保留到鬆軟，soft bread已經為佢加咗唔少分數👍麵包入面嘅係滿滿嘅黑松露香氣嘅香滑炒蛋同芝士，味道配合得啱啱好唔會過膩，滿足又飽肚☺️熱辣辣又厚實嘅粗薯條，一定要點佢哋提供埋嘅蛋黃醬，更加突出香脆薯條嘅味道😊再飲埋茉莉花茶，茉莉花嘅香氣襯托休閒嘅下午~總括嚟講佢哋絕對係「用心做包」，有機會一定會再返嚟☺️…查看更多

一直都聽過元朗有一間專食蛋治嘅專門店，每一次經過呢度都心大心細想試，不過通常都會因為價錢方面而放棄，係今次又再禁止晚市堂食嘅情況，終於決定試下！呢度果然真係蛋治嘅專門店，各式各樣味道嘅蛋治都有，連皮蛋肉鬆都畀佢納入做蛋治嘅食材，好得意😆 不過因為今次係第一次試所以好保守咁樣嗌咗鮮油芝士肉鬆炒蛋治😋呢份蛋治用一大個飯盒裝住，身為一個雞蛋關注組成員，一打開個盒蛋治嘅賣相真係好驚喜，金黃色晶瑩通透嘅炒蛋上面灑滿芝士碎，完全顛覆我最初聽到蛋治嘅想像😆果然係專門店，炒蛋真係炒得非常香滑，栽培上面頭嘅芝士同埋肉鬆真係非常夾，滿滿嘅炒蛋入面埋藏著方包，方包只係配角，炒蛋同配料先係主角😂 最初覺得呢個價錢食蛋治有啲貴，但係試過就發現真係呢個質素真係值得嘅😁…查看更多

今日經過柴灣想嘆番個下午茶，今次嚟到呢間日式餐廳個地點比較特別，冇諗過呢間餐廳竟然係位於柴灣體育館嘅一樓，都係經美食地圖app先搵到~上到嚟下午茶時段唔多人，環境亦都好舒服寧靜，真係冇諗過體育館入面有一個環境舒適嘅餐廳😆 今次我嗌咗佢哋嘅炭燒雞扒輕怡丼再加佢哋嘅熱咖啡，飯嘅面頭放滿咗紫菜同埋玉子絲，最啱撈埋啲飯食，賣相同味道都唔錯😁 佢哋嘅咖啡都係即磨嘅，所以嚟到一定要試下☕佢哋嘅裝修係以動漫為主嘅，鍾意動漫嘅朋友一定會搵到你認識嘅人物😆絕對係下午茶上嚟坐下休息下嘅好地方👍…查看更多

呢間位於荃灣千色匯嘅牛摩，之前已經率先試過佢哋嘅午市火鍋，平時佢哋嘅晚市都係人頭湧湧，今晚難得嚟到唔使等位，黑夜時間九點後仲有優惠，一於就打個新年邊爐！👏佢哋嘅餐牌九點前同九點後價錢，平日同假期係唔同嘅，今次我哋食嘅係公眾假期九點後黑夜時段，嗌咗豚肉加雞肉放題都只係$119一位🤩 九點前用餐時段係90分鐘黑夜時段只可以食60分鐘，但係對我哋食得快嘅人嚟講都係都夠嘅🤣湯底方面今次試咗壽喜燒同埋港式沙嗲湯底，食物種類都有好多冷凍配菜、壽司、甜品、蔬菜、丸類呢啲都係唔少得嘅~十分驚喜嘅係原先以為肉類係冇放題嘅，但原來雞肉同豬肉都係可以任叫㗎😱😱呢個價位嚟講真係非常抵呀！特別要讚嘅嘢食係佢哋嘅雞肉，非常嫩滑！丸類方面我十分推薦夾心芝士豆腐，平時好少機會見到，豆腐中中間有芝士夾心，打邊爐食呢個真係一流！蔬菜方面好多種類揀，特別推薦皇帝菜，鮮甜爽口，食肉之餘食多啲菜balance一下😁 兩個人的連加一都只係$262，店員服務仲要好好，下次有慶祝一定再嚟試👍…查看更多

最近係屯門華都開張嘅紅米，一直都冇機會試，今日終於有機會食佢哋嘅晚市喇~餐牌上面嘢食嘅種類好多，由意式西餐、鐵板飯、石鍋泡飯、去到雞煲同麻辣火鍋都有🤪 實在有選擇困難不過最後揀咗牛肝菌田園意大利燴飯試下！燴飯口感係非常Creamy而且奶香十足，配上牛肝菌嘅香味感覺好融合，仲配上西蘭花，份量亦都唔細碟，都真係抵食冇失望嘅~😋加八蚊係可以配牛角包、沙律、湯或者嘢飲，不過今次冇加到~下次已經決定嚟試埋佢哋嘅台式火鍋😁…查看更多

小巷驚喜午市日式飯！今日係聖誕後嘅紅日，好多餐廳同cafe都塞滿人，所以搵嘢食搵到嚟女人街~ 嚟到呢度搵到一間食日式丼嘅專門店，入面唔係好多人所以就揀咗呢間啦😆佢哋呢度特別有午市飯選擇，今次我叫咗唐揚雞丼，原本都係抱住單純食飽嘅心態，但呢個唐揚雞丼嚟到之後，賣相非常有驚喜！唐揚雞丼嘅正中間有一粒炸咗嘅溏心蛋，邊邊舖滿新鮮炸起嘅唐揚雞塊，入面有生菜絲，面頭擠咗滿滿沙律醬同埋香料🤩 除咗賣相有驚喜之外，味道方面都係高水準，唐揚炸雞新鮮炸起非常香口，你再配上好多沙律醬味道再昇華，更加特別想讚嗰粒炸咗嘅溏心蛋，外脆內軟非常好食而且有心思！😋除咗唐揚雞丼都嗌咗天婦羅，味道一樣都係唔錯㗎！食得太興起唔記得影相😂 呢間絕對值得一試😁…查看更多

踏入初冬，晚餐往往都會想食一啲溫暖嘅食物，喺旺角女人街嘅小巷入面就有呢一間非常熱鬧嘅一生懸麵，menu入面嘅拉麵賣相好吸引，所以都唔介意等一等👌呢間拉麵店同時有沾麵同拉麵，因為有部分湯拉麵已經賣曬，所以今次我嗌咗同樣我都鍾意食嘅濃厚豚骨沾麵🤩期待已久嘅濃厚豚骨沾麵嚟度，麵同埋湯汁都係熱辣辣嘅，湯汁果然真係如名一樣，非常濃厚！而且湯汁分量好足👍最驚喜就係嗰嚿日式叉燒，肥瘦適中而且煮得好冧，肉汁有鎖住喺叉燒入面👍入面嘅環境感覺好似真係去咗旅行咁，感覺溫暖♥️…查看更多

今晚又嚟到深水埗馳名嘅康瑞甜品，即使咩事都冇無阻呢度嘅客似雲來~ 今次來到我都係嗌最出名嘅仙草百配，仙草同芋圓小丸子等嘅配料比例恰到好處，滋潤可口👍 呢款招牌先做法配只有凍同暖兩種選擇。另外我朋友嗌咗嘅桂花配，一樣都係有水準，酒釀香氣配上蛋花，絕對係清甜清新之選！😋另外今次我仲試埋佢哋嘅糖不甩，令人印象深刻嘅軟糯口感搭配十分香口嘅花生椰絲粉~ 以上都係72蚊埋單，十分抵食！😝…查看更多

唔係嚟過都唔知九龍灣有一座商場係美食雲集嘅！今日嚟到九龍灣德福商場附近嘅Eastmark搵正嘢食😋 雖然有好多嘢揀但呢一間，以蕃茄濃湯為主嘅Red Object就最吸引我，健康同美味我全部都要！覺得番茄同牛嘅配搭係最match，所以我就揀咗蕃茄湯牛肩胛烏冬，個烏冬一嚟到個蕃茄湯底濃稠度好高，你就已經知道一定係食到連湯都冇剩先得😁 蕃茄濃滿滿咁樣混和咗喺個湯度，每一啖都係滿滿幸福番茄味♥️ 牛肩胛肉肉質鬆軟，賠償番茄湯更加襯托出鮮牛肉味~ 雖然價錢唔算平但係質素對得住👍…查看更多

今日有機會喺長沙灣做嘢，終於有機會食呢一間喺荃灣一直試唔到嘅和順記~長沙灣呢一間分店人流比較少，可能因為位置比較隱蔽。和順記最出名嘅係佢哋嘅神級雞髀皇，而且今晚非常肚餓，所以今次嚟到都嗌咗生炸雞髀煎蛋飯🤪 個飯嚟到真係嘩一聲，隻炸雞脾真係足足有成隻手掌咁大，表皮十分香脆，而咬落入面嘅肉質好juicy唔會乾，完全鎖住晒入面嘅肉汁，好邪惡！餐飲方面，熱飲唔需要加錢👍總括嚟講呢度嘅炸雞髀煎蛋飯適合大胃王而又有要求嘅一族！👍…查看更多

受街坊歡迎唔係冇理由嘅台式餐廳👍 今次嚟到屯門海麗花園食台灣嘢，我想講係呢間小店確實好受街坊歡迎，竟然係等外賣嘅人仲多過堂食，結果我哋食咗一個蓮藕餅肉燥飯同埋一個排骨酥肉燥飯，呢個餐係50蚊仲包嘢飲，真係大大件夾抵食，蓮藕餅一直係我必叫嘅，變得非常香而且唔油，份量亦夠足👍排骨足足有五塊，我覺得排骨嘅味道啱啱好，唔太鹹亦都唔會油淋淋，而且肉燥同飯嘅份量仲要非常之多，仲要有菜。整體嚟講乾淨企理，性價比滿分🙌…查看更多

今次嚟到屯門安定呢間加藤屋分店，平時嚟加藤屋食嘢嘅我都係食牛肉飯嗰類，今日入到嚟唔想食飯，天氣涼涼地想食啲暖啲嘅嘢，就畀我見到加藤屋原來有雜炊系列，睇落好似好多料，一於叫呢個過下打邊爐嘅口癮！雜炊係可以揀泡飯、烏冬同拉麵，今次我決定揀雞肉烏冬配壽喜燒湯底👍雜炊嚟到係用熱辣辣嘅鐵鍋上，入面除咗雞肉湯烏冬之外，有椰菜、金菇、雞蛋、獅子狗、蟹柳、木耳絲、粟米，😆 烏冬口感唔差唔會錄漉得太冧算幾彈牙，咁多嘅配料的確滿足到打邊爐嘅口癮，有菜有肉算十分之豐富，$43嘅價錢咁豐富仲要配埋汽水，實在係算抵食👍…查看更多

滿足的黃金意粉下午茶👍其實黃金冰室就喺我屋企附近，今日去食嘅係位於石蔭嘅黃金冰室，係香港咁多間近年開嘅冰室嚟講佢口碑一直都好，終於有機會再食🤪今次嚟到都係試下午茶，今次嗌咗$42嘅蛋黃卡邦尼蜆肉燴意粉，喺茶餐廳食卡邦尼意粉有蛋黃實在係好少見，一於試下👍卡邦尼意粉嚟到真係有一隻色水好靚嘅蛋黃喺頂，另外衣粉入面仲有好多雜菌炒埋，雖然係鮮肉燴意粉但蜆肉唔多，不過本人好鍾意食雜菌而且呢一碟入仲唔少，所以我都ok😆 卡邦尼汁加埋蛋黃，好Creamy好濃郁，雖然唔係完全傳統西餐嘅味道，有少少港式嘅感覺，但係茶餐廳可以做到呢個口感，實在係唔錯👍…查看更多