fatwestfoodie的個人專頁

北角開左好多餐廳，今晚就俾呢間台灣餐廳吸引左，簡單裝修加燈光招牌，就入咗去食晚餐，環境都幾闊落，而且冷氣好足，足到坐就來都有啲凍🥶呢度有主食、小食、湯品仲有甜品，俾我可以懷念下台灣嘅特色小食。我哋兩個人嗌咗四樣嘢食，分別係小巷弄半筋半肉滷肉乾拌麵、蚵仔煎、起司蛋手抓捲餅、仲有甜品蘆薈芋圓仙草凍😋 仲每日叫左杯輕芝士岩鹽奶蓋茶，先講個野飲，好似平時啲台式飲品店，好快就已經有，個芝士奶蓋好香，唔會好甜，配埋我個抺茶都好好飲。之後主食上菜速度都好快，首先講吓個麵半筋半肉滷肉乾拌麵，個肉同個筋都整到好林，入口即溶嘅感覺，滷肉乾拌麵麵或麵唔錯，不過個滷肉再咸啲都可以。起司蛋手抓捲餅係我一樣好鍾意食嘅台灣小食，佢呢度嘅手抓餅味道都唔錯，入面好好菜，口感豐富。我最中意嘅菜式就係呢度嘅蚵仔煎，都有好多隻蚵仔，整到好似台灣夜市嘅味道，而且加埋喺上面嘅甜辣醬，令到成件事升華咗，好食！當然唔少得就係甜品啦，本身都好鍾意食芋圓，呢度啲芋圓大大粒，有三個唔同口味，加埋啲仙草同蘆薈一齊食，口感好正，成件事唔會好甜，啱晒我口味😍整體來講，喺北角大商場價錢算合理，不過以台灣嘢食來講就偏貴，飲品同甜品都值得一試，叫主食嘅話飲品仲會半價添！…查看更多

今日突然好想食泰國嘢，就嚟咗尖沙咀呢間餐廳試吓佢嘅泰國菜。佢喺北京道其中一間大廈嘅上面，同一棟大廈都有其他嘢食。一出獵就見到好友泰國風情嘅裝修同擺設，燈光比較昏暗，但係有好多卡位係落地玻璃隔離，可以望到尖沙咀嘅景色，而且卡位好闊落，應該可以坐到六個人。我就叫咗必食嘅生蝦刺身做前菜，刺身新鮮，配埋佢個汁同埋蒜頭一齊食，有啲辣但係好好食！另外我又唔想食咖喱或者飯呢啲咁heavy嘅嘢食，所以今次就試吓佢推薦嘅鴨肉生菜包，平時喺出邊好少有鴨肉配生菜包食，嚟到嘅時候配料充足，拎咗幾羹鴨肉落個生菜度包埋食，除咗食到泰國香料嘅味道之外，都有淡淡的鴨肉香，都幾特別嘅配搭。因為呢兩碟嘢食都係比較辣，所以我就帶咗一杯番石榴沙冰，解辣之餘又可以有種清新嘅感覺，而且超級大杯好抵飲，番石榴嘅味道都好出，不過可以少啲甜味。最後當然唔少得食泰國最出名嘅芒果糯米飯啦！佢個芒果糯米飯係有普通糯米同紫糯米，仲要大大碟，一個人食嘅話都真係會太多，椰漿配糯米仲有鮮甜嘅芒果，一齊食落口真係好滿足，不過如果怕甜嘅話就可能未必鍾意，整體價錢係呢個環境下算係幾抵食，如果想約朋友係一個清幽小小嘅環境，又可以望到靚景嘅話，呢間餐廳值得推介！…查看更多

尖沙咀厚福街出名多野食，俾呢間喺轉角位嘅台灣餐廳吸引，門面同裝修都比較簡約，有啲古早味嘅感覺。店員都非常有禮貌，入到去可以先坐低睇咗食咩再出收銀落單，我今次就叫咗餐牌上面推薦嘅幾樣食物，分別係蒜汁雞絲冷麵、炸豬扒肉燥飯、麻辣海蜇雞絲、以及食台灣野必備嘅珍珠奶茶。落咗單之後5分鐘內就已經上齊嘢食，真係非常有效率，而且每樣嘢食都非常滿，一定唔怕唔夠食。蒜汁雞絲冷麵個汁非常好味，加埋啲雞絲非常嫩滑，撈埋啲青瓜同冷麵配搭非常好，我自己個人非常喜歡呢個，如果夏天食更加係非常適合。炸豬扒肉燥飯都非常唔錯，炸豬扒會已經幫你切件，非常貼心，個炸豬扒炸得好鬆脆，豬扒肉質亦都唔會好實，肉操上面加咗啲菜脯，撈埋啲飯同肉燥一齊食嘅時候更加有口感同好味。麻辣海蜇雞柳作為小食非常開胃，佢個麻辣食落都幾辣，加埋海蜇同雞肉呢個配搭，味道唔錯。珍珠奶茶同出邊飲嗰啲都差不多，亦都可以選擇甜度同冰量，我自己就嗌左半糖小冰，如果個海蜇覺得好辣嘅時候就可以飲幾啖啦！整體食物味道都很好，而且性價比高，就好似去咗台灣咁，地道得黎冇一啲浮誇嘅擺盤，值得一試！另外都見到餐廳設立自助外賣機，如果想買外賣就唔使排隊等落單啦，非常方便！…查看更多

今日行過鰂魚涌比呢一間飲品店吸引咗，Nuttea之前都見過朋友飲過，所以一直都好想試吓，其實自己本身對堅果冇特別大興趣，但係竟然今次一試難忘😍環境都好靚，我俾門口嘅slogan「堅持做對的事」吸引，咁門口就有寫咗佢哋用啲咩類型嘅堅果，亦都有寫到人氣推介嘅冷熱飲品，今次我就試下每日得100杯嘅伯爵朱古力堅果奶蓋茶，原來仲要係台灣奶茶節2019年嘅金獎，相信味道一定有保證！飲品亦都可以根據自己喜好揀選甜度同冰量，所以我就嗌咗無糖少冰嘅選擇😙初初以為堅果奶蓋會好似平時啲台式飲品咁樣，點知原來佢望落冇咁流質，感覺比較似雪糕嘅質感，杯蓋上面有教你用唔同方法去品嘗味道，45度打斜飲就可以飲到好香濃嘅伯爵茶味加少少朱古力堅果奶蓋味道，我非常喜歡呢個伯爵茶，之後就我以用飲管一齊飲個奶蓋同茶，更加容易飲到個朱古力堅果奶蓋味道，先講吓個奶蓋味道，佢唔會係好甜好膩嘅奶蓋，仔細品嚐仲會食到入邊啲堅果碎，朱古力味道尚算濃郁，想像唔到佢唔係真正嘅奶整出嚟，如果對牛奶敏感嘅人真係多個選擇，佢個質感都好特別，我比較喜歡將成個朱古力堅果奶蓋撈埋伯爵茶一齊飲，就好似變咗伯爵朱古力奶茶，我相信就算本身唔鍾意食堅果嘅人都會愛上呢杯飲品！既環保又健康嘅飲品，值得一試！期待下次再嚟試吓熱飲😝…查看更多

呢間咖啡店係喺一間位於尖沙咀嘅酒店大堂，個概念最新穎，將咖啡店同酒店大堂融為一體，就算唔係入住酒店都可以喺度坐低嘆杯咖啡食啲小食，感覺非常特別。中午時間去都幾多人等位，如果大家要來就可能早過check out時間嚟會好啲！我自己就嗌左一杯熱Cappuccino同餐牌上推薦嘅蟹肉芫荽牛油果多士，咖啡就一般，總好過一般酒店入邊嘅咖啡，反而蟹肉芫荽牛油果多士令我有驚喜，本身對芫荽冇乜特別好感，佢同啲蟹肉撈埋一齊，唔會搶咗蟹肉嘅味道之餘又發出淡淡的芫荽香味，配埋牛油果同多士，食落口個口感豐富，而且有唔同味道散發出嚟，亦都唔會互相影響，整晒俾我感覺驚喜，如果下次再嚟我會再食呢個，亦都希望可以試吓呢度去出名嘅Tiramisu！…查看更多

尖沙咀韓國街真係有好多韓國餐廳選擇，今日特別想食韓燒，就入咗一間望落比較平少少嘅餐廳，本身都驚會中伏，但係竟然比想像中好！呢間餐廳都係有韓國人打理，入到去多數客人都係韓國人，感覺上都係正宗同信心嘅保證，我哋兩個人嗌左一碟護心肉同一碟牛舌，另外再嗌左一碗雪濃湯。阿珠媽非常好客，啲嘢食一上枱嘅時候就係咁幫我哋燒，搞到我哋都有啲不知所措，差啲10分鐘內就燒晒兩碟肉，好彩我哋叫停咗佢，同佢講我哋會自己燒😂 燒肉味道都正常，我自己就個人比較鍾意包菜食，加埋嘅泡菜同白飯，一啖放晒落口，非常有層次同唔同口味😋另外雪濃湯味道非常濃郁，撈飯食或者就咁飲都好正，冬天呢啲天氣飲碗湯，成個身都暖晒！整體價錢可以接受，餐廳環境都好有韓國氣氛，真係好似置身左係韓國嘅燒肉餐廳咁，當自己去咗韓國😂…查看更多

葵興一直俾人感覺係工業區，好似冇乜嘢食咁，我自己都比較少去嗰頭，原來KCC入邊都有唔少好嘅餐廳，今日就去咗8樓嘅一間Cafe，好日咖啡店本身係喺銅鑼灣搬咗過嚟入邊，超級黃店，門口已經貼咗好多文宣，仲可以俾人隨便拎，要大大力懲罰佢！如果坐出邊吧枱，有落地大玻璃，可以約眼望晒成個葵興嘅景色，一邊嘆住美食，一邊享受咁怡人嘅景色，真心令人享受！我就叫咗呢度最出名嘅爽瓜瓜（花生醬）熔岩手打牛肉芝士漢堡，本身見到覺得花生醬同牛肉漢堡包點樣配搭，點知食落好有驚喜，花生醬感覺唔會太膩，我最怕就係太多花生醬會張住晒個口，但佢呢度嘅漢堡包識落唔會有呢種感覺，而且食食吓都唔覺得係平時食開嘅花生醬，但又會有花生嘅咬口，手打牛肉入味，而且好大塊，配埋粗薯條，非常好味道，一個絕對食得晒！我諗如果你想搵個地方chill下，呢度係幾好嘅選擇，仲有唔同嘅咖啡俾你選擇，一個下午有漢堡包、有咖啡、仲有靚景，真係Good Day!!!!☀️…查看更多

講德國餐廳一定會諗起呢一間！我之前嚟過happy hour飲嘢，但係未試過喺入邊食嘢，今次就特登book咗位夜晚同朋友慶祝生日。餐廳裝修好有西式格調，成間係最搞笑係對面有一枱比較大年紀嘅食客盛裝打扮，講緊係着晒西裝同晚禮服😂仲要帶埋自拍光圈燈瘋狂喺餐廳入邊影相，問個經理佢哋咩事，個經理勁風趣幽默講話佢哋係K”OLD”L，真係笑死我😂我哋嗌左幾樣特色德國菜式，包括唔少得嘅德國豬手、咖喱農夫包、德國大香腸、同埋小食拼盤等等。先講德國豬手，外皮香脆，而豬手肉質感嫩滑，而且非常大舊，配埋啲鹹酸菜一流；咖喱農夫包亦都係我另一個最愛，農夫包好食，而咖喱味濃郁，仲要好多配料喺入邊，可以選擇撈飯食或者dip包食；德國大香腸拼盤有唔同類型嘅香腸，俾你一次過試晒咁多款口味；而小食拼盤都係嗰啲薯條炸嘢，同朋友分享嚟食就夠晒開心！因為要同朋友慶祝生日，本身一嚟到嘅時候已經問餐廳有咩蛋糕，經理就好好咁推介左一個廚房自家製開心果蛋糕俾我哋，而呢個蛋糕大約1.5磅到，仲要係餐牌冇嘅，真係要問啲店員先知當日有冇，而且價錢算合理，仲可以有寫名嘅生日牌同埋現場生日歌播放，所以如果都想同朋友慶祝埋生日，就可以早啲打去問吓餐廳有咩蛋糕。呢個開心果蛋糕非常有驚喜，佢係開心果味嘅mousse，味道唔會太甜，但係就非常有開心果味，仲有啲開心果碎，講真出邊都未必買到呢個質素嘅蛋糕，我同朋友都食得好開心！最令我呢個酒鬼開心係嗰陣做緊德國啤酒節推廣，一個價錢可以去唔同分店度飲draft beer，總共有10杯，初初諗住今次未必飲得晒可以留返下次飲，點知原來今晚咁高興，大家一次過就飲晒10杯500ml啤酒，我揀呢隻德國啤酒麥味適中，自己個人來講幾鍾意，整體感覺好滿意，尤其是店員服務態度，佢嘅風趣幽默令我覺得樂而忘返！…查看更多

鼎泰豐一直都係台灣好出名，不過喺香港就一直未試過，所以今日就試試佢！可能疫情同平日關係，餐廳入邊相對少人，而且餐廳喺美麗華商場，面積都算好大坐，得好闊落，我就揀咗近窗口位坐，咁就可以望到彌敦道同九龍公園嘅景色，咁樣嘆住個茶都非常舒服！由於我好鍾意食小籠包嘅關係，今次就嗌左兩款小籠包，包括係原味小籠包，以及絲瓜蝦肉小籠包，個皮做得好靚，夾嘅時候唔會容易穿，但又唔會太厚皮，竟然絲瓜蝦肉小籠包有驚喜，食落去有絲瓜嘅口感，感覺仲好食過原味嗰個🤪另外都排咗兩個開胃小菜，包括蘿蔔絲伴海蜇皮以及紹興酒醉雞，兩款菜式味道有水準，而且非常開胃，蘿蔔絲伴海蜇皮就口感豐富，而紹興酒醉雞酒味濃郁，非常推介大家試吓。另外為咗飽肚啲都嗌咗一個擔擔面同流沙奶黃包，兩個味道都算唔錯，間唔中嚟食吓都還可以，不過成日食來講就價錢唔實惠，香港會有更多選擇食平啲。…查看更多

平日去大館行吓，都唔算太多人，但係原來啲人都係哂呢間cafe到，入到去之後我都好明白點解大家會坐喺度咁耐！首先一入到去感覺好闊落，裝修非常簡潔日系風，最吸引到我係將非常大嘅木櫈，設計好特別，餐廳分咗室內同室外，如果想打卡影相嘅一定會坐室外，好好彩嚟到可以坐到室外，望住香港城市景，俾一棟棟有特色嘅高樓大廈包圍着，好有香港繁華都會嘅感覺，而自己就置身左係其中，慢慢欣賞周圍嘅城市急速。我自己嗌左Adffogato，而朋友就嗌左熱朱古力奶，店員都好有禮貌，效率亦都好快，其實自己平時比較少飲Adffogato，但呢個絕對有驚喜，佢個雪糕好似牛奶軟雪糕，一加咗啲濃縮咖啡之後，表層即刻溶化，軟雪糕嘅甜味同咖啡嘅苦澀味配搭得十分好，就算平時唔飲濃縮咖啡都會容易接受，而且擺盤好有日系感覺，另外熱朱古力奶都味道濃郁，整體感覺好好！餐廳入邊仲有咖啡豆同埋一啲咖啡用品買，同大館另一間商舖合作，感覺質量好好，外觀好靚，有機會一定再黎！…查看更多

今日晏晝去咗食拉麵，座位都算多，但疫情期間都算坐得迫，同朋友都叫咗黑蒜油熟成拉麵，另外再追加左玉子大阪燒同埋明太子芝士餃子。首先，嚟咗玉子大阪燒，見到個樣有啲失望，只係用咗平時拉麵入邊嗰隻蛋加咗大阪燒啲醬同木魚，咁就$22，食落仲要冇乜特別，個蛋皮好老唔好食☹️ 之後個拉麵就嚟咗，啲湯冇平時啲拉麵咁濃郁，黑蒜油味唔重，另外再加黑蒜油醬料落個拉麵先多番少少黑蒜味，不過舊叉燒同蛋係幾好食，而拉麵嘅質地亦都唔錯😋 明太子芝士餃子係普通餃子上面加咗明太子醬同芝士，同我預期之中有啲出入，不過好足料，啲芝士可以拉絲，味道一般。整體成餐都麻麻地，冇乜特別，如果呢個價錢可以喺出邊食啲更加好食嘅拉麵，但如果想喺東涌搵拉麵食就算係一個選擇。…查看更多

近年深水埗大南街開咗好多咖啡店，好多香港人都會去嘆吓咖啡同打卡，今日去開深水埗當然要去嘆杯靚咖啡啦！今日就揀咗呢間充滿水泥風格嘅咖啡店，仲要係黃店都幾多人幫襯，要等一陣先有得入去坐，入面裝修走裝修水泥風，有一種好原始嘅感覺，唔講都差啲以為係未裝修好就營業xd我照舊叫左杯cappuccino，另外再嗌左一件Bailey Chocolate Cake，咖啡味非常濃，比平時啲奶啡感覺奶味冇咁重，我自己個人就幾鍾意咁耐咖啡味嘅奶啡，蛋糕來講都幾出色，就咁睇個樣以為會好膩，點知食落去唔算話太甜，仲有少少Bailey嘅酒香，比起普通朱古力蛋糕就更有特色。另外朋友嗌左杯caramel latte，個拉花好靚，不過大家試完都覺得味道怪怪的，都係普通奶啡好啲。不過咖啡店來講佢唔算坐得好舒服，可能因為比較迫，而且水泥風，成日都好驚會整到，另外因為疫情關係，要自己帶走用過嘅紙巾，咁大家就一齊留意吓做好佢啦！…查看更多

一直都聽過深水埗有間白布烏冬好想去試吓，本身都好鍾意食烏冬，今日就特登同朋友去試試佢！門口裝修已經好有日本店嘅感覺，午膳時間去都要等一陣位，入到去感覺更加似去咗日本，仲會播埋日文歌，呢排冇得去旅行都可以想像下自己去咗日本，入面座位空間大，坐得都幾舒服，我同另外兩位朋友坐咗吧枱。白布烏冬食法主要分為三大種類，分別係熱湯、暖嘅沾麵同埋凍食，我哋三個人分別嗌左雞肉入熱湯白布烏冬、雞肉入沾白布烏冬同南蠻Curry 沾白布烏冬，我初頭以為係得一兩塊烏冬，但係原來一個餐有七塊，相信都會好滿足。我自己就係食咖喱沾，咖喱味濃郁，不過既然係沾麵，我覺得個汁就可以再厚身啲，就更加可以掛係個麵上面，汁入面雞肉都好食，一塊白有烏冬都好大塊，夾起上嚟都幾難handle，我都係用筷子夾開幾塊先再放落啲汁到，可能食慣咗一條條嘅烏冬，一塊塊嘅烏冬感覺上食麵粉嘅感覺大左，gimmick來講係唔錯，不過我都係鍾意成日食一條條嘅烏冬。朋友嘅熱湯味道唔錯，係偏甜嘅醬油湯底，而雞肉沾白布烏冬個汁同呢個湯差唔多味，睇你鍾意食熱湯定係沾麵。整體來講試一次就夠，食完個gimmick就算了～…查看更多

每次食壽司郎都要有啲心理準備，因為之前兩次去佐敦分店食嘅時候都起碼等咗兩至三個鐘，但係真係好好味所以今次再嚟試吓開咗冇幾耐嘅樂富分店！中午嚟嘅時候已經好多人，比較多係啱啱放學嘅學生同家長同埋大學生，已經有晒心理準備要等個幾鐘先入得，不過今次竟然等咗半個鐘多啲就有位，真係太令人感動！每次店員都會問有冇食過壽司郎，如果冇都會耐心咁教你點樣用點餐，不過我哋已經嚟過就唔洗再學嚕。一黎就嗌左啲自己鍾意食嘅野食，有茶碗蒸、厚切三文魚壽司、特選中吞拿魚腩壽司、同埋壽喜燒牛排壽司，特別推介特選中吞拿魚腩壽司，吞拿魚腩脂肪比例分布平均，感覺上唔會太肥膩，而且魚腩份量十足，唔會係太薄，再者價錢合理，所以我冇一次係壽司郎都會嗌呢一款壽司！其實基本上食壽司呢啲因個人喜好而定，不過壽司郎嘅壽司普遍質素高，呢個價錢食到咁嘅壽司，唔怪得個個都去排隊，最後個人特別推介係佢個芝士蛋糕，芝士蛋糕芝士味濃郁，特別加分係佢上年嘅cream，唔會好似出邊嗰啲咁甜，有一陣好重嘅奶味，配埋個芝士蛋糕食簡直就係Perfect，所以每一次都要預留個肚去食呢個蛋糕。初頭大家食一個鐘會好趕，但係你入座嘅時候已經排到好肚餓，一開始會係咁食，好快就會飽，所以其實一個鐘都係啱啱好，不過排隊時間遍長，除非住附近，如果唔係都係有機會先會再去食！…查看更多

香港人最愛嘅澳洲牛奶公司，除咗佢嘅食物之外，大家最鍾意就係佢獨特嘅服務態度同香港人速度，不過無咗啲遊客，整體環境闊落咗好多，繁忙時間都唔洗排隊，對香港人來講其實都係一件好事！例牌叫左茶餐，「叉燒意、炒蛋、多士」已經係我每一次黎點餐嘅對白，我諗等咗1分鐘就已經上菜，叉燒意粉保持一貫風味，澳牛嘅叉燒比較瘦，不過都好入味，但我澳牛令我最中意嘅就係又滑又多嘅炒蛋，我最鍾意嘅食法就係喺個多士上面加一下火腿，然後再加滿滿嘅炒蛋，咁食就好似自製腿蛋治多士咁，仲要襯多士仲係脆口嘅時候食，真係好好味😋 食到一半已經問你要唔要啦餐飲，今次嗌咗凍朱古力，都幾鍾意澳牛飲品份量，唔洗飲太大杯，份量啱啱好。另外，朋友叫咗燉鮮奶同埋真·腿蛋治，味道都係一樣好好味，保持一貫水準，不過我哋都覺得員工態度變得更加友善，令我哋有啲受寵若驚XD 我哋都係犯賤嘅香港人，反而更加鍾意以前佢地串嘴嘅態度！…查看更多