肥仔奇的個人專頁

廟街嘆完煲仔飯，未夠喉。老婆仔熱愛中式糖水，我就當然開飯APP搜索，最近就係鵝記，縱然只得幾個笑臉，反正一試無妨。甫入店，地方光猛、簡約、乾淨、企理，與廟街一貫邋遢形象截然不同，感覺有如沙漠中的綠洲，深夜十一點幾，店内只有幾位客人，正好坐得鬆動自在。氣温低於廿度，熱食穩陣。我要綠豆沙，老婆仔要渣咋。重要的事情寫在前面，店舖凌晨打烊，臨收舖前大半個鐘點嘅熱糖水仲係滾熱辣嘅！坊間不少糖水舖賣嘅所謂熱糖水，繁忙時間都只係暖嘅！糖水夠熱，好感大增。試一口綠豆沙，不得了。濃淡甜度適中，臭草、海帶、果皮應該要有嘅都有，最緊要係真起沙！坊間不少糖水舖將一碗綠豆沙整到水還水、沙還沙，搞到好似金魚缸嘅水同石春明確分離咁樣。呢一碗至係我要嘅綠豆沙，暫時嚟講，除咗屋企老人家煲嘅之外，街上我從未食過煲得咁好。至於喳咋，由於本人唔鐘意食，一啖都冇食。以下意見係老婆仔原話：「夠淋、足料、不會太杰。」…查看更多

此店幾乎人人都係食雞煲。礙於去到嘅時候已經夜晚十一點幾，而雞煲只係食到十二點半，諗落食雞煲食得唔耐，不如就爆冷試試佢哋嘅點心，反正食評冇咩人寫過。宵夜點心就只限綠色呢張點心紙上有供應。直接入正題。食得出係疑似翻叮包，包身韌、叉燒餡太削。熱辣辣，好特別，唔發現第二度有得食，入面有隻冬菇，仲有其他餡料，夾埋口感唔錯。口感軟糯，足紅棗味，但係疑似加色。原盆馬拉糕，第二度唔覺有得食，所謂原盆，睇相就知道，佢係一籠就係一底咁蒸法，唔係舊式酒樓嗰種大盆蒸法。非常好味，甜度啱啱好，鬆軟熱辣辣。衰响啲蝦度，腸粉唔夠爽。勝在豉油分開另碟上，唔怕浸住哂。強烈推介，唔似舊區酒樓咁用下欄豬肉造，啖啖鮮味過癮。一眼望哂，冬菇、火腿、魚肚、雞，滾熱辣，唔覺味精，雞又夠滑。…查看更多

年輕嘅時候落中環，經常見到一大班菲律賓姐姐排哂隊咁響一間快餐店度唔知食乜嘢。當時互聯網、智能手機仍未普及，響一個仲係靠飲食雜誌、口耳相傳嘅飲食文化年代，令我一直冇試過呢個品牌嘅食物。直至宜家，終於的起心肝嚟試吓。地牢店舖嘅環境想象以外地闊落、乾淨，最令我讚嘆嘅係佢有洗手盆，而且擺咗兩支品牌消毒洗手液響度畀客人使用。店內好多菲籍店員，不時隨住店內音樂擺動身體，臉上總係掛住笑容，店員之間亦不時有講有笑，氣氛輕鬆而融洽。薯條炸得啱啱好，鬆脆有薯味。此行重點目的，亦係我重點推介嘅炸雞。呢個炸雞炸得表皮鬆化，雞有雞味，最難得係佢唔乾身，仲有肉汁，一口咬開冒出蒸氣嗰一刻令我嘆為觀止。相對於耳熟能詳嘅炸雞店與時下扮韓式炸雞店（用料根本唔係嗰回事因為根本唔係韓國嘅雞），佢係嬴哂。附贈一小盒略帶蘑菰味嘅汁作為點綴，冇得輸。…查看更多

此店位於婚紗街盡頭，三角公廁附近，金巴利道嘅小學隔籬。店面玻璃偌大的三個字「老火湯」，相比店名，更似寶號招牌。近日經某傳媒報道，嚟呢度嘅人忽然多咗，目測店內有人影相打卡，相信都係傳媒效應。凌晨搭正十二店，門外泊滿車，入嚟買外賣嘅人不斷，店內亦幾乎滿座，睇得出生意算唔錯。蝦醬炒飯，聞落係香，但食落偏油，好一般。勝在份量足，兩女一男三人行，啱啱好食哂。蝦仁炒蛋，煮呢個菜嘅食肆幾乎無一例外地衰響啲蝦食落唔夠新鮮呢個問題上，此店亦然。主打重頭戲係啲湯，都係講返湯水。三個人分別叫咗三款湯試味，花生雞腳湯、胡椒豬肚湯、蕃茄薯仔湯。花生雞腳湯－一個飯碗嘅湯之中有成五隻雞腳加一件冬菇，雞腳冇剪甲，我唔介意，皆因煲呢個湯，雞腳若然剪甲就會爛哂，識煲就係唔應該剪甲，咁至有雞腳吮吓骨。湯中充滿黏口膠質，老火煲出嚟無疑，花生香雞腳甜，掂。胡椒鹹菜豬肚湯－三個湯當中，呢個最好。夠辣，豬肚乾淨。但鹹菜唔好食，外貌似洋蔥，乾身、薄、冇味。豬肚份量非常多。蕃茄薯仔湯－鮮甜、濃郁。我就飲到好似有啲茄膏味。下次路過再試試佢個菜乾豬肺湯。…查看更多

凌晨時分，成個藍田幾乎冇啖好食，响呢個將冷未冷，夜晚凍凍哋嘅時候，落到街除咗便利店叮叮之外，地鐵站嘅新樂園幾乎係唯一選擇。茶餐廳格局嘅店面做埋打冷，隔籬同名舖做魚蛋雲吞湯粉麵。响冇得選擇嘅環境之下，獨市就係王道，有得食係緊要過好唔好食。洞悉香港人乜都鐘意套餐包杯飲品嘅習慣，餐牌上嘅乜飯物飯都係自動波跟餐。瘦叉燒有成十片八片足料厚切，炒蛋略嫌老咗少少，但係落咗韮黃加返分，豉油份量恰到好處，飯量足、夠哂飽肚。埋單$42，算好OK啦。…查看更多

做gym減肥期間，不宜食得太豐盛，之但係運動前又不宜空肚，本來打算去隔籬酸辣粉度食，奈何門口企咗五、六位客人等緊位，離遠睇見呢度大把位，心諗反正起碼已經幾年冇幫襯過，為咗趕時間做運動，就惟有將就吓。首先講吓呢度環境真係勁好坐、勁好hea，相對於已經結業好耐嘅寶勒巷分店，呢度裝修新淨，而且兩面落地玻璃，一眼飽覽附近人來人往街景，响度傾偈真係一流！之但係講返個沙律，煙三文魚三薄片加埋都冇我一隻手掌大，算！沙律蔬菜之中仲有好多枯黃咗嘅部份，證明冇揀過菜，都算！但係默認為應該鮮紅色嘅番茄點解都會係黃㗎？個黑醋汁味道都還可以，之但係啲蔬菜真係要改善吓。至於杯熱咖啡嘛，就中規中矩，正常機沖即磨咖啡味。…查看更多

用上自家品牌打嘜頭落餐具，本來係形象高級化嘅絕招，奈何金漆已甩色，碟仔多崩缺，到底係洗碗工人嘅粗心大意，抑或店舖更換餐具不勤，我都唔知道……傳統廣式雲吞麵家出品，份量甚少，已屬意料之內。筋腩皆入味軟稔，麵條幼細爽口，可惜走鹼未夠。湯底一陣熟悉嘅蝦米鹹香，雲吞餡豬肉鮮蝦層次分明。食物明明水準合格之上，但係無一例外地，似乎各家分店之「腐皮栗」都係高企。思前想後，段估乃係一個「貴」字出事。份量少向來係傳統，冇必要改，之但係價錢的確有得商榷。…查看更多

下晝嚟附近參加酒店自助婚宴，反正平時唔會無端端入愉景灣，今次亦係第一次嚟，既然一場嚟到，索性住多晚酒店。由於愉景北嗰邊嘅食肆相對上，高消費而開飯指數麻麻哋，所以，我都係決定搭車去愉景廣場，一嚐呢間最吸笑泰國菜。坐低先點飲品。冰凍嘅泰啤，配以一隻預先雪凍嘅啤酒杯。青檸梳打，糖水分開上。細節嘢都做得唔馬虎，心中有數，嚟緊嘅菜應該唔會差得去邊。蝦醬炒飯—有啲臘腸粒、牛腩粒，仲有炒蛋鋪面嘅飯。幾好味，比想像中淨係得蝦醬嘅炒飯嚟得豐富而且有驚喜。金牌冬蔭湯紅色—泰籍店員問要紅色定係青色，我心諗我又未試過我鬼知紅色同青色有乜嘢分别咩，於是乎是鬼但要紅色。湯入面有大頭蝦，最緊要係冇芫茜(女友唔食)， 但係就比較鹹，似醬汁多過湯， 而且係細湯碗份量。呢個湯我就唔建議特別去點嘞。大蝦刺身—即係常見嘅生蝦刺身，佢冇解凍後嘅水喉水味，除咗苦瓜、蒜片、紅辣椒之外，竟然有口感新鮮清香嘅薄荷葉。椰香雜菜— 似熱食嘅沙律，有粟米芯、老咗嘅芥蘭、西蘭花、蘿蔔片、椰菜，淋响菜上面嘅椰漿勁香。…查看更多

同女友响尖沙咀workout完，半夜近十一點肚仔餓搵嘢食，梗係第一時間上「開飯網」按圖索驥睇睇附近邊度有好嘢食啦。女友不論四季都鍾情打邊爐，好啦！今晚就哂妳！就搵打邊爐。掃一掃附近，竟然發現寶勒巷有一間「冇喊臉」嘅火鍋喎！一於上去試吓。行到樓下一望，哦原來就係舊時最大嗰間卡拉OK嗰棟大廈嘅２字樓。升降機上到去一睇，嘩！乜得我哋兩個人包場呀？一眼睇哂，立即意會到老闆似乎深諳香港人熱愛卡位嘅獨特文化，全場統統都係卡位嚟，而且係仿照高級韓式烤肉店嗰種高椅背寬敞卡位，向馬路嘅窗口位嘅窗臺仲有成呎咁闊嘅空間可以用嚟擺放隨身包袱，嘩一坐低已經覺得好舒服好正呀！藍色格調嘅餐紙與水杯，黑白分明嘅兩雙筷子，細節上之細緻就係值得矜貴。個人好鍾意呢種陶瓷質感嘅餐具，最重要嘅係佢冇水漬！出面好多扮高級嘅食肆，無論啲餐具用得幾靚，始終畀未抹乾淨嘅水漬出賣！但係呢度冇發生咁嘅事，好嘢！襯埋一set嘅茶壺與紙巾，掂！用竹筒裝嘅生蒜、乾蒜、辣椒乾、蔥花、辣椒豉油、沙嗲、芝麻等八味架。zoom近少少畀大家睇吓，肥仔奇則向來獨沽一味落生蒜。好嘞門面嘢講完，入正題，點菜！首先梗係揀個湯底啦！因為肥仔奇想試真啲食材嘅真味，所以故意點一個清淡啲嘅湯底。入面大概有五、六件豬肺，呷一口湯，比不上真正嘅老火杏汁豬肺湯，但真係勝在夠清淡。等水滾嘅時候想點個劍魚腩刺身食住先，點知冇貨。店員推介咗餐牌上冇嘅油甘魚畀我，好啦冇所謂，一於睇吓埋單收我幾錢囉！食落始終唔係日本餐廳嗰回事。但係望吓呢個ワサビ係真係即磨唔係粉溝水，之後用返佢嚟點其他食材係一樣咁惹味！皇帝菜好新鮮，清新、清爽、清甜！海蝦丸堅有海蝦味，墨魚丸堅有墨魚味，鯪魚球入面仲有清香嘅果皮，豬肉丸就好普通。珊瑚蚌勁新鮮勁有海鮮味，唔似出面有啲舖頭，為咗令啲食材擺多幾日而起勢落粉「嗱」到冇哂鮮味。攤出嚟就幾好睇，但係唔知係咪因為品種問題，呢種牛一灼就黑，而且咬落牛味唔算好濃、唔算好突出。夜晚九點半後全單65折。…查看更多

肥仔奇食盡全香港知名雲吞麵店，門口有明星相嘅、飲食雜誌大肆吹捧嘅都食過哂，一唔係份量太少，就係名不副實，雲吞麵嚟講，肥仔奇來來去去都係鍾情呢一間。坐低無耐，隔籬檯嚟咗幾位洋人，佢哋四處打量又互相商量咗成十分鐘之後，四個人每人叫咗一碗鮮蝦雲吞麵。竹昇麵依舊爽口彈牙，雲吞入面嘅蝦有蝦味，仲食得出有肥豬肉，呷一口由大地魚等等熬製而成再搭幾粒韭黃嘅湯底，實在係人生一大享受。無怪乎洋人都識得嚟搵食。嗱嚟呢度食豬手，絕對記住要食撈麵而唔係湯麵，點解？除咗話撈麵嘅麵底多啲飽肚啲之外，更重要嘅係豬手嘅南乳汁撈埋啲麵嚟食至係一絕，若果叫湯麵的話，湯底將豬手嘅南乳汁溝淡咗，豬手固然之就會冇咁好味，仲會搞到個湯底濁哂。豬手一貫地乾淨冇毛、油香軟熟兼入味，冇得輸。肥仔奇唔食豬潤，但係會食豬潤熬出嚟嘅粥底。粥底綿，皮蛋軟，成個粥底都有鮮甜味，正斗！…查看更多

家人生日，十人同行，以信用卡優惠慶祝來享用自助晚餐。也許適逢星期天之夜，偌大地方未見滿座，部份四人卡位空置。麵包蟹蓋，就如那粉紅色的什麼一樣可遇不可求。廚師每次添加，只有三隻蟹蓋，其餘皆為麵包蟹的其他部份斬件。眼見有「識食中人」一次盡掃所有蟹蓋。為何專揀蟹蓋？貪其膏多也。肥仔奇整晚亦僅拿得兩隻蟹蓋而已。眾所周知，麵包蟹肉不如長腳蟹肉鮮甜可口，惟有其膏堪比坊間膏蟹有如鹹蛋黃般的鹹香鮮味。經常吃自助餐者必知，此等開邊龍蝦冷盤，但食其「龍蝦」二字而已，實在灼得過熟，口感韌實，龍蝦味淡，惟有一點點龍蝦膏稍作安慰。即開生蠔爽口彈牙，新鮮而蠔味足。奈何酒店自助餐通病，開蠔者老是用水洗刷一番，致令蠔殼碎沒了，海水味也沒了。煙三文魚無渣，鹹度適中，可惜魚味略淡，油份不足。巴馬火腿味道意料之內，鹹鮮而無臭豬味，合格。澳洲和牛切得太薄，煎得過熟。若能要求一厘米厚切五成熟，估計不輸扒房出品。鵝肝多士油香豐膩，無禽鳥臭味，質素比得上同區朗＿酒店，可一可再之選。羊架極嫩帶血，可惜肉嫩而味淡，中規中矩。特意叮囑雪糕位師傅，每款味道只要半球，如是肥仔奇分兩次共嚐了七種味道。冷盤尚有各式凍肉、凍蝦、長腳蟹、沙律、刺身、壽司等。熱葷有燉湯、中西湯、燒味、口水雞、蒸魚、蒸扇貝、肉醬千層麵、咖哩等。甜品有曲奇餅、各式蛋糕、芝麻糊、豆腐花等。肥仔奇吃自助餐從來不貴不吃，不精不吃，沒有吃過的也就不予置評了。…查看更多

香港人都知道，尖沙咀食肆普遍價錢是遊客價，相同質量的食物往往比非遊客區貴20%或以上。由於肥仔奇近來經常出沒尖沙咀，當然要搜一下「開飯網」查探有何特色、便宜、好吃之處。是次第一回光顧Big John，見其門口狹小，若非熟客，一般路人甲乙丙是難以察覺此舖是食肆，更大可能誤以為這是一間髮廊。店內牆上掛滿狗照片，想店主必屬愛狗之人，不言而喻。顧客左右兩旁面壁而坐，中間一路直通店門，簡單直接、善用空間，目測只容十多人。內裡盡頭收銀位旁尚有數個樓梯底下座位，最宜「傾密偈」。此店採取先付款後捧餐方式，先到裡邊點餐付款，然後取得號碼牌，約等數分鐘，就有專人捧餐叫號，應聲收牌上菜。麵包軟而不熱，啖之無麵粉香。雞扒炸老了，太乾。自家製的醬汁亦難以補其不足之處。奶味茶味不出，入口亦欠滑，雖未至於難以下咽，亦只算中規中矩之作。…查看更多

眼見呢個舖經常座無虛席，晚市時段仲周時有人企門口等，根據肥仔奇多年獵食嘅經驗所知，一間要排隊嘅舖頭係不出三個可能：１．好食、２．好平、３．新開張。食過之後我會認為呢間舖之所以多人，純粹係因為２．好平。首先試試串燒雞翼，燒到過熟、乾哂、冇肉汁，調味亦不見得有何出色，失敗！再嚟試吓芝士蘑菇串，受惠於食材嘅新鮮原生菇味與多汁，再加啲芝士就好難整得難食。試埋汁燒日本年糕，好唔錯，個汁做得幾惹味，年糕夠煙韌，豪不吝嗇地包塊紫菜增添口感，呢個要讚！自家製蕃茄濃湯配以手打烏冬係毫無瑕疵，糖心蛋熟度剛好，蕃茄濃湯亦的確係蕃茄濃湯，若果一定要彈佢的話，就係個烏冬灼耐咗少少。真正出問題嘅係呢個和風燒鳥（燒雞就燒雞啦燒咩鳥啫），可能佢真係改錯名用咗個鳥字，鬆脆外皮之下係一陣好似雞屁股咁嘅禽鳥味，我唔知佢係冇用薑醃過定係點樣，總之如果唔去皮係根本食唔落。…查看更多

近排興芫荽，鍾意食芫荽嘅朋友就啱哂嘞，一大撮芫荽！為免黐底，記得加熱過程中要攪攪佢。眼見現場唔少人「大安主意」由得啲雞响缺水嘅情況之下乾煲到出哂燸味，佢哋就顧住捽手機同傾偈，我真係唔知講咩好。雞件份量足，要麻有麻，要辣有辣，調味方面係冇得彈嘅，可惜雞件的皮下脂肪黃油部份太多，對於時下講究健康嚟講呢就唔係太好嘞。意想不到嘅係雖然呢度嘅主打菜色係雞煲，但係呢度嘅安格斯肥牛無論色水、肉質以至牛味都係上等水平。魚的確係脆嘅，由於响重麻辣嘅調味之中滾熟，所以係食唔出任何泥味、腥味。估唔到西洋菜嘅甜同麻辣湯底嘅麻辣味竟然係夾得到㗎喎！竹蔗茅根水望落就幾足料，但係飲落就淡口咗啲。…查看更多

重要嘅事情講在最前面，打電話訂位嘅時候，接電話嘅小姐話星期一同二都冇做宵夜自助餐嘞（星期日仲有冇做我就唔記得嘞）。埋位先嚟刺身，點解唔係先拎生蠔？因為呢度啲刺身唔知點解係比生蠔搶手得多。呢度嘅三文魚向來品質有保證，好彩嘅話仲會搵到魚腩位，個人就最鍾意食三文魚嘅呢個部位，可惜今次影相時係冇魚腩。不過唔緊要，普通魚肉依然係有三文魚味，唔腥冇臭。雖然唔係即開嘅生蠔，但係勝過唔少肥仔奇食過嘅即開生蠔，蠔味極濃，唔需要任何調味就咁食已經食到兩打。不一定撞啱有提供嘅紅酒燴牛尾，撞啱有嘅話你一定要試，牛味正得很，肉質鬆軟冇渣。豉椒炒花蛤嘅豉椒味始終及不上大排檔，花蛤嘅貝殼類海產鮮味亦淡，好在佢冇沙。嗱嚟多張生蠔畀大家比對吓外觀質素。呢度嘅熱葷係會有轉換嘅，視乎去貨速度有幾快啦，此所以呢，千祈唔好諗住嗰晚人少就發達喇冇人爭嘢食，錯哂！要有返起碼坐滿一半人先多機會試多啲口味㗎！呢度嘅甜品係出哂名品質好水準高，個人至愛芒果拿破倫同半熟朱古力蛋糕。特別係芒果拿破倫，夾間鬆化，餡料奶香唔太甜。雲呢嗱＋咖啡＋朱古力雪糕係肥仔奇每次食自助餐寫上完美句號嘅習慣。…查看更多