EmilyPingPing的個人專頁

本來期待咗好耐，等放寬限聚令至4人就即刻嚟食返餐，點知食到一肚火！食物質素保持到水準，但服務就真係好唔掂！早幾日已經喺openrice訂定位，早咗少少到攞位，門口侍應叫我去呢張枱，去到又點我去坐第二張枱，都唔緊要，食咗差不多一個鐘，仲有少少就食完，侍應竟然叫我哋坐逼啲讓一邊枱畀2位搭枱坐，吓? 咁坐法咪即是叫我哋同陌生人同枱6人一齊坐??? 唔洗理限聚令距離?擾攘一輪後好彩最終都冇嚟搭枱。但過咗唔夠5分鐘，又有侍應嚟收碟話「叫嘅嘢到齊喇可，可以交返張枱喇可」呢一刻真係好令人，我4個人坐咗一個鐘左右，又要我畀人搭枱又催我走，最嬲係門口根本冇人等位，放寬限聚令你哋想做多轉生意我理解，但一食完啲嘢個椰青都未飲完就叫我哋走就真係好離譜！咁趕客真係唔想再嚟！…查看更多

上星期日剛在尖咀食過日式放題，抱著希望而去，可惜遇上厚粉的天婦羅、很腥的海膽、未熟的串燒，又漏單又「求其」，我惟有帶著失望而回...... 好吃的回本菜啊，你在那裡？你在那裡？感謝朋友的推介，我在復活節假期的第一天找到了！ 老實說，我是個路癡，由元朗西鐵站出發，靠 google map 及我的元朗通朋友後來來帶路我花了超過 30 分鐘才找到這間日本餐廳，離開時竟不消 15 分鐘就可以走回元朗西鐵站了！原來也蠻近的， 可見我走了不少冤枉路！不過有得食我就甚麼也可忘記了！ 餐廳門面雖然不太起眼，但內裡企理舒適，可能當時正值午餐時份，客人不算多，令人更無拘無束，最適合我們這天一行八人的慶生及慶祝朋友轉工這麼開心的聚會！ 餐廳剛開張數月，之前見朋友 post 了些刺身、壽司等食物，賣相已經令人很垂涎！事不宜遲！！ 劍魚腩刺身：很多人也認同，吃日本菜最先應由刺身開始；細心的朋友們在我到達之前已點好菜，剛坐下不久魚生就送到眼前了！ 首先是我必食的劍魚腩刺身，上碟棄用傳統的日式碟子而用了西式的湯碗，一來就看到這小店對創作料理的一絲不苟！厚厚的一片刺身，單看外表已覺得很新鮮！入口更有種豐滿的感覺！魚肉厚而無渣，第一道菜已教我暗叫了聲「encore」！ 油甘魚薄切：刺身不要停！ 接著來的是油甘魚薄切，配上橙色的啫喱狀東東賣相十分「醒神」！雖同是刺身，但跟之前的劍魚腩刺身感覺完全不同！厚切的劍魚腩刺身食後有豐富的質感，而油甘魚薄切則取其鮮味，刺身上的蔥花更能帶出魚的鮮味，一入口鮮味即充滿口腔，配以啫喱一同入口，口感更加豐富！相信這種創作不是偶發的，必是廚師的精心設計！ 和風豬肉薄餅：我最愛吃「香口」鬆脆的食物～（長那麼大還是小朋友口味！）這道薄餅絕對能夠滿足我對香口食物的渴求，也是這餐之中我最愛吃的一道菜！我食過的日式薄餅都是圓形的，而這道和風豬肉薄餅則是長條形的，相信在其他日式食肆未必有這道菜；如其名，主要餡料有豬肉、香蔥，面層加上了香濃的芝士，剛烘好的薄餅，熱烘烘的餅脆餡味濃，實是佐酒佳品！ 雜錦天婦羅：雖然間間日式餐廳都有天婦羅，愛吃香口食物的我對天婦羅要求很高的呢！ 要做炸粉要薄香脆夠熱不油膩，其實不容易！可喜這客雜錦天婦羅已做到我的80%要求！內裡的材料有炸蝦、蟹柳、冬菇、蕃薯、南瓜及茄子，炸蝦夠新鮮，蕃薯略嫌硬了點；食完留在紙上的油份不多，女士們不用擔心油膩問題呢～ 海膽海鮮炒飯：炒飯最怕油膩，也最怕飯太硬！ 這個海膽海鮮炒飯外表平平無奇，食落卻有點驚喜～飯粒煙韌而不硬，海膽加進飯內又不失鮮味，同場有怕腥不吃海膽的朋友，食過都話好夾好好味！只是略嫌炒飯咸了些。 雜錦刺身：之前食咗兩款刺身，意猶未盡，再豪叫個雜錦刺身！一上枱大家「哇」聲四起！第二個動作就是舉（手）機拍照了，因為實在砌得太豪華了！ 九款刺身包括三文魚、拖羅、吞拿魚、油甘魚、油甘魚薄切、海膽、帆立貝、螺片及甜蝦，花多眼亂，美食當前真係有啲感動～ 拖羅入口即溶，油甘魚薄切依然鮮味，海膽大大件配如青瓜口感更清新，螺片超爽口，甜蝦爽甜，蝦頭又多膏又香，嚟多個我都食得晒！ 和牛：這道菜最反映了廚師的心思－－一般燒和牛都是佐以醬汁，味道較單一，但也可以說是最能吃出和牛的鮮味；然而這道和牛除了可單點醬汁外，還附上幾款配料：炸蒜、茄茸(?)、薑茸及蔥粒，令和牛的味道更有層次，蔥粒提升了肉味，茄／薑茸令牛味清新而不油膩；配以大量蔬菜大大減低了和牛的油膩感；碟邊還有一小碟炸過的牛脂浸在醬汁內，煙煙韌韌，有很濃郁的牛味，牛肉愛好者不可不試！ 北海明太子燒帶子：也是這店的招牌創作料理；一客客的帶子分別以黑色小羹盛載，很有排場！材料有明太子、原粒大帶子、帶子裙邊及配以蔥絲，明太子咸咸香香的，燒帶子配以醬汁，味道濃郁，大大粒口感豐富，也是另一款佐酒佳餚！記得要一口同吃整個配搭，明太子的咸香、帶子的鮮味及醬汁的鮮甜會一同刺激你的味蕾！ 鹽燒三文魚頭：有時我覺得我前生是貓，我真是極愛吃魚！ 很多時吃到的鹽燒三文魚頭都是瘦瘦的乾的。可能真是慢工出細貨，等了良久又催了單，幸而這個千呼萬喚始出來的鹽燒三文魚頭絕對沒有令我失望！外皮脆魚肉多汁，而且肉多又滑又不油膩，魚頭新鮮單單配以鹽燒已最能帶出鮮味，不枉我等了你那麼久！ 彩虹卷：賣相真是跟彩虹一樣繽紛，材料有三文魚+吞拿魚+油甘魚+牛油果+芒果，魚生的鮮味加上芒果的甜味及牛油果的香=清新的感覺，其實不用點醬油也能吃出這種和諧的感覺！ 牛油果妙趣卷：這卷物應是有六件，但我們一行八人不夠分，貼心的待應小姐說可加至八件，體貼的服務實在令人窩心！妙趣卷賣相絕不遜於彩虹卷，也是十分足料，除了中間有玉子、青瓜及牛油果的太卷外，上面的配料分別是鰻魚+蛋絲、燒帶子+芝士、三文魚+芒果、劍魚腩+芝士，味道比彩虹卷濃，是又一令人驚喜的濃味與清新的配搭！ 焦糖燉蛋：叮噹叮噹！食到尾聲，又係甜品時間！ 先來兩款焦糖燉蛋，有綠茶味及生薑味，朋友們點的，他們說不算太甜，燉蛋夠滑～ 綠茶／柚子雪糕：也是朋友們點的，綠茶雪糕夠軟滑；而柚子雪糕質感較則似雪芭，酸酸甜甜很清新。四款甜品為這一餐劃上了完美的句號。感謝朋友的推介，令我們有個美味又愉快的中午！ 雖然對我這個九龍人來說實在有點遠，但還有好些特色菜式我還很想試，而且見到這小店老闆在社交網的專頁亦提到會陸續推出新菜色，可見老闆的確用心想創作更多令人回味的新菜式，我一定會再來的！…查看更多

一直對沙爹王又愛又恨！愛佢啲咖哩好食又抵食，小食又多款式！ 恨佢實在太多人排隊，等到個肚打晒鼓都仲未有位！ 都有好一段時間冇嚟，尋晚喺旺角搵食，再臨沙爹王！初時都擔心要排好耐、又驚食物質素又大不如前，好彩呢啲擔心都係多餘，只係等咗十分鐘左右就有位喇！好嘢！雖然海盜主題嘅裝修雖然已經唔新鮮，不過就好切合近日嘅「魔盜王」熱潮！haha！！ 枱與枱之間唔算逼，卡位還可，其他坐位就略嫌張櫈太細了！ 呢晚兩個人叫咗四樣嘢，亦都係order咗冇耐好快就到！1) 白咖喱香茅豬扒飯－－其中一款特色自選飯，可選沙爹／白咖喱／咖喱，配以日式奇脆雞／香茅豬扒／肥牛／薄切黑豚肉／炸魚／雞扒，今次我哋揀咗咖喱好香椰汁味，香而不辣，豬扒有三塊，十分入味而且鬆軟，白咖喱同香茅出奇地夾，乾蒜更能提升白咖喱同香茅香味，汁又夠多，餸完飯仲可以要嚟點蒜香脆包！2) 蒜香脆包－－充滿牛油同香蒜味，金黃香脆，無論淨食同點咖喱食都一樣好味！3) 脆蝦棒－－四條一開二蝦棒，香脆的春卷皮配以蝦膠同菜絲餡，十分足料！卜卜脆配沙律醬係理所當然，我哋再大膽嘗試點白咖喱同魚露，竟然都係出奇地夾！4) 越南豬肉粉卷－－粉卷一向係賣飛佛！一定要點！ 不過呢碟略嫌乾咗少少，皮有啲硬；味道方面，內裡嘅肉碎同菜粒加埋面嘅香茅同肉鬆配以魚露，非常香口！值得一讚嘅係服務態度，侍應非常細心，好多次都係一見我哋飲晒杯水就唔洗按鐘都即刻嚟為我哋加水，又會問我哋係咪已經食完至收碟，十分有禮貌！食物水準保持得很好，絕對不會令人失望！而且真係好抵食，兩個人食咗四樣嘢都係百一蚊左右，真係好過去食連鎖快餐店！…查看更多

已經不是第一次來光顧荃灣Oliva了！上一次來覺得這店作為意大利菜來說，真是又抵食又好食； 但事隔一年多，店舖依舊，但味道同服務卻大不如前了！真是十分失望！由於訂咗位，所以唔洗等，不過都唔見有人等位！環境方面，呢度真係唔錯，牆上布滿大大小小嘅相架，加上幾盞吊燈，很有意大利風情！而且餐廳一邊係全落地玻璃，面對荃新天地，環境好舒服！但對於人多嘅聚會嚟講就唔多適合喇！因為呢度冇大枱，所以呢次我哋一行11人，要坐一張由六張細枱拼合而成嘅大枱，一頭一尾嘅朋友根本冇可能傾到偈，而且食物要傳嚟傳去，都幾麻煩！ 服務方面就麻麻喇！冇比麵包我哋，（後來見到隔離枱有包食至醒起咋！）而且侍應數量不多，往往要叫幾次先有人理我哋！食物方面，上次嚟都覺得又抵食又好食架！而且以前我經常光顧大埔分店都覺得環境好食物好，但今次好多食物真係差咗，好幾樣都好咸，有啲就好乾，攪到成晚勁飲水！1) 三文魚柚子沙律－－口味清新，三文魚粒配柚子味道好夾，蔬菜新鮮，飯前食好開胃！2) 意式小食拼盤－－呢個係全晚最好味嘅！有炸蝦、蝦春卷、炸帶子、炸雞塊同炸薯角，炸到啱啱好，熱辣辣脆卜卜，仲有沙律醬同甜酸醬供應，點唔點醬食都一樣好味！3) 燒豬肋骨－－肉嫩，醬汁配合得好，味道不錯。4) 咸豬手－－得個咸字！完全食唔到豬手嘅鮮味！不過尚算炆得夠林，肉亦唔「鞋」，不過真係好咸！ 兩款菜都有個小焗薯配酸忌廉，味道不錯！5) 天多尼雞肉薄餅－－薄餅並非常見嘅圓形而係正宗意大利薄餅嘅長方形，人多好易分！ 但呢款天多尼餅底太乾，雞肉也乾，而且雞肉太重小茴香之類嘅味道，夾埋洋蔥一齊食味道怪怪地咁，食個個個耍手擰頭！6) 千島海鮮薄餅－－呢款雖然餅底仍然偏乾，但比起天多尼味道好好多！海鮮有魚、蝦同魷魚，與千島汁很配合，不過餅底略嫌唔夠脆。7) 芝士汁三文魚露筍蝴蝶粉－－又係得個咸字！可能因為三文魚同芝士都係偏咸嘅食物啦！但都唔係好多三文魚咋喎，所以都唔明點解咁咸！而蝴蝶粉較硬身同乾，個人認為呢啲唔係煙un！8) 蜆肉意大利飯－－又係好咸！不過蜆肉都唔少，飯就煙煙un un咁幾有口感，尚算可以接受。9) 墨魚麵－－呢味我只有遠觀而沒有品嘗，不過有食嘅朋友話意粉夠汁，而且汁夠香，味道不錯。由於當晚有朋友生日，所以我哋自備咗蛋糕，最好笑係個 waitress 剛放低把刀俾我哋切蛋糕，佢果頭執枱我哋都未切就將所有餐具連埋蛋糕刀全部收晒！真係叫都叫唔住！其實以食意大利菜嚟講呢個價錢算係ok，但食物水準同服務質素都有待改善，希望下次嚟可以回復昔日水準啦！ 註：埋單時問經理有咩咭有 discount，因為看到 openrice 指星期一至日只要食滿 $150 便有 citibank 信用咭85折優惠，但經理卻說星期一至五才有此優惠，如果為咗呢個優惠至嚟幫襯嘅要留意喇！…查看更多

又到星期五晚出動搵食嘅時候喇！今次嚟到呢間「田記」都係報紙推介所以嚟一試佢啲粥品！不過相比上次去過佐敦嘅「順德村」真係差好多，令人有點失望！首先環境方面，街坊食店格局，摺枱膠櫈，冇乜裝修，牆上寫滿小菜名，坐位唔多，但算係幾闊落，起碼唔會坐到背脊痴背脊！食物方面，唔單只可以食煲仔生滾粥，仲有小菜可以點，適隨尊便！呢晚我哋試咗佢三款粥品同兩款小菜：A) 粥品－－粥底好杰，鍋底啲粥杰到一舊舊咁痴晒底，但我覺得佢應該冇落味精，實在淡而無味，好似食冇落鹽嘅白粥咁，食咗三款粥都覺得冇分別！1) 龍蝦粥－－龍蝦唔多，而且殼多肉少，粥亦冇龍蝦味，但咁又唔怪得嘅，因為啲龍蝦本身都冇味！2) 石斑粥－－哇！呢個腥到我暈呀！ 又係骨多肉少，粥仍然是冇魚味的！3) 泥鯭粥－－呢款算係三款粥之中最有味嘅一款！稍為有啲泥鯭味，一碗有兩條小泥鯭，可能加了果皮絲，所以冇石斑粥咁腥！但都係果句：啲粥冇味囉！B) 小菜－－無意間叫了兩款都係炸嘢！小菜比起粥品好食好多！夠鑊氣，亦好味道，如果嚟食小菜我覺得可以再幫襯！1) 椒鹽鮮魷－－（太肚餓忘了影相）鮮魷夠厚身，炸粉亦唔厚，脆卜卜，又夠味道，夠香口，餸啤酒一流！2) 椒鹽百花茄子－－因為好奇所以叫！ 問落單的姐姐係咪即是百花釀茄子，佢話唔知...... 不過我哋都照叫！嚟到見到好似炸蠔咁大碟，都嚇咗一跳！總共有十件，係茄子面有層蝦膠再用炸粉炸，唔油膩，夠脆又香口，食唔停口呀！仲見到有其他小菜都好有興趣試試，無奈肚皮已經飽晒！老實講如果食粥就應該唔會再嚟！（因為覺得之前食過嘅「順德村」真係正好多！）但如果食小菜都有興趣再嚟試吓！…查看更多

呢間餐廳經過好多次，但幫襯都係第一次！見到門口的廣告推介海南雞飯呀、炒飯呀好似幾吸引咁，其實都有幾次想入去試吓。今日又路經此地，同男友兩個人嚟食下午茶，男友order了楊州炒飯，我就叫咗個炸雞髀拼薯條。男友的楊州炒飯味道雖然咸咗少少，但都幾足料， 但略嫌多油，不過都算幾好。但我order的雞髀就十分非常唔掂！雞髀炸到over晒，又乾又硬又細隻；薯條是翻炸的，又un又硬，也沒有茄汁供應，茶記都不如！兩者的賣相太快餐店了！令人沒有興趣拍照！不過價錢尚算ok，當去食茶記也無妨！…查看更多

母親節人人都同媽媽去食中菜飲中茶，我媽媽就反傳統，鍾意食西餐！今次帶佢去呢度食 lunch + tea，雖然我哋都唔係花生漫畫嘅 Fan 屎，但一入到去見到咁可愛嘅環境，媽媽都變得充滿童真，到處留影！ 食物方面呢度都有幾多選擇！有意粉、pizza、小食、蛋糕、甜品同各式飲品。餐廳以自助形式，但落完 order 後會有服務員送餐，而且服務員態度十分有禮貌，值得一讚！1) 至尊朱古力－－上面會整一個花生漫畫人物，十分可愛！真是不捨得攪勻來飲啊！這個是 Patty；由於這杯不是我飲的，不來評論了！2) 朱古力－－可選擇要不要加 cream，味道香濃且滑，但只是暖暖的不夠熱！3) 龍蝦汁帶子炒意粉－－龍蝦汁香濃，甘筍略嫌硬了點，味道不錯。4) 意式煙肉蕃茄意粉薄餅－－一嚟到見到咁厚身嘅 pizza 都嚇咗一跳！原來中間加咗意粉！非常之多煙肉，而且炸到脆卜卜！十分足料！內層夾了意粉，十分特別！我都係第一次食有意粉嘅 pizza！5) 胡士托雞卷－－老實講，味道很怪，皮好像吸了水林晒一 pat pat 咁，啲餡加咗啲香料令味道很怪，沙律醬冇味。6) 史諾比雞翼－－味道不錯，雞翼去了骨只剩下主骨方便食用，略嫌炸得有點乾。 旁邊嘅係薯蓉，內有薯粒，味道也不錯。另外仲有好多蛋糕同甜品選擇，造型精美，真係睇到都好開心！點捨得一刀劈落去整爛公仔個頭度呢！無論同家人歡聚，或是同朋友聯誼，呢度都係一個任坐唔嬲嘅好地方！…查看更多

生滾粥食行多，但用煲仔上的生滾粥又食過未？據聞此店閑閑地排隊都要半粒鐘， 所以今晚一收工就即刻去呢度醫肚！ 七點鐘左右嚟到，好彩即刻有位！食到差不多七點半，門外已經開多幾枱兼要排隊等位了！今晚我哋叫咗三款粥同三款美食，每樣食物都係即叫即整，所以都要等十幾廿分鐘至有得食！不過每樣都係熱辣辣，粥又係煲仔上滾熱辣，特別好味，等吓都值得！1) 肉丸粥－－肉丸滑，仲有成六粒肉丸咁多！粥底夠綿！2) 田雞粥－－田雞冇雪味，粥有鮮味。3) 蟹粥－－蟹好足料，有成隻蟹咁多，係三個粥之中最鮮味。4) 薑蔥魚皮－－而家好多人怕有蟲所以都唔多見人有叫，但我覺得呢個係我呢餐最驚喜！魚皮爽滑，薑蔥加上麻油同醬油令魚皮特別鮮甜。5) 炸鯪魚球－－即叫即炸，熱辣彈牙，令人回味！6) 炒腸粉－－呢樣算係比較普通，腸粉也算軟滑，不過碟頭較細。是晚六樣食物共食咗 $148，食完非常滿足！另外此店更有馳名魚粥，用盡魚嘅唔同部位，下次我一定會再嚟試吓！…查看更多

年幾之前已經嚟過呢度買蝴蝶酥，由於蝴蝶酥嘅鬆化同牛油香味令我十分難忘，而且就近我屋企，所以間中我會再去幫襯幫襯～我最鍾意呢度職員態度友善而又有免費試食，食到啱先買！真係唔買去試食都抵！ 以前去親都會見到老闆娘謝寧，不過近年都好少見到佢蹤影喇！之前我只買蝴蝶酥，而曲奇餅只試食過而未買過，今次就買咗盒九種口味曲奇餅試吓，果然冇令人失望！另有十一款曲奇鐵盒裝可選！除此之外，餅店仲有適合生日同各種日子嘅禮盒，你嘅至愛親朋收到一定加倍開心！當然唔會忘記買我最愛嘅蝴蝶酥啦！不過價錢都漲得幾快，由年幾之前賣$38一包，而家要$48一包，真係令人慨嘆物價飛漲！好味嘅嘢特別快食晒！我諗我好快又會再嚟幫襯！…查看更多

復活節最後一日假期，尖咀街上仍然人出人海，要出去搵食都有啲惆悵！好彩醒起曾經去過香葉呢間樓上舖食，食物唔錯，價錢又抵，最緊要係唔洗等位又坐得舒服，所以即管一試，希望唔洗等餐懵啦！去到果然不負所望！即刻有位， 帶位的 Waitress 仲特意安排個比較闊落o既卡位等我哋坐得舒服啲添！我哋今次兩個人嚟，叫咗兩個套餐同埋加咗啲小食：今次食完都冇令我失望，加上環境清靜，我會再來的！…查看更多