聞雞起舞的個人專頁

在荃灣住了十多年，一次都未來過這裏吃東西，每次搭車經過沙咀道，看見這裏的老式裝修，和門口的幾缸魚，就好有衝動想入去食番餐。不過，每次都是過門不入。今晚無煮飯，個仔仲係term break唔使返學，佢竟話想o黎呢度食。於是一行三人，來呢度食飯。晚上九點未夠，樓下得另一檯人。我們坐低，叫了三個菜：鹽焗雞、炸大腸和菜遠炒牛肉。鹽焗雞真的乏善足陳，不香不滑，兼夾熱度不夠。炸大腸也好像擺了一輪才拿出來似的，完全沒有熱度。至於菜遠牛肉，梳打味勁到離奇。唉！希望今次係大廚偶然失手，否則，以這樣的水準，竟可以企咁耐，真令人費解。還有的是，整間餐室有一股怪味，十分難聞。而廁所也十分不乾淨。飯後也沒有糖水之類送。找數二佰二十大元。拜拜，下次唔會再來。…查看更多

深井裕記一般的小菜不是太吸引，但是它的燒鵝一向不錯。所以，近年來，如果一旦燒鵝癮起，多數煮定飯後，去買外賣，飛車拿回來吃，半個鐘內，食味同口感都唔會走樣。點知昨晚卻令我失望。由裕記返屋企好快，只用了二十分鐘。點知一打開個盒，隻鵝竟然皺皮，而不是以往那種漲卜卜，塊皮好似蝦片咁樣o既感覺。一食落去，塊皮竟然係韌的，又薄衣衣，o的肉削削地，好似含住泡水咁，嘩！野來o架？當堂無癮。惟有lik去焗爐焗返佢，才勉強食埋。唉，這是幫襯裕記以來最失望的一次。希望下次唔係咁啦。…查看更多

本人的工作地點在這間食肆附近，所以每個星期都有一兩次來飲茶食午飯。今日lunch又來。這裏的點心款式幾多，水準亦不太差，其中以盅頭飯和煎炸類較好。這裏的盅頭飯叫做桶仔飯，因為飯盅放在一個小木桶內。這樣，飯就不容易涷，而且，飯也煮得不錯，我每次都吃。這裏的煎炸點心做得比蒸的好，最正是煎薄餅和腐皮卷。也有特價小菜，每款28元，不過，做得麻麻，我不常吃。人們最稱頌的是它的特價灌湯餃，12點前落單，每個2.8元，很受歡迎。這裏最不好的是非吸煙位太少，但下星期開始，應該沒有這個問題了吧。…查看更多

Openrice o的食家絕大部份人都讚呢度o的蝦子撈麵好野，麵無鹼水味，水餃又大隻又好食。由於我曾經響附近做野，lunch同埋o的同事一齊，都幫襯佐呢度好幾年，一句話，唔難食而已。尋日又到附近買野，有o的肚餓，又見其他檔口無吸引，於是來食碗麵。我叫佐蝦子撈麵同剩水餃。蝦子無疑係好多，但係無香味，水餃好似一向咁大隻，不過水準極之不穩定，有o的幾好味，有時無味，應該係包埋幾日用之故。不過，最唔得o既係o的湯，一向湯都唔係呢度o既強項，不過今次仲奇怪，竟然甜甜地，當堂唔想飲。唉！食蝦子撈麵竟然無湯送口，成口沙咁，梗唔得，唯有夾硬飲，感覺當然唔良好啦。不過佢\平，兩樣夾埋都係40蚊。街坊生意，唔可以咁高要求o既o勒。但係值唔值得專程拜訪，就見仁見智o勒。…查看更多

來曾記的主要目的是吃它的潮州粿品。無論甜的鹹的，這裏的粿品都非常出色，其中蘿蔔粿和韭菜粿，更是個中妙品。不過，這裏還有另一類東西吸引我的，便是它較少人提及的潮州甜品。這裏有兩款精美的甜品賣：清心丸綠荳爽和白果芋泥。這裏的綠荳爽做得比其他號稱以潮州糖水出名的店更出色，綠荳肉帶有輕微的咬口，清心丸有少少煙韌但不過硬，配以羔燒過的白果，和以清新潤喉的糖水，真是百吃不厭。至於芋泥，熱辣辣的芋香撲鼻，嚐一口則滑而不膩，甜度適中，明知肥死，也不禁盡一大砵。至於消費，每人只是二十五元，簡直抵到爛。…查看更多

今天開始有三天假期，有機會行行街，購購物，順便去一些平時無時間幫襯的食肆，吃一些久違的小食(因為肚皮有限大，而想吃的東西又太多，所以專揀小食來吃。)首先去麥奀食麵。呢度D雲吞麵好「的骰」，仲要25蚊一碗，唔使三分鐘食晒。不過無計啦，淨係呢度D麵同埋湯，尤其是D湯，先至有細個時候食o既口感同味道，第二度無。童年時食o既雲吞麵全部都係咁o既味，而家周圍已經失傳，剩係得呢度碩果僅存。食其他D雲吞麵完全感受唔到食雲吞麵o既樂趣。莫講話D青年才俊讚口不絕o既乒乓波咁大o既雲吞，就算好多其他好出名o既，又係賣廿幾蚊碗o既麵，食落都係完全不是那一回事。無辦法啦，幾十歲人，無謂因為o個十元八塊虐待自己，一於貴就貴，食o左至算。…查看更多

昨日個仔term break，唔使返學，竟然給我一個驚喜，六點鐘左右，來公司搵我食晚飯，於是即刻熄燈走人。因為唔趕時間，所以揀旺角鳳城。其實我好少來呢度食野，因為放工後由公司來，剛剛同返屋企背道而馳，唔就腳。三個人，各人點了自己喜歡的食物：炒鵪鶉生菜包、大良炒鮮奶、窩貼明蝦卷、西湖牛肉羹。生菜包、炒鮮奶和蝦多士都是這裏的「名物」，水準穩定。今次炒鮮奶不用瑤柱而用鮮蝦，增加了鮮味但缺少了鹹香，同時也令整碟菜「削」了。所以，我鍾意舊版。西湖牛肉羹這種羹湯，只有這種舊式廣東酒樓才有供應的了。吃它，是一種感覺，與味道無關。餐後送糖水：紅豆沙。到這裏吃東西，食物和招呼都沒有令人特別驚喜的地方，但有其自然和自在之處，有一種廣東人的氣質：不刻意而透著活力。…查看更多

今晚女兒話做冬兼同媽媽慶祝生日，於是book了這裏晚膳。主持人話今晚無得點菜，只可以食套餐，無問題，既來之，則安之，照吃可也。先上大蝦沙律，大蝦爽口香甜，不錯，但不是戲肉。花膠燉翅，湯清甜，翅軟滑。鮑魚扣鵝掌，鵝掌淋滑，豐富的膠質，佐以鮮美的鮑魚和美味的汁液，使人回味。我覺得這味菜，鵝掌才是主角。瑤柱西蘭花和碧綠龍躉炒球都有水準，但都比不上那鮑汁荷葉飯好。荷葉飯一打開，便清香撲鼻，飯是顆粒分明，但又不乾不削，而且索滿了香濃的鮑汁，令人齒頰留香。但整餐最使人難忘的，反而是最後的一道糖水：杏汁蛋白。杏汁香甜美味，蛋白不多不少，稀稠適中，有熱度而不燙口，真想來它一大窩。這裏環境不錯，座位也舒適，招呼幾周到，雖然貴少少，算食得過。…查看更多

今晚個仔要返夜校，又剩番兩個「老野」食自己。走o左去九龍城南記飯店。呢度好有大牌檔情調。食物又平又大碟。叫o左幾樣野：蠔仔粥、椒鹽九肚魚、芥蘭沙爹炒牛肉、牙帶。牙帶先來，鹹鹹香香，最好送粥，吃了兩塊，其餘的包起拿回家慢慢吃。呢度o的方魚蠔仔粥好正，正牌冷飯粥咁款，稀杰適中，o的方魚同埋蠔仔好好味，加埋o的芫茜同冬菜，真係天衣無縫。九肚魚又大條又脆口，肉質鮮甜軟滑，完全唔使點o急汁等醬料，已經好好食。沙爹芥蘭炒牛肉乃今晚的高潮。爽脆的芥蘭，軟滑的牛肉，豐富的沙爹汁，吃到最後，我把九肚魚、沙爹汁和蠔仔粥撈成一碗，汁液淋灕地呷之，整個舌頭的味蕾被夾攻得應接不暇。臨走才見到雪柜有幾砵芥菜排骨湯，不過已經好飽，惟有下次再吃了。埋單146，經濟抵食。…查看更多

星期日唔使開工，同老妻來飲下午茶。下晝兩點鐘，lunch的人剛剛散，樓下有位，幾好。我唔多鍾意坐樓上，唔鍾佢太high卡。兩個人，叫左豉汁排骨、蝦餃、蠔油鮮竹卷、重有最緊要o既鵝潤腸卷，另外叫了一碗雲吞麵同埋一碗鵝瀨。所有點心都ok，蝦餃皮薄汁多不在話下，最感動的是鵝潤腸卷，鵝肝腸脂香多汁，但沒有那種一咬落去便成口油或者個飽被油浸透晒的情況。總之甘肥厚沃，其味無窮。雲吞麵拍得住麥奀記，燒鵝瀨粉D湯用左雲吞麵湯底而唔係豬骨湯，瀨粉亦稍稍比早排多左澄粉。略失色。坐左個半鐘，飲夠普洱茶，去行街。…查看更多

呢間深水[土步]老牌食店的第一個食評竟然由我來寫，真是十分詫異。無來呢度好耐，福榮街呢頭竟然變成一條食街，食店林立，琳瑯滿目，好多選擇，不過以前係呢頭開工時，成日來呢間食tea，有o的感情，於是入去食番碗粥。睇餐牌多左好多野，反而唔識叫，是但叫左碗艇仔粥，老妻叫鮮牛肉鯪魚球粥，加了一碟腸粉同埋一碟油炸鬼。我們撈亂食。粥算甜，師父點都有少少，不過唔算好多。粥料新鮮，尤其是o的鯪魚球，彈牙爽口鮮甜，水準之作。不過我唔喜歡佢而家的粥底，太膠，應該是加了米漿煲。以前o的粥底好香，稀稠適度。唉，人懶左o的野就越來越差的了。油炸鬼同腸粉應該係交來的，無mud好評論。平均每人廿幾餅一餐tea，算係咁了，俾個笑面佢啦。…查看更多

呢度係我飯堂之一。因為夜收工，晚飯多數出街食。呢度的出品唔錯，但就十分容易搵位，所以我與內子每個星期最少來一次。我最鍾意食呢度的海蜇頭，大舊爽口，蔥油香味濃郁，食到尾用匙羹「畢」埋的汁液，沁落D銀絲卷度食，正。炒鱔糊是內子喜愛之一。呢度係京菜館，但的炒鱔糊就滬菜響油鱔糊做法，下墊大量韭黃，她愛其辛辣。呢度D拉麵應該係自己打的，唔似一般京滬菜館的死死實實。重有，蔥油餅都幾正，包有汁，每次必叫一個。這裏的工作人員招呼一流，禮貌周周，值得一讚。食完順路搭車返屋企，又一日。…查看更多

尋日個女生日，佢\\\\\\\話鍾意食涮羊肉，我很少食京菜火窩，於是就由佢\\\\\\\「渣」主意，book左呢間。要食京菜，我多數揀鹿鳴春，以前松竹樓還在的時候，都不時去下，而家就貪方便，會去下荃灣間北京樓，至於呢間，則從未見識，一來唔就腳，二來我怕左Ｄ傳說中的「大款」。睇菜牌，無MUDo岩口味，因小女是羊痴，由佢\\\\\\\發辦，叫左一個清湯窩加羊肉組合、沙爹羊肉串燒、羊肉餃、番茄餃、羊肉粉皮、拉麵、羊肉生煎包、燻蛋、生菜、甜品有驢打滾和拔絲香蕉。這裏的混醬較簡單，不過正合我意，我不喜歡太雜的味道。羊肉頗有鮮味，亦夠騷，唔錯。燻蛋夠糖心，但味較薄，沒有什麼煙燻香味。粉皮不過不失。D餃好味，汁液亦夠。最敗筆的是羊肉串燒，乾硬無汁，還附上辣椒粉，連僅有的汁液都吸乾埋，攪到乾辣而無味。不過，個湯就越淥越甜，最後配埋Ｄ拉麵，吃至窩底朝天。至於生煎包，很多地方做得好過佢\\\\\\\，合格而已。甜品驢打滾質感似潮州「香蕉糕」，有少少紅荳味，拔絲香蕉脆皮太厚，普通。侍應很殷勤，意外的是，不見傳說中的「大款」喧鬧，雖無非吸煙區，但檯很疏，無大影響。本來話我請，不過個女話要佢\\\\\\\俾，伯爺公梗係唔D同後生爭啦，當收家用。不過自己就唔會再主動來勒，我會去鹿鳴春。…查看更多

昨天晚上同老妻第二次來這裏吃東西。嘩，果然是週末，人山人海。好彩「太子女」好人士，見我們得兩個人，便給了擺工夫茶的檯仔我們，遠離人群，靜靜地，幾好。坐下，先奉上潮州茶、花生、鹹菜。這裏的鹹菜很正，食晒。我們見人多，不敢叫太刁鑽的東西，點了幾樣大路野：煎蠔餅、蘿蔔烙、鹹菜梅子燜大鱔、蠔仔肉碎粥。雖然人多，但上菜速度仍然正常。先上蘿蔔烙，此菜外觀金黃微焦、蘿蔔香撲鼻，最難得的是，碟底一滴油也見不到。吃一口，口感極佳，外鬆內軟，有汁液，點著少少魚露吃，一口一口的，不能停箸。吃著吃著，鹹菜梅子燜大鱔來了。正宗潮式，寬湯。先呷一口湯，鹹酸菜味、梅子味、大鱔味、蒜子味，層次分明而又混為一体，極佳。鱔肉略走油，帶爽，能「淋」些更好。美中不足是，可能因人多而傳菜慢了，熱度不太夠。蠔仔粥，稀杰適中，味鮮甜，蠔仔是我吃過的最大的。兩人盡一大窩，飽飽。最後來蠔餅，已沒有什麼能力吃了。吃了幾塊，鬆脆無油，蠔仔鮮甜。叫「太子女」用盒裝好帶走，主動俾埋魚露，服務態度好。埋單202元，幾抵食。最值得一讚的是，這裏雖是家庭式作業，但十分清潔。…查看更多