Creamy Anytime的個人專頁

懷住放假心情同朋友玩狗hea聚，閒日lunch time都幾多人，好彩朋友醒目book定outdoor枱。對呢度最好既印象係無論男女店員都非常有禮，所以一定要俾咗讚先👍🏻之前聽其他朋友鍾意食cafe既都推介呢間，作為無乜西餐癮既人，今次終於有機會一試，覺得係有驚喜喎！一個lunch set有 沙律/湯，加個main唔洗$100，好合理既價位，半價加埋飲品感覺良好。食得飽既份量，對得住相機既賣相，加埋討好味蕾既味道，絕對蓋得住室外座位食嘢的話唔夠舒服既感覺，但hey!人家咁既擺枱就係要打咭靚嘛！😂…查看更多

好耐無到鑽石山，又好耐無食金滿庭，既然去到都8:15，正好尾圍用膳，無人等就食佢啦！一坐低隨桌茶芥小吃竟係醉雞，然後有小二誠懇奉上茶包供選擇，有帶位小姐禮貌通知截單和用膳時間，感覺良好~自行QR code落單後，人不餓但充滿期待，畢竟已10年無食，印象尚停留10年以前。一行三人只想簡單吃個家常便飯，點菜不多不複雜，美食好快上枱，（菜名只依稀記得）炸銀絲卷、陳醋海蜇頭、青菜煨麵、紫薯上湯浸豆苗、黑毛豬生煎包。由於係便飯一頓，無打算寫食評，所以無影相既雅興，就即刻起筷，然後......盡力收起停滯10年既期望🥹，努力調整味蕾，希望唔好俾自己對金滿庭既印象幻滅。但埋單一刻，6XX既價錢提醒咗我內心應該要對同樣質素，但一半價錢就食到既上海菜館 公平一啲，就以$138一碟陳醋海蜇頭為例，先不論海蜇頭既口感，陳醋都應該用上對得起$138呢個價錢的吧!一直對金滿庭印象好好，但已經係10年前既事，記得當年排晒隊要等好耐……10年人事幾翻新，無諗過會咁失望……如果唔嚟，可能我仲傻更更同人講緊：金滿庭好好食架！ 係既，10年前既事了。如果而家俾接近$700 3個人食上海菜，可以有更好選擇。是晚俾多既$350，就當係俾面9:45埋嚟善意提醒傾得興起既家人，佢地店面準備做清潔衞生，態度令人舒服。希望有日有人話我: "搞錯！佢其他分店仲係好好食的！" 係我呢個大愛上海菜既食客，最想認既錯🥺…查看更多

收到朋友通知，茶木既BIG BIG珍珠奶茶，做緊10蚊1杯，咁抵又咁啱行過有分店，就即刻買杯高興下。好搞笑，除咗正常珍珠，嗰幾粒“BIG BIG珍珠”真係好大粒，成個乒乓波咁大，唔講都唔知其實係果凍嚟，加埋鐵觀音奶茶，夠晒特別。…查看更多

平時對橙既嘢麻麻，對橙色亦麻麻，但一見到呢間嘢喺yoho新開，唔知點解就好有興趣想試，終於有隻啱既腳，出動👊🏻中午1點，一去到，一條長長既隊，仲以為多人食到咁排法，正諗放唔放棄食第二間好，就發現原來撞正店舖元宵活動開始，免費派嘢飲！話晒仲係新正頭，咁好運，唔係唔領下嘛😂拎完飛就排隊拎飲品，入座先定有得飲先，估唔到係入座先。呢杯就係活動免費既飲品，menu睇成68蚊杯，值唔值就見仁見智。我就選擇一試難忘，再試孤寒🤑😂另外一坐低有碟薯仔沙律前菜幾好食，3個人2小碟有啲唔夠喉，不過送既就多謝一句啦~其實全段食飯時間，同行朋友Y都一直不滿店員既態度同說話語氣（尤其門口帶位既男店員），但我同朋友T就無在意，仲以為係朋友Y挑剔，但正如其他食評所指既服務情況同人物，同朋友Y所不滿既情況都好相近，回想當午店員既語氣的確麻麻，只係同朋友T心情好，所以無在意🤷‍♀️Menu仲有想食既嘢，所以仲有機會會去既……應該……😅 如果下次再去，或者試下第二間分店吧，真係服務差，就獎返個劣評俾佢吧😗…查看更多

已經唔記得幾耐無食過正宗打冷，元朗嚟講選擇唔算太多，一般都會揀老店，貪其食開穩穩陣陣。呢間坐落“雞地“既小店，對我嚟講算新店，想試好耐一直未有機會，今日機會嚟喇，朋友叫到話想打冷，加上無敵天氣坐室外食一流。以後此店將會係本人元朗打冷首選，已經諗好再嚟要試乜：椒鹽九肚魚、涼拌魚皮、涼瓜黃豆排骨湯、春菜腩肉……哎呀，成個menu都想試晒咁滯，即係又要試多幾次😂 仲要朋友請食飯，理應點都抵咗，點知一問埋單價錢，3個人先食咗3百幾，嘩，初時仲以為計錯價錢🤑 好，下次醒目喇，約咗幾點食，就早30分鐘拎飛排隊！😄…查看更多

大年初四約咗同朋友食飯團拜，預計度度都多人，所以預早book定頭圍用膳！一到場見排晒隊入walk in，諗緊自己book咗洗唔洗排，但新年流流避免口角，照排! 好彩安排都算唔錯，跟隊3-4分鐘就安排好入座，話晒新年，決定揀個SetD，食得豐盛啲，希望全年豐衣足食🤑！好好彩坐到近飲品櫃同甜品既位，非常方便😁呢隻韓國酸柑汽水好好飲！市面好似唔覺有得買，所以主打飲呢個！原來仲可以任飲啤酒同清酒，但揸咗車所以無飲，下次唔揸車就可以盡慶啲飲埋🍶🍻一坐低唔洗叫已經有齊個set既牛同海鮮可以試啱自己口味先狂落order，唔洗浪費！托壽星鴻福仲有A5和牛西冷送，好食到有幸福感呀🥰剌身款式唔算多，但算係新鮮有光澤，亦俾得唔姑寒😂熱食好多選擇，由於要留肚食燒肉，只能精挑某啲款式，估唔到大部份都滿意，而且有啲仲有驚喜！連湯烏冬都完全唔hea，仲要係好好食既稻庭烏冬！雞泡魚乾係原塊上，要自己燒一燒，做啲手工剪到一條條，神還原居酒屋擺盤，如果可以飲埋清酒就無敵喇🤤其實成餐放題已經食得好滿足好豐盛，但有得任食牛角包窩夫同Mövenpick雪糕，唔係唔食呀？本來諗住只食一份，因為真係好飽，點知估佢唔到個窩夫完全唔輸條街排隊買幾十蚊一份嗰啲，食得一份好似對自己唔住🤪食物質素的確幾有驚喜，款式選擇又多，令人會有想快啲翻兜既感覺🤭而且特別要讚既係，呢間坐爆場既燒肉店，係完全零油煙架！走既時候發現身上、袋、褸，坐咗120分鐘係一啲油煙味都無吸到架！👍🏻👍🏻👍🏻由於假期，加上頭圍用膳，所以當大家食到忘我時，職員埋嚟提示差不多要交枱時都幾禮貌，所以大家都識趣，開開心心食完就走，開咗個好年！🤗🧧🎊…查看更多

由Green Common一開就入會，睇住佢一間一間分店開，到一間一間餐廳開，好喜歡佢地既理念同揀選既產品。直至轉咗喺中環返工，知道公司附近有分店，除咗會成日去買嘢同閒逛外，久唔久lunch都會食下Kind Kitchen，除咗Lunch試過2次堂食，平日午市比較多人所以會買外賣，但無論堂食同外賣(未來漢堡系列)，水準都keep得唔錯，尤其薯條，做到夠酥脆，沙律菜亦夠新鮮，份量又足，單點$88以食同樣份量既美式漢堡餐計，除咗包睇落細咗啲外，食埋其他配菜，其實都夠飽。最近第一次嘗試放工後堂食晚餐，新鮮整好更加好食。因為今次未來漢堡係用買一送一coupon嗌，所以飲品雖然比較貴(平均$40以上/偏細杯)，都叫咗兩杯飲品開心下。結果所有嘢我地都食得津津有味，非常滿足！可惜，已經不止一次留意到，餐廳只有一個男侍應係抱住該有既良好態度招呼客人，入面其他所有女待應/女經理(定主任)，態度同語氣都幾差。由帶位開始，已有種態度俾擺出嚟係好似 “唔想招呼你(但焗住做)、睇你唔起(對外國人好少少)、覺得你好麻煩(尤其落單同問嘢嗰陣)……”而且唔係一個，而係全部女餐廳職員既對全部嚟既客都係咁。幸好當晚係由一個好好禮貌男待應招呼我枱，得以無影響我當晚愉快既心情。😊希望有緣睇到呢篇食評既你，有定心理同EQ準備，嘢可以去食，服務就當去澳牛算🙃由2018年已有人寫佢地服務差，就知唔係無中生有。…查看更多

點解係要的起心肝入去食？因為佢一係間門面唔吸引既屋邨日本菜。每次經過都只會諗：下次先試。唔係話睇唔起屋邨，但通常好得既食肆俾人既印象，都唔會開喺屋邨商場，更何況日本菜？要是但填肚，不如是但一間下價食肆或快餐店，慳住荷包食飽就算。今晚，就係 是但搵食 既情況下，行咗去天瑞邨，又想食日本嘢，所以無乜期望下但求醫肚。所以，無期望就無失望，佢既價錢俾到合理既質素。今次2個人好餓下，點咗2個餐牌上貴少少既丼飯，再加一個牛肉鍋，三樣份量都唔細，兩個人好夠飽。魚生無太過凍冰冰，新鮮度合格，飯亦唔差，而且份量好多，大食既男仔都會撐得飽，細食既女仔最好少飯。雖然比起專門食丼既店，魚生份量唔會有「嘩」一聲既澎湃，但只係幾十蚊嚟講，影相夠厄like吧～其實點解佢地夜晚仲可以爆場，除咗因爲對邨內居民方便外，呢度普通醫肚係ok之上既，如果懶去得遠又想食日本嘢，間唔中一餐都接受到丫。至少，無期望下第一次去，係覺得唔差既。但當去多十次八次，心情相信會影響味蕾。會有下次，不過唔知幾時。大概係下一次唔想離家遠又想食日本嘢，然後又咁啱想試佢個拉麵/烏冬、天婦羅同壽司，咁就會去了…查看更多

沒有台灣家庭式小店那種味道, 但還是找到一點點台灣味。 台式特許經營店,食物質素穩定。環境尚算整潔,價錢合理。 或店面空間有限, 2個人食還可, 4個人難坐, 多過4個應唔可以同枱了~…查看更多