Lucky Foodie的個人專頁

放完假之後返工，總係無乜心情做野，所以今日決定早D收工，去荃灣廣場 Cow Bean 食個早飯，因為呢度係繁忙時間，一定大排長龍，所以五點幾去幫襯，就最好啦，一入去揀左個窗口位坐，雖然出面無靚景，但係有D天然光照下都好吖，加上呢度裝修走清新自然風，感覺都好舒服。望完餐牌叫左個鐵板三文魚炒飯，加杯朝日啤酒。好快冰凍啤酒就送到，Happy Hour 即刻開始，飲左一大啖，實在透心涼。跟住鐵板三文魚炒飯又到啦，熱辣辣，賣相好吸引顏色好靚，好多三文魚仲好有光澤，蔬菜都好多，分別有椰菜、豆角、洋蔥、粟米，面頭仲有一大堆甜蛋絲，首先將D蔥花放曬上去，加埋隻溫泉蛋，再淋上燒肉汁，鐵板唧唧響既時候，已經聞倒香嘖嘖，即刻輕輕撈勻，熱辣辣食入口，好好味，軟嫩既三文魚好有鮮味，D蔬菜好新鮮，而D飯亦軟韌適中，加埋溫泉蛋令整體口感滑溜溜，燒汁亦吾會太鹹，調味啱啱好，差吾多食曬，D飯依然熱辣辣夠曬熱度，食到個胃暖笠笠，跟住飲番啖冰涼啤酒降下溫，真係又爽又滿足。食到飽飽，餐廳又出現人龍，無辦法啦，要食好野，花多少少時間都係值得既。…查看更多

同好朋友慶祝生日，食佢大愛既日本菜，點名要食廚師發辨，一於豪食一餐。先來前菜，有和牛，松葉蟹肉，安鱇魚肝， 碟碟都好好食，雖然係細細碟，但都好滋味。跟住再囄刺身，右口魚，珍蠔、醋啫哩，海膽海蝦，金目鯛，最鐘意珍蠔，吾算好大隻，但味道好清又鮮，仲有右口魚，油脂好多，好香。跟住大大隻龍蝦刺身，肉質雪白，入口又爽又彈牙， 好新鮮，吾點醬汁，食佢既原汁原味，都已經好正。燒銀鱈魚，面層燒到金黃，入口好幼滑。手握壽司，師傅話依個時候係最啱食白魚，所以我地主力都係食白魚壽司，有池魚，剝皮魚，鱸魚, 鯖魚壽司，款款都好新鮮，不過最開心有我鐘意嘅赤貝壽司，好爽脆，口感一流。仲有右口魚，左口魚食得多，但右口魚就少食，入口個種入口即溶既感覺，真係好正。另一個要讚嘅係北海道海膽拖羅飯，其實之前食左噤多壽司，都飽晒，但見到噤新鮮既海膽， 又點忍得口，一口氣將佢食清光。最後囄個熱辣辣既龍蝦湯，望落去好清，飲落味道好鮮甜。甜品黑芝麻雪糕，芝麻味好濃好滑，覺得好滿足。…查看更多

每次要出街食飯，唔理係熱辣辣既夏天，定凍冰冰既冬天，火鍋都係我首選，今日就同朋友去左環境一流既酒鍋。一睇餐牌，見到個好特別既湯底，酒火入鍋吾駛諗即刻叫，對佢充滿好奇，一個鍋有5種唔同味道既湯底，夠晒方便，不過最特別係中間個湯底，倒d酒入去，然後就點火，隔左一陣，再放乾冰，效果好靚，仙氣十足。頂級安格斯牛小排一定叫，肉質好嫩，油脂均勻，淥一淥就食得，好正。 再叫賣相好靚既黑毛豬腩肉玫瑰花，賣相好靚，黑毛豬真係又香又淋，朋友好鐘意。食火鍋最鐘意蜂巢豆腐，吸晒湯底既精華，熱辣辣勁夠味。鵪春蛋福袋，啱晒新年食，感覺食左充滿福氣。再叫海鮮拼盤，有蟶子，大蜆， 帶子，花竹蝦，款款新鮮，吾駛點調味料，都已經好好食，鮮味十足。再有勁吸晴既七星報喜，七種吾同顏色既手打丸，禁好意頭，一定要叫。叫埋個什菌拼盤，有我鐘意鮮冬菇，金菇，仲有秀珍菇同雞脾菇， 份量都唔細，兩個人夠晒食。再飲埋Peach on the beach，好香桃味同菠蘿汁，好解渴。朋友杯Summer delight，芒果加菠蘿汁，酸酸甜甜，啱晒幫助消化。 …查看更多

今日成日都係出面做嘢， 喺銅鑼灣收工已經七點幾，經過白沙道見到一間望落去有D似酒吧，睇真啲原來係台式小店，主打牛肉麵，仲有台式奶茶、果茶、奶蓋沙沙外賣櫃位，門口仲有高枱櫈可以坐低慢慢飲，見噤靚噤吸引就入去試試。店內嘅裝潢有古老倉庫氣息，週邊破爛紅磚牆、懷舊擺設、海報帶出台式小店風味，仲有不少綠葉植物作點綴，感覺舒服。既然店名用上三個牛字犇之食堂，一定要試下佢哋嘅眷村紅燒牛肉麵啦，餐牌有牛仔標誌架。牛肉係用牛，聽講台灣人鍾意牛牛有咬口。食落軟淋而有咬勁，有唔同層次，牛肉味濃。湯頭有牛肉鮮味，湯色較深但鹹淡啱啱好唔會太濃。 麵係闊身麵條，咬落彈牙，沾咗湯一齊食可口順滑，仲可以加埋枱面上嘅酸菜就更惹味，的確係有水準嘅牛肉麵。小食點咗大腸拼小腸， 係台灣嘅傳統小食。大腸係糯米腸，小腸係黑橋牌台式香腸， 佢嘅賣相好特別，將大腸開邊再加上酸菜同小腸再用竹籤串起， 食落味道豐富，有糯米嘅軟淋，香腸嘅肉味，酸菜嘅甜酸再加上醬汁， 令傳統小食變得仲好味。台式飲品一定要試啦，叫咗香橙茉莉花茶，都係有牛仔標誌。 飲落有明顯嘅香橙味，但不會遮咗茉莉花茶嘅清香。臨走前同經理傾咗兩句，先知道材料都係來自台灣，連師父都係台灣囄，唔怪得味道可以咁有台灣風味，原來檯面嘅酸菜都係台灣師傅自家製，下次要加多啲，食真啲。…查看更多

天氣開始無咁熱，心思思想食日式燒肉，荃新天地嘅牛太係我首選，地方闊落、坐得舒服、通風又好，食完唔會成身味，一於約朋友今晚去食個燒肉大餐。一坐低，經理落力推介新出以泰國為主題嘅燒肉餐，當然要試吓啦，先有柚子沙律，柚子又甜又多汁，仲有青綠嘅生菜，混埋辣辣地嘅醬汁，食得好開胃。泰式酸辣豬頸肉，用泰式醬汁醃過，好入味，邊位燒到燶燶地，少少油脂，好香口。食完泰式前菜，開始食我至愛嘅霜降迷你牛扒，鹽味、燒汁同味噌，三款都愛，全部叫曬，霜降迷你扒燒一陣就食得，點番少少醬油吊吓味，好好食。牛肋條肉，鍾意佢有口感，牛味又濃，加埋燒緊果陣D油香，真係好正，我同朋友都好鍾意食牛，所以真係食到停唔到口。食完牛，叫咗海鮮，雖然無牛咁多選擇，但每樣都有叫，覺得燒魷魚最好味，細細地，唔會太 heavy。燒帆立貝都唔錯，先喺錫紙盤加埋D牛油一齊燒熱先，等佢吸曬D牛油香，再放上爐面燒乾佢，趁熱食，好正。蔬菜叫咗個蔬菜拼盤，好多種類，有粟米、南瓜、鮮冬菇、翠瓜、洋蔥同京蔥，最香嘅當然係燒洋蔥同京蔥，口感爽，好甜，不過好容易燶，要小心睇火。熱食，當然要叫番個泰國主題嘅香葉石鍋肉碎溫泉蛋飯，熱辣辣石鍋上枱，將肉碎同溫泉蛋攪勻，粒粒分明嘅飯，沾滿幼滑嘅溫泉蛋，好滑溜好滋味，但係鍾意重口味嘅我，覺得再辣D，再多D香葉仲更加惹味。甜品朋友叫咗燒香蕉，話未食過要試吓，經理話要撕咗少少皮，放喺爐上面燒到熱熱地，再加埋朱古力醬，就食得，朋友話第一次食熱香蕉，感覺好唔錯，好軟淋，好香甜。跟住再食埋個 iseeisee 芒果糯米飯雪條，入口好重椰子香，跟住係酸甜嘅芒果香，仲有粒粒糯米飯，多重口感、多重好味，清爽又解渴，正。而我就食咗最愛嘅 movenpick 雪糕，當然一樣咁正。…查看更多

今日，同朋友行街路過人氣餐廳 NINETYs，因為時間仲早，餐廳唔多人，雖然未肚餓，但係我哋決定入去食個早飯。餐廳空間唔算好大，不過裝修有個性，沉實啡色主調、金屬枱椅混搭、燈光柔和，打造出一份協調氣氛，雖然枱與枱之間比較淺窄，但整體感覺舒服。先叫咗個特色小吃 Avocado Tempura，牛油果就成日食，但用離做天婦羅都係第一次食，感覺幾新鮮，熱辣辣，外面層脆漿好薄，裡面軟綿綿，咬入口好輕身，完全唔係想像中嘅厚重口感，唧少少檸檬汁喺面一齊食，多咗份清新，原來熱食嘅牛油果，味道更加香滑，好味。跟住係 Kumato Pork Belly Ball，賣相好靚，兩大粒圓波出場，真身係用咗薄薄嘅腩肉，包住橙紅大番茄一齊焗到金黃，腩肉好香脆，而裡面隻番茄，熱辣辣，好 juicy，爆曬汁，點埋D醬汁調味，酸甜滋味又醒胃。其實，豬肉加番茄配搭唔算特別，但係做法同味道，的確另人喜出望外。主菜係 Grilled Black Cod with Japanese Sweet Potato Purée，用食物天然嘅顏色，做出悅目擺盤，鱈魚皮香肉滑，好有鮮味，加埋個西京燒汁，更加好味，配菜選擇都好用心，最鍾意梗係嗰幾片無花果，配埋個甜薯泥食，好綿好滑溜。冰凍西柚汁，最啱食飽飯飲，少少酸澀，味道清新醒神，又幫助消化。朋友叫咗杯 Apricot Houjicha，茶色清透，冰涼清爽，呢杯茶最正就係用原片茶葉，唔係製過嘅茶包，所以，茶味特別香濃，裡面仲有粒粒杏桃肉，泡浸之後，食入口爽爽哋，茶香果香，好飲。甜品，本來想食 Donut Toast，聽聞話好唔錯，點知沽清，失望，唯有搵日再離食下午茶，早D應該有得食。雖然我哋只係食咗幾樣嘢，但的確誠意可嘉，做得精采。…查看更多

今日喺荃灣行街，見到新開嘅喜棧，裝修幾有特色，係時尚版嘅客棧 feel ，座位空間好闊落，望吓門口個餐牌有咩食，經理即刻熱切介紹咗個雙人鼎上赤龍蝦仔餐比我哋，話好抵食，同朋友決定試吓。先上兩盅無味精九鼎湯，由九種材料熬製而成，有木瓜、佛手瓜、雪耳、蜜棗、南北杏、果皮、老薑、豬踭同唐排，熱辣辣入口，味道又清又甜，足料足味，好好飲。喜棧瑤柱浸雞，雞肉好嫩滑，又有瑤柱提鮮，點埋薑蓉，仲更加正。椒鹽赤龍蝦仔，遠遠已經聞到香氣，食入口真係好香好惹味，而D蝦肉都好有鮮味。梅菜蒸時蔬，連蒸籠上枱，賣相吸引，面頭好多梅菜，甜甜哋，好啱送飯，而菜心蒸完都仲好青綠爽嫩，吸埋梅菜味，感覺零舍清甜。另外，我哋加多咗個小菜，滑蛋牛肉，D蛋火候啱啱好，入口好滑溜，而D牛肉都好香好軟淋。食飽再叫埋杯熱柚子蜜，味道清新又幫助消化。喜棧標榜食物唔加味精，餸菜味道都幾清，唔會太油膩，感覺都幾住家feel，想食住家飯，又唔想自己煮，喜棧應該係一個唔錯嘅選擇。…查看更多

一號風球高掛嘅夜晩，風唔大雨好大。突然好想食日式燒肉，即時搵朋友一齊，去咗荃新天地嘅牛太開餐，鐘意佢食物質素好唔錯，裝修夠型格，座位好闊落，加上完善嘅抽風系統，食飽之後唔會成身燒肉香，而且，喺呢個風雨交加嘅日子，搭港鐵到荃灣站，沿住全天侯嘅天橋行過去，完全唔怕落雨斯濕，掃曬興，真夠爽。我哋六點半到，唔算多人，唔洗等位，即刻入座，即刻點餐，㨂咗店長推介嘅華美清馥燒肉放題，望住個平板電腦，食物選擇好多，牛、豬、雞、海鮮、野菜、沙律、麵、飯、小食、大食、甜品，全部有齊，不過，以牛魔身份，首輪當然專供牛肉。開爐點火，店員送上前菜，牛肉拼盤跟生菜，跟住自己點嘅牛肉都好快送到，叫咗霜降迷你扒、牛脊肉、同牛胸腹肉，放入爐燒一陣，肉香冒升即食，款款牛肉都好正，最鐘意霜降迷你扒，油脂好均勻，肉質好 juicy、嫩滑軟淋，而且仲有三種調味，鹽味、燒汁同辛味噌，自己最愛當然係鹽味，因為本身肉味已夠好，跟本唔需要額外調味，灑少少鹽，原汁原味，就係最好嘅食法。次輪食海鮮，叫咗海蝦、原隻魷魚仔、鹽燒帆立貝、牛油蒜蓉燒蠔，熱辣辣食入口，新鮮好味。跟住清一清胃口，食野菜，有自己最愛嘅燒菠蘿，好水潤。燒洋蔥都好香，好爽甜，朋友食到停唔到口。仲有粟一燒，少少燶燶地，好香口。朋友見到有迷你冷烏冬，話要試吓。寫就迷你，其實份量都唔細，烏冬煙韌，湯底清甜冰涼，所有熱氣，即時降溫。食埋甜品，叫咗是日甜品櫻花蛋糕，細細地，甜甜地，味道啱啱好。仲有叫咗鯛魚燒，燒到少少燶，脆口香甜。另一驚喜，就係每人仲有一杯movenpick 雪糕，呢餐日式燒肉，真係食得好滿足，夠曬正。…查看更多

今日同朋友喺 ifc 行街，行到又攰又口渴，去咗人氣咖啡店 % Arabica 買咗杯咖啡飲吓先，抖一抖再血拼，下晝三點幾，仍然有條長長嘅人龍，果然係人氣咖啡店，第一次飲，真係要試真D個味道。朋友係抹茶控，睇咗餐牌，即刻叫 Matcha Latte 抹茶鮮奶，話要試吓京都嘅抺茶風味，果然抹茶味道好香濃，奶味好重，入口好幼滑，又唔會溜，真係好正。Spanish Latte，遠遠已經聞到陣陣咖啡香，入口奶味濃郁細密，跟住嚟咖啡味道有深度烘焙焦香，冇帶酸冇苦澀，入口好順滑香醇。但自己覺得如果奶嘅分量可少D，就更加好，依家D奶味好似蓋過咗咖啡味，下次要試下 Espresso ，相信咖啡豆嘅香氣應該會發揮得更淋漓盡致。…查看更多

我同朋友都好鍾意食炸雞，真係食極都唔厭，每次食完都覺得好開心，好relaxe，今日又想食，去左銅鑼灣Sodam食炸雞。今次叫咗新菜式辛辣焗雞，啱晒我胃口，我鍾意焗雞又鍾意食辣，焗雞嘅皮好脆，D肉又唔乾，好juicy，成碟雞好吸引，面頭好多辣粉，睇落去覺得好辣，嗱嗱聲熱辣辣咬一啖，好香，好正，好惹味，不過朋友話辣得滯，食唔到，成碟辛辣焗雞差唔多我食晒，勁滿足。朋友最鍾意原味炸雞，次次都食佢，炸雞個皮好香口，雞肉又唔會油淋淋，點埋個甜辣醬，好滋味，不過我覺得唔點醬都好好食。食炸雞啤酒真係唔可以無，我叫咗果味濃嘅白桃啤酒，朋友叫 Asahi ，依度D野飲又真係好大杯，好抵飲，天氣又噤熱，一啖冰涼嘅啤酒，一啖新鮮熱辣嘅炸雞，真係夠晒爽。…查看更多

銅鑼灣行完街，腳步好自然咁又行咗去炎丸水產食飯，日本料理喺我哋飯單裡面，始終係人氣高企。而且，我哋好鐘意呢度舒適自在嘅飲食氣氛，裝修好有日本 feel。天氣又笠又熱，坐低即時叫番杯冰飲，降吓溫。洋梨燒酎，大大杯全透明，睇見都涼浸浸，一啖入口，梨香都幾鮮明，加埋淡淡酒味，清甜爽喉。朋友飲鹽檸檬 HighBall，微鹹微酸，味道清新醒神，但酒味偏淡。跟住叫D開胃菜，麻醬蕃茄豆腐沙律，切得丁方嘅冷豆腐好有豆香，加埋去咗皮嘅水潤蕃茄、多種新鮮蔬菜，混埋香口嘅芝麻醬汁，食入口酸酸哋嘅鮮爽，好醒胃。炸蓮藕片，金黃薄脆，味道清清哋，送酒最啱，唔覺唔覺好快比我哋食曬。三文魚中卷，賣相好飽滿，用料好足，面頭仲有鹹鹹哋嘅魚子，好味。再離食番個熱辣牛油炒野菜，又香又爽。暖胃過後，當然要食番個鮮味十足嘅刺生啦，點咗梭子魚，同埋左口魚刺身，輕輕燒過嘅梭子魚，多咗一份微焦油香，口感軟嫩鮮甜。自己比較鐘意食左口魚，口感軟滑之中帶有彈性，點埋個酸汁，味道更加清鮮。壓軸當然係磯燒啦，白蛤磯燒，雖然細細粒，但一口一粒，食得夠爽。貴妃蚌，連埋湯汁一齊食，唔使講當然鮮甜十足，好正。大蝦鬼殼磯燒，大大隻，蝦殻燒得燶燶哋，香噴噴，蝦肉好雪白，一啖食入口，實在嘅爽彈口感，呢餐真係鮮味無窮。…查看更多

今日喺荃灣食飯，朋友話帶我去一間佢成日幫襯嘅餐廳，仲話我試過一定覺得正。原來講緊嘅係 Olive Cafe，呢間餐廳喺荃灣已經好耐，不過自己就一直無食過，今日就去食番個豐富晚餐。先叫飲品，熱血橙水果茶，透明茶壺裝住橙紅嘅水果茶，黃燈底下特別吸引，明火保溫，入口暖笠笠，淡淡橙香。朋友杯凍鮮果茶，茶味好濃，加埋新鮮嘅水果，香甜清爽。龍蝦濃湯，熱辣辣、香噴噴，輕輕攪勻面層嘅忌廉，口感好幼滑。香煎蟹餅配刁草芥末醬，自己最鐘意食蟹餅，所以見倒一定會叫，蟹餅煎得好金黃，入口啖啖蟹肉，點少少刁草醬，更加好味。芝士煙肉焗蠔，有蠔嘅鮮味外，仲有香濃芝士同煙肉，好正。海膽扁意粉配椰香海鮮濃汁， 金黃嘅海膽入口回味甘香，加埋椰子嘅清香，配埋 creamy 嘅海鮮濃汁，味道層次好豐富，好好食。香煎1855肉眼扒配薯條雜菜配紅酒汁青胡椒汁，肉眼扒面有少少焦香，肉味好濃，好 juicy，粗薯條新鮮即炸，夠曬熱辣，好正，10 安士嘅牛扒，份量都唔細，食得好滿足。食咗個豐富晚餐，再慢慢飲埋杯水果茶，同朋友傾吓傾吓，唔覺唔覺就消磨咗一晚。…查看更多

放咗四日復活節假，今日返工，真係覺得零舎悶， 所以一早 plan 好，今晚要出街玩，去 Mr Steak Buffet a la minute 食返個豐富自助餐。食自助餐，最鐘意食海鮮，呢度D海鮮又多又新鮮，第一時間食番隻我最愛嘅麵包蟹， 又大隻，又多膏，真係好好食。蟹腳，鹹鹹地，唔算好大，不過肉質都 ok，好食。見到三個師傅好努力咁忙住即開生蠔，夠曬衛生，食得安心，蠔味好鮮，有少少海水味，肉質好爽。刺身，食咗好新鮮爽囗嘅赤貝、同埋好嫩滑嘅帶子，仲有甜蝦，不過我怕麻煩，因為要自己剝殻，所以只係食咗一隻，味道都好鮮甜。食完生嘢，食番D沙律清一清胃口，沙律菜都有好多款，全部都好新鮮爽脆。酥皮磨菇忌廉湯，賣相好吸引，熱辣辣，味道好香濃，口感好 creamy ，好足料，磨菇勁多，食埋個香脆嘅酥皮，真係正。食咗好多海鮮，飲埋碗熱湯，跟住要食佐賀和牛壽司，師傳即叫即灸，保證新鮮，和牛入口即溶，面頭少少燶燶地，仲放咗D蟹籽，增加口感，好香好食。跟住食和牛壽喜燒，和牛真係好鬆化，好軟滑，D蔬菜吸埋壽喜燒嘅汁，甜甜地，令人愈食愈開胃。熱葷都好唔錯，而且種類都好多，所以每樣都只可以食少少，都巳經好飽。但係講到甜品，當然要食，係我最鍾意嘅 Haagen-Dazs 雪糕，食咗兩大球薄荷同咖啡味，咁呢個自助餐就夠曬完美。…查看更多

夜晚9點幾，喺銅鑼灣搵嘢食，見到新開嘅千里屋食堂，喺門口睇吓個餐牌有咩食，店員即時熱切介紹，佢哋係來自大阪嘅食店，主打牛肉飯，好吸引，同朋友決定試吓。呢度走食堂風格，裝修係大眾化嘅日式自然風，木枱櫈加柔和燈光，感覺自在舒服。望完餐牌，叫咗個 Shabu Shabu Gozen Premium 御膳，店員好快手，連爐帶鍋一齊送上，跟埋漬物、前菜、味噌湯、白飯一碗，前菜係炆牛筋肉，又淋又入味，仲有兩件暖暖嘅玉子卷。而鍋裡面就有好多新鮮嘅野菜同菇菌，當然仲有主角，一碟肥瘦均勻嘅安格斯牛肉啦，放喺熱湯上面，勺兩吓，已經食得，肉質好鬆、好軟滑，雖然係薄切，但係都好有肉味，加埋吸曬清甜嘅昆布野菜湯底精華，好好味，跟住食啖白飯，再飲番啖熱辣靚湯，味道真係好圓滿。朋友係牛魔王，當然揀得嚴謹，4款鹿兒島黑牛Fair之中，揀咗和牛鐵板3種，跟埋味噌湯，同白飯。熱辣辣鐵板上面，放咗清爽雪白嘅大根、洋蔥絲，3色雜豆，同埋3小碟調味，醬油、胡椒鹽、芥末，伴住3種唔同部位嘅嫩紅和牛，每種都有3、4片倒，切得好工整，分別有五花腩、肩肉、里脊肉，3種絶對唔同口感嘅享受，油脂比較豐富嘅五花腩，輕輕點少少鹽吊吓味，肉味濃厚甘香，肉質好滑溜，食入口簡直有種即溶嘅感覺。而肩肉，就有一種好實在嘅咬口感，肉質好有彈性。跟住係口感細嫩嘅里脊肉，油脂比較少，一定要慢慢細嚼，感受一下呢種獨有嘅細膩牛香。食到飽飽，飲番啖冰凍烏龍茶，真係有一份好幸福嘅滿足感。遠道日本而離嘅千里屋食堂，夾住食高級牛肉嘅招牌出場，味道當然做得耍家，一眾牛魔王，千其唔好錯過呀！…查看更多

今晚同朋友係四季文昌食椰子雞火鍋做晚餐，叫咗半隻雞，七彩芝士流心丸，鬼馬蝦滑，和牛拼盤同豆苗。等咗陣，好香椰子嘅火鍋就到，店員將新鮮椰青水倒入煲到，等佢滾咗，就將鮮雞放埋入去，用漏斗計時，7分鐘到就有得食，係等佢熟期間，聞到陣陣椰子香，雞係用文昌雞，肉質好嫩，雞味好濃。和牛拼盤，有牛柳粒，牛舌，安格斯牛頸脊，澳洲M9和牛，佐賀A5和牛，好豐富，牛舌係一粒粒，口感好好。店員叫我地要由底開始食起，一層一層食上去，最後先食日本和牛，其實除咗牛柳粒同牛舌要淥耐少少，和牛真係淥一淥就食得，好有油香，油脂好均勻，入口即溶，好正。七彩芝士流心丸，七個味道，各有特式，不過淥咗後，個芝士仲好流心，朋友話好正。鬼馬蝦滑，油炸鬼釀咗蝦滑，面頭仲有蟹籽，蝦滑好爽彈，油炸鬼吸晒D椰子湯，又香又甜。豆苗，種完嘅豆苗未收割，要自己用胶剪剪，好特別，夠晒新鮮。食完火鍋，朋友見到隔離枱食臘味煲仔飯，好香，所以我地都叫咗一個，好足料，臘味好多，芋頭又綿，又有飯焦，口感一流，我地叫咗細煲，好大好多，四個人都夠晒食。最後飲埋椰青，好夠凍，勁解喝，成餐飯食完覺得好滿足。…查看更多