一勞永逸的個人專頁

兩公婆今日放早, 去咗尖沙咀 shopping一陣, 跟住再黎一round Happy Hour, 然後拍拖去食日本嘢。喺棉登徑找到一間門口大方企理的嵐山日本料理， 餐廳裝修簡單整齊，適合拍拖或三五知己聚一聚。可能好耐都冇同老婆拍拖，所以嗰日胃口特別好。我哋聽店舖經理逐一為我哋介紹和協助點菜， 首先食的是刺身，三文魚、赤貝、 吞拿魚(中拖羅)、 深海池魚、 仲有好特別嘅鰤魚， 味道似油甘魚但更鮮甜肉質更誘惑。鮮甜可口野菜魚湯，d 魚味好濃好鮮甜。 跟住再嚟係燒鮑魚和燒羊架，鮑魚咬落有口感， 燒得啱啱好。 羊架都唔錯不過如果燒耐少少可能更加正。壽司方面，海膽油甘魚，蝦膏帶子，吞拿魚蓉牡丹蝦， 配搭有心思而且不會搶味!雜錦天婦羅大大碟，有蔬菜亦有大蝦， 炸得啱啱好。 最後完成和風大雜菜就簡直係一個完美嘅句號。…查看更多

禮拜日約左班老友去筲箕灣食飯， 食完飯飽飽哋班美少女話想食甜品，見到有間糖水舖新開入去試下， 而且見到門口新店開張八折，其他分店又有咁多名人幫襯，應該非常可靠...... 結果不單是可靠,更帶來驚喜!!!店舖的地方不算大，但光猛整潔，可說是麻雀雖小五臟俱全。 店員的態度非常好， 碰巧那天遇到甜品舖老闆陳生陳太， 他們每事親力親為和殷切的態度令我對這甜品店有非常親切的感覺， 當然兩位樣子甜美的女店員亦是加分位。至於甜品方面， 我們點選了芝麻糊、 椰汁西米露、香芒小丸子和芒果蛋白。 有凍有熱有新鮮水果,我們可以交換來試試， 由於我是芒果迷， 所以對芒果特別有要求，芒果新鮮香甜， 非常不錯值得推介。 至於芝麻糊和椰汁西米露亦在水準之上， 由於是第一天開張所以沒有豆腐花， 希望下次可以試埋豆腐花和榴槤咁就完美喇。…查看更多

過往都曾經慕名去過《鮨文》元朗店，當時用餐亦都好愉快，不過始終對我哋呢啲香港島返工嘅人嚟講，入去真係遠咗啲。呢間開咗一年嘅黃埔分店就非常方便，一出黃埔地鐵站過對面馬路就係。門口比較隱蔽，亦都冇招牌。全場以淺木色為主，摩登日本風。黃埔店比元朗店大，吧枱目測都可以招呼10幾人，仲有幾間VIP房，下次再約埋一班同事過嚟先。見到餐牌選擇分為兩款廚師發辦，一款＄1350，一款＄1750，黎得慶祝咁梗係揀左＄1750。首先，師傅準備咗啲前菜，有紅酒蕎頭、千本漬同芥末淮山。一邊食一邊睇師傅表演。同好多鮨店一樣，廚師發板第一道菜通常都係茶碗蒸，其實係食生冷野之前先食啲暖同熟嘅食品，確會可以起到保護胃部嘅作用。蟹肉茨金箔茶碗蒸呢個茶碗蒸裏面嘅蟹肉都幾鮮甜，蛋唔算好香濃，但係勝在蒸得好滑身。櫻煮八爪魚 師傅話用咗三日準備，熟成、慢煮、細心睇火，因為要每個部份都煮得均勻，最後調味，先送到我哋面前，絕對係有心機嘅菜式。八爪魚入口軟腍，帶啲啲甜同辣椒，做得好好。魚子醬伴白子呢個係鱈魚白子，其實係卵巢部份，有啲似豬腦，入口creamy 肥美，同啲酸酸地嘅柚子醋好夾。真蠔 呢個日本真蠔來自小長井。日本真蠔味道相對一向食開嘅法國蠔味道薄啲。口感細膩，肉身厚，帶甜味。香箱蟹香箱蟹係雌性松葉蟹，小弟都係第一次食。其實平時好少叫蟹食，好怕煩，食蟹最怕要自己慢慢拆肉，呢度菜啱晒！師傅拆晒啲肉，再加埋啲蟹子蟹膏，放返去蟹殼上面，加埋啲啫喱醋，啖啖肉，正到難以言喻！清酒蒸蝦夷鮑魚鮑魚新鮮爽彈，唔錯！令我最深刻唔係鮑魚，而係鮑魚肝醬撈埋啲赤醋飯嚟食，香濃惹味，送酒一流。寒鰤魚切成三片嘅非常肥美，入口爽甜。針魚肉質爽，結構緊密，獨特的魚香。白象拔蚌白象拔蚌口感鮮甜爽脆。三文魚子三文魚子粒粒圓渾，脆卜卜。深海池魚肉質緊緻，魚油肥美，味道清甜。北海道點紋牡丹蝦蝦膏燒得燶燶地，充滿鹹香。蝦肉爽嫩，甜度爆燈。吞拿魚面頰燒過嘅吞拿魚面珠，油香十足，而且仲好嫩！干飄手卷葫蘆瓜卷，甜甜地。雲丹盛小弟好鐘意食海膽，啲海膽一瓣一瓣睇到人哋好開心！裏面有兩種海膽，分別係北海道白雲丹同赤雲丹，前者香滑，後者濃郁鮮甜，想再encore 一杯！伊達卷質地唔太乾，唔太濕，啱啱好! 聽講日本人食呢個甜品，好似我哋食湯圓一樣，有團團圓圓嘅意思。果物噴左威士忌日本蜜瓜，令香甜嘅蜜瓜肉多咗份花香，為呢餐寫上完美嘅句號！…查看更多

大坑聚腳好地方 The Socialhouse 大坑真係好有外國feel,自成一角，樓又唔太高，感覺好輕鬆。今晚就同個老友隨便揀咗間角落頭嘅餐廳，外面係用木造都幾顯眼，有啲似瑞士小木屋。間餐廳叫做「The Socialhouse」，牆上掛左啲油畫，都幾有藝術氣氛，中間有個小酒吧，方便我哋呢啲三五知己過嚟聚下，飲杯酒。先點左杯紐西蘭Marlborough 嘅Pinot Noir ，果味豐富，酸度甜度適中，適合作為餐酒。餐前麵包係餐廳自整，軟熟又唔乾，唔錯。男人其實同女人一樣，好注意自己身型，尤其是差不多步入中年，新陳代謝減慢，身邊嘅老友好多都唔想有肚腩，都會有食沙律嘅習慣。今日我哋就點左呢一個無花果沙律，呢度嘅無花果睇個顏色都知道非常新鮮，沙律菜亦都好爽脆。主菜就點左虎蝦天使麵天使麵，煮嘅時間掌握得唔錯，彈性啱啱好，虎蝦幾大隻，醬汁亦幾入味，小小辣好惹味。白酒青口，幾嫩滑，個汁充滿蒜片同香草味，仲有有啲咬口嘅辣肉腸。 西班牙式燒乳豬做得好出色，果然係餐廳招牌菜，皮脆肉嫩，肉汁豐富，食完全個口嘅餘香久久不散。…查看更多

今晚去大角咀接老婆放工，諗住簡簡單單打個邊爐，但老婆又話要坐得舒服啲，上OpenRice搜尋一下，見到呢間新開喺酒店入面嘅日式火鍋店，就冇book位嘅情況之下，上去試吓。入到去裝修係日本格局，樓底都幾高。除咗室內座位出面仲有室外座位。呢度除咗打邊爐，仲可以叫日式料理二人前，不過因為一心上嚟打邊爐，就直接揀咗個自遊人二人餐。老婆想叫地獄海鮮湯但我怕太辣，所以就提議叫燒壽喜燒火鍋。收起鍋甜甜地，醬油味都幾香。壽喜燒「澳洲M4 Oyster Blade和牛肩脊」同「日本四元豚肉」有五片左右。和牛肩脊呢個位牛味濃d, 有咬口。四元豚肉幾嫩滑。海鮮拼盤，唔一定跟足餐牌。餐廳會睇吓嗰日邊啲海鮮夠新鮮,今晚我哋就有鮑魚、蝦、龍躉肉同蟶子，全部都幾新鮮。菜籃擺得都幾整齊，菜都好翠綠。食完成餐飯，仲有個甜品送，係日本蕨餅，唔係太甜，啱晒我哋啲男士。…查看更多

一行四人本來諗住去佐敦打個邊爐， 但揀嚟揀去冇咩心水，見到有間鐵板燒好似幾骨子，於是你眼望我眼最後入咗去…………鐵板燒餐廳門口企理， 餐廳內的裝修簡單整齊， 座位不多但方便與師傅直接溝通。前菜是開胃刺身， 三文魚、帆立貝及超級超級大蝦 再加個開胃沙律揭開序幕……跟住師傅泡製咗個特別醬汁，麵豉醬銀鱈魚: 新鮮的配搭不一樣的享受！！！😋香蒜牛舌配海膽他他汁， 感受到海陸空的味道！牛油鐵板蝦， 火喉啱啱好爽口有咬口。香桃配鵝肝感覺分外清新！！！香辣廣東汁加在生蠔上超級惹味， 感覺中日的配合！蒜香聖子、北海道新鮮帆立貝更是我最愛的貝殼類！！！特製醬汁脆皮鰻魚， 濃味又夠脆皮！薄燒美國牛和A5和牛， 簡直是魚與熊掌都想兼得！！！大蜆清湯加西洋菜清湯， 看圖片已知這裏是不一樣的做法！！！最後再整個樂師傅精選炒飯本來已經食飽的我都忍唔住成大碗清曬！！食飽飽，這個禮拜的quota已用完了是時候做運動啦！！！…查看更多

一家人平時各有各忙，難得一齊晚飯。 我哋鍾意食新嘢， 老豆阿媽要食傳統中菜， 所以我哋就揀咗呢間餐廳一齊試試……地方光猛企理， 廚房透明度高， 令人感覺乾淨衛生。 餐廳新開，所以我哋都係聽經理介紹，點選咗幾款推介菜式……洛神金沙紅米腸粉: 賣相特別，以網皮包裹配料， 口感層次豐富，腸粉有咬口，網皮夠爽脆，紅米腸的色澤鮮紅艷麗又搶眼。鴻圖超脆麵: 師傅細心地特別分成數少分， 令我們一人一口剛剛好， 另外麵餅上的蟹肉全是新鮮蟹肉，加上自家醬料，即時香氣芬芳，脆中帶軟。沙田燒乳鴿: 據說這裏的燒乳鴿子採用150多年前的玩法製作方法， 原汁原味，睇到相已流口水。表面是小雞仔， 實際是家鄉鹹水角， 鹹中帶甜感覺很新鮮，相信小朋友會非常喜愛。五款特色點心拼盤: 包括紫蓉豬八戒、黑金流沙包、墨汁蟹餃、真係粟米包及翡翠白玉、各式其式，任君選擇。西班牙膏蟹飯: 這道菜式中西合璧， 西班牙式的烹調方法會上中國式傳統蟹飯， 而且話明係膏蟹隻隻都爆膏超多份量， 一食難忘！你間酒樓製作絕不馬虎，適合一家大細做家庭聚餐！我同阿爸阿媽都食得好滿意！！！:)…查看更多

今日約左幾個朋友食飯，西班牙菜係最啱幾個人一齊食，開心share 幾個菜。入黎個環境唔錯，環境都幾大，我諗都可以放60至80人，music 既taste 都ok 喎，播緊Placebo。我地幾個都唔知叫乜好，侍應介紹左 Suckling Pig, Seafood Grill, Crab Cake, Tortilla 同 Foie Gras Toast ，咁就試下啦。我叫左杯Sangaria 西班牙傳統飲品，將水果切粒加上紅酒，加上糖漿同梳打水調配出嚟，甜甜地，而且酒精都唔高，啱我哋班女仔又想飲少少酒，但係比我怕飲醉。第一份黎係Tortilla 蛋餅，都OK， 我比較中意Crab Cake， 好重蟹味，雖然咸左少少，但都幾好味呀~ 之後的Foie Gras Toast 係好唔錯，好香而且連個Toast都keep 得好脆唔會油林林。之後黎既suckling pig，D 皮燒得好脆啲肉亦好腍，連平時唔食豬皮既我都食晒，我地一行四人好快就將佢食晒了。最後黎係Seafood grill, 完全估唔到原來咁大份，好壯觀! D 海鮮烤到啱啱好，呢度啲食物都幾大份下次約多啲朋友一齊再嚟食過。…查看更多

女人愛浪漫，男人愛實際。所以女人係食環境，食氣氛;男人首要都係要好味同食得夠飽。不過耐唔耐都要同老婆浪漫一下，今日我就揀咗E Molto Buono呢間係Time Square附近嘅樓上私房菜同老婆試吓。樓下嘅門口唔係好顯眼，不過上到去就別有洞天。首先有位笑容滿面嘅女服務員，帶我們去座位度。餐廳唔係好多個位，應該20幾個左右。有一個長嘅酒吧連接廚房。燈光暗暗地，又播左啲輕柔嘅音樂。落地玻璃可以望到出邊嘅街景。雖然出邊係一條好多車行嘅天橋，但坐喺裏面非常寧靜，隔音做得好好，絕對符合女人鍾意嘅浪漫。呢度嘅Chef Menu有$660至＄738不等，菜式選擇都幾多。我哋都好鍾意食牛所以就點左兩個有牛嘅menu。生蠔做緊Promotion，買一送一，而且老婆好鍾意食生蠔，盡責嘅老公當然點左當晚供應嘅三款生蠔，俾佢好好品嚐（其實我自己都好鍾意食）服務員細心介紹左每隻生蠔嘅特點，同埋進食嘅次序。今晚嘅生蠔分別為Scottish Rock（$88/隻）、Ancelin Special ($88/隻）同Gillardeau ($98/隻）。買一送一後平均每隻$40多至＄50。值得一讚，係佢哋開蠔開得好好，冇任何蠔殼碎，而且開之前應該浸過足夠時間嘅冰水，而且亦冰鎮得好好。所以每隻生蠔係夠冰凍，更鮮甜、爽脆。蘇格蘭生蠔好夠肥美，甜得來又有啲層次；法國安莎連蠔海水味濃郁；蠔后法國吉拉度蠔帶子為鮮甜，口感細膩，富海水味。餐前麵包一啲都唔馬虎，全部都係自家制。一向我唔係好鍾意食麵包，不過都食咗幾啖。芝麻墨汁包、芝士脆片同香草包，我最鍾意墨汁包，附上嘅特色將我就鍾意意式辣肉腸南瓜醬多啲，因為我唔鍾意食茄子嘅。個茄子醬有啲似加入咗我哋中式香料孜然粉，我諗應該係Cajun嚟嘅好多中東國家鍾意攞嚟整雞。法國谷飼牛肉他他口感有啲似吞拿魚刺身，不過就多咗啲牛味，加埋啲蛋汁用係個口到，好香濃，加埋個多士就啱啱好。老婆本來唔係好鍾意食八爪魚，話因為好難咬，但呢度嘅青檸蒜香八爪魚配香甜紅椒蓉裏面嘅八爪魚煮得軟腍，加埋啲蒜蓉泡泡同橙酒魚子，幾開胃。至於湯係意大利風乾煙肉露荀凍湯配煙燻泡沫，凍凍地嘅口，感蘆筍湯味道清新又唔油膩。香煎鵝肝配貴妃焦糖燴蜜桃，外層先得焦脆可口，本來厚切嘅鵝肝會好油膩，但巧妙加上左蜜桃同焦糖醬，同多士，冇咗份油膩感反而多咗果甜，真係唔錯，不過我都係鍾意配搭無花果多啲。好多法國菜都喺前菜與主菜中間，上一個番石榴雪葩，呢度都唔例外。呢度嘅番石榴雪葩，果香味足，真材實料。主菜香草紅酒燒汁燴澳洲和牛牛面頰，配牛肝菌玉米糕。和牛牛面肉，好入味，一絲絲，味道好香濃，配上味道較淡嘅牛肝菌玉米糕，味道啱啱好。我比較鍾意個M8澳洲神戶和牛配香甜紫薯蓉時令蔬菜配香草燒汁。和牛煎得五成熟，雖然牛味唔會好濃，但係肉質就好軟嫩，油脂甘香。甜品係紅茶法式焦糖燉蛋，有啲似香港奶茶奶凍，唔係太甜，啱晒我哋唔喜歡食甜野嘅男士。花茶同Petite Four，老婆話個蝴蝶酥好正好鬆脆不過我已經太飽冇食啦。E Molto Buono浪漫嘅氣氛、有質素嘅食物、而且分量非常足夠，係不但可以滿足女士，又可以滿足男士嘅私房菜。…查看更多

傳統斧飯 | 岩鹽老婆約咗姊妹，放工後我就同啲兄弟喺附近搵嘢食，見到有間新開嘅日本餐廳就去試吓《岩鹽》。我哋首先叫咗個黑松露水牛芝士日本番茄沙律，夠晒凍，日本番茄冇平時啲蕃茄嘅腥味，酸酸甜甜，好開胃。然後到刺身，我最鍾意食帆立貝刺身，呢度嘅質素都唔錯，鮮甜爽嫩。生蠔就一般，比較細隻，肉質稍嫌太creamy。聽講呢度係主打日本斧飯。門口落地玻璃會見到有一部專程由日本買嘅斧飯機，我哋就叫咗個北海道海鮮斧飯試吓。我覺得有啲似中式嘅蒸飯，同意大利嘅燉飯，呢個北海道斧飯都幾豐富，有三文魚、三文魚子、海膽、蟹鉗同鰻魚等等，啲飯都幾香幾鮮甜，不過兩個大男人食，其實唔係好夠。跟住我哋到埋啲茶入去做茶漬飯。食完飯都唔係好飽，所以再叫左個鹽燒吞拿魚鮫，吞拿魚鮫燒得好香，好肥美，送酒應該好正！…查看更多

今日難得放早， 約三五知己happy hour係最開心活動， 飲完兩杯去打番個邊爐， 雖然係肥啲但係開心呀冇計啦……聽朋友講養心殿，火鍋食材較健康，相對冇咁肥膩 ，絕對啱貪靚又為食嘅少女們！銅鑼灣分店地址就腳，就在銅鑼灣鵝頸橋附近！ 食店內環境不錯，不會太擠迫，空間感足夠。我哋揀咗個鴛鴦湯底， 有麻辣鍋(鴨血凍豆腐 配以多種香料和藥材): 有鴨血已經會加分，仲要免費添加一次添，喜歡麻辣的朋友們不要錯過！另外餐廳出名的養生鍋: 有老雞豬肉配以名貴藥材和人蔘等等， 聽到介紹已知係滋補系列喇！手切牛肉和霜降肉眼非常唔錯，切得大小適中， 若喜歡特別的朋友牛胸爽值得推薦！ 又彈牙又不是平時可以食到所以可以一試！蝦丸和墨魚丸各半份， 食料都幾新鮮，大細適中，女仔食亦都不會分量過多！再加埋個響鈴、清菜同一支清酒四個人食份量已經啱啱好！…查看更多

我老婆知道我鍾意食韓牛，又想試試新地方，聽朋友介紹黎左位於中環蘇豪區的木槿花韓牛專門店大擦一番……餐館門口夠大夠清楚，一d都唔難搵！餐廳佈局光猛，空間足夠，並分開上下兩層！兩口子拍拖和三五知己聚舊都適合！我地點選了特級韓牛牛肋骨二人燒烤套餐，加埋兩杯紅酒，享受我們兩公婆二人世界！前菜夠惹味，泡菜香而微辣，最愛是冬菰小魚，而沙律菜亦夠新鮮！韓牛他他好正好正，係必食推介！至於韓牛骨雪濃湯味道啱啱好，不油不肥，仲有牛骨喺湯入面添！至於主菜牛肋骨和五花腩更加不会令人失望，特別是五花腩更選用西班牙黑毛豬，肉質嫩滑，咬落有口感。最後食埋個冷麵作為今晚完美的句號！！…查看更多

我們這些老夫老妻簡簡單單食晚飯已經很幸福， 老婆話啱啱去完歐洲旅行，想食中國菜， 我們就在公司附近名館開餐……餐廳佈局簡單大方， 由於位置適中，所以非常受食客歡迎。 餐廳中間有透明玻璃可以看到廚房情況， 眼見廚房衛生整齊， 食嘢都放心啲。大良鮮奶脆網卷: 咬落去夠熱夠脆， 果然大量鮮奶喺入面。風味口水雞: 絕對啱香港人口味， 雞肉夠滑帶有麻香，小辣不會渲賓奪主！黑椒蔥爆安格斯牛柳粒: 黑椒夠辣夠惹味， 愛辣人士必定啱！菌皇醬蒸鐵棍淮山: 健康得嚟又夠香魚米之鄉: 賣相已經好吸引， 食落去好足料又有海鮮又有魚味， 炒飯炒得啱啱好，不會太多油，夠乾身， 仲多餸菜中我最喜愛這一款!!!紅棗烏雞花膠湯: 食完咁多嘢當然要飲返碗湯，補一補， 湯好足料， 因為我愛喝湯，所以湯一定是有分加的！哈哈………查看更多

老婆鍾意食甜品，聽同事講大坑有間小店甜品唔錯，今日剛好要喺大坑見下就順便帶老婆來試吓。小店有啲似咖啡室，簡簡單單，白色和黑色為主，座位唔多約十多個。餐牌選擇唔多，但係就幾特別。我哋叫咗兩個以前冇食過嘅菜式。海鮮拿破崙酥皮唔似平時酥皮湯皮，有啲似餅乾、都幾鬆脆，裏面係龍蝦汁再夾左啲海鮮。我都好欣賞佢嘅軟殼蟹，鹹香得來啖啖肉。法式油浸鴨腿配窩夫，店員教先切開半熟蛋，等蛋汁流出。油浸鴨腿外皮酥脆，肉質鬆軟香濃，沾上蛋汁更滑，配搭窩夫很特別。綠茶奶昔忌廉濃郁，甜度啱啱好，綠茶味幾香。白朱古力薑汁慕絲，有啲似牛奶布甸加薑汁，口感比布甸實淨，唔算好甜，男士食都適合。…查看更多

朋友生日，揀左食川菜。之前無留心睇餐廳簡介，就只係知道食辣嘢。點知入到間餐廳都打個突，係一間幾有情調o既西餐廳，一入到去見到d人係飲緊紅酒同水果特飲，d人係周圍行去隔離檯飲下吹下水。由於其中一位朋友唔食得辣，因此我地Order辣嘅程度減到最低。過去食辣嘅經驗，叫小辣或BB辣只得2個結果，一係就繼續勁辣，一係就完全唔辣。而呢間餐廳做到小小辣，而辣嘅香味充足，朋友都食到，我地又唔會好無癮。除左環境同食物，餐具都幾有心思，為配合「派對」係餐廳嘅主題，餐具都係花形，水杯係彩色，成件事睇落都幾開心。食物質素固然重要，而整體環境,氣氛，服務等等都係令消費者會否再返黎幫襯嘅主要因素。呢度令我有feel另一個嘅重點係，佢價錢算幾平民化，喺銅鑼灣黎講，食得飽仲要呢個價錢都係一個唔錯嘅選擇！整體黎講係充滿住新鮮感，原來中菜都可以mix西餐廳。成日出街食食到好悶，呢度應該俾到驚喜你，至少我有估佢唔到嘅感覺。麻辣雞蝦鍋雞（海蝦秀珍菇土豆）因為冇蝦，佢換左牛肉，而感覺好襯，呢種小辣配牛肉，正；d薯仔好仲入味，成件事由配菜到主菜都不錯。水煮味型江團其實明明係水煮魚,個名型左小小。魚質都滑，而且唔算太油膩，呢個就稍為唔係好夠辣嘅香味，可能下次要試下辣小小。鮮椒爽脆生腸呢個真係正，爽口兼脆口，麻麻地辣辣地，好滋味。前菜必點。手拍青瓜青瓜係新鮮嘅，味道尚可，如果能夠凍d就好好。冰雪鮮檸C飲呢杯野有料到，首先大大杯，酸酸地，對於食完辣成口都係「百感交雜」嘅味蕾，有更舒服新鮮嘅感覺。有青檸之餘，一粒粒嘅估計係奇異籽又有咬口，效果真係幾好。平時食川菜都係啤酒汽水，呢杯飲品真係幾唔錯。…查看更多