Tin_Lam的個人專頁

諗住佢新店開張試吓會唔會好啲。叫咗碟雙拼燒味飯（叉燒+油雞）$75，油雞淨係得一隻細雞中翼，完全冇肉食。如果我叫嘅係單拼燒味飯送隻雞中翼都算啦，但係依家係俾多少少錢做雙拼。如果佢哋覺得要再加多啲錢先俾啲肉個客，不如就寫明雞胸肉/雞脾/雞肉要再加錢啦😤而唔係俾隻細雞中翼個客就算，連一整隻雞翼都唔係，冇連埋雞全翼上面部份嘅肉，只係得中間嗰部份嘅雞中翼！真係唔會再嚟食！加錢買骨食！仲要味道普通冇特別，價錢又貴過其他人燒味店！…查看更多

唔係熟客就唔好晒時間等位啦。個個熟客唔使拎飛自己直接上去問啲企枱有冇位。下面啲客就戇居居等。咁大間酒樓一個鐘頭淨係叫咗一張四人枱同一張二人枱。問前台嗰個點解咁耐都未有位，佢就話啲人book咗枱。我尋日打過電話去想book枱，佢哋又話冇得book，淨係大枱先可以book。咁請問啲人點”book”嘅呢？ 奉勸唔係熟客嘅拎咗飛再上去望一望，如果見到一大咋人企喺架𨋢附近同埋靠牆企等緊位，就諗吓自己係咪有咁多時間去晒/或者盡早離場!…查看更多

之前經過見到都多人幫襯，終於前幾日就同朋友去咗食lunch試吓佢。lunch meun都多選擇，但係有少少美中不足嘅係自己部電話太細，scan QR code落單嘅時候，啲相太細冇得放大，同埋冇寫到入面包括邊啲壽司。例如”午市壽司套餐”，張相大約估到幾件明顯少少嘅 （三文魚，吞拿魚 & 鰻魚), 其他就睇得唔清楚，要估個套餐有咩其他壽司🧐。最終決定咗食三文魚親子丼，大約～$120。碗丼好大碗，好多料，而且都幾新鮮。啲三文魚唔係切片咁鋪上飯面，而係大大粒角切咁一大堆放上飯面。鍾意食三文魚嘅人應該會覺得好滿足，因為份量十足同新鮮。但當我食到一大半差不多飽嘅時候個waiter先俾個麵豉湯同蒸蛋我😑。另外個朋友叫炸雞烏冬漏咗單。總括食物方面值得一試，價錢可能比較貴，但份量多，值回票價。服務方面就有進步空間。…查看更多

之前聽朋友介紹話好得，點知好失望。服務同環境都幾好，但食物選擇不多。刺身都新鮮，但係連多數人鍾意食嘅三文魚都冇。壽司款式都不太多。冷盤海鮮有蝦，蟹腳，青口，蜆，東風螺。熟食嘅選擇都唔多，大約有牛腩，咖哩，炒飯，菜，叉燒，油雞燒鴨.... 牛扒就變咗燒烤完切好一小塊咁俾人夾。仲有粉麵區煮湯河。甜品區再令人失望，得一個小小display 櫃，好似平時甜品店個小小display櫃咁。另外一區有細萄撻，細waffle （但係冇蜜糖&練奶，只有朱古力&士多啤梨醬😩），豆腐花，湯圓同生果。最吸引只係個雪糕櫃，有六款雪糕。綜合所有食物嘅質素同味道都唔錯，但係唔值哩個價。原本我哋每人要俾$580，但係埋單嗰陣個staff話如果我哋download 佢哋個app join 會員即刻有六折，所以最尾埋單每人要俾$350。折咗$350去食都好唔抵食。仲有周圍不時有著住泳衣嘅住客行行去泳池。…查看更多

今日諗住同兩老去飲茶。心諗依家多返人出嚟食飯，所以就大約十一點左右去攞位。去到已經有好多人等緊位，我攞飛要等成十幾張枱。大約半個鐘都只係入咗兩張枱。之後見到一家三口遲過我哋半個鐘嚟去櫃枱攞飛。嗰兩位明顯唔係本地人嘅夫婦同個仔不停喺櫃枱附近行嚟行去，不停用佢哋嘅鄉下話同櫃枱個阿姐傾計。之後佢哋就唔駛等就有枱。而我哋明明人數一樣，攞飛等位就要繼續等多十幾張枱。之後都有其他等緊位嘅客人投訴個櫃枱阿姐，因為好多人唔攞飛就直接入去見有位就坐低，或者好似頭先個一家三口咁，傾吓偈就有位。但係個櫃枱阿姐扮晒嘢話咩都唔知。之後有位婆婆同我哋講，話嗰啲熟客仔，成日俾利事，所以唔駛排隊。哦，咁不如唔好開門淨係做熟客仔/同鄉生意喇，或者同等緊嘅人講熟客優先，你哋慢慢等啦。最後我哋等咗一個多鐘左右先有位。…查看更多