FeliSam的個人專頁

如果講到香港人最愛嘅日本野，牛肉飯一定會係排係top3到，但係相信咁多位都戒左口好耐，但宜家有多一個選擇，大家可以再食翻啦！🤟🏾香䓤温泉蛋牛肉飯啲牛肉係正常牛肉飯質素，小弟叫左L size ，牛肉份量都幾好，啱啱好夠夠食到最尾嗰啖飯，温泉蛋煮嘅時間都掌握得唔錯，唔會話個蛋黃熟得濟，撈落個飯到再加埋啲䓤真係好夾。美中不足係有啲少咸。温泉蛋燒肉丼燒肉丼感覺冇上面嗰個咁正，但都幾抵食，燒肉唔算燒得好香，俾嘅份量都比較少啲啲，汁係用翻燒肉汁，所以整體偏甜，但都可接受。值得一提係兩個飯都好夠熱飯品小食特制紅茶對得起個名，有茶味同埋唔算好甜，配第一個丼飯個感覺啱啱好。炸雞就係平時入貨嘅日式炸雞，上碟唔算熱辣辣，得少少脆。青菜，本身以為佢係俾菜心，但點知係通菜，成件事有少少驚喜，佢用蒜茸整，雖然蒜味唔算好濃，但都幾爽脆，唔錯。總括嚟講，人均50蚊左右，滿足牛丼慾之餘又唔算差，幾抵食會黎encore。…查看更多

要食正嘅泰菜一定要入九龍城？係港島東一樣揾到平靚正嘅泰菜。尤其是午市真係好抵食，去開呢頭不妨過黎試一試。環境 服務呢間Jariya Thai 嘅老細同伙記全部都係泰國人，店入面仲播住啲泰文歌，好有泰國feel ，牆上除左一啲泰式嘅藝術品之外，仲掛左啲好有趣嘅電影海報。清潔都ok，張枱唔算油。伙記服務好好，店員見我哋兩個人一齊食會好主動咁俾兩個碗我哋。冬陰功蝦河粉好多香港嘅鋪頭都會將啲冬陰功嘅味變得港式，就冇左泰國嘅風味，不過呢碗冬陰功好抵讚，好夠酸同辣，面頭仲有好多香料。啲蝦都算大隻同埋已經拆曬俾大家。啲河粉係比平時香港食開嘅粗，但都好滑同埋軟硬適中，有吸到啲湯。泰式炒金邊粉金邊粉炒得好香好惹味，雖然睇落好似好油咁，但佢炒得好乾身。都唔算好咸，但美中不足就可能係配料唔算多，但都夠你開心咁食完。香葉肉碎炒媽媽麵 & 香葉肉碎飯香葉肉碎做得幾似泰國食到嘅，但咸左少少，但配埋飯食同埋嘢飲整體不錯，好啱下晏食，炒媽媽麵其實就係炒公仔麵，同樣都係炒得幾好，呢到就唔重複。雖然呢個都表現都唔錯，但更加建議去試泰式金邊粉。飲品午市包埋嘢飲，凍飲唔洗加錢，要左一杯凍泰式奶茶同埋凍泰式咖啡。唔算好特別，但佢就冇話去到泰國飲嘢咁甜，配住啲咁惹味嘅泰國嘢幾好。…查看更多

一講到良心甜品店，甜姨姨不嬲都係人氣之選，尤其係入面嘅日式刨冰。咁小弟就抱住好大嘅期待拉埋我個女神一齊去食，點知唔太啱我哋嘅口味。咁當晚時間尚早，所以鋪面冇乜人，同埋個感覺好光猛乾淨，仲有一啲貴啲嘅消毒用品，環境感好唔錯。女神好鐘意食士多啤梨，所以就叫左嘅士多啤梨味刨冰。刨冰一上到黎好大份靚仔。因為佢係日式刨冰而唔係港式/台式，所以啲冰會大粒少少，但整體冰嘅狀態好幼滑，呢方面都唔錯嘅。但問題佢個調味真係甜左少少，再加埋啲士多啤梨乾脆脆，就顯得更甜。可能因為我哋嘅口味比較鐘意啲啱啱好嘅甜，亦都可能我哋唔好彩食到份比較甜。下次有機會的話想試多次睇下係咪當日我哋唔好彩…查看更多

一個普普通通星期四晚，出咗糧就約屋企人去試新野。之前已經成日ig見到人地打卡，今次終於試到，餐廳環境裝修都幾靚，價位都中遊，節日約會慶祝都可以再encore🍸🍽凱撒沙律大大份 生菜蕃茄都好新鮮好脆醬汁同芝士粉落得好大方 唔會話食到底冇曬味白酒青口(R)!!重點推介Regular menu無架，係額外一張紙仔到好少見餐廳有新鮮青口 好creamy鮮甜配淡淡海水咸味，配料有啲洋蔥西芹吸曬啲鮮味仲配2塊烘得好脆嘅香料麵包一定要沾啲汁Perfect match💯西班牙豬肉腸紅椒野菌意大利蛋麵•蕃茄汁意粉就中規中距，唔算好入味，豬肉腸都係一般超市買到嘅味道。另外，餐廳有promotion星期日至四follow page 酒類飲品有半價 (第一杯)，所以叫咗2杯試下🍸Long Island 可能係餐廳自己調配style，同想像中傳統嘅Long Island 有啲分別，偏甜明顯飲到菠蘿汁味道，易入口要小心飲🤣Mojito 呢杯相對冇咁甜少女，薄荷葉青檸好清新，比較啱我個人口味啲…查看更多

除左大南街嗰一堆好有文青feel 嘅cafe之外，係佐敦近柯士甸都有一間唔錯嘅打卡cafe。如果去開呢一頭，都不妨過黎enjoy 一個舒服嘅下晏。環境小弟係星期五嘅下晝黎到，店入面有乜人，所以都坐得好舒服，而佢嘅裝修都好韓風，而且都好光猛乾淨，店入面都有廁所，如果人有三急都可以用。Kactus koffee 🥤$40係一杯比較大眾口味嘅嘅latte，建議攪勻左先至開始飲，飲落去甜味奶味同咖啡都好均勻舒服，不過hardcore 嘅咖啡愛好者可能味必咁啱Dolche triple latte 🥤$40佢嘅做法同signature 嘅kactus koffee 類似，不過係佢嘅基底上再加上一層奶蓋。唔係平時飲開嘅台式飲品芝士奶蓋，而係比較香甜嘅version，但飲落去都唔會過甜。不過呢杯整體黎講更加有層次，而且用嘅杯都好靚好啱打卡。…查看更多

10月消費券一出就當然係出街飲飲食食嘅機會，話就話有3000蚊墊底姐，但都一定要揾啲抵食又抵食嘅出黎同大家分享。今次就黎到旺角出名嘅平價和牛燒肉尚八。當晚小弟一行二人就五點鐘準時入黎食早鳥時段，我哋都係叫左388味連加一嘅和牛放題。今次我哋冇好彩坐到卡位，只可以同其他人一齊坐，但係張台都幾闊落，唔會有壓迫感，亦都夠位放order左嘅食物同埋都乾淨企理。但有個唔好嘅地方係較大細火嘅制係走廊旁邊，如果坐得入要較火喉就比較麻煩。一坐低店員就放低左一碟和牛頭盤(太心急唔記得影)，入面跟左6種肉，當中印象最深刻係牛三角同埋和牛冧，兩款都好有油香，其他4種肉都表現得好合乎水準。而且啲肉冇話黎左幾轉之後肉質明顯變差同埋厚薄適中，所以食得都幾滿意。但有個問題係唔知點解冇得單獨叫一款和牛，只係可以一set 咁叫。至於飲品櫃就有可樂七喜烏龍茶蜂蜜綠茶同各式包裝果汁。不足嘅係冇提供zero 系列嘅嘢飲，有嘅話呢餐會感覺上健康啲啲。講下海鮮類，海蝦扇貝都好鮮甜juice ，值得係咁叫，其他就正正常常。前菜熟食入面牛舌好軟熟，雞軟骨炸得好脆，蟹籽沙律幾爽口，其他冇試就唔評論。其他肉類感覺都有啲差距，入面嘅羊架係性價比之最，好大舊之餘冇騷味仲要好多汁。豬同雞就唔洗點講，一如既往嘅高質，不過如果要主食佢哋的話就不如去食佢個午市108放題，所以今次就冇主攻佢哋。如果要講到比較差嘅肉就係入面嘅舌舌(唔係小食嗰種)，厚切牛舌嘅味題係可能切得比較邊，整體都比較硬同咬唔開，叫細塊嘅就冇呢個問題。最後甜品就係正常甜筒或者韓國雪條，每人只得一份，整體而言388唔算貴，值得一試…查看更多

肥膩唔健康嘅嘢食一向都係好吸引，咁今次小弟就黎到吉豚屋試食。入面嘅環境好有日式快餐嘅感覺，整體尚算ok ，塊地唔算好滑，但係翻過左膠嘅餐牌有啲油淋淋嘅感覺，建議可以定期換一換。本身小弟諗住去試佢個定食，因為咁先至可以同其他主打吉烈豬嘅鋪頭有直接嘅比較。但見到佢個套餐好抵好吸引，就叫左佢個滑蛋吉列豬套餐。套餐價值59蚊，而加吉列蝦只需要6蚊。肉類🐷滑蛋豬扒飯最怕就係嘅啲蛋同啲汁整到件吉列豬淋曬，但今次小弟去試嘅時候呢個問題唔嚴重，係食到後面先至有少淋。而隻豬都處理得唔錯，冇咩異味。加左6蚊嘅吉列蝦都表現得好好，㐋好脆同好有蝦味。飲品&湯水🍵呢兩樣嘢就有啲失色，個湯味道唔算濃郁，但好在入面都有啲野菜同埋肉片。至於叫左嘅巨蜂提子乳酸特飲都係好一般嘅感覺，同埋都幾有溝稀左嘅feel總結以一間唔洗排隊嘅平民日式餐廳黎講，吉豚屋嘅性價比相當高，係一間唔錯嘅家常便飯之選。…查看更多

上次提到小弟係一個吉列豬愛好者，得閑冇事都會去食下吉列豬。除左啲出名嘅過江龍之外，係長沙灣都有一間人氣熱店，佢就係大丈夫食堂，相信住係附近嘅師兄都有聽過，今日就一於去睇下佢係咪真係咁神。今日係平日11點半黎到，可能就到食一黎已經見到有人龍。都係嗰句啦，如果啲嘢真係好食嘅，等下又有乜所謂姐。由於鋪位唔算好大，等左大概30分鐘先入到去。但店員服務態度都幾好，安排得好有耐性，排隊嘅時候都好有秩序，冇咩混亂嘅情況出現。小弟一行兩個人都叫左吉列豬扒定食，眼見店入面其他人都有啲人叫各種魚生飯，不過既然呢間嘢專門食炸豬扒，咁第一次黎就冇理由叫其他啦係咪先？呢個定食包左一大份吉列豬，一啲椰菜絲，味噌湯同埋茶碗蒸。先講下主角吉列豬，真係好大份！同埋因為即炸嘅關係，上台都仲脆卜卜，炸到出黎都唔會話好油膩，亦都好有油香，同埋因爲塊扒大過碗飯好多，真係做到啖啖肉嘅感覺，至於隻汁就正常。其他嘢嘅表現都正常，唔係話佢地唔好食，湯同埋茶碗蒸都好熱辣辣，只係炸豬扒太出色，不過有佢哋嘅存在成餐飯完整好多。…查看更多

今日中午終於試到香港嘅吉列豬名物大丈夫食堂，一場黎到長沙灣就緊係試下唔同嘅coffee shop 滿足下嗰口咖啡癮。係大丈夫食堂嘅斜對面就有一間係OpenRice 頗有名氣嘅cafe contrast 。個環境就唔算好有特色，但坐落都幾闊落，店員都幾nice。但對於小弟黎講，飲到一杯正嘅咖啡先至係最重要。咁我就叫左一set 價值50蚊combo ，當中分別係piccolo 同coffee macchiato 。大隻嘅店員哥哥就叫我哋試左piccolo 先，對於平時只係飲開espresso 嘅我黎講piccolo 都真係幾驚喜，佢嘅味道更加尖銳，嗰種酸味同果香好衝擊我嘅味蕾，個aftertaste 都好深厚同回甘。飲左一啖之後就當然即刻試下杯macchiato 先啦，點知呢杯更加有驚喜。經歷過piccolo 嘅洗禮之後杯macchiato 嘅甜味，果香同咖啡香就更加之出黎。對於一間cafe 黎講50蚊有兩杯飲下同坐下都真係幾抵，店員嘅服務都唔錯又唔洗收加一，行開嘅頭eg 食完壽師郎都可以黎飲下。…查看更多