Pinky Lee 0703的個人專頁

榮獲米芝蓮推介嘅容記小菜王最出名梗係燒腩仔啦，不過原來餐廳嘅菜式都有好多，今日同老公嚟開太子，佢話好掛住個燒腩仔，就過嚟食個晚飯。 餐廳有個容記十大必食推介嘅餐牌，我哋都點咗幾個試下。 容記第一咀：呢個其實即係墨魚咀，炸得金黃酥脆，口感爽脆有嚼勁，炸粉唔會太厚，充滿椒鹽香味，絕對係佐酒小食No.1🍺！ 懷舊經典炸大腸：炸大腸擺盤精美，伴以一片片菠蘿，炸大腸外脆內軟，油脂唔算太多，而且無餲味，食完炸大腸再加番片鮮甜嘅菠蘿，又可以解膩。 得獎脆皮燒腩仔：得獎脆皮燒腩仔梗係要試啦，個皮又香又脆，而且唔會太過肥膩。 鹹魚雞粒炒飯：雖然呢個唔係十大必食推介，不過個人認為真係幾好味。炒飯粒粒分明，不會過於濕黏。 鹹魚獨特嘅鹹香味為炒飯增添風味，除咗鹹魚同雞粒，炒飯中仲加入雞蛋、蔥花等，增加口感和風味。  彈牙鮮蝦餅：蝦餅炸得金黃香脆，感覺唔會太油膩，蝦肉爽口彈牙。…查看更多

啱啱去完旅行返嚟，好耐無食過中菜啦，於是約埋屋企人嚟到深水埗人氣中菜館金豪酒家食個晚飯，呢間平時經過都見到好多人㗎啦，好彩book定位啫。 今次揀咗個龍躉兩味，一次過試晒兩款唔同造法。 清蒸斑頭腩：斑頭腩夠滑，魚肉鮮甜，配合埋大量香蔥，非常美味。雲耳爽脆可口，吸收晒魚嘅鮮味，絕對係成碟菜嘅精華所在。 翡翠炒球：魚肉嫩滑，魚味濃郁，西芹爽脆，可以中和魚肉的膩感，亦增加口感層次。  金豪和味雞（半隻）：雞肉肉質嫩滑，鹹香味十足。 蘿蔔清湯腩煲：牛腩炆得夠軟夠稔，肥瘦適中，蘿蔔清甜無渣，湯清甜美味。 啫啫通菜：以熱砂鍋呈上，夠晒鑊氣，通菜焦香爽脆，同時吸收晒腐乳醬汁精華。 沙薑豬手：豬手炆得軟糯入味，皮爽又夠彈，醬汁酸酸辣辣，絕對係靈魂所在。 豉油皇中蝦：中蝦色澤金黃，口感鮮嫩，咬起嚟爽口彈牙，並且帶有濃郁嘅豉油香氣。…查看更多

一直都想試下深水埗棠棠居，今日有時間過嚟試下先。 即烤三黃薯片雞：上網睇人人都叫呢個薯片雞，我哋當然都唔執輸。不過記得要預早一日打去book，咁先可以用優惠價$168享用，如果唔係即場叫要$238㗎。一入座，職員就問我哋係咪訂咗隻雞，因為要即場燒30分鐘。雞皮燒到金黃，食落好似薯片咁脆卜卜，果然叫薯片雞當之無愧，雞肉亦十分嫩滑🐔，食落有鹹香味，非常juicy。 鎮江水晶餚肉：肉紅皮白，光滑晶莹， 鹵凍透明，猶如水晶，香味濃郁。 金沙新鮮魷：魷炸皮薄且金黃酥脆，魷魚爽彈，雙重口感，搭配炒香咗嘅鹹蛋黃非常香口，非常邪惡，送酒一流。🤤 海鮮翠塘豆腐：一味古舊香港菜式，估唔到呢度有得食。蛋白口感幼滑，完全媲美真豆腐。配以帶子、蝦，味道清淡得嚟又鮮甜，再加上少許芥蘭頭，顏色更豐富。 椒絲腐乳炒通菜：通菜爽甜翠綠，非常惹味。 黑松露醬牛崧炒飯：炒飯粒粒分明，黑松露味道非常濃郁，成個飯都炒得好香。 鴨屎香手打檸檬茶：大大杯，充滿濃郁果香味，味道清新。食完晚飯仲有糖水送添。…查看更多

老豆前排七十大壽，佢又唔想大搞，咁就喺觀塘搵咗間私房菜一家人去慶祝下啦。呢間私房菜之前同事都有介紹過，喺工廈入面。老豆最鍾意食海鮮，所以今餐都以海鮮為主。 香芒沙律大蝦球🥭🦐蝦球大大粒，炸到金黃色，食落爽口Q彈，感覺新鮮。配搭埋香甜嘅芒果同埋沙律醬，味道酸甜又開胃。 什菌大蜆豆腐湯睇落平平無奇嘅豆腐湯，綜合咗多種菇菌嘅鮮味、蜆嘅鮮甜同埋豆腐嘅滑嫩，味道清淡得嚟又夠鮮甜，讚！ 涼瓜炆大肉蟹🦀涼瓜吸收咗肉蟹嘅鮮味，而蟹嘅鮮味亦中和咗涼瓜嘅苦澀味，風味獨特。 富貴金龍 (流沙黃金 & 吉列椒鹽)沙巴龍躉，厚切無骨，食落啖啖肉。分咗兩種食法：流沙鹹蛋黃酥香惹味，極度邪惡😈；椒鹽嗰款外脆內嫩，亦都夠晒惹味。 蒜蓉粉絲蒸蟶子皇蟶子皇完全無沙，鮮嫩可口，味道鮮甜，金銀蒜蓉份量足夠，足夠覆蓋每一隻蟶子皇。粉絲爽口，吸收晒蟶子皇嘅鮮甜味同埋蒜蓉嘅香味，非常美味！😋 汕頭滷水鵝識食一定要揀汕頭獅頭鵝，鵝肉肉質鮮嫩肥美，口感醇厚，香氣撲鼻。滷水汁融合多種香料，鵝肉充分入味，帶有淡淡的鹹甜味和香料味，令人回味無窮。 蒜蓉炒白菜仔白菜仔炒得嫩綠爽甜，蒜蓉份量足夠，夠晒鑊氣。 招牌御膳炒飯呢個炒飯炒得夠乾身，粒粒分明，材料豐富，有牛柳粒、蝦球粒、帶子粒。 脆皮玻璃乳鴿呢個乳鴿無得頂，皮脆肉嫩又多汁，外皮晶瑩紅亮，見到都流晒口水。 最正仲要「免開瓶費」，老豆帶咗幾支酒上去，完全唔使額外俾錢開，提供埋冰桶酒杯！另外，我地拎埋個生日蛋糕上去，連加一同切餅費都免埋，真係very good。 飯後仲有甜品送！宜家打卡分享食物相片仲可以免費換汽水，真係慳唔少。 呢餐飯真係超值得推薦！…查看更多

最近見到夏麵館推出咗個特色蟹粉宴，今日經開太子分店就嚟試下先。 鮮蟹粉河蝦仁撈麵：見到poster呢款做緊試食價$68就試下啦，仲可以加多$30將蟹粉嘅份量double up，撈麵口感黏黏哋，有鮮蟹粉同埋河蝦嘅雙重鮮味。 蟹粉小籠包：小籠包個皮都幾夠薄又多汁，咬開就必晒啲汁出嚟，所以食嘅時候小心辣親個咀仔。如果再多啲蟹粉就更加perfect。 花雕醉雞：花雕醉雞雞肉嫩滑入味，皮肉間有水晶般剔透膠質，酒香撲鼻芬芳，肉質色澤動人，餐前小食最好不過。 排骨擔擔麵：排骨夠熱，又酥又香，麵條細滑，湯汁微辣惹味，陣陣花生香味，做到掛湯嘅效果。 開心果鍋餅：近年開心果熱潮紅爆全港，一向食開紅豆鍋餅，宜家都推出埋開心果味， 金黃香脆嘅鍋餅入面夾住濃厚嘅開心果醬，味道亦唔會太甜。…查看更多

九龍城除咗出名食泰國菜之外，粵菜都好出名㗎，呢間老字號喺九龍城屹立多年，連食家蔡瀾都推介，唔係唔試下嘛 粉葛赤小豆豬骨湯：呢度嘅例湯非常出名，一入座就我哋即時揀咗個一煲細煲，職員一打開個蓋，成個都仲係滾燙，個湯煲咗4個鐘，絕對真材實料，而且無味精， 家鄉煎魚餅：煎魚餅炸到金黃，鯪魚肉質細嫩、味道鮮美，香口彈牙，加埋蜆芥，鹹鮮味十足。 山楂醬排骨：醬汁由新鮮山楂打成，酸甜醒胃。 排骨外脆內軟，排骨外層醬汁香濃。 皮蛋酸薑：酸薑爽脆無渣，配上溏心皮蛋；一滑一爽，一酸一鹼，以醋酸味去掉皮蛋嘅灰澀味，互相中和，竟直係天作之合。 家鄉豬油炒飯： 米飯粒粒分明，炒得好乾身，豬油渣香噴噴。 豉椒鮮鵝腸：新鮮鵝腸非常爽滑，豉椒十分之惹味。…查看更多

西九龍中心food court 越嚟越多好嘢食，今日發掘咗間在蘭州嘅小店。以前返鄉下親戚老家附近都有間蘭州拉麵，真係由細食到大，鍾意佢即叫即拉，又大碗又抵食，估唔到西九龍中心呢度都有一間，一於回味下先。 牛肉麵：師傅即場拉麵，麵條非常煙韌彈牙有嚼勁。湯底方面可以揀清湯、微辣、小辣、中辣、大辣，我揀咗個清湯，湯底加上大量香料，再配上大量芫荽葱，成碗麵都香氣撲鼻。另外加$10可以加牛肉。 五香牛展麵：牛展夠稔，切得夠薄，非常入味。 低糖豆漿：鍾意呢個豆漿，味道淡淡哋。 滷蛋：滷蛋滷得非常入味。…查看更多

成日聽人講石峽尾好多好嘢食，今日同老公過嚟石峽尾睇下有咩好西食先，發現南山邨有間小炒價錢經濟實惠，二話不說試下先。 一坐低，職員即時送上例湯。 大漠湘式扇香骨： 扇香骨表面鋪上大量金蒜，非常香辣惹味 椒鹽鮮魷： 魷魚撲上一層薄生粉，炸至金黃。香脆可口，魷魚爽口鮮甜，椒鹽味道惹味，送啤酒一流。 馬拉盞通菜煲： 鹹香味十足，通菜爽甜翠綠，非常惹味。 鹹魚雞粒炒飯： 份量非常大碟，炒飯夠乾身，粒粒分明，有鹹香味。 滑蛋炒蝦仁： 炒蛋非常嫩滑， 配有香蔥嘅味道 ，蝦仁夠大隻，爽口又彈牙，送飯一流。…查看更多

經常上網見到好多人打卡呢間餐廳嘅飲品，bookmark 咗好耐要同閨蜜過嚟打下卡先。 呢度個餐廳環境好正，可以飽覽成個維港景色。今次安排坐喺bar檯，可以欣賞bartender 調酒，絕對係另一番享受。 Damn Pissed Off我就係為咗呢杯cocktail過嚟打卡啦，cocktail 以迷你浴缸serve，上面有一層泡，好似浸緊泡泡浴咁，側邊仲要放咗隻鴨仔，so cute😍，玩味十足，Vodka 再加上熱情果同菠蘿味，味道香甜。 No More OT Please呢款係staff介紹我哋試，同樣啱晒打卡，個酒杯係Flamingo 造型，非常優雅，品嚐起嚟更添品味。味道係由石榴，檸檬汁加上Vodka調製而成。 Thai Crispy Pata豬手表皮酥脆，肉質嫩滑。伴碟嘅薯蓉口感幼滑。 Sambal Fried Clams蜆肉鮮甜，配合泰式醬汁，味道香辣醒胃。 Hamachi Ceviche油甘魚新鮮鮮甜，柚子醬汁酸甜開胃，味道清新。 Lobster Pasta with Lobster Tail🦞龍蝦尾爽口彈牙，混合泰式醬汁，別具泰式風味。意粉掛汁能力強。…查看更多

之前試過廣華街呢間black coffee，覺得佢嘅主菜同埋甜品都好好味，今日經開又再過嚟回味一下先。 水牛城雞翼：雞翼炸得金黃香脆，加上酸香微辣嘅醬汁，味道層次豐富。配菜青瓜同紅蘿蔔配合，清新得嚟又可以中和下水牛城雞翼嘅辣味。 慢煮牛柳配芝士薯蓉：牛柳肉質嫩滑多汁，芝士薯蓉口感棉滑，非常美味。 黑芝麻窩夫配香草雪糕：呢度嘅窩夫有好多款唔同嘅口味今次揀咗個黑芝麻味，成個窩夫都係黑色， 咬落去仲有黑芝麻， 感覺真材實料成個。窩夫味道香濃，外脆內軟，配合埋芝麻忌廉、吉士醬，芝麻醬，令成個窩夫都好好味，口感好豐富。芒果手搖冰茶味道香甜，茶味恰到好處。…查看更多

最近長沙灣開咗間小店賣貢花雞，我同屋企人都鍾意食雞，一於試下佢啲雞如何啦。 招牌貢花雞手撕雞飯🐔：嚟自山區嘅自然放養走地雞，雞肉紮實，雞味濃郁，充滿芝麻香，雞絲撕得幼細，有兩種醬汁配埋。仲會送五指毛桃湯👍。 廚哥秘制牛雜滷得非常入味，有牛腩、牛肚、牛筋、牛腸、蘿蔔，啲牛腩都炆得好稔，蘿蔔鮮甜而且無咩渣，整體味道都唔錯。 見到有黑色嘅粟米，未試過就試咗一條，粟米粒飽滿、Q彈有嚼勁，味道香甜，口感軟糯。…查看更多

最近有朋友去完北角匯試咗間法國米芝蓮介一星嘅西餐廳話好正🤤，今日同老公嚟開北角就去試試先。 餐廳以大雲石裝修，低調高貴，令人可以喺舒適嘅環境下用餐。店內設有室內和露天座位，露天座位可以飽覽維港景色，不過可惜當日露天位已經滿座。 我哋揀咗兩個set dinner，每個set有1個starter、1個main course、1杯餐茶☕️，另外可以加$58有個是日精選甜品🍰。 餐包配咗自家製嘅銀魚柳蛋黃醬，點埋一齊食都好夾。 頭盤方面揀咗法式白酒煮青口，青口係法國新鮮藍青口，口感柔軟，配合洋葱同蒜蓉嘅香味，份外鮮甜，湯底吸收晒青口同洋葱嘅鮮味，味道更為提升，連平時唔係特別鍾意食青口嘅老公都讚不絕口！ 忌廉磨菇湯：職員即場將湯壺倒落碗，感覺更高級。忌廉湯味道香濃，陣陣磨菇香。 香烤肉眼扒配薯蓉及小甘筍：叫咗七成熟，表面焦香，肉味香濃有炭燒味，咬落去嫩滑多汁，薯蓉非常香滑，入口柔軟。 慢煮西班牙豬鞍配洋蔥及薯蓉：豬鞍表面煎香，咬落去有微焦嘅感覺，肉質非常嫩滑。薯蓉好香好滑，食落好似泡沫咁。…查看更多

前排去行花園街買嘢之後，順便喺附近搵吓有咩好嘢食，見到有間平平哋嘅日式料理就試下佢先。 呢度個menu望落都好豐富，我哋揀咗兩個和食套餐： 滑蛋咖喱雞扒飯：滑蛋夠creamy，雞扒外脆內juicy，咖喱汁惹味，送飯一流。 日式叉燒拉麵：炙叉燒有微微焦燶，充滿油脂香，豐厚滿足。口感稔滑，肥瘦適中。 每條麵條沾滿晒湯汁，更加品嚐到湯頭嘅味道😋。溏心蛋做到溏心效果。 另外可以加$28 配埋個麵豉湯、茶碗蒸、蟹籽沙律同埋飲品。 刺身盛： 有三文魚、帶子、甜蝦、海膽，賣相精美，而且新鮮鮮甜。 炸芝麻雞翼：個外皮香脆又乾身，咬落去依然好多肉汁。…查看更多

好耐無食車仔麵啦，今日咁啱行開長沙灣買嘢見到有間三五碗車仔麵，個名幾得意，就被佢吸引咗。 呢度除咗有車仔麵食之外，仲有串燒同雞煲火鍋。今次就試咗佢嘅車仔麵同串燒先。 車仔麵最基本就兩餸麵$36，三餸麵$42，淨餸三款$38，其後每加一個餸就加$9 起。我今次揀咗個三餸麵，清雞湯底，餸方面就揀咗豬軟骨、牛腩、墨魚丸，豬軟骨同牛腩都好入味，而且夠稔，墨魚丸有墨魚粒，夠彈牙，另外啲米線出奇地煙韌，食落彈牙有嚼勁，口感非常好。 老公就揀咗個幼麵配豬紅、雞翼、蝦卷，拼個腩汁。豬紅好滑，雞翼入味，蝦卷香脆，蝦肉都算彈牙。 燒雞軟骨：食落爽口又有嚼勁。 燒雞皮：整到好脆口。 燒五花腩串：五花肉同脂肪比例恰到好處，油脂香氣十足，油脂入口仲保留住脂肪融化口中的香味，肉質柔嫩多汁，肉味濃郁美味。 燒蒜蓉粉絲扇貝：扇貝都新鮮，最緊要夠晒多蒜蓉先好味，加埋少少辣椒粉，味道好香。…查看更多

香港好食嘅大排檔真係買少見少，最近搵到間位於銅鑼灣嘅大排檔小炒，雖然名為大排檔，但就唔係大排檔嗰啲格局，而係可以有冷氣舒舒服服咁坐喺餐廳度食，不過食物絕對做出大排檔嘅風味。 我哋首先揀咗呢度嘅招牌菜，鐵板黑椒龍蝦🦞，龍蝦以呢種煮法都比較少見，一上檯就發出咋咋聲，再淋上黑椒汁，香氣四溢。龍蝦肉爽口彈牙，加埋青紅椒同埋黑椒汁，非常之惹味。 一品貴妃炒飯都幾大碟，粒粒分明，炒得夠乾身。上面鋪上乾脆嘅欖菜和蝦米乾，非常香口。 時菜炒牛肉有驚喜，芥蘭苗翠綠，牛肉嫩滑，炒得非常有炒氣。…查看更多