LOUI L的個人專頁

睇食評見呢間私房菜都幾高評語，決定一試，本來book左六點，驚冇車位所以五點鐘就去到餐廳門口泊車，點知招呼的侍應姐姐話可以早啲食，梗係好啦，唔洗諗點消磨嗰一個鐘，侍應姐姐好有禮貌好好招呼，重帶我參觀餐廳其他房間，呢間餐廳唔錯，環境幽靜同優雅，今日我呢個餐總共有八樣野，頭盤清酒鮑魚，好食，鮑魚夠晒大隻，係南非鮑，唔係普通嘅九孔鮑，接住陸續上其他菜式，有開邊蝦（啲蝦有羔架）、椒鹽斑馬瀨尿蝦、農家菜（勁鮮！唔好睇佢簡簡單單一碟生菜，非常之鮮味，只係略嫌油多左少少，食到底會太油所以冇食晒）、濃湯花膠翅（勁好食，足料）、松露豆腐（呢個略為失色，冇食評講得咁正），另外甜品有蛋白杏仁露，本來我重點左馬拉糕，點知靚仔哥哥話廚房攪錯左冇做到，結果比左桂花糕我，桂花糕特別之處係啲桂花餐廳自己種嘅桂花樹做，因為今日係慶祝生日，餐廳額外送左壽包同菜包比我，菜包係估唔到咁好食。整體成個晚餐，個人認為絕對抵食，一定會再嚟！…查看更多

小女子三個月前去過呢間食，第一次食覺得非常好，日式加西式嘅fusion 菜，感覺好新鮮，由餐湯開始至到最後嘅甜品都做得非常好，所以趁住小女子生日都決定要再去食多次，三個月後嘅dinner set,同三個月前嘅一樣，已經有點兒失望，小女子點左個$488嘅set,有前菜，主菜同甜品，前菜點左個油甘魚刺身，原來要加$58,埋單先知，主菜我點左個和牛，要求七成半至八成熟，但嚟到都唔知有冇七成熟，諗住生日無謂投訴，照食，但我估係有一半以上食唔倒落肚囉，又肥膏又有筋呀咁，食完成個set,我都有同侍應反映，因為和牛要另加98蚊，加錢唔緊要，但加左錢其實食唔倒嘅就好浪費，侍應只係話唔好意思，後來埋單有個比較高級嘅走嚟比左張200蚊嘅coupon 我作為補償，ok啦諗住，叫做有啲表示，點知返到屋企睇下，張coupon 係過期嘅，算點啫，好唔開心呀呢餐生日飯，唔會再去囉。…查看更多

星期一放假，入左赤柱high tea, 想試小黃屋好耐喇，見今日唔多人於是入去tea 一tea, 由於食左早餐都冇幾耐，所以只點左兩個小食一個湯，粟米濃湯，好濃好甜，唔係一般罐頭湯嚟，蟹肉多士，有驚喜，個sauce 好好味，雜錦海鮮桶，個藍青口好正，整體來講樣樣都好滿意。環境算唔錯，可惜坐唔倒window seat, 啲侍應都好有禮貌，一坐低就比左一啲白色紙袋你放口罩用，下次一定要嚟試下佢哋啲晚餐水準。…查看更多

剛剛呢個星期六放監，諗住食餐好，選左呢間蟹將軍，諗住早啲食唔洗迫，5點半已經入座，入到去冇人好似包場咁，叫左4樣野，本來諗住叫5樣，honey話驚食唔晒，好啦，叫左蒜蓉蒸蟶子皇（我唔覺得佢可以叫皇囉，細隻到呢）重要唔新鮮，粉絲係硬嘅，叫左鹽水浸蜆（有沙嘅）椒鹽瀨尿蝦一隻（諗住320蚊一隻，應該幾大隻下，點知....失望到極點，唔抵食）蟹油炒麵，好有期望，其他人話呢個必食，又係失望囉，麵夠大碟呀，不過同出面嘅豉油皇炒麵冇分別囉，不過呢度有個優點，就係冇限你食幾耐，我叫左4樣野，食左兩個鐘,由天光入去食到天黑走，平均半個鐘先上一個餸，重要催先嚟，全張單8折，折完都要7百幾蚊，中伏啦，重要食唔飽。…查看更多

昨日係同honey 5週年紀念日，honey話想食居酒屋，所以我選左呢間南瀛水產，上網睇過其他食評都唔錯，決定一試。點左一個壽司set,一個海鮮set,一客清酒煮蜆，玉子燒，蚧味噌甲羅燒(呢個一定要食，真係好好味)，點左兩杯野飲，巨峰梳打同青蘋果乳酸，啲海鮮好新鮮，兩隻蠔大到呢，其實唔只，連蝦，元貝同鮑魚都堅大隻，由於冇加啲咩調味，即場燒嘅，所以如果係重口味嘅你可能會覺得啲野食好淡口，但我鍾意食原味，所以覺得好食，最後以呍呢嗱蛋糕作為完美嘅句號。…查看更多

小女子上星期六又去左三家村食飯，今次試左個海鮮餐，九種海鮮十種煮法，聽已經覺得好吸引，所以決定一試，一上枱個氣勢已經不得了，嚇一嚇添。呢個餐貝殼類比較多，主角係龍蝦，成個餐我覺得最出色嘅係黃金波士頓，真係有驚喜，除左龍蝦係用咸蛋整之外，旁邊嘅脆脆原來係用餃子皮炸嘅，真係估佢唔倒，初時重以為係春卷皮。其中一個菜式係用龍蝦頭煲粥，攞呢啲脆脆送粥一流。每樣海鮮都非常新鮮，龍蝦粥鮮味突出，兩個人食到最後個粥已經好飽，不過都點多一客燒菠蘿（當甜品）作為完美嘅句號。…查看更多

小女子喺剛剛星期六去左呢間試京菜，之前睇倒其他食評都講得呢間唔錯，決定一試，兩小口子食呢個京菜做團年飯啦，已經早一日訂位，好失望，去到竟然安排我坐喺類似冷巷位置，咁我訂位嚟做乜，我訂6點，我5:45已經入去諗住早啲食，點知要坐咁既位置，已經唔係好開心，不過都入到去喇，就照食囉。知道呢度嘅片皮鴨要等50分鐘，我一坐低已經同waitress 講，我訂左半隻片皮鴨，你幫我做左先，點知佢話要我點其他菜先會做，吓!咁我需要多啲時間考慮其他野食嘛，點解唔可以幫我做左片皮鴨先呢，難度你覺得我淨係食片皮鴨唔會叫其他野食?好啦，我預左等一個鐘嘅呢隻鴨，算!我忍! 後來我點左前菜唔知乜鬼馬蹄，真心，呢個好食，值得推介，蜜汁芋絲，好甜好痴牙，如果你都係兩個人去食的話，勸你唔好叫，食左呢個已經滯住唔係好食得落其他，燉湯都叫做足料嘅，金沙魷魚，係最好食嘅，到主角片皮鴨喇，比想像中差，太肥，食左幾件，已經比啲油漲住個肚食唔晒，最後來個蛋白杏仁露，好一般，杏仁味唔夠，成餐晚飯整體來講，只屬一般。…查看更多

小女子今晚第一次試呢間私房菜，本來店主set左有7款二人套餐，但係試得私房菜，就唔係太想食啲太普通嘅，例如士多啤梨骨呀咁，因為自己都識煮，於是決定自己編制菜單，呢間私房菜自由度都好大，可以任改，最後編好9道菜(連埋甜品)，首先來個小食，手撕雞，但嚟左個麻辣，小女子唔係好食得辣，要求換個唔辣嘅，侍應立即換過，本來個個套餐都係以豆腐湯為主，小女子將湯改為翅，好可惜原先訂的金勾翅冇貨，換上金湯海皇翅，不過不失啦叫做，之後食龍蝦，煮得唔錯，重有蝦羔添，蟹呢就用蛋白花雕蒸，酒味重了點，蛋白唔夠滑，胡椒炒鮑魚，勁辣，唔食得辣嘅真係唔好叫，鮑魚肉質一般，勾翅鳳味蝦，叫做可以中和番胡椒鮑魚嘅濃味，蒜蓉粉絲蒸蟶子，最好味，蟹油炒麵，味道可以不過麵身硬左啲，最後就係甜品芒果布丁，非常好，細細杯，味濃，加埋淡奶真係絕配，另外再加左一支汽水，本身like 佢fb 已送一支，全部九樣野夾埋1600有找，唔算貴，兩個人出去食海鮮都唔只啦。…查看更多

早一個星期去呢度食海鮮，未去之前都諗，去鯉魚門食會唔會好貴呢，不過同至愛慶祝生日，冇所謂啦，未去到酒家之前已經有人問我地去邊間，個哥仔聽到我地話去快樂，直頭帶埋我地入去，入到去環境比想像中好，坐低一陣就出去選海鮮，海鮮檔個哥哥好好人，佢話我地兩個人唔洗叫咁多，四樣就夠，我好欣賞佢嘅老實，換著第二啲，會不斷游說你食呢樣嗰樣，自己感覺四樣唔太夠，所以最後我選了六樣。四隻蟶子，兩隻南非鮑，一隻龍蝦仔開邊上湯伊麵底，貴妃蚌，瀨尿蝦，炒羔蟹，個瀨尿蝦同蟹，啲羔多到不得了，煮得好食，每樣都好ok,侍應服務不錯，另外叫左一罐可樂，有湯同甜品生果送，埋單1600，真心唔貴，呢餐真係食得好快樂，一定會再嚟。…查看更多

睇左食評話呢間餐廳幾好，所以決定今晚一試，我選擇坐indoor 位，竟然成晚得我一枱 indoor 客，其他客人都坐 outdoor 位，感覺好似包場咁，叫左個龍蝦湯，好好味，真係有半隻龍蝦喺個湯度，重要有蝦膏，另外點左個藍青口，成鍋上，多到食唔晒，好食，係靚嘅藍青口，再叫左三隻燒蠔，不過其中一隻帶腥，唔知係咪唔太新鮮，重有叫左個龍蝦包同 baby ribs, 龍蝦包值得一試嘅，而個baby ribs,意外地好食，啲肉唔鞋，好大份，整體來說，全部野都好好食嘅，可以再來。份量都幾多下，兩個人食到捧住個肚走。…查看更多

今次諗住食餐好嘅當做冬至飯，第一次食呢個法國私房菜，一入到去，地方唔算大，但好在夠靜，一坐低先來餐包，包嘅質地唔錯，跟住上左個頭盆，煎鮮帶子薯仔，帶子ok,反而覺得個配菜薯仔好好食，再來紐西蘭托托蜆，好肥美，配香草汁好夾，跟住就係白酒忌廉煮青口，非常好食，個白汁配蒜蓉包，冇得頂，龍蝦湯，略嫌味太濃，有少少澀，之後來一個雪芭清一清先食主菜，點左M5和牛同烤乳豬，個牛唔得，上枱時唔熱，要叫佢再煎煎佢，個乳豬又太肥，食左兩件已經滯住左，最後上甜品，焦糖燉蛋，不過不失，朱古力拿破崙，唔好食，餐飲點左什果賓治同紅酒，紅酒比想像中好，整體成個set, 我比60分，因為個主菜太令人失望，扣晒分，兩個人埋單1700，法國私房菜來講唔算貴，起碼自己可以選擇想食乜，唔洗set 死晒，如果佢個主菜好食啲，呢餐就算完美嘅，值得一讚係個男侍應生，好有禮貌，食到甜品時重主動話幫我影相，我好欣賞佢嘅service…查看更多

小女子昨晚心血來潮想食拉麵，決定試下呢間，以為放工時間都會幾多人下，但去到出奇地唔洗等位，選擇左bar 枱座位，本人感覺上坐bar枱食拉麵會襯啲，自己點左一個海老拉麵，原來唔係大蝦，只係蝦米仔嘅物體，有點兒失望，不過佢啲湯底好掂播，好濃味，麵質，軟硬度可自由選擇，另外點左牛油粟米，睇落好似好平凡但食落又幾好味，唔會話整得好林又唔會太硬，剛剛好，重有餃子同炸軟殼蟹，呢兩樣就不過不失啦，埋單兩個人合共265，唔算好貴，黃埔區拉麵舖唔算多，呢間都叫做係一個不錯嘅選擇。…查看更多

昨晚試呢間鐵板燒，未嚟之前睇過餐牌，最平一個 set 係 450，唔貴，決定一試，另外再order 左一個龍蝦餐，780蚊，呢間舖唔大，bar 枱只可以夠三pair 情侶坐，好彩我一早訂左位同埋早左到，所以可以選擇坐對住廚師嘅位置，一坐低，已經有一杯花旗參茶放喺面前，感覺好清新，食鐵板燒會幾熱氣下，所以呢杯絕對係用心之選，幫客人下一下熱氣，接住就上沙律同刺身，刺身好新鮮，good !跟住就陸續上set 入面嘅食物，燒牛脷，非常厚身但好林，唔會咬唔倒，不過我 prefer 佢切薄啲會更好，因為有成三大塊厚厚嘅牛脷，食完都有啲飽飽地咁，牛肉薄燒，處理得非常好，5成熟，初時重怕會生生地，但入口ok 啊，燒龍蝦，非常好味，啲芝士溶晒喺上面再加埋醬汁，一流，食晒成個餐，我挑剔唔倒邊樣係唔好食，唯一只可以講，個炒野菜同炒飯平凡左少少咁囉，成晚最期待嘅，係個湯，好特別，係用個膠袋盛住啲湯，最後，甜品係泡芙，鬆軟唔會過甜，為呢餐劃上完美句號。整體來講，食物足料、好味，叫左兩個餐，飽到捧住個肚走，非常滿足。唔只食物ok, 啲侍應同廚師都好ok, 個個都有笑容同好有禮貌，又經常同我加茶換碟，服務我都比80分。…查看更多

小女子在紅磡返工，知道有呢間咖啡店已經好一段日子，但一直都好少入去買咖啡，一個月最多只幫襯三，四次，大半年前，轉左手比而家呢個老闆，初時覺得轉手之後咖啡冇上手沖得咁好飲，有一日膽粗粗同老闆講，你啲咖啡唔得啊，冇我之前飲的那種味道，點知老闆立即改進，佢話一定會調到啱我口味為止，既然佢咁有誠意，我都繼續比機會佢，跟住每日我都入去買杯咖啡，不出三日，佢真係做得到，終於冲左我認為好味嘅咖啡出來，我好欣賞佢嘅誠意同衝勁，有聽取客人嘅意見不斷改進，值得一讚，除左咖啡之外，老闆重會因應客人嘅喜好做出啱客人口味嘅三文治，呢間絕對係一間令你覺得窩心嘅咖啡店。除左咖啡之外，佢地嘅 muffin 同埋椰子撻，出奇地好食。而家每日不能缺少的就係呢一杯窩心咖啡。…查看更多

昨天星期六去試呢間喺郵輪碼頭嘅西餐廳，因為睇食評話個景好靚，野食唔算貴，所以決定一試，點知一入到去好失望，夜晚係睇唔倒出面有咩景既，點左兩個 set dinner,豬鞍同牛扒，個豬叫做 ok,個牛就好唔掂，叫佢做7至8成熟，總之唔要生既，點知上枱時切開，血水非常多，我估最多只有6成熟，真係食唔倒，勉強咬左幾啖都趙唔倒，叫侍應整熟啲，廚師只係再煎一煎表面，入面依然係唔熟，同侍應講，佢肯換其他餐比我，跟住就轉食煎龍脷魚柳，食完諗住 order 甜品啦，原來佢地係冇甜品的，失望到非常，呢餐食左五百幾但唔飽囉。老實講真係冇下次！…查看更多