津巴報料偉的個人專頁

身為一名合資格既潮州混血兒，當然要周圍試試潮州菜，今日就去到呢間酒樓試食。由於係下午茶時間關係，價錢都比較豐儉由人，蠔仔泡飯半價，一大碗都係廿四蚊雞，食落其實同有啲打冷舖頭既質素相近，性價比高，身為識貨之人，一定唔可以錯過。不過，係經歷完呢個抵食蠔仔泡飯蜜月期之後，良好既印象就漸漸被破壞。人生若只如初見，如何回到當時…首先要講既係欖菜肉碎炒飯，又名"攬炒"。其實錯不在佢，因為佢發揮正常，只係我呢個經常犯錯既潮人混血兒再度犯錯，又叫炒飯又叫泡飯，令到兩者重覆出現。不過，好彩最後都食得晒，否則定必愧對非洲小孩。到到蘿蔔糕，雖然我係一個百分百蘿蔔糕fans，但係呢度既蘿蔔糕認真唔得，粉多於蘿蔔，入口即溶，是否希望化作春泥更護花？但宜家秋天都就快到了，呢度既師傅應該要留意一下。以前細細個最鍾意食韭菜粿，鍾意到呢...可以當飯食，所以都可以扮下專家既。而呢度既韭菜粿，餡太咸了，過量既咸味將韭菜香味完全掩蓋，失望得使人不禁感嘆一句友舞久菜。而咖喱魷魚，就正正常常啦，不留印象。總括而言，呢間酒樓表現唔差，如果改埋上面既少少minor位咁就perfect啦！順帶一提，由於報料偉需要回到深山潛行修練，可能會過一段時間之後先可以同大家再會，但我一定會返黎，再為眾兄弟介紹好飲好食好去處，大家記得要繼續支持我啊！Stay tune :)…查看更多

昨晚一時興起，恰巧閱報察有優惠劵之，故本將軍便攜家眷前往之，以會將軍之威名矣。報紙上面做緊一個叫"雙蟹宴"既promotion，於是就叫咗一set試試。蟹將軍首先派出"刀鋒豆腐"作為先鋒部隊，將豆腐切成一塊又一塊薄片，初時上枱以為係浸淫於豉油之中，豈料個啲醬料係點蟹既醋。在賣相上，呢個刀鋒豆腐的確完美展現廚師既刀功，每片豆腐既厚薄都係一模一樣，可惜既就係配醋，醋同豆腐兩者格格不入，就似一對貌合神離既戀人一樣，兩人唔似係向著同一個方向進發，的確令人心酸唏噓。唯一可以解釋就係，呢個刀鋒豆腐係蟹軍既先頭部隊，希望能個開開我地個胃啦。接住就係到豉椒炒蜆，中規中矩吧，其實好似踢足球打中場一樣，只要唔好傳失波，偶作向前傳球，就已經算係打得唔錯，恰好形容呢一味餸:只要發揮正常，一般都唔會走樣得去邊。到到九肚魚啦，味道香口惹味，可惜骨頭有如九肚山路一樣九曲十三彎，對於不精於面對骨頭既我自然係一個大挑戰。身為將軍，面對挑戰，又豈能放棄?雖然面對呢個困難既處境，但只要有耐性，慢慢解決，唔好放棄，堅持信念，最終必會守得雲開，問題迎刃而解，嘗到美食。避風塘炒蟹，都不必多講，由於掛住食既關係，所以記得既味道實不太多，不如簡單直接地講，過多既文字，只會令人生煩厭之感。好啦講正題:香口、多肉，啲蒜頭多到可以用個樽入返起佢打包返屋企用，所以未上枱已經聞到好香好香，隻蟹鉗同蟹蓋係冇得輸，明知食完肥廿磅都係忍唔住，決意捨命陪君子。三杯雞，又係好好味，每件雞都入晒味，所以明知落咗酒，對酒精有敏感既我都忍不住將生命一捨再捨，所謂今朝有酒今朝醉，現實生活令人心碎。係食咗幾味咁濃味既餸菜之後，係時候要食返一啲清清地既dishes去refresh個味蕾，所以就有一碟蕃茄浸時蔬，就好似我地經過每日勞累工作之後浸一浸按摩浴一樣，俾味蕾休息一下，充滿電之後又去搏殺過。當然，唔係人人都認為按摩有效啦，可能就咁飲杯清茶就夠，但呢一碟菜係呢餐飯既作用係正面既。係按摩完味覺浸完溫泉之後就到另一味蟹啦，就係娘惹蟹，雖然個名有個娘字，但佢個size並不娘娘腔，比避風塘個隻有過之而無不及，可以加入變種特工做超能博士既手下。原本蟹將軍會送六隻饅頭過我方陣營送蟹食，但係賣晒，所以最後叫咗兩個飯撈咖喱，但效果一定比撈饅頭為佳，因為饅頭澱粉密度高，本身食落去已經有甜味，如果加上咖喱的話又會犯上貌合神離之誤，但撈飯的話就能完美磨合，天生一對，能夠試到撈飯，實為天意，由此可見，命裡有時終需有，終需會時辰到，別怕。會正題，呢一隻蟹個鉗，比本將塊面還要大。最後就係蟹肉蠔仔泡飯，係上枱個陣waitress灑咗一啲飯焦落去，大大提升咗飯既口感，唔會一味俾啲湯浸淋，有硬有軟唔單寡。…查看更多

話說某日獨自係屯門區探險時行到盈豐附近，醒起以前做census個陣有間野做外賣又平又好味，所以好想再去試試睇下水準仲keep唔keep到，所以就去試試。去到點左當年最鍾意食既焗豬扒飯，水準依舊保持，豬扒多肉而鬆化，骨頭唔大好易就可以分到出黎，個飯底亦都好有心思，係真係炒飯底，而唔係出面食個D冇heart蛋撈飯，因為個D蛋撈飯係好削好水，但呢度個飯底真係炒，所以每粒飯都好分明，而且好香口，所以特意推介俾眾兄弟。不過，係質素冇退步過既同時，價錢同一時間大躍進，個飯已經要賣差唔多四十蚊了，唔再係好似以前做外賣咁廿五蚊包野飲。只能蓋嘆物價不斷上漲之禍矣。…查看更多

話說今日係荃灣放工放兩點半，於是就唯有係荃灣覓埋食先返歸，恰巧醒起呢間烏冬店，故前往挑戰之。由於係兩點幾既關係，農民偉已經餓到手軟腳軟，故一到埗好快就睇定晒食咩。不過呢度並唔一般既餐廳，而係好似一般快餐店一樣，先去佢出面個廚房揀野食，揀埋天婦羅同埋飯團等等，再一次過俾錢。今次就點咗豚骨湯烏冬、咖喱牛肉烏冬，明太子飯團同埋海老天婦羅。都係個句，由於已經兩點半既關係，唔單止農民偉肚餓到頂端，而且好多野食都已經sold out了 :( 但為咗試食再向眾兄弟分享既原故，農民偉就明知淨返一件都照嗌啦。首先係明太子飯團，食落去既味道有少少辣，味道都尚可，但最令農民偉驚訝既就係個飯團口感...真係「吳克檢」 飯團expect佢同壽司一樣都係維持係15度至室溫，但係呢度既就係熱，農民偉估計係因為佢同啲天婦羅既爐頭放埋一齊既關係啦，因此原本應該脆卜卜既紫菜，入口時都頓化作清泥矣。接著就係海老天婦羅，其實買淨一件，雖知道個結果會係點樣，但心入面總係唔試唔安樂，呢個情況相信大家係現實生活中都經常遇到，亦都好令人唏噓。結果果然一如所料 :( 質素中下，界乎不留印象至留下壞印象之間，唔太新鮮，蝦欠鮮味，只食到脆漿既白淡味道，期望下次去可以食到新鮮既佢地啦。先前食過既兩樣前菜都有點失望，正當對呢度既期望越來越細既時候試左一啖豬骨湯，就將所有既不快都一掃而空 :) 個湯好鮮，並唔係之前經常提及既shimizu湯底,再試試隻蛋，唔錯，但好似有少少酒味，所以極度擔心入面有酒精，因為農民偉對酒精有好嚴重既敏感，但味道真係good good good good good。最後就係到咖喱牛肉烏冬，揀咖喱係因為咖喱係各間食店既保險，如果連咖喱都唔得就...當然呢度冇令我失望，喱味濃，微微辣好醒胃，但淥烏冬既水沖淡左個咖喱，間接證明左咖喱同烏冬係唔夾，而咖喱既最佳伴侶...當然就係白飯啦 不過如果係度嗌咖喱飯食而唔點烏冬的話，情況就好似去觀音廟搵耶穌告誡一樣 總括而言，烏冬口感不俗，基本確認會再去食，一試去觀音廟搵耶穌告誡既滋味係如何！…查看更多

友人早前宣稱係呢度食左個性價比極高既lunch，繼而再謂同佢女朋友成日去食，但農民偉係開飯網見到眾兄弟俾呢間餐廳既評價都係「劣」、「駄」等等，所以今日我呢個識貨之人懷著戰戰兢兢既心情去試食，睇下為佢平反，定係由佢繼續係劣食爬行榜上繼續爬行。由於下晝有活動既關係，所以十一點十就上左去，上到去赫然發現間野原來開十二點鐘，正當我地互相恥笑對方之際，入面既叔叔就開門好好人叫我地入去坐住先。坐底就落單，點左友人用人頭擔保所推介既A set，四十八蚊包六塊魚生、一件手卷、一客燒物、主食同埋雪糕糯米糍。牌面上的確如友人所述幾抵。等左廿零分鐘終於有食物上枱，實情都算幾耐，幸好農民偉個肚尚未打鼓。首先食既就係先前係其他地方食過好好食留下好印象既甜蝦。誰知一食落去.............以上省略左一D唔應該講既說話，因為真係幾腥，可能係殺隻蝦仔個陣嚇親隻蝦，令到佢分泌左D不知名hormone啦三文魚冇咩特別，但色水怪怪地；八爪魚味道可以，texture一吃便知唔新鮮。跟住就係A5和牛手卷，個名好似好勁，實際呢，就一般般啦，唔係好好食，但又未去到難食既，但有點油同埋紫菜唔脆，要同佢搏鬥一會先咬得開。友人叫既粥、燒雞翼配三文魚腩同埋農民偉既鰻魚汁三文魚炒飯，我盜取左一隻雞翼試食，燒得幾好，香口得黎又唔燶，憑良心推介俾眾兄弟，呢個一定唔係伏，而農民偉既炒飯就......鰻魚汁味太重，入面又冇三文魚，同屋企炒差別不大。最後就係金菇肥牛卷，同英國快餐店最近推出既「朗尼漢堡」既特點一樣，就係nothing special，不能留下印象。其實間野又唔係眾兄弟講得咁不濟，五十蚊到有咁多野食食到攬住個肚，quality就要有心理準備。不過，都一如眾兄弟所講，間野係收費方面的確有些少問題，因為我同友人兩個餐48+48，suppose係96塊錢，但實際埋單卻收101，後經算術達人農民偉精密計算，方發現可能係凍飲加兩蚊，罐裝飲品加三蚊，48+48+2+3=101，所以大家要小心小心啦！…查看更多

某日superwoman逛團購見到呢度有半價coupon賣，故買下以試之，順道係呢個未去過既mall度行行探探險當日大概七點零八點去到，見到間餐廳其實都幾大間，但又冇咩人，所以坐得好舒服，可以慢慢傾計詳談到天亮（當然，人地都要打烊既）見到有日個卡位好靚好有特色，希望下次可以坐到啦。接著就為眾兄弟介紹食物了，就跟住上枱既次序講啦！首先就係拍黃瓜，辣辣地又有香口既麻油，所以對於我呢個唔多食得辣既農民黎講都可以話係好易入口，作為頭盤可有醒胃之效。此外仲有炸雞扒肉燥飯定食。成個set有好多野跟，首曰蠔仔湯。蚵仔湯冇咩特別，都有幾粒蠔，並唔係得一兩粒係度掛蠔頭賣水肉之流；次曰泡菜，雖然呢度係食台灣野，但跟餐所送既泡菜竟然係韓國既泡菜，應該係想藉此醒醒食客們既胃，而係呢個餐入面佢都可以發揮作用；跟住就係講重點：雞扒同肉燥飯。雞扒係同係台灣好出名好大大塊既雞扒texture同味道相當，但農民偉略嫌有點dry。係呢個時候，碗蚵仔湯就發揮作用，食一啖雞扒，呷一啖湯moisturize佢，就能將我所擔心既野一掃而空；而個肉燥係農民偉既拳頭推介因為個肉燥食得出係自己炒，香口且足料，yummy yummy，並唔係好求其咁有D肉碎再打個啡色味精芡就算，意識良好，值得嘉許！最後就係花枝丸炒飯，對於一個好喜歡食丸仔（墨魚丸、魚丸、貢丸個D咋）既我黎講，的確勾起了好大興趣，食落感覺都好好，因為一般人都可能會認為丸仔加炒飯就好似功夫加足球一樣咁無厘頭，但兩者所得出黎既結果都係一樣，雖非大放異彩，但仍令人刮目相看，花枝丸同炒飯並無排斥之感，推薦眾兄弟試之:)To put it simply，食物質素中上，環境非常好，基本鎖定會有下次，且希望快D就到下次…查看更多

是日農民偉伙拍另一農夫同埋農場大地主去左巡視嶺南荒野之農地，故名思義個邊係荒野既關係，我地可以知道個邊係冇啖好食，所以農民偉就帶住地主返返出去市中心搵食。本身出到市中心後想食D快野，但眼見「歐洲去去」、「冇骨氣拉麵」同「嬰兒茶座」都冇晒位，所以最後就兩男子一女子就去左呢度開餐。由於係農地個邊已經飽食風雨既關係，所以D二人四人六人set都唔岩我地食，最後就決定散叫再happy share，叫左生煎飽、窩貼、菜粒咸肉飯、豬扒麵，當然唔少得就係小籠包啦！傾左幾分鐘有關農場收穫既問題，呢客中式桌球就上枱，我爭D就忍唔住拎起隻筷子做倚天cue，係食之前先打返個147度波由於一雙手已經飽歷風霜既原故，農民偉大膽地以手試溫。嗚呀！爭D著火當然野食係要趁熱食，所以眾人都急不及待地起動。不過，一咬落去既時候，大家都後悔了。因為一咬之下高達攝氏300度既滾汁係口入面四方八面爆發，情形就好似食星爺佢地既「爆漿瀨尿牛丸」一樣，簡單黎講就好似放左個手榴彈入口之後爆炸一樣，真係好滾熱辣！但係呢一下衝擊並未能夠阻礙呢個生煎包成為呢間舖頭既FOR，即Food Of the Restaurant，因為包入面既肉汁真係好鮮好濃郁，非先前所食個幾間淡口生煎包可比，而且個底又可以煎到脆而不燶，頗具功架。接住黎到既就係鮮蝦窩貼。初初waitress姐姐拎黎個陣我真係唔知係窩貼，以為係煎米粉之類既野食，但我地明明冇叫，細心望一望先知道係窩貼，用左「中環碼頭」水餃所教個一種落豆粉水一齊煎既方法，不過我實際上唔係好喜歡呢個煮法，因為口感上同窩貼唔係好夾。餡方面呢，就冇咩特別，長條形易入口，但不留印象。第三樣就係呢個菜粒咸肉飯，menu上面明明寫住係炒飯，但上枱既又係咁既樣，使到一眾農民大惑不解。但唔緊要，有野食黎到就食啦。係菜牌入面佢係一樣舖頭廚師五星推介，但食落就令我不禁想化身成后羿，係射晒九個太陽落黎之後再射埋佢呢五粒星星落黎。唔係話唔好食，淡淡地有少少肉香味，但真係唔係話要去到五星推介咁厲害，而個飯又比較多油，even每粒飯上面都有油係度，係就係香滑D，但顯然對一些力求健康既朋友黎講就唔係太適合。世間上萬事萬物皆有佢既長處短處，聰明既就會揚長避短，但可惜今日我地就不幸發現佢既短處，當堂令呢間餐廳扣左唔少分數。碗麵唔係冇味，但湯底只停留於味精水之流，雖不至於shimizu清水翔太湯底，但亦都唔係用上湯，有點失望。而豬扒更係呢一間餐廳既軟肋，可能係炸得太耐既關係，D豬扒炸到好似包裝食物咁，而且表面粗糙程度可比馬明以前既臉蛋，甚至磨一磨個口就會即刻損，痛到流眼水。最後就係小籠包，保持穩健水準，皮唔會太厚，肉味濃郁，又有好多汁，食落去係一種享受，總算能撫平被豬扒傷透既舌尖。咁多樣野食加埋$303，農場地主見我地係農民，乃一介布衣，所以就請我地食，而我農民偉亦非無貢獻，拎出一張係報紙剪既$50 coupon，所以實際上只需繳付$253就享飽餐一頓矣！…查看更多

話說今日到佐敦區返工，先前已經上定黎搵定一眾兄弟係開飯網入面有咩推介，本身想試海南雞飯，但奈何午飯時間既一場大雨就將呢個念頭狠狠沖走。:(咁唯有係公司樓下隨機抽樣，是但揀一間野食，就去到呢度食米線。坐底跟手點咗清湯魚片頭腩肉米線，走芽菜，因為芽菜入面既水份會沖淡食物本身既味道，就會頓成失去味覺既大長金喇。好快碗粉就上咗枱啦，由於小人有眼不識泰山，所以就係對碗米線冇咩特別大期望就開動了。但一試個湯底就真係不得了！因為個湯底好鮮甜，非一般米線餐廳既shimizu清水湯底可比，再望望牆上面有openrice 100 likes sticker係度，才恍然大悟，見到自己有如井底之蛙般見識淺薄。不過，雖然個湯底好飲，但餸菜方面其實就冇咩大分別。不過31蚊有兩餸，大大碗仲要送埋豆漿，性價比其高，所以就係度推介俾眾兄弟食個又平又靚既米線…查看更多

近日稻香launch咗唔少特價優惠，當中以下午茶平最多，好多點心都割引割引再割引，價錢上的確跑贏咗元朗唔少酒樓。雖然價錢係就係平咗，但係對於食品既質素，就要有定心理準備，付出十分耕耘都未必有一分收穫，何況只係俾出一分錢，又豈會得到七分貨？首先要講既就係我到各大小酒樓都必點既菜苗餃，食落去無法俾出任何反應，只能講出一個長十米闊十米既「吓」字，因為菜苗餃竟然加薑係入面，真係千奇百趣，oh oh oh oh my O 唇。跟住就係價值八個八銀錢既叉燒米線，一如所料，叉燒係啲冇人要既地帶，例如肥位或者邊皮燶晒既位，實屬增肥良品，減磅人士切勿以身試線。酥皮焗餐包，冇咩特別，唔係難食但又唔算太好食，因為同出面其他地方相差唔大。煎花枝餅，味道係唔錯，但係有太多「沙角乙明」，有太多沙葛同馬蹄，口感上顯得格格不入。最後就係燒賣，點到呢個燒賣彷彿係淘寶買野買到正貨一樣，十蚊燒賣有大大粒蝦，強力推介俾一眾兄弟！最後好簡單概括一句，當食點心放題重量不重質，呢度可以滿足到大家，但如果真係想食啲靚啲既點心，都係出邨吧啦。…查看更多

某日去呢度食lunch，係門口見到佢個open kitchen，啲師傅都好有姿勢，心想應該都會有實際。入面係以自助搵位買飛形式營業，所以都冇咩服務可言，好似啲連鎖快餐店咁。點咗一客生煎包，咖喱豆卜粉絲，蘿蔔豆卜粉絲同埋兩杯野飲。首先要講講野飲，點解係一次過講兩杯野飲而唔係逐杯講？唔係筆者懶，而係兩杯野其實一樣味，只係顏色唔同。到到生煎包，味道其實不錯，但皮的確好薄，不能夠單靠幾個生煎包（或者叫做生煎餃）就能夠醫飽個肚。到到兩碗粉絲，都係同飲品一樣，名字雖然唔同，但都係用咗shimizu湯底，即係清水湯底，就算有一碗聲稱係咖喱口味，但都係染咗色而已。令人能藉此明白莊子物我不分既思想，物我間係名字外表上或有分別，但本質上所有物種皆一樣。不過呢度既致命傷就係冇食物選擇，筆者今次所叫既就已經係個度既所有選擇，好多都係迫於無奈先要叫，就好似民主進程一樣。:(…查看更多

話說呢間餐廳都開咗一排，但一路都冇時間食，恰巧個日咁岩趕時間而且得呢度有位，故一嚐之。入到去個裝潢都頗西，電視播緊外國節目，牆上面既黑板就寫住廚師推介同是日午餐等等。個侍應哥哥仲好熱情地介紹當日廚房有咩靚。由於時間關係就點咗兩個set lunch，有忌廉汁香草雞扒跟飯同埋鮮茄焗豬柳飯，各自再加12蚊跟餐，就跟磨菇湯、蒜蓉包同餐飲。首先黎到既就係個湯同個包，個湯呢...食落去竟然有點類似豆蓉既渣，同個湯格格不入，而且令到個湯好青，反而冇咩忌廉味。個包就係全餐最滿意既位，香口又鬆脆。接著就係香草雞扒飯，食落會令你仿佛自己係大長金一樣，過足韓星癮。唔係因為外表似足李英愛，而係你會懷疑自己係咪好似長金咁失去咗味覺。有畫冇味，實捉到鹿但又唔曉得點脫角，有點失望。到到鮮茄焗豬柳飯，即叫即焗熱辣辣，豬柳亦預先切好方便食用，不過呢...個飯實在太多茄，當食飯時如果連埋個茄入口既位，本身既味道就會俾蕃茄沖淡晒。可取之處就係飯面上既芝士，香口而有口感。呢間餐廳，實有令人恨鐵不成鋼之感矣。…查看更多

話說某日路過利舞台，見到林源三隔離有兩位古裝朋友係大熱天時仲著住如項少龍所云幾廿層咁厚既古裝係度派扇做promotion，就幫佢地拎左把。初初唔為意，以為只係宣傳佢地八色小籠包呢個product，過左一排先赫然發現原來把扇係小籠包買一送一coupon 故前往挑戰之！由於係lunch hour既關係，去到都冇咩位淨，內堂入面既位已經冇晒，要坐係商場open area既位，本身唔太想坐，因為真係幾open，但見到可以遠眺寶馬山景，令心曠神怡，所以就照坐。坐低之後侍應哥哥就即刻奉上金茶壺，氣派不凡，而且會幫你斟茶，實有賓至如歸既感覺，奈何呢度冇得揀飲咩茶，compulsory要似普洱，對我呢個好怕飲濃茶既人黎講，確實有點失望 :( 經過一輪menu之研究後終於畫好order紙。本想試試呢度既擔擔麵，但見到個menu入面既佢旁邊有幾隻辣椒仔係度，為免再度喉嚨痛，都係乖乖嗌返菜肉雲吞拉麵。此外仲叫左一客生煎包，有雜誌推介既燉雞湯拉麵亦都係試食之列，當然唔少得仲有是次探險之重點－－八色小籠包 首先係生煎包急不及待地上枱，第一時間以手試溫，係辣手既，新鮮煎的。之後就係試食時間，味道係唔錯，肉味都幾濃，但係汁太多而肉太細，麵包皮又有D厚，所以口入面既肉味唔係幾足夠去撈個包，而入面既肉比接下來要介紹既菜肉雲吞還要小，表現就好似今屆世界盃既西班牙咁－－黯然失色。跟住黎到既就係菜肉雲吞拉麵，第一眼望到隻碗個陣，心想係咪俾D七尺巨人食 望入去隻碗入面又唔算太大碗，正當諗住係「雷聲大雨點小」之作，食落就會將你呢個想法一掃而空。因為拉麵既麵質好實，唔同一般既即食麵般虛而浮。不過個湯底有點似味干拉麵豬骨湯底既淡版，唔足以撈到一碗麵，所以就要靠菜肉雲吞既幫忙，不過D菜肉雲吞呢就...有點「西西」雲吞既影子，冇咩特別之處。另外既燉雞湯拉麵，麵質都係同之前個碗一樣，都係好實，而且可以睇得出真係人手拉，因為...D麵條粗幼不一。不過，雖然兩碗麵顏色相同，但味道卻有大分別，由於要突出燉雞湯既鮮味，呢碗麵既湯底呢...清過清水翔太既Shimizu湯底 不過個雞湯的確唔錯，如果可以分開點，世界就美妙了。最後當然就到萬眾期待既八色小籠包，由於有買一送一扇既關係，就可以實踐唐唐之前既政綱「香港大肚婆，一人一床位」既共同體－－「香港為食仔，一人一籠包」把扇上面印住既小籠包隻隻都好colorful，但實際上上枱既大部分都係咖啡色:(不過算啦，橫掂都係食落肚，所以就學Tony Jaa、三姑同森美用泰文講句「咖啡色」啦(唔明白既朋友可以上Youtube重溫)佢地有個進食order俾我地跟，咁我就跟住個次序黎介紹下啦！首先就係原味，保持住呢度一貫既風格－－淡。肉味係有，但真係要味覺靈敏既朋友先會明顯地食得出。緊接其後就係人參味，呢粒真係不得了...識得欣賞既人會話好食，但我只係一介草民，一放落口真係苦到將眼耳口鼻都乸埋一舊，形成一個「米」字樣><不過都唔係冇方法解救，如果真係唔太接受到的話，可以係食個陣飲啖茶，當堂變成參茶一樣易入口。第三粒就係鵝肝味，又係難以理解之作，食落去感覺好腥，只想快快吞左佢，失去左品嚐味道品味美食既精神，失望矣。跟住就係黑松露味，其實都係一眾以黑松露混入中菜結果既縮影，就係肉味cover唔到澀味，食落去感覺好青好生，同人生一樣，無論個樣野單一黎睇係幾好都好，加落去係唔夾，就係唔夾，相信各位對此皆有所感...好不容易先食完半籠，條路就好似去取西經咁難行，諗住越後越難捱之際，接落黎既芝士、蟹粉同埋蒜香，都係正正常常，雖未能留下深刻印象，但未至於令人抗拒。最後就到麻辣，食落去第一個感覺係好香口好有麻油味，但當你對佢放下左戒心之後，佢先會露出真面目，辣味就好似煙花咁爆出黎，令你一時間難以招架。食過呢個八色小籠包，就好似經歷左一段人生一樣。首先，你唔會知道自己將會食個一粒係好食定係劣食，就似人生你唔活到個一個point你係唔會知道個陣既你係點既樣；係食緊一D較為遜色既味道個陣，其實係自己對面對逆境既磨練，好似灘叔咁講，只要你捱得過，你就係大個仔；最後，只要你冇因為頭半籠食到冇咁好食既口味而放棄，你就可以食到後尾個四粒較好味既小籠包，教我們只要堅守便有望。最後，從味道去評呢個八色小籠包，我只能夠講：創新同怪異之間，只有一線之差。…查看更多

幾經辛苦終於考完試，捱完一個漫長既學年，當然要好好慶祝一下「全新暑假，投奔初夏」呢一個開心喻快既日子啦，所以就預早從團購入手，同my angel好好慶祝一番雖然預先book左枱，但由於happy friday威力驚人，上到去個陣D人多到彷彿要將waiting area既每一個平方厘米都要鋪滿一樣等左十零分鐘到終於有位啦入面環境貌似有點迫，但其實都有好處，就係可以坐得close d傾計傾得開心D:)黎呢度之前當然有做定資料搜集，所以就點左幾樣各位網友都曾經推介既食物，就好似燒菠蘿，食落酸may may幾開胃，而且燒完之後都係掩蓋唔到佢地既新鮮，因為一咬落去d菠蘿汁就急不及待要湧出黎。食開燒物當然一不離二，就係燒羊架。平時其實好少食羊，一來一般餐廳都冇羊既dishes，二來「本是同羊生，相食何太急」，不過呢度既燒羊架就的確唔錯，冇咩騷味，又唔會實到要食到好似打MMA同佢搏鬥咁。當然仲有我地都鍾意食既雞軟骨串，對佢既評分一定高過朗尼係球場上既評分最令人喜出望外既就當然係芝士蝦丸，入面既芝士係semi solid而唔係全熟既solid或者liquid，it's good!跟住就到刺身啦，點左三文魚、吞拿魚、甜蝦同埋甜蛋三文同吞拿質素比想像中好，話晒係放題以為都係以量為主，質為其次，但呢度就兩者並重，唔會一夾即散，或者係枱上面跣來跣去暢泳一番；但不得不提既就係甜蝦，唔係普通既甜，而係有個種一放入口有鮮味，含一陣有少少甜味，吞左落去之後有回甘既感覺個甜蛋又係好得，因為真係食得出有蛋味而唔係一般壽司舖頭咁似一種化學甜。到到壽司一環，我地主要都係食火焰系列，有鰻魚、三文魚，亦都有蟹棒，佢用既蟹棒並唔係冇heart獅子狗蟹柳，兼且係蟹棒面上加左一點沙律醬，幾合拍。火焰三文魚亦唔係係咁易用支bunsen burner辣一下，而係只係同元朗田中爭少少，唔錯唔錯。最後就係到兩口冷麵，一人一口，份量係差唔多，但係呢度就見到佢地奸詨既地方，就係佢地係碗麵入面落既麻醬有點過多，令到個texture好實，食多幾口一定會飽晒，食唔落其他野。雖然有團購，但如果計埋d service charge，其實同正價爭唔遠。不過，最緊要就係食得開心:)整體來說，質素的確比一般放題為佳，一分錢一分貨，不過如果你係David Wong，咁一分錢就好有機會可以食到七分貨啦基本確定會有下次，depends on when u free, hehe…查看更多

之前聽好多朋友講過話呢間beans好出名，於是就同superwoman帶住滿心期待既心情去試食個日六點鬆啲就去到，所以成功避開人潮唔使等位。入到去見到間cafe分成三part，有bar枱位、酒店cafe位同埋正常餐廳位。我地叫咗忌廉蟹肉意粉同夏威夷薄餅。首先要講講個意粉，個賣相的確精緻，味道亦唔錯，蟹肉並唔係用一般好普通既蟹柳，不過意粉略嫌煮得唔夠耐，就算平時鍾意食硬texture既我都覺得個意粉有點太過硬身，同埋冷氣有啲大，所以個意粉好快就凍晒:(跟住就到夏威夷pizza，其實係蕃茄醬煙肉餡，面頭再加芝士焗，食落唔錯，唔似其他cafe咁就咁鋪啲餸係面就算，食得出佢地既心思！:)整體來說質素幾好，侍應哥哥姐姐又好禮貌，如果可以改到一啲小問題的話，會有好多好多個下次…查看更多

大家通常去季季紅，自不然都會叫乳豬食，不過如果真係要認真評價的話，其實同出面其他酒樓既乳豬分別不大，最神奇既係當你同佢地講要瘦啲既時候，佢地就偏偏俾隻肥肥地既你:(可能呢個係咒語啦，所以食落去個陣，乳豬皮既甘香俾肥膏沖散晒，好可惜。杏汁豬肺湯，係飲到一種清甜既味道，係第二間分店係飲唔到呢個感覺，只有呢度先有。拔絲咕嚕肉，呢一味餸難度幾高，食落去口感好煙韌，可惜實在太甜，如果冇咁甜應該好好食，仲要撈到飯。跟住就到我最鍾意最鍾意既芝士琵琶豆腐啦，豆腐同魚肉完美混合，加埋芫茜香味，只有齒頰留香可以形容，再加上芝士汁，真係明知會肥好多磅都係會忍唔住繼續食…查看更多