hswtoni的個人專頁

今日同朋友經過太子發現咗呢一間新開嘅漢堡店店裏面座位唔算好多，主打都係外賣生意，睇完個餐牌發覺其實選擇都幾多，有好多配搭都好新穎～最後我同朋友分別叫咗一個招牌WB豬牛薯堡，同埋另外一個新出嘅韓式辣醬蝦堡。先講下個招牌WB豬牛薯堡，熱辣辣一出爐份量真係嚇親我，厚度好厚同埋入面真係有好多唔同嘅材料，有齊基本嘅蕃茄芝士，生菜配料之餘，佢嘅主體竟然有齊晒牛肉同豬肉漢堡扒，仲要有塊鬆脆嘅薯餅！無論賣相同口感都係一流，而佢嘅醬汁來講比較清淡，唔會搶咗食材嘅味道，而且食落去都唔係好膩，相當好！而另一個新出嘅韓式辣醬蝦堡，蝦肉彈牙，不過個辣醬就唔係好辣，鍾意食辣嘅人可能有少少失望，但係就好符合普羅大眾嘅口味！整體來講，佢嗰兩個包嘅食材都好新鮮，而且全部都係即叫即整！另外我仲加咗兩個小食，選擇左蕃薯條同薯格，兩個都好足份量！我就比較喜歡蕃薯條，好脆而且蕃薯本身甜味好出,超好食! 而且跟餐嘅價錢一啲都唔貴，值得推薦大家一試！…查看更多

難得經過大角咀當然唔少得食下佢嘅人氣台灣食店先，我哋大概7:00去到排咗一陣隊就得去啦 （仲未開始禁堂食嘅時候），見佢入面裝修得幾唔錯，而且都好多人keep住買佢哋外賣。餐單上嘅選擇都幾多，我哋就叫咗佢個招牌超濃芋泥蛋餅，紅燒三寶牛肉麵（轉乾拌麵），酥炸排骨便當同埋試埋佢嘅珍珠奶茶先講吓佢個小食蛋餅，芋泥分量超級多，真材實料而且唔會太甜，都幾飽肚唔好講笑～確實值得一試！而個牛肉乾拌麵，麵身剛剛好唔會太淋太硬，而當中我最欣賞係佢個牛筋，炆得剛好又入味，相反牛肚就冇乜太大驚喜。乾拌麵大家可以放心，吾會太鹹，但略嫌佢個味道層次不足～而另外個酥炸排骨便當，一樣份量十足，排骨炸得好鬆脆，而且我最鍾意就係佢個配菜粉絲，辣辣地好開胃！我同朋友都相對比較喜歡佢嘅便當！珍珠奶茶來講尚算合格，但配上啲主食來講就絕對好滿足嘅一餐！整體來講CP值真係唔錯，大推大家可以試吓佢既小食，聽朋友講佢荃灣開咗分店，大家下次經過都可以試試…查看更多

今日黎到灣仔一間海鮮主題餐廳食dinner，見唔少朋友都打卡佢哋個shakeshake海鮮，唔同款式嘅海鮮加埋醬汁，望落相當之惹味。餐廳有bar位同卡位，今次同朋友兩個人就坐係卡位，都幾舒服闊落，同埋周圍既裝修好似一個船艙咁match返佢地logo隻蟹同海洋嘅主題。而今次我哋叫咗個二人set，就有得揀三款海鮮，我哋就叫左海蝦、藍青口同原隻魷魚，而醬汁都有幾種，我哋揀左lemon pepper。除咗海鮮之外，前菜叫咗個黑松露薯條，而主食呢就蟹肉蟹膏南瓜意大利燴飯。飲品方面，跟餐有兩杯house wine既。Shake shake袋送到黎，staff會幫你即刻處理同打開埋個袋，成個流程都真係幾新鮮由炮製到送到上枱面，一打開個袋個濃郁既醬汁香味就湧左出嚟，分量黎講兩個人都足夠，相反嗌原隻魷魚嘅就要注意個意思得一舊架姐，而海蝦非常之鮮甜大隻，青口都比足唔係得個殼，個檸檬胡椒醬汁都幾夾，如果食得辣嘅可以試吓佢哋個主打mr.crab醬汁，見都幾多人嗌。至於個黑松露薯條份量係多嘅，薯條就係粗扁個種，味道正正常常，重點個醬都夠濃郁。主食燴飯都唔錯，蟹肉蟹膏南瓜醬汁包住每一粒飯，大量配料同蟹肉個啲混係入面，層次豐富。而我哋叫咗個兩杯house wine，一杯紅酒一杯白酒，個人覺得白酒係夾海鮮多啲既，清清地又唔會太哽，總括嚟講，一大班朋友嚟食應該更開心，食到更多款唔同既新鮮海鮮！…查看更多

今日同朋友去咗荔枝角一間人氣餐廳，雖然個位置唔算好方便，位於工廠樓上單位，不過交通都方便，附近就有d2 place，食之前仲可以喺附近行吓街。我同男朋友一坐低就有歐食麵包上枱，佢仲會俾埋橄欖油同黑醋，你鍾意點配搭都得，之後就上個前菜duck salad，裏面有紅菜頭配鴨胸沙律，感覺清新好開胃之後就有個小食Chorizo sausage ，佢既西班牙香腸唔算好辣，配埋個豬脆粒，口感好豐富到主食方面，就有個烤南瓜北非小米配法式燒鴨胸同檸檬牛油汁配自家製意式菠菜雲吞～前者真係好值得一提，但duck breast完全唔老，好嫩滑而且調味一流，加上個烤南瓜一甜一鹹既配合，令我地不知不覺間都食晒一大舊duck breast!!唔會覺得肥膩，而個Ravioli都好有店家特色，filling好足料當然唔少得個飯後甜品，一個係佢嘅檸檬撻，而另一個就係tiramisu,兩個都唔錯，不過我個人喜好就係比較喜歡Tiramisu，creamy得黎又唔會過分soft!正！整體來講啲嘢食都食得好飽，而且環境好舒服，好適合情侶或者係好耐冇見嘅朋友坐得舒舒服服咁聚餐！…查看更多

呢間moo moo plus開左唔算好耐，不過佢既鵝肝漢堡就一直都係我既 list到,今日同朋友去銅鑼灣就終於都可以試試！去到發現個環境都幾好，好chill,好適合同朋友relax下員工仲俾咗個口罩cover 俾我地，好貼心我地兩個女仔就叫左個招牌銅鑼堡同一個pasta share,先講下個銅鑼堡，裡面既配料有鵝肝，安格斯牛肉，芝士，蕃茄，生菜同佢獨家既moomoo汁，口感黎講都好豐富，雖然鵝肝俾人既感覺係好重油脂，但佢加上d配料就中和左佢既味道，moo moo汁唔會太重口味,好乎合大眾既口味～而個pasta就叫左個黑松露卡邦尼意大利麵，松露味道唔算好突出，不過反而個Parma ham真係幾好食，佢煎到好脆身，超級薄脆可口，配上個意粉一流。飲品方面一杯叫左lemonade同cranberry juice,不過我地一致認同lemonade好飲d~哈哈…查看更多

好耐無去觀塘覓食，因為朋友係觀塘返工，佢話最近觀塘有個地方好似food court有好多唔同既餐廳進駐，好多都係小店，唔洗下下食連鎖店咁厭。最近我地揀左間叫pizza pan，見有人排隊又好多人叫佢外賣！一睇餐牌，d價錢都幾抵食，我地叫左個2人套餐，都只係150蚊左右，前菜有雞翼2隻加蒜蓉包2塊，主食方面就叫左個classic Italian pizza同松露醬帕爾瑪火腿意粉，另外加兩杯飲品！個雞翼都唔錯，好juicy~不過個蒜蓉包就不過不失，無咩特別！但個classic Italian pizza真係令我好喜出望外，佢裡面有齊芝士、香腸、菠菜同意式香草汁！雖然芝士好足但完全唔會油膩，而且個餅底係超級無敵，唔厚實而且無油好乾爽，真係比連鎖店正好多，重點係個價錢真係cp值勁高！至於個松露醬帕爾瑪火腿意粉，都好唔錯，有cafe ge水準，但相比之下個pizza真係好突出！大家真無要去試試，如果我住觀塘附近，應該會不停叫佢外賣…查看更多

今日嚟到觀塘一棟工廠大廈上面食日本菜，大概七八點左右已經開始坐滿晒，大家果然好落力幫襯黃小店，如果想食dinner建議都係online bk定先！睇吓個Menu呢度主要都係食丼飯、串燒同壽司卷。最尾兩個人叫咗個松葉蟹肉海膽甜蝦丼主食、吞拿魚腩海膽卷、天龍卷，而小食有牛舌、流心芝士漢堡扒同明太子醬玉子燒，叫少個丼飯兩個人就可以試多啲其他小食。首先係個甜蝦丼，可以見到上面嘅材料係堆得非常之滿，至於下面嘅松葉蟹肉係超多，係食到最尾一啖飯都仲有餸，而個海膽同甜蝦一啲都唔腥，幾新鮮，個人唔太好魚子但都有一大堆係面頭，咁樣價錢合理抵食。至於兩個卷個人就鍾意天龍卷多啲，三文魚腩嘅油份夾埋炸蝦同入面嘅青瓜絲，幾滿足。反而吞拿魚腩海膽卷飯個比例係飯多過料，同埋丼飯入面都有海膽，所以食落感覺中規中矩，唔太驚喜。另外牛舌都算厚，總共有四舊一串，燒得岩岩好唔韌唔難咬，都ok多汁，價錢40幾都合理，可以一試。而漢堡扒係好厚嘅，正常味道，但入邊流心芝士整得幾好幾正。最後就個玉子燒，上面嘅明太子醬燒得焦焦地非常香脆，入邊嘅蛋好有層次同味道濃郁，夾埋甜甜地唔錯！晚餐食日本菜嚟講價錢合理，丼飯同串燒比較岀色，值得推介！…查看更多

今日家母冇煮飯，唯有喺外面商場求其買個晚飯食下，見荃灣如心廣場呢度都有好多新餐廳開，而呢一間台式幸福食堂都幾人多排隊，決定試吓買佢嘅外賣先睇佢餐牌款式都唔少，除咗有佢嘅招牌嘅藥膳排骨同埋大家都比較熟悉嘅台式鹽酥雞飯之外，仲有好多小菜同配菜，我最後叫左個鳳梨蝦球餐。另外，就算食素嘅人都唔需要怕，可以試吓佢嘅三杯素菇豆腐！等咗大概五至10分鐘，我嘅外賣就整好咗啦，我嗱嗱臨攞返屋企試試先，佢配既前菜小食係涼拌黑木耳，味道都好fresh好開胃一開個鳳梨蝦球都幾香！不過賣相隻顏色就冇圖片顯示得咁colorful，我好欣賞佢嘅外套設計，佢係一個兜裏面仲有分夾住飯同埋主食，咁就唔怕啲汁同醬將會沐晒落啲飯到！呢個鳳梨蝦球都唔錯，而且份量好多！我諗都有成10件左右，而且size都吾細！不過好可惜係因為拎返屋企有段時間，所以外面層炸衣已經吾脆，都係prefer大家當食呢個，反而外賣可以選擇個招牌藥膳排骨，仲好養生！…查看更多

呢日同朋友去咗間喺荃新天地2期嘅素食餐廳，平時都甚少食素食，見朋友介紹到就試試佢餐廳位置比較遠因為二期多數都係餐廳唔係行街商場，應該食嘢先會過個頭，入到餐廳個環境係好闊落，顏色同佈置都幾舒服望下個餐牌啦果然係素食餐廳，好有心咁標左邊啲係有包含蛋或者牛奶，最後我哋揀咗個all day set，前菜揀咗紫薯紅菜頭雪球、涼拌杞子百合黑木耳、同埋麻醬沙薑豆絲粉皮三樣，湯就揀咗牛肝菌桃膠忌廉濃湯，煮食就揀咗菠菜合桃野菌忌廉燴意大利飯伴椒鹽天貝猴頭菇，甜品就係野什莓乳酪蛋糕，仲加咗$18一個香芒牛油果苜蓿手卷先尼個桃膠菌湯，桃膠整已經好麻煩，食上無乜味但似燕窩既口感，加上佢個菌非常之濃郁，值得一試而三個小食之中我就鍾意紫薯雪球多啲，因為雞絲皮個啲都係正常味，紫薯雪球仲有紅菜頭係入邊，味道唔錯，有得揀三種一定要揀呢個至於個燴飯嘅飯粒粒都好肥，好好咬，伴嘅椒鹽天貝猴頭菇係最好食嘅，又大粒有啲似食肉嘅感覺，但要留意分量一碟飯未必夠兩個人食加咗個芒果牛油果手卷，兩樣都大舊嘅，而第一次食苜蓿尼樣嘢，味道不過不失，最後食咗一個乳酪蛋糕，都係正常味道素食你講呢間餐廳算整得好食同吸引，加上款式都好多環境又舒服，可以再去！…查看更多

今日同朋友約食呢一家天天海南雞飯，大家聽落個名係咪以為好普通，好似一間小餐廳咁呢！其實絕對唔係咁簡單，佢係全世界唯一一間米芝蓮推介嘅南洋咖啡奶茶，係一間新加坡好出名嘅餐廳！我同朋友坐低發現環境比我想像中新潮好多，佢嘅裝飾係非常摩登，絕對唔會好求其，而且佢既餐盤餐具全部都好靚，絕對可以打卡！我地叫左必選既天天海南雞配上石窩雞飯，仲有小菜海膽豆腐，香茜蟶王。飲品方面我哋怕飲完咖啡瞓唔着，就叫左牛油果奶昔同蔗梨薏米茶！先講下個招牌菜天天海南雞，雞嘅肉質非常之嫩滑，比起我平時係出面食嘅任何雞更加嫩，而且雞皮好薄，雞嘅脂肪亦都唔多，食落去感覺上好健康，而且調味好好食，佢另外仲配上三種唔同嘅醬料俾你配搭，果然係間店嘅number 1!!!!個雞配上石窩雞飯，真係一啖接一啖！我油飯好香，令平時唔多鍾意食飯嘅我都忍唔落食左一大兜！至於個海膽豆腐同香茜蟶王都相當唔錯，海膽豆腐嘅海膽都好多，絕對唔會小氣！如果鍾意食芫荽嘅你就必定要嗌香茜蟶王，而且蟶王非常之爽口，好推薦大家飲品方面，牛油果奶昔都幾好，而蔗梨薏米茶係冇加糖嘅，非常健康好適合女士去飲，唯一唔好嘅就係裏面嘅材料真係食唔到，有點浪費！下次有機會一定要試佢嘅米芝連南洋咖啡！！…查看更多

今日同朋友去咗旺角呢一間添喜冰室食飯，位置都有少少難搵，附近食肆林立，平日都比較少經過，但見到餐牌選擇都幾多，所以決定入去一試！我朋友就叫咗一個鰻魚滑蛋飯同一杯熱朱古力，而我就住咗一個焗咖喱薯仔係豬扒飯配一杯凍奶茶！先講下個鰻魚滑蛋飯，價錢只係$60！估唔到呢個價錢有咁大塊嘅鰻魚，滑蛋亦都相當之綿滑，亦都有浸浸嘅牛油香氣，配上鰻魚汁一齊食真係好唔錯，唯一令到我覺得可以再加多少少就係鰻魚醬汁，如果唔係齋食白飯有啲單調！另外嗰個焗咖喱薯仔豬扒飯亦都相當唔錯，表面有一齊厚厚嘅芝士，而且豬扒嘅份量都相當多，好大塊，咖喱汁都幾惹味，配飯一流！唯一可以改善嘅我就覺得豬扒有少少老，如果焗少啲時間可能會更加出色！至於嗰兩杯嘢飲都吾會中伏，而我就比較建議大家可以試吓佢哋嘅凍奶茶，茶味出但又不失奶味，而且兩樣野溝埋糖度剛剛好，相當推薦大家！整體環境都坐得幾舒服而且價錢相當合理，大家下次經過旺角可以幫襯下！…查看更多

今日同fd係天后附近做野，夜晚唸住近近地天后搞點，上OpenRice 睇，見到附近有間越南餐廳評價好好，環境同食物都好似好精緻咁，於是就決定去拜訪下。本人十分喜愛越南菜，喜歡菜式雖然簡單偏清淡，但味道可以十分出色有層次，而且感覺好健康！！入到餐廳，餐廳既裝修好現代，充滿pop art 既色彩，感覺年輕又輕鬆我同fd兩人共點了三道菜加一個椰青飲品，等左一陣好快就上菜了，先係炸蝦餅湯河，炸蝦同湯河分開上，湯河大大碗比想像的分量多，炸蝦餅大大塊超好味！外脆內軟一d都唔油膩另一道菜軟殼蟹米紙卷亦都用上了真材實料，大大隻軟殼蟹，最鐘意米紙卷帶出的清新味道，清淡但又口感豐富，大愛！最後上枱既係咖喱雞排煲，唔好講笑，入面既雞肉真係超級無敵多，食極都有！咖喱汁都好多，記得要配白飯食呀，超級開胃，咖喱帶微辣，怕辣既人都完全無問題！雞肉又好嫩滑，淡淡肉！呢道菜最好兩個人share，因為真係會好飽，哈哈！餐廳質素遠遠高於預期，朋友都話係暫時食過最好食既越南餐廳，以後黎開天后一定要再捧場！…查看更多

今日天朗氣清，同屋企人行去荃灣愉景新城買嘢！行到夜晩，我地見到有一間環境氣氛都唔錯既扒房餐廳，所以決定係度食完飯先返屋企！入到去發覺佢裝修以懷舊為主，高貴簡約，四周有好多特色擺設作裝飾，感覺好舒服。欣賞完環境，我地就開始睇Menu叫嘢食，我地叫咗個芝士肉醬意粉，小食拼盤同埋美式什扒，首先個芝士肉醬意粉絕對係我目前為止食過最好食既意粉，個肉醬汁配上烤過芝士，食落非常開胃惹味，而且意粉又煮得剛剛好，軟硬度適中，勁有口感，而且配埋肉醬，簡直係人生一大享受！另外個美式什扒，大廚煎得火喉剛剛好，不論雞扒，牛扒肉質都又嫩又滑配上秘製既黑椒汁，入口即溶，而且塊豬朳又厚又大，絕對夠食！最後上嚟個係小食拼盤，入面有炸魷魚，薯格，天婦羅同雞中翼，款式多，任君選擇，尢其係佢地既炸蝦天婦羅，外層炸得金黃通透，食落酥脆可口，而且內有原隻大蝦，肉質鮮嫩，令人一試難忘，所以大家得閒記得要嚟試下啦！…查看更多

黎到呢條厚福街都出左名都多野食，而見上網評價都相當吾錯，決定一試呢間amitie kitchen！先睇下餐單，個精選晚市套餐都有好多選擇，我就叫左個烤燒大啡菇，焗釀北海道帶子，虎蝦意大利飯伴龍蝦汁，而我朋友就叫左一個紐西蘭肉眼扒，要5成熟既！落完單轉個頭就即刻有餐包，仲要都幾有誠意咁有成幾款俾你選擇，再可配上牛油又或者係果醬，任君選擇！之後無耐就有廚師是日餐湯，個日就係南瓜濃湯，南瓜味都幾重而且吾會好水，扺讚！另外個套餐中包埋沙律，個香煎紅鯛魚田園沙律伴青檸蜜糖油醋汁，個紅鯛魚剪得剛好，配上佢既醬汁令人好開胃，越食越fresh！朋友個紐西蘭肉眼扒份量都吾算少，肉眼扒新鮮吾會好難切，容易入口！再配上一大堆薯菜都幾飽，至於我最期待就係呢個虎蝦意大利飯伴龍蝦汁，果然冇令我失望！意大利飯粒粒分明，而且虎蝦好大一隻，肉質鮮美可口，另外個烤燒大啡菇超級juicy，焗釀北海道帶子都好新鮮好大一個，必食！…查看更多

成日經過荃灣都見到呢間幾多人食，於是今日就決定試吓佢先！睇吓個餐單，發現除咗佢嘅招牌通粉原來都有好多唔同嘅選擇！我哋揀都揀唔落手，最後我都係決定咗叫佢嘅招牌番茄濃湯通粉配牛乳炒蛋再配個瑞士雞髀，而我朋友就叫咗個吉列豬扒配蛋治沙律，另外我哋都叫咗個焗芝士西蘭花同埋個菠蘿油成日食！先講下佢嘅招牌番茄濃湯通粉先，番茄味極重，而且個湯汁好濃郁，絕對唔會好水！怪唔之得見到好多人都食緊佢嘅通粉！值得一讚嘅係佢嘅招牌瑞士雞髀，好大一個而且雞皮唔會好厚，雞肉好滑，每食一啖都係啖啖肉，我想個瑞士汁調味剛剛好，鹹甜適中，相信男女老幼都鍾意！而我朋友嗰個吉列豬扒配牛乳炒蛋冶及粟米什果沙律都幾好，感覺上這一個好豐盛嘅小食拼盤，兩個牛乳炒蛋冶嘅蛋都非常之厚實，材料十足，份量對一個男人黎講都唔細，再加上個吉列豬扒真係好滿足，而個豬扒亦都炸得剛剛好，唔會好老好硬！另外，個芝士焗西蘭花對我來講唔算好太特別，不過鍾意食芝士味嘅朋友一定好喜歡！反而，我就好鍾意食佢嘅菠蘿油，佢塊牛油雖然好厚，但係一啲都唔覺得好油膩，而且我同朋友都覺得佢塊牛油有少少檸檬清香味，食落去完全冇罪惡感！ 加上個菠蘿油嘅外皮香脆，裏面鬆軟唔使2秒我哋就K.O.左佢，大家記住如果要食嘅話一定要趁熱食啊！都真係幾推薦大家可以嚟食呢一間茶記，位置方便而且價錢同食物質素來講真係相當高質！cp值好高！…查看更多