Mr. Bone的個人專頁

第一次嚟。過海做完嘢，想搵個地方坐低睇書，諗起bookmark咗好耐的睡飽吃吃，上社交平台 check咗佢今日有開，營業時間係1300-1800，咁就嚟排隊喇~1258到達，有3個人喺店外排隊，佢地都係女仔、單拖。西西里島開心果巴斯克：$68/件，唔平，比我最鍾意的Yumo貴$5；由於睇咗食評，心知蛋糕細件，所以冇期望落差，而佢係細既；presentation係唔合格，其一係餐具唔講究，cafe提供餐叉而唔係蛋糕叉，而叉同碟又完全唔合乎比例，用佢拮蛋糕，唔方便之餘，真係2、3啖完食，失去享受甜品的儀式感；其二敗筆係隻碟崩咗一忽，唔優雅其次，整親就唔好啦；味道方面，蛋糕好食，但未到世一（hemma都唔係），蛋糕的堅果味濃郁，但層次較單一，口味的對比嚟自3個部分：蛋糕體、蛋糕面（焗燶的部分）同開心果醬：蛋糕面就住嚟焗，呈金黃色，未到接近燶的狀態，所以喺味道上冇造成好大對比，但對於唔鍾意焗燶的焦苦味的人嚟講，佢烤焗得非常討好，令一般人容易接受；開心果醬有令味道昇華，但食開開心果醬的人都知，就咁𢳂開心果醬出嚟食都一定滿足無比，所以，開心果醬好食係意料之內，冇大驚喜；最讚同最有記憶點係蛋糕體的質感，佢勁滑，食落味道有啲似豆腐，而堅果味亦非常濃郁！蛋糕體唔係流心，而係質感細緻、軟滑，有啲人食流心巴斯克時會驚佢中間唔熟，呢度的巴斯克就會係一個好選擇Latte：$40；睇咗唔知係咪由Foodie寫的食評，話睡飽吃吃難得係蛋糕好食、啡又好飲的cafe...令飲緊Latte的我懷疑人生，杯咖啡真係平平無奇~最近差唔多日日飲Latte ，近期飲過最好的係Parkside@Nina，呢度的Latte係有特別而討好的味道，但果個應該係鮮奶味而唔係咖啡味。整體嚟講，咖啡味唔突出，$40細細杯（~150ml），唔值，不過無辦法，入場必須點1杯飲品餐廳環境唔錯，檯與檯之間有距離，加上食客多數單拖，而cafe喺平日午後營業，嚟得的人都比較chill，所以坐落幾安靜。座椅係實木，唔算舒適。Cafe有2層，上層用餐區有梳化，但應該係俾幾個人一齊坐，位置開揚嚟呢度食嘢有幾點要特別留意：（1）店內冇廁所！唔知係咪嚟得不合時定cafe一向如是，以為cafe一定有廁所，而我亦搵到一道疑似通向洗手間的門，門外寫「staff only」，問店員洗手間位置，佢話：「廁所塞咗，你可以行番去西營盤站隔離XXX的廁所」聽到有被嚇一跳，由港鐵站口行過嚟要3-4分鐘，單拖點咗食物、俾埋錢，想去洗手間就要離開舖頭，來回6-8分鐘，呢點好難接受，如果食食下先人有三急咪好弊？；（2）Cafe只收現金：㩒定錢先好嚟；（3）蛋糕冇得外賣；跨區嚟到，本來想外賣幾件蛋糕俾屋企人試下（當時自己都未有得食），但店員話不設外賣，冇盒、冇紙袋，所以，如果真係想外帶，就要自備食物盒，不過，試食後，覺得冇外賣都唔可惜，雖然蛋糕唔差，但以入口的驚喜度嚟計，Yumo、Mr. Cheesecake甚至Liberty都高分啲。個人而言，睡飽吃吃同hemma的檔次差唔多，算係幾好食，但食一次就夠，而呢一次主要係湊熱鬧。我咁遲先嚟，最終只係刪走wish list的其中一項，試完過但搵唔到一個回訪的理由~…查看更多

呢間餐廳喺Ann Mamma Thai by 張秀玲隔離，食唔到張秀玲，就轉咗嚟呢度late lunch。周日嚟到，仍有午餐，大約$5x-6x，跟餐飲，另外可加錢點特價小食、甜品同特式飲品，都幾彈性同豐儉由人。張秀玲同樣有午餐，價錢貴~$20，不過都合理，始終假日。泰式香辣肉碎炒飯：午餐，$64；牆上有英文告示寫話如有特別要求，可用英文/泰文註明（電子落單系統有「備註」一欄）；備註咗「less spicy」，但啲食物的辣度依然有料到，狗狗爸爸食咗1-2啖話佢炒得幾惹味，但辣度令佢享受唔到，不過，當我哋撥走曬食物入面的小紅椒後，就好好多，唔辣，可以好好享受泰式鳯爪沙律：跟午餐+$15；口頭同侍應講話因為食素，想走鳯爪而多啲沙律菜，佢幫我同廚房溝通，而我亦同樣以英文備註；+$15預期細份，但上檯有驚喜，五顏綠色好吸引，份量亦唔算細；味道同樣辣勁十足，要撥走曬啲小紅椒；泰式沙律汁惹味、開胃，值得加配新鮮椰青：跟午餐+$28；正價係$4x，售價同一般泰式餐廳相若，但椰青size較細；上檯時，單憑外觀（呈啡色，較硬）已判斷到椰青唔算新鮮，放耐咗或者保存得唔夠好，同時椰青身仲有一條裂痕；嘗試打開個開口𢳂啲椰青肉食，點知蓋口甩咗出嚟，淨番果忽好難撬開，只好叫侍應攞番廚房開；由於唔新鮮，椰子水都少啲，但仲係好甜既，甩蓋令到有啲椰子殻碎屑跌咗入啲水度，飲得唔係好暢快整體嚟講，對呢餐都幾滿意：1）環境：餐廳幾有特色，設樓上雅坐，氣氛特別；1500午市last order，嚟到冇乜人，好似擁有一個私人空間咁；剛坐低時播住泰文歌，幾好feel，後尾可能侍應等落場，轉播張敬軒，有違和感2）服務：必須要讚樓上雅座的男侍應！當我哋入餐廳時，見樓下的高檯坐滿人（3-4個），所以上咗樓上用餐，埋單先發現樓下果啲人原來係員工，坐曬喺度等落場，唯獨樓上的侍應一直上上落落服務我哋同另一檯客，就算因額外要求而令佢行咗好多次，佢都keep住好有禮貌3）食物：聽到有泰文對話同睇埋個指示牌，相信廚房應該係由泰國人主理，辣度實在強勁，但同時口味應該正宗啲；整體食物質素唔差，只係個椰青唔ok4) 價錢：經濟實惠，埋單冇加一，$107題外話：原本想張秀玲（未食過）。1430去到，見食客陸續離開，有空位就入咗去。一個留及肩頭髮的男侍應叫我哋出餐廳外面等，然後，佢行出嚟，指住門口一個細指示牌「Closed」，話午市截單，同我哋講等晚市。雖然係我哋心急冇留意個牌仔，但佢態度麻麻，而且佢其實可以喺我哋入去果刻直接講既。最後，當然冇聽佢講等3-4個鐘，錯有錯著，其實呢間泰國餐廳氛圍仲好~…查看更多

每年都帶狗狗嚟2、3次，但會避開炎夏，試過夏天嚟，室外座位又熱又多蚊，搞唔掂。酷熱天氣警告下，同狗狗爸爸、狗狗到天空之城，驚見大飯糖開闢一個寵物友善用餐區，被膠簾圍封的一處餐廳外圍裝咗冷氣同風扇，馬上連餐牌都唔望就推住寵物車衝入去~呢個用餐區地方淺窄，擺咗2張2人檯同1張3-4人檯，有2部冷氣同幾部風扇同時開動，足夠降溫；牆上裝咗掛鈎固定狗帶，狗狗喺自己身邊活動，方便照顧...呢啲都係細心位。其他免費的寵物友善設施就冇喇，但自費的有寵物餐：雞肉(細)$25、(大)$35。All day 英式石斑魚薯條：套餐除主菜外，包自選前菜、配菜同甜品各1份，亦可補差價點飲品1杯(平日有2款免費飲品 - 冰茶，假日暫停供應）。預設的前菜、配菜、甜品唔使加錢，但要轉其他指定選目就要加錢，所以，原本$138的套餐，呢度加啲，果度加啲，埋單變咗$179，以呢個級數的餐廳嚟講，價錢偏貴。芒果金柚有機沙律：前菜，唔使加錢，份量細，2啖左右；食唔出沙律菜係咪有機，芒果、金柚好少；食材唔多但沙律醬汁多而鹹；唔好抱太大期望IMG:2]英式石斑魚薯條：狗狗爸爸的主菜；魚塊炸得幾脆，狗狗爸爸話食到魚味；魚同薯條份量唔算多，但配咗一大碟沙律醬煙肉流心蛋芝士飛碟：預設配菜係薯餅，改呢款飛碟+$6，值得，因為佢食材多啲、工序多啲同冇咁熱氣(主菜已經跟炸薯條)；飛碟放耐咗，麵包變得冇咁脆，流心蛋、半融芝士，都幾好食；煙肉望落似火腿法式焦糖燉蛋：+$10；呢度所有要加錢的項目水準8唔錯；甜品用Paul Lafayette同款的淺砵，份量同外面食到的差唔多；味道唔錯，由於套餐以定食形式上菜，哪怕焦糖係即時燒(唔確定)，食的時候已變咗液態焦糖，但佢都好食既；甜度頗高，冇Paul Lafayette的雲呢拿籽，但都有雲呢拿味，燉蛋亦滑西瓜沙冰：+$25；零擺盤，都大杯，算係真材實料，沙冰夠冰涼，可解暑；估計有加糖水，但西瓜味足整體嚟講，原本餐廳的性價比唔高(可取：毋須加一，食物以定食形式提供，款式較多)，餐廳的舒適度同服務普通，食物味道可以但冇乜驚喜，定價過高。不過，帶住狗狗的話，評價提升好多，因為喺香港實在太難搵到餐廳容讓狗狗涼冷氣，單係呢點都值得由ok跳至好評~狗狗食評🐕📝：食物🍽️：我食到爸爸、媽媽個餐入面的沙律(走醬)同少少麵包，另外，我都飲咗少少凍冰冰的西瓜沙冰，個餐唔大份，我只係分到少少，好在爸爸、媽媽都帶定少少零食俾我；佢地話雖然有寵物餐，但屋企成日整雞肉俾我食，唔好嘥錢~環境🌳🪑：迫迫地，我哋一家三口霸咗張大檯，呢個位大啲，勉強放得落我部的戰車；餐廳有冷氣幫我降溫寵物友善度💖：對我嚟講，有得同爸爸、媽媽一齊食嘢已經好滿足，美中不足係店員冇主動俾水我哋，我哋呢啲小動物天時暑熱過到嚟都好口渴架嘛…查看更多

收藏好耐，趁平日放假，終於可以試下。經Openrice訂位，1330到達。餐廳外觀唔錯，建築物係玻璃幕牆，但室內感覺侷束，冇自然光，燈光略為昏黃，座位排得密，離廁所近，檯椅亦好普通，以呢個價位嚟講，用餐環境麻麻。幸好廁所乾淨企理，只係水籠頭感應後，出水時間短兼水量少，洗手要有耐性。睇咗Openrice的餐牌先訂位，但嚟到係另一回事（可能近日轉咗餐牌？）平日午餐只有1款：1個小食+1款Dosa+飲品，$178，須加一。如果想食其他印度烤餅/飯，只可單點。Samomsa chaat：聽完侍應簡單講解做法後，由3款小食中揀咗呢款；菜式係將samosa打碎後再以乳酪同其他香科調味，製成品的面層灑上脆脆同石榴籽；賣相吸引，份量唔細；味道有層次，微酸帶少少甜、辣，口感上有乳酪的順滑、薯仔的腍、samosa炸皮的脆；推介！Dosa：餐牌上有5-6款dosa，呢款單點價格最高，可能因為食材種類較多，有牛油果、羊奶芝士、火箭菜同風乾蕃茄，喺營養上平衡啲；dosa唔算大，打開見到饀料所用的食材幾新鮮；風乾蕃茄唔似出面買到的咁鹹，羊奶芝士唔膻，牛油果熟度剛好，火箭菜新鮮，整體味道清新！不過，dosa放耐就唔脆（尤其加咗餡料），要快啲食Coconut chutney：好重椰香味的醬，味道清新，好食，量少，食落唔「漏」Soup aloo sabzi：印式薯仔蔬菜湯，用料豐富，惹味帶辣勁；問侍應係咪可以添加，佢有拎多一小碗俾我Flat white：套餐包咖啡、茶/印度奶茶，咖啡可揀奶啡，唔使補錢。以為大多顧客會點印度奶茶，但發覺望落似熟客的人都係點咖啡；咖啡幾大杯，飲到咖啡豆的烘焙味；以cafe角度評價，略嫌拉花有進步空間，若以印度餐廳角度睇，咁佢的咖啡水準唔錯，侌人滿意整體嚟講：環境：苛刻啲講，以呢個價位嚟講，餐廳佈置一般，檯椅平凡而櫈腳亦唔係特別乾淨；最大問题係侷束，冇空間感，隔離檯講嘢聽得一清二楚，廁所近在咫尺服務：侍應唔熱情但勝在有問必答，經常斟水，見我對印度菜冇乜認識，就主動遞上有食物照片的餐牌俾我參考食物：賣相還可，味道非常適合香港人的口味，惹味而辣度溫和，但未去到被吹捧的高水平，只屬於唔錯的級別，而喺度飲到有cafe質素的奶啡都有啲驚喜；性價比低，平日午餐連加一接近$200，呢個價位可以搵到啲包semi buffet/甜品的午餐，而環境佈局又好啲的餐廳；bookmark咗的話，唔嚟未必會死心，但試完就冇誘因回訪，除非當佢cafe咁嚟飲杯咖啡，咁都ok~…查看更多

之前嚟Café&Meal MUJI都係飲咖啡、食甜品，未試過食正餐，主因係覺得佢份量細、唔抵食。今次朋友提議嚟呢度晚餐，先有機會坐低正式用餐。點咗三品素食料理套餐，$88，自選2款冷盤、1款熱盤，再選配16穀飯 / 白飯/ 麵包 /鹽麴烤蔬菜。揀咗鹽麴烤蔬菜(小份)，額外+$25點多1客大份。芝麻醬拌菠菜冬菇：冷盤；做法非常簡單，完全可自家複製，味淡，無特色；菠菜自身唔夠鮮味，喺缺乏醬汁助力下，食落好寡，唔推介羅馬蕃茄配柚子檸檬汁：冷盤；用小玻璃碗裝，視覺、味覺透心涼；呢個蕃茄品種多汁但茄味淡，幸好有酸甜柚子檸檬汁，建議將蕃茄整細件再撈汁食昆布味噌節瓜：熱盤，但上菜時只係微暖；1小件節瓜，面鋪有本菇、杞子；以味噌及昆布調製的醬汁濃稠、鮮味，豐富咗整體味道的層次鹽麴烤蔬菜：主菜；比冷、熱盤更出色；配料多，有雙色椰菜花、絲瓜、豆角、雞樅菌等；烤過的配菜有咬口，鹽麴提升蔬菜同菇菌的味道，帶鹹香；由於額外多購1客大份，所以好㩒食無糖豆漿：正常三品配麵豉湯，落單時店員表示麵豉湯有鰹魚成分，改為冷/熱豆漿，無形中由湯品變飲品，更合胃口；豆漿無糖，健康、有黃豆味，好飲整體嚟講，環境一般，檯椅排列稍逼，附近有幾檯家庭用餐，有大人、有細路，如果想喺一個清靜的環境用餐就唔太適合，勝在唔限時；價格：食物份量極細，如涼拌菠菜只得2啖，唔夠食，只係食物睇落豐富、精緻，性價比一般，另有好處係自助免加一（朋友黯點正常三品，有肉、海鮮，就覺得夠飽）品；服務：店員會上餐，而斟水要自助，食完曬亦冇人主動執檯（可能因為冇限時，冇翻檯壓力）。試完Muji的正餐冇失望，但唔會主動再嚟，因為細份唔抵食，不過佢的菜式的確清淡、健康，以外食嚟講，係一大賣點。…查看更多

早1日訂位，平日夜晚嚟到，設90分鐘用餐時間。餐廳似逆市奇葩，平日仍持續有人排隊，不過幸好餐廳夠大，最後，我同朋友都可以坐耐啲。餐牌上的主菜/飯/意粉都跟餐飲，但飲品選擇少，只有冷/熱檸蜜、咖啡或黑糖薑茶，其他飲品及餐湯可-$8，各式甜品則+$30。以湯、飯/意粉、特飲同甜品咁計，連加一~$250/位。另外，仲可以+$30選配小食。牛肝菌湯：上菜時以茶壼裝住，由侍應席前倒入一隻放咗2小瓣牛肝菌的闊口茶杯；份量唔少；湯色飽和度高，入口亦濃稠，雖然頂多只係以蘑菇製成，但味道唔錯，鹹味適中龍蝦海鮮濃湯：上菜時冇牛肝菌湯的花臣；湯入面有海鮮料，如蜆；朋友話味道可以但冇乜特別羽衣甘藍藜麥雜菜沙律：+$30換的小食，份量竟然有啲睇頭，唔孤寒；配酸甜柚子蜜，開胃焦糖蕃薯條：+$30換的小食，份量大，滿滿的一桶；蕃薯條色澤金黃，入口香脆，表面淋咗蜜糖（但冇焦香），香口、好食，不過，餐廳竟然跟埋個蕃茄醬，配搭非常古怪荳子超級食物沙律：唔平，冇跟餐飲，唔抵食；顧名思義，食材係人所共知的各款超級食物，純素；沙律菜幾新鮮，牛油果略熟，味道尚算軟滑但已呈輕微瘀黑，藜麥、穀物的份量唔多，feta cheese正常，青蘋果、腰果只係點綴；全碟最好食係紫洋蔥，生食、好甜；沙律唔細份，但食飽就講唔上（飽肚的殼類太少）美式手打牛肉漢堡：幾個朋友share嚟；$170+只係咁真係幾令人失望；朋友冇話唔好食，我就試咗薯蓉同沙律菜，正常；個漢堡包好細，配菜佔咗隻碟的3/5，性價比低西班牙海鮮飯：同樣係朋友食，賣相可以，但飯量少，雖然如此，朋友都食剩1/4，話唔算好食千島醬海鮮薄餅：以為餐廳賣麵包，pizza應該好耍家，但當見到係厚批時真係好失望（個人喜好問題）；薄餅的用料唔多，賣相麻麻，蘑菇片明顯係罐頭直出再放上餅面，焗製亦唔到位，焗完啲蘑菇仲帶濕，而且颜色蒼白，不過，薄餅單價唔高，如果想點樣嘢食飽個肚，可考慮Tiramisu：同朋友點咗4款甜品，呢款最好食；朋友本身唔想點，話太細杯，的確係，幾個人分，每人1匙；質感軟滑，有酒香特濃開心果杏仁蛋糕：喺餐廳門口見到凍櫃display，朋友已經話必食；送到上檯，覺得佢勁迷你；味道方面，1個字：伏！蛋糕唔好食，冇開心果味，開心果碎「淋」曬；未食過咁差的開心果甜品美式特濃朱古力軟心蛋糕：大件夾抵食，尺寸大到嚇一跳，1-2個人唔太建議點，3-4人就好適合；有香濃朱古力味（未到「特濃」），朱古力忌廉同朱古力海棉蛋糕層層相夾，食完會「漏」但滿足到想食甜品的慾望卷。奧樂蜜C蜜糖檸檬：擺盤有心思，蜜糖伴碟，味道香甜；卷蛋入面的檸檬味忌廉同檸檬果凍令層次豐富咗，同時亦中和到蜜糖的甜味，值得一試f熱鮮奶拿鐵：好飲，雖然一杯的份量唔多，但咖啡味香濃亦有奶香（加$3轉十字鮮奶），不過，呢啲都關乎咖啡師的手勢，因為喺Beans將軍澳分店都飲過淡而無味的咖啡食完就明點解餐廳可以逆市吸客：（1）環境：枱與枱之間有啲距離，座位舒適，餐廳溫度適中，坐得舒服；（2）服務：侍應的服務態度非常好，有求必應、冇甩漏，部分侍應好年輕，態度亦好，動作勤快，每次飲完水時，侍應會主動斟水，亦好頻繁地清碟；（3）食物：但凡加錢的食物、飲品水準唔錯，份量唔細，哪怕只係小食，賣相都令人impressed，不過，主菜係有啲「搶錢」。如果2個人嚟，不妨點1個餐，然後加餐湯、小食、甜品，轉特飲，再單點多1杯飲品同甜品，計落~$160/位，性價比高啲。…查看更多

以前（當時連小洪賓都未聽過）去開將軍澳分店，果邊設計、空間感一流，食物水準唔錯，性價比高。當時，午餐包湯/沙律，餐飲可選奶啡，有造型、大大杯，食完飽足又滿足。今日放假，為求新鮮感，就去咗尖沙咀分店。5月份午餐由$98起，只得主菜+餐飲，小食/甜品可額外加錢。意大利憤怒大通粉配意瓜：$108；午市餐牌上有幾款素食選擇，呢個睇落最純粹（冇芝士），適合素食人士；上檯時，通粉冒煙，非常熱，絕對唔能夠即時擺入口。由人手落單到上菜，極速完成：落單後1-2分鐘有飲品，~5分鐘有埋主菜，估計好大機會係預製+微波爐翻熱，一諗到可能係咁就相當失望。味道方面，茄醬的味道非常好，餐牌寫係「（漚（熬）煮3個鐘蕃茄汁，辛辣）」，佢的質地濃稠，適合用嚟掛汁，辣度夠，味道濃郁，相當惹味；散筆的係大通粉，煮/翻熱過籠，幾乎每粒都未篤已散或一叉即散，莫講話al dente，佢的水準甚至比普通西餐的出品更低，嘥咗個茄醬；意大利青瓜切到好細粒，水份重，冇乜味，只係點綴Latte：檯上有牌仔寫「餐飲咖啡可免費升級意大利Caffe Carraro coffee」，落單時，侍應反轉牌仔話是日咖啡係左面的「Honduras」，呢個時候睇見幅圖，先知原來Caffe Carraro coffee係膠囊咖啡，唔係咖啡豆，有少少失望，但都點咗latte試下；咖啡嚟到，細杯，冇拉花，顏色係淺米色，咖啡味唔重，似飲緊帶薄弱咖啡味的牛奶Tiramisu：望落大杯過latte；質地可以，𢳂落層次分明，手指餅冇浸到淋曬，甜度啱香港人，亦食到有些少酒味，不過，甜品的味道好單薄/單調，冇層次，當食到酒同cream cheese的味道時，哪怕唔係食家都食得出食材質素較低，只有表面的味道，唔會想追住食整體用餐經驗：呢度無論上菜速度、味道同服務都猶如快餐，飲品落單冇耐就送上，令餐廳免卻斟茶遞水；食物應該係翻熱食品，pasta肢離破碎，咖啡稀，tiramisu味道單一，以上總總都令人幾失望。講番呢次的特別體驗。當食物送上時，因為太燙口，只好慢慢食，等佢放涼。望望下突然發現點解冇意大利青瓜既？仔細睇，係成碟都冇。問侍應，佢同另一位職員（應該負責廚房）聯繫後，話落漏咗，幫我重新整過。新上果碟多咗意瓜粒，食物同樣燙口。再隔一陣，侍應送上tiramisu，話因為落漏材料而請我食。原本因為餐廳的食物質素，我同個菜名一樣都幾「憤怒」，不過，侍應同職員好有禮，加上免費甜品，點都緩和咗負面情緒。呢間餐廳最好的地方係（1）環境；（2）職員的態度（服務一般，主要因為得1個侍應睇曬成個場）；至於食物，光顧前要做定期望管理。最近睇過小洪賓的片。當遇到劣食時，小洪賓會爆粗，而佢亦曾經以意大利人身分，評價香港的意大利菜。與其周圍覓食，小洪賓不妨先踩場試下自己名下的分店，用食客的角度，發掘餐廳更多可以進步的空間！…查看更多

少入西貢，入嚟lunch前睇過Openrice食評，但冇邊間餐廳想試，因為有供應素食的多數係cafe，除咗貴（如Little Cove Espresso)，仲好悶添~同朋友邊行邊搵，見到呢間餐廳喺店外棟咗個素食餐牌，亦有提供午市套餐。喺多個午餐選項入面，有「印度香料烤雞卷」，下面有行字話可改為「炸鷹咀豆餅鷹咀豆蓉卷」，所以直接點咗呢個餐，唔使單點素食。是日餐湯：午餐可揀湯或沙律，沙律寫明有肉；是日之選係西蘭花湯，跟湯有一小塊法式蒜蓉多士；湯有少少稠，但唔係忌廉果種厚重質地，飲落唔漏，份量適中，味道清清地亦有少少飽肚感；西蘭花的份量應該唔多，湯只呈淡綠色，飲落亦冇乜西蘭花味炸鷹咀豆餅鷹咀豆蓉卷配沙律、薯條：上檯時，已覺得好大份、足料；鷹咀豆餅/蓉有起沙的口感，好鍾意；調味唔重手，恰到好處，食得好舒服；份量大，可以2個人share再額外點多1個前菜/甜品，應該已經夠飽同滿足，健康美味；沙律新鮮，應該加咗檸檬黑醋汁，清新；幼身薯條，上檯時唔熱，味道正常；因為個卷，我會俾呢個餐5粒星，係日日食都唔會厭的食物烤雞配沙律、薯條：朋友的午餐；半隻烤雞，有肉汁，亦有少量醬汁；朋友食曬，味道應該唔錯凍黑咖啡：凍飲毋須加錢，味道正常餐廳環境幾好，每檯有花點綴，座位舒適，檯與檯之間距離闊落，適合傾計。剛入餐廳時都擔心中伏，因為1300去到，附近的餐廳已坐滿人，唯獨呢度無論室內、室外亦冇客，點知原來佢的食物水準幾高！餐牌上的食物選項乜都有啲，有啲「立立雜雜」，定位唔係太清晰，可能算係多國菜？坐到1330，開始多咗啲客，而侍應端出嚟的食物亦好香、好大份、好吸引，見有食客帶狗狗坐室外，佢點咗個沙律，份沙律滿滿一盤，主人同狗狗可以分享，令我都想計劃一下同狗狗一齊嚟。侍應的服務可以，唔係好殷勤，但加水、執檯好爽手，上菜亦幾快。我同朋友喺餐廳留咗1.5小時，可慢慢享用食物之餘，又能夠靜靜哋傾下計。…查看更多

上次同狗狗嚟係年半前，午餐喺選擇同價錢上冇乜變，$88-118，唔使加一，跟冷飲/熱飲/特飲。狗狗爸爸依舊揀咗自家製和牛漢堡包，售價維持$108。自家製和牛漢堡包：漢堡包分半上，易進食；上次啲生洋蔥好嗆，今次就非常香甜，醃酸瓜唔會死鹹同太酸；麵包、和牛漢堡偏細；狗狗爸爸話漢堡切落唔juicy，但入口有肉汁，味道幾好；薯條可能放耐咗，唔太香脆；沙律菜正常，配上類似泰式醬，味帶酸，開胃香辣蒜片欖油蜆肉扁意粉：$95；係最接近素食的午餐；擺盤有待改善，意粉好似亂放咁；份量略細；侍應喺落單時提醒話有少少辣，個人而言，意粉落咗好多小辣椒，都幾辣；蒜片較大瓣，蒜味未出得曬；橄欖油唔太香；不過，意粉足料，有>30粒蜆肉凍檸茶、凍咖啡：跟餐凍飲唔使加錢，同茶餐廳一樣沖好送上，想糖、奶另上要講聲；凍咖啡的咖啡味幾香，但甜咗啲同狗狗嚟只能坐室外，夏天嚟都幾悶熱，餐廳有冷風機但冇開嚟，只得一把細牛角扇，不過，侍應願意將風扇放低啲，狗狗俾啲時間總算可以降溫。服務幾好，有2位侍應，一男一女，佢哋對寵物好友善，亦幾健談。餐廳的洗手間乾淨、企理。狗狗食評🐕📝：食物🍽️：我喺餐廳係食爸爸、媽媽餐點入面啲蔬菜，選擇唔多環境🌳🪑：室外空間唔算大，我冇得落地，全程坐寵物車；呢度有啲熱，餐廳將牛角扇擺近我的水平，另外，有水可refill，我飲咗好多水降溫，啲水仲有檸檬味添寵物友善度💖：餐廳冇註明pet-friendly，但侍應哥哥、姐姐對我好親切，侍應哥哥養過同我同品種的狗狗，有多啲話題…查看更多

復活節最後一日公假同狗狗出外，天熱當然想搵間可以俾狗狗坐低嘆冷氣的餐廳，於是揀咗呢度。靚位係近門口、有落地玻璃窗的幾張檯，而帶寵物就冇得坐，會被安排坐餐廳最入的檯。除送餐外，其他都係自助，免加一。南蠻炸雞定食：$105；包2款前菜（泡菜、玉子燒）、麵豉湯、5-6件炸雞、紫菜白飯同生果（蜜瓜）；除炸雞外，其他項目較的骰，但食曬絕對夠飽；狗狗爸爸讚炸雞有肉汁，配沙律醬、洋蔥絲幾好味；白飯正常，紫菜似韓式即食紫菜，略鹹；泡菜的鹹、辣度適中，微甜，好食；麵豉湯可能係即沖，入面有少量海帶同腐皮絲，2-3啖飲完，唔鹹，幾好味；玉子燒冇好香蛋味或好嫰，但不過不失；蜜瓜唔夠熟、甜度低，因為一小件上，冇去皮、切粒，喺唔夠熟的情況下自己切有啲呢hea；整體上，呢個餐的水準唔低，唯一缺點係要等，由落單俾錢到上菜，等咗>45分鐘，肚餓要三思鯛魚刺身紫蘇汁冷闊條麵：$120；對比南蠻炸雞定食，呢個餐的款式變化少，只有3個項目：標配麵豉湯、蔬菜天婦羅同鯛魚冷麵；份量一般，飽足感因人而異；蔬菜天婦羅有2款（蕃薯、淮山？），各2件，非常迷你，炸得唔夠香脆，上餐時已經淋咗，蕃薯唔甜，另外果款爽脆、好食啲；鯛魚刺身經火炙，有6-7片；冷麵的擺盤好清新，鯛魚上放有一小束紫色食用花，幾有心思；紫蘇汁味道清爽，酸梅味非常適合夏日，開胃；闊條麵份量少，唔知係咪fettuccine？麵條煮得啱啱好，軟硬度適中，口感唔錯，麵本身冇味，要靠紫蘇汁帶起味道；雖然幾好食，但考慮到份量小，覺得呢個餐偏貴餐廳的木系設計感覺小確幸，地方寛敝，冷氣溫度啱啱好，清爽又唔會太大風、太凍，坐得好舒服；座位基本上係任坐（雖然滿座），好似我哋2人1狗可以坐1張4-6人圓檯，好適合帶寵物而一抽二掕的主人。上餐需時，第1個餐等咗30分鐘，之後等多>15分鐘先送上第2個餐，好難等埋一齊開餐。狗狗食評🐕📝：食物🍽️：因為市集有出售寵物食品，所以我點都有盒狗狗壽司食，不過，餐廳亦有啱我的食物，媽媽點的鯛魚刺身調味少，火炙過，佢俾咗我食，仲有闊條麵同冷麵入面的青瓜片、車厘茄，去汁後我都食得；而爸爸個餐有唔算甜的蜜瓜，啱曬我環境🌳🪑：我可以坐入餐廳，有冷氣，仲可坐上有軟座墊的木櫈，全程唔使落地等食，最緊要係可以坐近爸爸、媽媽同張檯寵物友善度💖：餐廳係pet-friendly，不過侍應哥哥、姐姐可能忙，只係送餐先見到；餐廳有寵物餐盤、消毒噴霧，都幾關顧我哋的需要…查看更多

知道佢由細舖搬大舖、純外賣變可以堂食，今次終於有機會試下，可惜係今次用餐體驗麻麻。兩個人先喺店外排隊排咗~45分鐘，入餐廳坐低同落單後，又要再等食物逐一送上。兩個人點5個項目，由輪候到離開前後用咗2個小時，當中最唔花時間係食，因食物份量唔多，食材配搭唔豐富，進食時間可以好短。餐湯：跟主菜+$20；細碗；飲落係堅果加上湯的味道，味濃，而堅果（醬）只起點綴作用；湯的味道唔錯，但唔算清新煎雞扒蒜蓉意粉配杏仁甜椒醬：主菜$78；份量唔多；雞扒望落大件但偏薄，狗狗爸爸話雞肉仍嫩滑；意粉的軟硬度適合香港人，唔係al dente但都唔會過腍；醬汁類似印度咖哩，少辣，冇乜特別；比較差係沙律，蔬菜唔新鮮，部分菜葉好岩巉，剩低用嚟上碟的亦冇生氣，量少，而以沙律菜配搭意粉感覺有啲奇怪榛子青醬鷹嘴豆沙律配燒菠蘿：主菜$78；味道方面，佢唔係唔好食，但考慮到食材配搭、用料同份量，性價比唔高；燒菠蘿係2圈菠蘿片，切成4件，烤過，保持到水份，帶酸甜味；鷹嘴豆量多，味道正常；沙律菜同樣都係唔新鮮，了無生氣；當你點沙律而獲得呢一丁點唔新鮮的沙律，真係好失望；青醬過鹹，味道有少少霸道，遮咗榛子的果仁香，亦掩蓋食材的原味開心腰果露：跟主菜+$30；同餐湯一樣細碗；如單點係呢個size，咁就真係好唔抵，而家只係+$30，都覺得唔太值得試；飲落係飲到少少開心果味，但味淡，最突出只係甜度，估計主要成分係腰果；可能人人口味唔同，呢個甜品雖然夠甜（甚至略甜），但應該滿足唔到開心果迷花生醬素窩夫：單點$48；2塊三角形窩夫，窩夫的凹位填咗花生醬，伴碟有一小pat 純素忌廉同埋少量用作點綴的水果，配椰糖醬；呢個甜品最好的地方係唔甜，但花生醬的堅果味淡薄；以前當舖頭開喺石硤尾時買過佢的花生醬，當時已覺花生醬遜色，呢樣可能同原材料或烤焗方式有關；今次再試花生醬，感覺一樣，味道似係由花生粉開出嚟咁，淡而無味今次想一次過試勻舖頭的食物，因為唔想排隊食第二次。覺得呢度的食物定價偏高，質素去唔到一個令人滿意的水平，無論係湯、主菜以致甜品都只係不過不失。有兩樣嘢想提：（1）喺店外排隊時，後面有兩位食客，佢哋等到唔耐煩，其中1個就話：「IG係咁宣傳，但又唔請多個人，根本就做唔切」，雖然唔知平日嚟係咪都要等咁耐，但就算唔使排隊，以呢個價位，喺土瓜灣都有更多選擇；（2）附近有檯客，女的點咗窩夫，食咗幾啖便同男士耳語，然後見男士用叉篤起其中一小件，反去後面睇...原來因為燶底，所以女士冇再食而pass咗俾個男士清碟，見到咁，覺得食物質素一般~…查看更多

餐廳主打菇菌+雞鍋，喺香港算幾特別。佢的野菌雞鍋較出名，而素食者就可以單點素鍋。餐廳平日有午市優惠，喺Openrice可以平少少買到3款套餐（肉/海鮮），而單點食物就有88折（唔適用於鍋底）。午市冇加一而且供應時間長（1230-1600），2小時用餐時間，冇客就可以繼續坐，計落午餐比晚餐抵食好多。同朋友即場買咗1張套餐券，再單點野生菌養生鍋、刺身金耳菌、芥辣紅乳菌同板藍根青菜。2個人有2個鍋，1大1細，加上可以到自助區拎醃菜同生果（各2款），好夠食。鹽醃海帶莖：自助前菜；似韓式醃菜，唔辣，味道略鹹，海帶莖滑身帶𡁻口，好食醃蘿蔔：自助前菜；蘿蔔爽脆，有辣勁，開胃刺身金耳菌：$68；幾乎個個寫評價的人都點，聽落好似幾特別；賣相先聲奪人，冰鎮，青檸片同金耳菌間隔排列，旁邊放切半的小青桔，應該係俾客人唧啲青桔汁配搭享用，亦有日式醬油同wasabi；主角係金耳菌，佢的質地同味道激似蒟蒻，雖然適合扮魚生，但本身冇味，唔點醬油同wasabi就味如嚼臘；試過以青桔汁拌食，味道好酸、好怪；建議大家唔好點呢個前菜芥辣紅乳菌：$58；呢個前菜/小食同樣係食質感，但佢特別啲；上檯時，第一個反應係：「做乜俾碟未熟的豬膶我？」無論颜色同質感，佢都好似生豬膶，瘀紅色又滑潺潺，朋友試咗少少經已投降，接受唔到呢個紅乳菌的口感，而我就覺得佢好特別，撈咗芥辣好惹味；值得一試野生菌養生鍋：湯料足，有大量雜菌同竹笙，仲有紅棗，感覺滋補；用一個非遺墨脫石鍋上檯，個鍋份量十足，但已撞崩少少，而且鍋唔深，湯底份量有限；侍應提議未落火鍋料前先飲湯，湯幾清甜；湯底有油，唔確定佢係咪真•素食，可能同野生菌土雞湯底一樣，只係冇連雞件上~野生菌品質和牛套餐鍋B：$130；火鍋料豐富，有白菜、粟米、薯仔（心內美）、黑豆腐、冬瓜、安格斯保樂、牛肉丸、蝦子滑、土雞片，前菜/小食係鮮椒溏心皮蛋，連1大杯手打檸檬茶、靈魂口味碟，鍋就係單人小鍋野生菌土雞湯底；呢個1人餐的配料多，份量唔多，基本上係2-4小件，鮮椒溏心皮蛋就係1隻開3件；套餐賣相精緻，全部細碟上，感覺有啲排場；試咗蔬菜，唔係太特別，黑豆腐略嫌粗嚡，鮮椒溏心皮蛋油膩但入味；手打檸檬茶夠2個人飲，微甜；葷食人士可試下呢個套餐，食材樣樣有啲，淺嚐即止板藍根青菜：$48；朋友話必點，因為香港食唔到，而且爽脆、鮮甜；佢似細棵的嫩芥蘭，連菜花食，唔苦，爽口；但始終只係葉菜類，取價都幾離地生果：自助區供應西瓜、柑；西瓜清甜，keep住refill 蘸料：放咗已調配好的靈魂蘸料，因為唔覺得特別啱口味，所以冇試；拎咗生蒜、芫茜、蔥、芹菜，再加少少醋都好好食；蘸醬唔係必須，就咁喺個鍋撈上嚟，食物已經有鮮味環境方面，餐廳佈置典雅，坐得幾舒服。負責我果邊用餐區的侍應都幾熱情、健談，但就漏單，單人餐的鍋底等極都未有（套餐的配料已送上），前後問咗2次，最後先由一位上菜員送上雞鍋連爐具。個爐似露營用果種，餐廳又有啲出風位，所以侍應要花時間調整爐的擺放位置，其後發現鍋底一直滾唔起，原來冇gas，於是又要換gas~食物同價錢方面，性價比一般，用餐後直至第2日，都覺得口乾同出現輕微身體不適反應（我對味精敏感），估計同啲鹹/辣前菜有關，食咗唔係太舒服整體嚟講，呢間餐廳值得一試，第1次嚟會覺得用餐體驗美好，但建議lunch嚟，消費較低。記憶點唔多，主要係食環境同體驗。佢啲菇係多，但餐牌只列出各種菌類而冇標價，加上全屬單點，冇拼盤，人少的話，就算佢菇多，都冇錢+胃納試多幾款。嚟多幾次可能就覺得不外如是~…查看更多

同朋友聚會，本來滿心期待，食完覺得不過爾爾，都幾失望。經openrice訂位，平日晚上嚟到，餐廳得3幾檯客，非常冷清，直至收爐，食客亦唔多。點咗4份晚餐，追加1個小食、2款甜品同埋所有人加錢轉飲品。雜菜湯：餐湯，細碗；足料，有雜菜同一小嚿薯仔；湯唔鹹，濃稠度適中，味道可以迷你牛角包：2啖食完；朋友話好食；睇落唔酥脆，拎上手亦冇跌啲酥皮落嚟，口感偏軟糯牛油果藜麥沙律配煙三文魚：份量少，用poke bowl的厚底木碗上菜，碗的深度不足，放唔到幾多食材；有3塊三文魚、半個中細形牛油果、少量沙律菜同藜麥；沙律菜唔新鮮，已出水，咬落欠爽脆；牛油果軟滑但味淡；醬汁係普通芝麻醬，重鹽，冇特別；沙律好快食完，唔係好飽鮮奶咖啡：跟餐+$18；賣相尚可但份量小，飲落冇特別巴斯克開心果芝士蛋糕：跟餐+$68；之前食過喺油麻地分店外賣的同款蛋糕，當時覺得開心果味濃，蛋糕亦提供到唔同層次的味道同口感，所以今次加點；蛋糕送上嚟時已感覺到佢好「削」，擺盤亦好普通；蛋糕雖然流心，但開心果味唔算突出，可能係開心果醬落得唔夠；件蛋糕咁「的骰」，原價$88，食完係完全唔明憑咩賣到咁貴？今次食，覺得同之前記憶中的味道差太遠，就算只係+$28，亦未必回購果仁意大利蛋糕：跟餐+$48；比巴斯克開心果芝士蛋糕大件得多（下圖2款蛋糕都係1/4件）；上碟方面，兩者不相伯仲，完全平平無奇，只係就咁將件蛋糕放喺甜品碟上，而餐廳供應的甜品匙亦好奇怪，似攪拌用的長柄匙羹；蛋糕甜味重，食落有啲漏，果仁已經「淋」曬朋友點咗唔同主菜的晚餐：明太子蟹肉蟹籽扁意粉、牛肝菌香煎帶子刺身扁意粉同香煎法式蘋果忌廉豬鞍配芝士椰菜仔。呢幾個晚餐份量頗大，3個主菜都食唔曬，尤其豬鞍，佢有粗薯條作為配菜，我哋本身又追加咗黑松露薯條（小食），所以食剩唔少。朋友加$18點咗抹茶鮮奶，比咖啡大杯之餘亦幾靚整體嚟講，餐廳地理位置好，近地鐵站，易搵；店內燈光昏黃，昏昏欲睡，座位偏硬，坐得唔算舒服，餐檯略矮，進餐時冇咁就手；侍應唔熱心，餐廳有2-3個樓面，照顧3幾檯客，人手唔緊張，但由坐低至埋單，侍應都冇主動俾杯水或斟水，最後，由於經常被我哋召喚加水（餐廳用迷你即棄紙杯，2啖就飲完），佢哋就直接放低一枝水俾我哋self serve，有次當我行出樓面自行加水時，侍應企喺隔離，見我準備斟，亦冇開聲話要幫手；結帳離開時，我要求收據，負責打單的2位店員即時話印唔到，我提議不如俾我影低部機的畫面（有菜式名稱同收費），然後，其中一個侍應拎出一卷新打印紙，換落部機度，印張單出嚟。原來唔係印唔到，只係臨收工（當時距離餐廳收舖有半個鐘，有食客仲食緊主菜），唔想煩。另外，餐廳好似收2200，但2100已last order。餐廳食客少，如果當嚟呢度消費係買個地方靜靜地坐下，咁係絕對ok，因為冇乜客，心理上當係租個地方幾個鐘；食物的質素只係一般大眾化coffee shop的水準，其實呢度的開心果甜品同飲品喺早前開心果熱潮下都有啲迴響，不過，唔知係咪心理影響，覺得之前外賣的蛋糕份量大啲，味道亦好啲。…查看更多

知道舖頭有推廣活動，喺最近1星期推出軟雪糕買1送1優惠，就趁推廣期的最後1日去食開心果軟雪糕。開心果軟雪糕：原價$32；賣相可愛；店員將雪糕注滿雪糕筒後再向上捲，所以，雖然望落只得3圈，但整體雪糕的份量唔少。雪糕有開心果的堅果味，質感非常幼滑！以前未試過呢間舖的任何產品，今次食到軟雪糕好驚喜：雪糕輕盈、味道像真、雪糕筒夠脆，軟雪糕唔易融，加上撞啱有優惠，性價比極高，無可挑剔！希望店舖密密推出優惠，有機會一定會再試。…查看更多

假日中午嚟食雪糕，有5-6個人排隊。好奇怪，周六有啲時間嚟，唔算多客，但有3個店員，而今次星期日中午嚟到，唔知其他店員係咪放飯，竟然得1個店員密密手收錢、掃電子印花、𢳂雪糕，睇見都辛苦。買最大球，杯裝，$32/3球，3款口味都係之前未試過，加上可儲電子印花，幾抵食。薄荷朱古力：清新，入口有薄荷味但又唔會涼到「辣喉」；雪糕入面有朱古力碎，食的時候係硬碎粒，入口慢慢嗒會融；本身唔鍾意薄荷朱古力，但呢個味道好啱口味藍莓：味道係會有啲假，似以前夾心餅、糖入面果種藍莓味，不過，感覺都唔算太人工、化學；雪糕入面有藍莓果肉，細細粒，似藍莓乾；以平價雪糕嚟講，都算有誠意提子冧酒：最想試呢款，狗狗爸爸一食就話有酒味，而我可能期望大，反而食唔到冧酒味，佢似牛奶雪糕（尤其融咗後），而雪糕的味道似乎嚟自提子乾的輕微發酵味；提子乾量多，大粒、飽滿，幾腍又保留少少𡁻口；整體嚟講，雪糕味道清新，適合夏日，但比另外2款甜些少今次杯雪糕份量幾大，3個巨球，裝滿隻杯。雪糕係冰凍、結實的狀實，唔會好快融。店員殷勤，雖然忙個不停，但見到我哋2個人買，都主動遞咗2隻木匙俾我哋，值得一讚！坊間都有啲超平雪糕，但我未有機會試到，手作之店係M記、7仔外，我接觸到的平價雪糕之一，再者從冇出現食咗腸胃不適的問題，所以會繼續幫襯，希望試曬佢所有的口味~…查看更多