lazyguy的個人專頁

某個網上平台買一送一中午自助餐，價錢吸引，而且個名～普慶餐廳，真係要嚟懷舊一下，𡃁仔年代周不時嚟普慶戲院睇戲。餐廳要落到去B2, 第一感環境唔錯，但後來發覺原來分佈嘅食物位置都幾「散下」，再者雖然好多物種選擇，但價錢真係反影到質素。食物較為「值錢」嘅只有麵包蟹同生蠔！剌身得三文魚，八爪魚同鯖魚，蒸魚係真係小見嘅「鯇魚」，而唔係常見嘅『班』。呢舊豬腩卷算最出色，皮脆肉嫩，反而則邊件牛肉，睇落半生熟好靚，但肉質唔掂～「韌」又無牛味，唔好食。雪糕算係另一樣值得食，其他甜品都可以接受。回頭度：3/10唯一可取係個價錢，但食物種類，味道，質素真係差一個級別，再者係填補食物嘅速度都慢，十二點開始，一點零，好多都無晒，無補充返，或者係補得慢。收碟又慢，一樣又係一點後，好似無晒伙記，真係唔知想點！？我今年食咗十幾次自助餐，未試過有咁嘅「待遇」。仲想講下，上面提過嘅平台，係唔會容許客人俾『負皮』，所以當大家選擇餐廳食飯時，要小心選擇平台參考！以上純粹個人食後分享，絶無收受任何利益或優惠，亦願意承擔所有責任。…查看更多

機場附近影日落相，影完順便過東薈城食晚飯，星期六間間都排晒隊，揀咗間淨係等一張枱嘅試～羅麥記。印象中，用得人名做公司名，一般都會有返咁上下質素同歷史，呢間嘢歷史我無興趣知，但質素就⋯⋯叫咗～秘製香辣雞煲伴大蝦鐵板燒汁芥末牛柳粒海南雞飯避風塘鮮魷(辣)芥末牛柳粒～牛柳大家都知道肯定「淋」過西冷等其他扒，但呢碟牛柳粒個咬口係「硬」，唔係『韌』！真係唔夠牙力都攪唔掂，另外「芥末」，頭幾啖係有新鮮感，但有一啖食落去，食正成啖芥末，霎時間辛苦到爆。辣雞煲伴大蝦～啲雞係有辣味，唔知係咪星期六好繁忙，啲雞肉同牛柳一樣，煮到過晒火，「柴」到離晒譜，啲蝦一樣求其炸到熟曬至起貨～乾到呢。避風塘鮮魷～我嘅認知用得避風塘呢三個字，必定係大量蒜片之類，同好野味，呢碟蒜粒小量，大量嘅係厚厚嘅炸漿，咁厚嘅漿食一舊就夠。反而都係海南雞最正常，但係我哋食左以上三味一半，要催單至上枱。最奇怪嘅事係D5餐牌打$128，手機落單$138，問過佢哋，佢哋話跟apps, 事彈啦，唔通我要同你拗！？二口子埋單$444回頭度：3/10咁嘅質素，真係唔怪之得啲人要北上消費，又一話香港人依家食嘢係無要求？求其平同飽就得？以上純粹個人食後分享，絶無收受任何利益同優惠，亦對以上言論,承擔所有責任。…查看更多

入嚟馬鞍山交收，女友推介行吓呢個商場，今次醒，食小小，可以分開試多一二開食肆，首先見到呢間～喜牛蘭州牛肉麵。十一點五十入場～包場，食嘢最驚係咁，真心怕有「伏」，叫咗～喜牛牛肉麵，三細（麵嘅粗度） 涼拌木耳 檸檬無骨鳳爪 鴨屎香檸檬茶先嚟二個小食～涼拌木耳，唔係一般有乜辣乜辣味，叫個係無味嘅，真係～涼～拌木耳（原味）。檸檬無骨鳳爪，呢個睇到都覺得味道會複雜啲，甜、小酸，唔辣，個味有啲特別，唔係平時我認知或者大家食開嘅味道～可以接受，但唔讀得上好好食。拉麵～一定係試啖湯先～失望，係有小小牛骨湯味，唔夠濃厚，個人覺得失色，牛𦟌～正常味道，加分位係大量嘅葱喺碗邊，同埋個麵真心拉得不錯，彈牙。我真係見識小，呢個粗度叫～三細。同埋最唔鍾意喺堂食，用咁多『紙品』嘢，外賣無得揀無辦法，堂食用呢啲真係覺得好唔尊重，其次至講唔環保！埋單當一人前$126回頭度3/10除咗麵質，其他真係無乜特別，香港人真係習慣晒，主食加嘢飲，依家普通都係加十元八塊，但呢度一杯普通嘅所謂鴨屎檸檬茶都$30～無套餐（當然係咪因為今日星期六冇，我唔知），所以真係欠吸引力。…查看更多

尋日嚟過見排晒隊，今朝一早再嚟「挑戰」⋯⋯早嚟唔使排，真係「得閒飲茶」⋯⋯二條友已經好勞力，特登叫多幾款試真啲～沙爹金錢肚(優)得獎蝦餃之王糯米雞龍蝦湯鮮竹卷春風得意腸千島醬脆皮蘿蔔糕3.6牛乳太陽蛋瑪卡燉竹絲雞先嚟春風得意腸～咬落去口感層次好豐富，腸粉皮有水準～好食。招牌蝦餃～同樣個皮一樣出色,入面淨蝦仁調味啱啱好，係比一般嘅酒樓好。龍蝦湯鮮竹卷，賣相同色水都唔錯，但個龍蝦湯無味，鮮竹卷亦一樣，淨係個色同「相」可以，無「內涵」。千島醬脆皮蘿蔔糕，上網睇果時同上一個鮮竹卷都有啲期望，但現實係當你食第一啖之後，你會諗～又千島醬又咁厚炸漿入面又係粉～肥死🤣，所以我第二舊係，整走晒啲炸漿至食，發覺原來入面淨粉連臘肉都無，而且仲要無味，原本啲味淨嚟自個醬同上面啲柴魚片。糯米雞，正常味道，入面唔係傳統多啲蠔油色果隻，而係你見到右下角橙橙紅紅果隻。沙爹金錢肚，都幾重沙爹味，正常發揮，唯獨啲豆卜，好似事後放落去，個色同一般放底入晒味的不同，都收貨。燉湯，好清，味唔濃，唔知係咪因為一早，所以未夠火，我個人覺得欠火喉。呢個甜品，我個人幾欣賞同鍾意，口感有啲似燉奶，真心不錯。回頭度：6/10食咗八樣嘢埋單$270,呢個價錢同今日係星期日，真係好扺 扺食。暫時覺得唔係所有點心都出色，整體合格有餘，下次試吓其他。以上純粹個人食後分享，絶無收取任何報酬或優惠，對以上言行，本人原意承擔一切責任。…查看更多

本來特登諗住去『得閑xx』,點知排晒隊，咁鬼熱梗係唔等，行過對面睇吓有乜選擇，結果誤打誤撞入咗呢間～金滿樓。叫咗～香煎蘿蔔糕 窩夫蝦春卷 櫻花蝦金菇牛肉腸 醬皇金錢肚 鳳爪排骨煲仔飯 桂花椰汁糕先嚟係腸粉，一放低睇到薄薄透透嘅「粉皮」，再加上厚厚嘅牛肉，熱辣辣～口感不錯，真係皮薄餡靚。跟著係春卷，首先個春卷皮係有別於其他傳統酒樓或點心店果隻，另外個醬汁，唔係用喼汁，係甜甜哋嘅～我個人覺得有小小似芒果醬，但又出奇地夾。金錢肚，正常味道，黑椒味重。煲仔飯，攪唔清佢夠竟係蒸還是「燒」，反正都ok好味，點解我咁講？因為上次試過煲仔飯有飯焦，但係煮燶晒，今次無飯焦,所以我分唔到。不過如果收$83煲咁小「料」，就有點兒那個。蘿蔔糕～無乜特別，正常水準。飯後甜品，呢個唔錯，清清甜甜，食完有好清新嘅感覺。回頭度5/10下次就算有機會嚟，都唔選擇假期或周六日，因為眼見啲孖寶三寶喺呢啲日子，加好多價上去，簡單啲講～平日平好好多，舉例有個三寶平日128.呢啲日子要加50就真係唔好攪。以上純粹個人食後分享，絶無收取任何報酬或優惠，亦對以上分享，承擔所有責任。…查看更多

本來想去『碌鈴』，點知排晒隊，結果變咗揾食，一出嚟見到呢間～麵鮮醬油房周月，又「米豬蓮」，又拉麵，為食嘅我～唔係好肚餓都要試吓。叫咗～辣味噌拉麵，同埋～和牛拉麵。另外加咗碟～紫菜，呢碟紫菜有啲特別，係要加埋落碗湯麵一齊食至過癮好味。和牛拉麵（$143），價錢係有啲高，但由湯底，和牛，以至啲脆筍，都相當好水準，牛肉份量其實唔小，二塊大加二三塊小的，夠食有餘（總扺過上次二片雞肉），牛肉入口咬落去，牛嘅嫩度牛嘅油脂同牛味，雖然薄切，但到足以滿足到我，順帶一提，以前食日本拉麵都會經常有「筍」呢樣野，依家拉麵店真係小見咗好多。女友食呢個，辣味噌拉麵～入面燒果個日本黑豚肉，真心不錯，辣味噌湯夠味，唔夠辣，女友加埋啲辣椒粉～完滿。攞咗塊黑豚肉試，你哋睇吓幾有層次？！同埋都有相當厚度。紫菜幾得意，撈埋落麵食，真係又另一番口味。埋單三佰有找。回頭度～9/10真心好食，真係食得好開心，好耐未試過有咁嘅感覺，水準絶對對得住個價錢，期望佢哋保持水準之外，再多啲選擇！以上純粹個人食後分享，絶對沒有收受任何利益或優惠。對於本人所有嘅言辭，一律承擔所有責任。…查看更多

路過青衣城朋友選咗呢度食午餐～熟客。睇吓得唔得～叫咗二個海南雞飯，雞絲大蝦湯粉，檳城海鮮喇沙。先講海南雞，真係食過咁多次，真係好小見到啲雞係白色而唔係黄色，雞肉唔夠滑，啲油飯又無油飯應該有嘅味，如果以馬拉或新加坡餐廳嘅收貨嚟講，真係唔收貨，除咗唔夠滑有一二件啲肉有啲梅嘅感覺，即是新鮮度嘅問題。另外加了二個小食，以單邊雞翼比較入味，網蝦春卷一般。其他二樣湯粉同喇沙，我無份食所以評論唔到.但見二人都清碗，應該不錯。另外想講吓呢度嘅服務同工作態度～先講下服務嘅質素，二海南雞飯放底咗，個盤無飯嘅？我以為墊喺啲雞嘅下面，撩開啲雞～又無，如是者，等咗五分鐘，開口問侍應，佢至記得攞嚟，真係咁者得？到埋單俾咭，個四眼哥哥俾張單我嘅時候，好似我欠佢好多錢咁，除咗應有嘅笑容無之外，真係多謝都無聲。如果你屬於經理級，你公司真係多得你唔小，你如果係茶記或大排檔，我真係唔會有呢個要求，你間店係中上店，就應該有中上嘅質素。要記得，你公司係有加一服務費！係～服務費！！埋單連加一，410回頭度～4/10食物質素同服務有待改善。以上純粹本人分享食後感，絕無收取任何利益和優惠。…查看更多

睇演唱會前（獵食），最近係呢個場，女友話想食～叻沙，好唔情願之下～屈服咗。叫咗 ～海南雞叻沙滲滲同海南雞飯，無錯二個都係雞，小食又係果二組～雞翼同春卷。叻沙味道正常，湯濃有幾舊豆卜，另上嘅雞睇落算多，不錯～一陣再講缺點。海南雞飯正正常常，個油飯講真唔錯，雞睇落小左啲，雞肉亦都滑，正常水準。問題嚟喇～二樣野都係海南雞，除咗去骨之外，呢度嘅特式係幾乎連肉都無埋！呢件係其中一舊，係反轉對摺左嘅，未對摺其實係成塊雞皮雞油！呢度係二碟雞加埋嘅皮，其實都唔係全部，但都嚇親。真係食咁多海南雞，一周二三次未見過去骨去埋肉嘅海南雞飯。跟飯碗湯，鹹得滯。小食雞翼同春卷都正常收貨，二杯咖啡同奶茶都收貨。最後加埋二碗甜品如圖，建議可以慳返，圍住果啲芋丸唔似坊間，有咬口彈牙，呢度口感係～無味嘅蘿蔔糕再硬小小小，真係唔知想點？定還是我見識小？！跟著成碗嘢要撈埋至勉強叫好食啲。我會提議你哋叫其他嘢食，因為座位近，貼住隔離枱～𥄫到個咖哩牛腩好似好多⋯⋯😂😂唯一嘅好處係～價錢唔貴，埋單$270回頭度～4/10我揀海南雞係因為諗住穩陣，但連最穩陣嘅都出事，好難令我再嚟！以上純粹個人分享飲食嘅經歷，絶無收受利益同優惠，亦對以上嘅陳述「經歷」，願意承擔所有責任！特此聲明！…查看更多

類似呢啲餐廳，裝修好少少，打正日本和牛，懶係高質，個價又「高質」，究竟得唔得？叫咗～鐵板美國牛板腱 白飯加$8 炸沖繩魷魚 宮崎和牛,鰻魚雙拼飯 加$15有味噌湯+迷你沙律1/4條鰻魚，4「塊」和牛，小量嘅菜同菇～$179，沙律同湯要另$15，咖啡又加$28，加嚟加去已超過$200。鰻魚～肯定唔會識飛，正常無驚喜，和牛～係有小小牛味，唔係入口化果隻，真係包裝靚啲，再「和牛」加持，承惠$179。鐵板美國牛板腱～$128,眼見咁多，薯條得幾條，汁又小得可憐，究竟係倒落去「炸炸」聲定係好似隔離果幾滴茄汁用嚟「點」？一樣無驚喜，正常口味，鐵板餐都係港式嘅好。埋單$466回頭度～5/10性價比底，環境又唔係好座過人，食物普通不過，懂得包裝就係一切。以上純粹個人食後分享，絶無收受任何利益或優惠，亦願意承擔所有責任。…查看更多

又嚟呢個場睇戲順便食個飯，今次求其揀咗～橫濱乜乜拉麵。入場前望過餐牌，價格比一般拉麵店高，唔知係咪因為咁，喺星期六晚八點零鐘，入座七成。叫咗～極上和牛野菜拉麵(黑椒風味 ) x 2 炭燒雞軟骨串 海老天婦羅 5件首先到嘅係～炭燒雞軟骨串佢嘅「型態」唔係我哋喺串燒店果啲一粒粒，係好似啲魚蛋小丸子（如圖）型態，一啖咬落去，係好淋，好似食豬肉丸咁，但唔係彈牙果隻，咬到最後，有小小小小雞軟骨件 ～感覺一般。跟住～炸蝦，比較好嘅係唔會「油淋淋」，蝦算新鮮彈牙，略嫌個炸醬厚咗，呢個整體合格。主菜～極上和牛野菜拉麵（黑椒風味），眼見咁多材料，主要係一塊薄薄嘅半生熟和牛，黑椒風味就係一個啖而無味嘅湯底上面耍啲胡椒喺上面，牛肉可以選正常（呢個型態），或者全熟，麵可以選粗同幼，我選粗，首先試啖湯，真係唔知想點，淡～完全無味，淨係嘗到面頭黑椒味，係『面頭』！跟著用筷子撩吓啲麵，成個「麵團」黐埋一舊未散開，咁都得？師傅煮麵果時唔係揾筷子撩開晒嘅咩？我可以幻想個畫面係，成舊麵餅掉落碗，加上所謂嘅「𤴓湯」，再加上配料，起貨？！當然以上純粹個人幻想同感覺，講返碗麵，塊牛肉薄得可憐，係較為可取，但真係唔夠喉，成$158碗，真係唔值。二口子埋單$475。回頭度～2/10性價比低，呢個價錢可以食到好多嘢。到不如食good court 果間，好小食呢類拉麵個湯底係，無牛無豬無雞味～佩服！或者大家有機會可以試吓其他拉麵，而我就一定唔會再嚟。以上純粹個人食後分享，絶無收受任何利益同優惠，亦願意承擔所有責任。…查看更多

之前成日有人介紹呢間總店燒住啲大大嚿牛肉，已經覺得好吸引，依家喺附近開咗間，點都要過嚟試吓。叫咗個三件漢堡排套餐～漢堡排分原味、芝士、同牛油果三種味，唔夠味？唔緊要，佢哋仲有幾隻精選醬汁俾大家選擇～原味～佢放落嚟話有五六成熟，我就覺得34成，幾大都煎多陣至食，靚牛肉又唔怕熟小小，更何況漢堡，牛味唔重，係食個新鮮整出嚟、醬汁同口感。芝士～其實味道又唔係真係好大分別，雖然係好多芝士，但又唔係好重芝士味，真係得好睇但唔係間唔好食。最後～牛油果，落烤爐後，淋上壽喜燒嘅汁，夏季限定，但我又唔覺得二者好夾？！二個餐埋單$308回頭度～7/10牛肉唔算點好味，但勝在有幾舊肉團俾你食，西蘭花、湯、同白飯任加，呢個幾好！再講就係啲服務不錯，但如果講嘢嘅速度、清晰度再高啲會更好，因為啲後生唔知係趕時間定怕羞，講完一堆急口令就轉身走人，我完全係收唔到係咩信息？😂😂以上純粹個人分享，絶無收受任何利益或優惠，同時亦願意承擔所有責任。…查看更多

行「宜媽」前「加油」先，揀咗呢間～米泰。叫咗～米泰極上船河 泰式雞肉冬陰功船河 香芒牛油果素菜米子卷船河睇落唔錯，有幾舊炸豬皮，豆卜，生牛肉同牛丸，湯底算濃，但唔算好味同正宗果款，其他食材ok.由以牛丸較出色。就冬陰功湯河～上面一樣有啲豬皮同豆卜，幾件雞，個湯底唔錯，係我個人喜好果款，雞件應該煎過，所以香口嘢易入口，整體都可以話收貨。芒果素菜卷～芒果就係你見到果幾點嘢咁多，寫明素菜，就係淡而無味，你要靠個甜酸醬至攪得掂～不推薦。回頭度～5/10除非無其他選擇，有啲話唔會再嚟，因為忘記咗喺呢度樓上定樓下，有間泰式小店，出色過呢度。埋單$284，不過不失嘅一餐。…查看更多

食完糖水，口痕排隊買埋串燒食，差唔多到嘅時候，諗起隔離有間好有歴史嘅飲品店～陳乜乜崩大碗（我只飲呢隻），順便清下熱氣。同事頭婆講崩大碗一杯，跟著我話事頭婆唔該俾個蓋我，佢話：蓋呀？蓋要收錢！咁我話收幾多？佢話一蚊，真係咁大個人未聽過話蓋要收一蚊，又長知識！今次歲定係最後一次幫襯！你真係可以收貴啲，無人會計較，但呢啲咁不合理嘅收費，會令人反感，就算你嘅「產品」有幾咁巴閉同無敵都無用！回頭度：0/10以上純粹個人食後分享，絶無收取任何利益和優惠，亦願意承擔所有責任。…查看更多

『碌完鈴』醫肚，都係取其最近果間～牛角。極上牛三重定食～日本A4黑毛和牛肉眼、牛五花和牛頸脊(150g)，同埋女友嘅上選牛三重定食 講真如果無學一般燒肉店插支標籤喺度，我點會知佢嘅名堂？食燒肉最緊要肉質新鮮同靚，當然要加埋佢哋啲醬汁，呢三款肉加埋150g, 飯可以有三個份量選，我當然唔客氣揀300g最大嘅一碗。今日唔趕時間，一塊塊慢慢嚟，三款都有不俗嘅口感，嫩-小小牛味，肉質唔錯，再加埋醬汁～收貨，紫菜加啲櫻花蝦咁樣撈飯又真係幾好食，攪到我要全部「消滅晒」佢。因為肚餓又真係無諗住寫嘢，所以無影到果幾隻醬汁🙏。埋單$450回頭度：7/10食物質素ok,價錢平貴好個人嘅接受程度。以上純粹個人食後分享，絶無收受任何利益同優惠，亦願意承擔所有責任。…查看更多

真係好耐無食過上海菜，今日行呢個場，順便食吓久違咗嘅上海嘢。柯打咗～上海炒粗麵 京蔥爆牛肉 砂窩雲吞雞<6位> 上海小籠包(四隻) 瑤柱賽螃蟹首先出場～小龍包，由於太肚餓，所以一人一隻好快清晒，影唔切相～皮薄肉餡多汁，味道正常，但真係不錯。京葱爆牛肉，上海嘢不褸係好深色，但雖然深色，味道唔會偏鹹，味道真係好適中，牛肉淋，加埋其他配菜，真係無得頂。上海粗炒，真係由細細個已經一食親上海野，呢個係必食，第二就係鱔糊（但今日沽清），味道都啲似京葱牛肉，但當然無咁多味，粗炒正常味道，但佢呢隻味係令你停唔到手同口。睇返先知叫瑤柱賽螃蟹，但無瑤柱嘅？係咪我孤陋寡聞？「佢」用另一個方法出左場而我睇唔出？呢個餸係食功夫，真係小啲功力都做唔出效果，睇同埋覺得純蛋白，點解咁值錢，但當你知做法嘅時候，你會有唔同嘅想法。好普通嘅蛋白，但好入味，餸飯一流，真心不錯。最後砂窩雲吞雞～啖湯有啲似雞湯翅嘅濃湯味，但味道偏鹹咗，雲吞同雞都好味，都飲咗二碗。埋單$710回頭度：7/10除咗個湯偏鹹之外，其他嘢都有水準以上嘅質素，亦都令我重新認識上海菜，真係唔係太悶得果幾味，而且真係又幾好食。以上純粹個人食後分享，絶無收受任何利益同優惠，亦對以上言論，承擔所有責任。…查看更多