叫咗～椒鹽焗鮮魷
紅燒乳鴿
西湖豆腐牛肉羹
燒汁茄子牛仔骨
家鄉腰果小炒王
炸漿薄，魷魚新鮮，正常水平～不錯
顏色深色咗啲，但絶對無偏到鹹，如果肉汁再豐富啲仲好。
茄子牛仔骨，無諗過係煲仔上，成煲滿滿，牛仔骨厚肉大大塊，舊肉易咬～「淋」同埋意外地牛肉味不俗，唯茄子🍆「失色」，唔知係煮過龍定什麼，唔係一條條嘅型態，係一pet pet。
家鄉腰果小炒王～材料豐富，而且鑊氣同味道絶對不下於大排檔，唯一失望嘅係主角『腰果』竟然係「淋」嘅，呢個真係失望加失敗，但係好彩其他材料味道同鑊氣搭救同補分數。
西湖豆腐牛肉羹～最簡單嘅嘢就係最考功夫，好簡單嘅材料，但係碗湯真係幾好飲，二個人清晒呢大煲，豆腐好滑，牛肉碎新鮮，芫荽，草菇加加埋埋～就係好飲，唔鹹味道剛剛好。
埋單$671
回頭度：7/10
我首先想講嘅係，佢哋嘅所有員工嘅服務態度同水平都高過一般酒樓「幾班」，真心希望其他食肆學下嘢。
傳統嘅酒樓好難改到有好多新派嘅菜式，所以能夠維持同生存到真係好難得，而且佢哋食材同味道都不錯，最難得「肥滔」老闆都有在場，真心希望佢哋能夠做落去，對我嚟講呢間真係山長水遠，但都希望短時間內再去多一次。
