PollyinFu的個人專頁

試新店~幸運茶點點心~廟街對面惠康轉彎幾日前無意中發現依間舖，上網搵到資料今日同阿媽試下。環境唔太舒適坐得唔多舒服，店員服務都有善有禮，食物還可以但以佢嘅賣點之一~米芝蓮兩位廚師主理又好似誇咗啲😅其實主要想試蝦多士但幾油~不過都正常嘅麵包一定吸油，但就唔鍾意佢面頭隻醬囉~唔多夾！其他食物都同外面差不多，冇太大評價。…查看更多

一心諗住食燒肉結果食垃圾🤮真心唔覺得平、抵食！有啲嘢試一次就夠。每次行過都想試，今日終於試吓等自己心息。唔明點解咁多好評？我覺得難食到一個點。先講入座服務欠周到，冇位放袋之類，搞到全程攬住食。再嚟入主題知道食材係雪藏嘢，但都唔駛成陣雪味呀！牛扒肉、豬柳肉霉嘅！食物又唔入未，蒜味雞翼更加冇醃過😑剪肉較剪仲有污漬個爐又係~想點？試過一次夠，食漢X韓燒好鬼過！冇影相，影唔落自己都食唔落。唔用心去做點留得住食客、點做得長？但都比個"服"佢，咁都做咗幾年😑…查看更多

同個friend出嚟食晏想食小籠包search完之後揀咗呢間。入到去一開始經理帶位都還可以 ，但店員上茶時佢完全係冇留意到冇茶杯，上完就算！落單係要跟掃QRcode自行落單，同個friend一人一個午市套餐另加一籠流心小籠包，一開始個friend點嘅套餐連甜品好快上枱，有少少打個突心諗:正餐都未食甜品上埋？用餐時間90分鐘喎？唔係咁催人呀？ 但到自己嘅水煮牛肉上枱食到一半個生煎包都仲未嚟，同店員講第一次個理由係"因為要蒸完再煎所以制作需時，再過多十五分鐘碗牛肉麵都食完，整個生煎包真的需要前前後後用四十多分鐘嗎？食嘢期間留意到三個店員兩男一女，女嘅不斷吹水，每次舉手叫佢哋都要嗌兩次先有回應， 男嘅混混噩噩發夢咁。要自行出櫃面埋單，諗住係跟手機落單處見到嘅價錢付款，所以攞咗齊頭數目畀經理就走了，結果個friend畀人嗌住咗，原來畀少咗錢冇計到加一服務費，咁點解張單唔一開始就寫埋要加一呢？咁算唔算誤導消費者？"加一服務費"呢個文化有時真係畀得好唔甘心 ！…查看更多

好耐冇自己一個食放題😋琴晚特登走去search放題邊間好，見依間好耐冇食，碌吓啲相見到有人post乳鴿隻眼即刻發光🤩今日走咗去食，出去自助吧攞嘢食嗰陣感覺 啲嘢食豐富咗，到自己掃QRcode落單見到啲嘢食覺得終於放題同lunch set有大分別，雖然放題價錢加咗價，嘢食質素好過以前，起碼加入咗新菜式有乳鴿任食等😋。保留嘅食物款式都比以前靚仔咗,相機食先影出嚟賣相都好過以前😍乳鴿每人最多每次叫兩客，一客得4分一邊雖然感覺比外面賣嘅細小，但不得不讚送到嚟好過酒樓水準，新鮮、熱辣辣、超脆皮👍…查看更多

今日農曆大年初八同個friend出嚟食嘢諗住開開心心，結果原來真係有人戇居到會搵人開年。約咗個friend嚟新世紀食牛涮鍋，諗住上次都係一人一鍋湯底所以就同個職員工講兩位，揀選咗兩個湯底，結果埋位嘅時候先見到佢係畀一個爐嘅座位。 行出去同返樓面個姐姐講我係叫咗兩個湯一人一鍋喎？跟住佢好惡咁樣同我講話:"你唔講我點知呀? 另一個女仔加把嘴嚟話:"鴛鴦鍋都係兩個湯喎！"我同佢哋講:"係咪應該問下我介唔介意？而唔係話我冇同你講要一人一鍋！"更何況我真係冇諗過會有鴛鴦鍋。嬲到我真係同佢開年，即場同佢個經理投訴。若然你覺得係個客唔啱、野蠻，但係新年流流係咪都唔應該用咁嘅態度對客呢？…查看更多

住在九龍區九龍灣係最近的分店，但一直以來都係去北角分店食。昨天同媽咪第一次去九龍灣分店覺得頗為失望😴雖然佢啲服務態度好過北角，佢哋會主動問要唔要加泡菜👍但係食物選擇就比北角差，可能喺工業區所以主要得lunch set。打開個menu北角有嘅嘢佢冇，想叫食開嘅蟹膏蟹肉石頭鍋飯~冇，加58蚊換嘅炸雞~冇， 芝士紫菜飯卷都係冇😭叫咗一客鰻魚石頭鍋飯畀媽咪、一份燒肉同一個海鮮煎餅。喺北角每次都會叫燒肉佢哋會畀一份生菜、配菜同埋一碗飯，但九龍灣係冇生菜的，泡菜可以任點但爭我碗白飯竟然要自己出聲先至話嚟緊？😑之前都有比北角分店寫食評，有附上食物嘅相，唯獨尋日嘅鰻魚飯漏咗影，所以今次食評缺相。…查看更多

開業咁咗都冇試過，因為覺得貴。有次行過望吓餐牌比啲可愛特別嘅食物吸引就帶阿媽一試。第一次食覺得味道同賣相還不錯。第二次再去叫啲普通嘢，其中一個蘿蔔絲酥，真係得蘿蔔絲，只有白蘿蔔味😅酥皮還可以。第三次嘅今天再來，叫返第一次叫過嘅魚片瑤柱粥、脆皮蘿蔔糕、紅蘿蔔造型咸水角、炭竹流沙包同雪茄造型長春卷~因為頭三樣第一次去食過覺得好食所以encore，本來想試山楂雪山包，但要十一點後先有所以改叫流沙包，真係好流沙一咬爆漿🤣個雪茄春卷就失敗了，炸到餡料乾晒兼有啲硬😖之前喺荔枝角食過一間類似，又係有麻雀造型糕點，但做得太求其了只係喺面貼張紙，見依間有人post過相都係咁所以不試而且十蚊件太貴了。若再有下次，會想試吓狗布甸。…查看更多

一直以嚟都想試下呢間因為見佢門面幾有特色 ，openrice評價又不錯今日同朋友一試。嚟到門口有啲小插曲，因為度門太重嘅關係我哋輕手得滯以為度門開唔到懷疑店未開，上返正門問過保安再行返落去先知原來度門係要好大力開🤣一入去個侍應哥哥好好禮貌好好招呼 ，坐低我哋點咗level 3(包level1同level2)喺出面攞嘢食，level 3就要用qr code點餐，而我只係尊攻level3嘅嘢食因為有一次性黑毛豬同任點和牛(其實食得唔多😂)，而朋友唔食牛肉所以佢淨係出去攞咗普通嘢。食物味道唔差但亦都唔見有驚喜😅或者可能我啲妹仔肚唔識食好嘢掛🙄唯一係杯嘢飲嚇親😱杯嘢飲應該叫一揸多個叫一杯而且個杯勁重😶。之後想飲啤酒但怕又嚟咁重手嘅杯裝，問咗侍應哥哥好彩係罐裝🤭…查看更多

第一次同個friend去食，價錢屬於便宜、分量大，唯獨是味道覺得差少少。今日第二次嚟帶阿媽一試，叫咗個甜辣炸雞職員好細心問我駛唔駛叫個第二樣怕老人家食唔到辣👍其實一啲都唔辣😂 叫咗一份紫菜飯卷，傻傻分不清同日本手捲有什麼分別🤔因為都係黃瓜、青瓜、蟹柳，另外有啲紫紫地色唔知係乜嘢？或者有少許分別但係我感覺唔到😅今次份蛋捲叫咗明太子紫菜，明太子配紫菜芝麻真係好香😋 自己叫咗杯薄荷青檸梳打超重薄荷味，反而飲唔倒檸檬味。本來上次同個friend嚟，食完之後一心諗住冇下次😅今次同阿媽嚟，可以幫小店平反🤣因為阿媽食得好開心😊…查看更多

好耐冇搵個friend一齊食嘢，經佢介紹咁啱喺佢屋企樓下就試一試。舖仔細細環境還可以，食物一般。叫咗一份海鮮煎餅~ 海鮮足料但粉漿太厚沒有脆嘅口感，覺得似港式薄撐多啲。一份雙重芝士蛋捲~ 雙重芝士口感太漏，早知就叫返明太子芝士蛋捲。半份蜜糖牛油炸雞~ 食唔出牛油味,若果話牛油蜂蜜，又覺得味道怪怪地。另外叫咗兩杯嘢飲~自己個杯係蜜桃沙冰，杯嘢飲真係好抵，飲極啲冰都唔溶🤣店務員一位女士唔知係咪老闆娘？態度幾好，值得一讚🤗…查看更多

見雜誌推介又見幾百個好評所以帶媽咪嚟試一試結果算係失望而回🙄食到半路可能係打工仔放飯時間好多人入。見 食評啲人多數都係post午市套餐，唔知好唔好食但係我就一心諗住食炸雞小食，本來想叫"明洞2人餐",但係覺得唔多吸引最終都係散叫，但原來選擇錯誤😓叫咗一份蛋捲、一分豬頸肉、一份原味炸雞 同一個海鮮煎蛋餅，蛋捲味道尚算唔錯，豬頸肉太硬老人家牙齒不好不啱食，炸雞雖然有兩款醬汁可以點但係炸得偏乾脆皮炸得過火太硬，最後嘅海鮮薄餅面頭放上很多泡菜， 餡料只係四隻蝦、幾塊羽衣甘藍，但食落去唔覺有啲咩味道，另外叫咗兩杯飲品，埋單$442, 平常喺香港食嘅正宗韓國人主理嘅都知道多數貴的，但喺依到覺得依個價錢完全唔合當，一點也不值🤦‍♀️…查看更多

之前食過三次都沒有寫食評，今日第四次去 原來餐牌已經轉咗，之前放題每位都會包一份灌湯餃同一份用竹籃盛着的特色點心可以影相呃like用，但今次原來特色點心已經轉咗每人一粒鮑魚仔燒賣☹放題沒有平時食開的點心例如牛肉球、雞扎等！呢啲只可以喺大、中、小點計算。 但放題的點心味道唔差，只係分量難以計算例如:"件"計分量可能多過"份"計😅唯一挑剔嘅係添水好似冇人理，每次都要自己出去斟。放題收費連加一每位$175/90分鐘…查看更多

低嘅價錢都唔駛諗期望有幾高，食物唔係太豐富，熱葷多、冇乜凍盤海鮮但入坐後每位都有算肥美嘅生蠔。最愛炸魷魚鬚，條條都好粗身唔似街邊嘅炸粉多同魷魚不成比例，真係一條好粗嘅炸魷魚鬚香脆唔會硬😋有讚必有彈~失望嘅係即整嘅班戟，配料落得少、蛋漿唔夠香口，師父動作好似有少少騰雞 唔熟手😅lunch buffet ~openrice 訂位九折等於免加一成為$188/位…查看更多

間餐廳喺個friend屋企樓下，搵佢出街順便試下呢間嘢，味道冇一般嘅偽韓食店咁重味， 叫咗一份半半雞啲雞肉勁juicy，唔似得出面嗰啲炸到好乾👍但係我最欣賞係嗰個炸紫菜卷，裏面包住啲粉絲口感超得意❤ 見隔離枱全部都係啲韓國大媽，一個二個叫韓國午餐顯得我同個friend好搞笑~晨早流流食部隊鍋、炸雞😂 部隊鍋超多料、超多腸仔、魚糕、粉絲、年糕、仲有一粒烚蛋同埋一個即食麵。雖然韓國餐廳啲嘢食係唔平，但係依餐有價值😋👏…查看更多

openrice見到好多食評諗住一試，每次都見到好多人今次見到仲有位就入嚟啦！但係一入到嚟係冇招呼嘅，咁都算喇！點咗啲嘢食先，結果收單都好耐，問完要咩茶結果等咗十分鐘又係冇人理。最終左望右望先有人問番我要咩茶。 其實真心食嘢係其次，一入到嚟你冇態度真係唔會有再下一次，我寧願去隔離嗰間啲人話唔好食嗰間，至少嗰間總會有位、有人彩吓你…… 點咗啲嘢食不會寫食評，今po只係純粹講下佢哋啲態度🤬…查看更多