由於，N年前就有幫襯過佢喺北角嘅舊舖，甚至有follow fan page，所以知道佢哋喺上環重開，就去食返當年嘅味道。頭幾次係去食午飯，而佢上環哩間舖嘅中式飯係多咗幾款選擇(請睇相)，可以配飯食嘅汁都多咗，我最初午市上去通常係食慢煮櫻花蝦燒肉餅飯配蜜桃咖哩汁，其次係慢煮燒豬扒飯，食多幾次後老闆就開始推介其他汁醬同新款嘅午飯比我，汁醬方面我個人喜歡蜜桃咖哩汁，令一個比較喜歡就好似係叫菠蘿梅子醬嘅汁，蜜桃同咖哩都好夾，真係會食到有個蜜桃味喺微辣嘅咖哩裡面滲出來，菠蘿梅子醬係有啲甜酸醬感覺，有啲似從前食燒鵝嗰種醬嘅味道，而其他兩個汁就比較辣，好似係有個叫紅茄，最辣好似係叫黑蒜汁...而午飯就最喜歡近期推出嘅瑞士汁慢煮花膠牛𦟌飯...當然花膠唔係花膠扒嘅厚度，但係個牛𦟌真係好食，令外個今期中湯都係好飲(好似係隔一排就會換一次，上次係五指毛桃淮山百合蓮子豬骨湯)。而16：00開始係Happy hour時段，適合我哩類飲酒人，有啤酒有清酒...都好似有High Ball供應，當然其他汽水都有，一面飲就可以叫啲串燒食，因為老闆講明自己唔係走日本風，所以串燒嘅味道都明顯唔係跟隨日式串燒嘅口味，當然串燒嘅選項係同其他本地舖頭分別不大，但係切件同串上竹籤嘅手法、燒法可能有唔同，我個人感覺就有啲似10幾年前旺角、尖沙咀一啲小食檔口嘅味道，即係好味(價錢當然同當年無得比啦，舖租都唔同咗咧～)，而通常都係食豬、牛脷、鰻魚、秋葵、雞皮餃子魚骹、掌中寶、風乾咸牛肉...有陣時會食下佢個花膠芝士撈烏冬或者素肉芝士撈烏冬。而家香港乜都係靠輸入，但仍然食得出老闆係有心揀選一啲質素好，而又唔會令自己蝕大本嘅食材，亦食得出佢對客人嘅誠意。要食到好味道當然要行多幾步，同付出合理價錢...可以比自己喺上環多一個食飯選擇，我會用隱蔽唻形容，而唔係隱世。(因為係分好多次去食，一篇“論文”又只可以Upload 12張相嘅關係，其中有啲相片亦已經唔喺電話，所以有啲喺社交媒體網站嗰邊Download 返，質素構圖會有不一同唔齊。)…查看更多
