Sunshooter的個人專頁

老豆老母返大陸，一條友食乜好？下午五時半仲係下午茶時段，就去富園食個焗咖哩牛腩飯。出到黎效果係好，至少真係有焗返時間，牛腩份量亦唔少，雖則似係將清湯腩加返咖哩汁，變個身做到呢個焗飯，所幸咖哩汁夠味，牛腩都唔柴。加個凍飲都係$51，抵食啦。…查看更多

講真，你話佢好好食，老遠都要黎食又唔需要。但係大埔中心區域內，可以掃街的食店就唔多，夜歸肚餓，幫襯下也無妨。間舖食物範圍都闊，總有一樣合你心水，如果你嫌污糟就唔好幫襯啦，牛雜確實較夜買會較淋同入味；炸大腸就串定，有柯打至拎去電爐炸，水準當然難和專業户比較，正常味道。…查看更多

呢間嘢開左好耐，即使過了疫情都未幫襯過，今朝見裡面有位就幫襯個早餐。豬柳蛋芝士漢堡配熱香餅，額外加錢配多個薯餅，整體冇乜事，個包好熱，焗過的，正常味道。到比錢就覺得奇，原來配凍咖啡要加八蚊，張單就寫話即磨咖啡，兼且要收加一，承惠59元。即係咁，係個門口餐牌吸引到我入內幫襯，也可能我冇睇哂整個餐牌，冇留意週五晚，週六日全日要加一，只見假日早餐要比多2元，加薯餅8元，以為凍飲只是加3元咁啦。早班果位員工勤力的，唔會質疑態度。…查看更多

假日晚上七點幫襯，QR code落單， 300g黑安格斯牛肩胛扒賣哂，唯有選個M7和牛搭豚舌，加多串鰻魚。整體個餐冇驚喜，和牛分左做兩細舊，但味唔多一樣，我覺得似湊合咁，本身冇叫帶子，卻又有兩粒，其他豚舌同鰻魚就都係咁啦。配套唔合格，珍珠飯太濕，湯冇哂又從來冇職員添加，飯素亦如是。雖然佢官方社交平台話通風改善左，即使現場食客得一兩台，四邊擺有風扇都煙霧彌漫，怪不得冇人乜幫襯。區內新達廣場有分店，倒不如摺左呢度啦。…查看更多

飯舍執笠之後，過了一段時間，個位就比津記茶餐廳租左。食環署旗下街市租金較便宜，所以津記的午餐價錢比較相宜，平均四十多元就有蒸魚飯，午餐的選擇也比較多。而我分別在兩天，就試了星洲炒米及炒貴刁。 水準也不錯，分量足，是即場炒出來的樣子。 例湯不是例水，你叫阿姐比大碗d湯，佢真係比個湯碗份量的。環境呢，始終是街市內，冷氣比較不足，不過整體感覺也不錯。…查看更多

飲下午茶，2:45pm入場遲左，但不致於一半點心賣哂掛，蝦餃燒賣冇，釀辣椒煎薄罉又冇，咁你點開酒樓？只係憑小區內獨市至未執咋。服務？人手不足就梗架喇，仲要態度差，所以只會平日下午茶較多人幫襯，週日加多三蚊就少緊d，去哂石門。食左六碟野，連茶錢及加一都近$170，下次去唐記買外賣都冇咁慶。…查看更多

檔野好耐冇開，應該執架喇，就講下呢間拜拜的原因。六月中的假日，就試左呢間午市外賣，咖哩牛腩飯+凍奶茶，57蚊係貴，觀感上你將個餐價上調，成件事會好睇d，52+3+2感覺好搵笨咁。講返個飯，咖哩正常，腩都有幾舊，都係果句，食完唔會返轉頭，等個外賣十幾分鐘，熱天等，下次不了。夜市佢賣小菜餐，七八十蚊邊有人幫襯，我猜間野仝人應該係新手創業，有個錢就唔好搞餐飲喇，呢次當買教訓囉。…查看更多

上次去過買外賣，體驗不好，唯有比藉口話佢可能較擅長藥膳雞，而車仔麵不是他們強項...原址改了名以為執左笠，點知行過條街見到同一個名，原來細舖搬大舖，再試下係咪堅中伏。新舖好闊落，比舊舖好好多，QR自己手機落單，叫左藥膳雞河粉，十分鐘後上枱，味道還可以，有酒香，55蚊算正常啦。間野人手明顯唔夠，水吧收錢招呼都係同一個阿姐，出餐都係比較慢，旺場就危矣，整體合格，但又不致去到必食咁誇囉。…查看更多

疫情下好多餐廳都唔做堂食，前幾日行過呢間舖，好耐冇食過，所以幫襯個外賣。我選了鹵水豬大腸，腩肉同魚腐，河粉加底，連外賣盒要$58，我要承認只留意"至少三餸"，冇留意個基本底已經要$25，所以侍應大姐講$58，我呆了數秒，但冇所謂，好食就可以。返到公司打開個盒，係塞滿的，不過整體幾失望，最大問題係鹵水豬大腸你只係比幾小粒!？唔係咁矜貴掛~ 其他好普通。幫佢兜的話，唯有話我自己冇加多$2分湯，搞到佢地整得唔好囉。又或者佢專長係藥饍雞，而我冇幫襯囉~…查看更多

檔野叫李記快餐店，唔知同之前開左唔夠半年就執笠的李記老蒲仙雲吞有冇關連...佢主打外帶飯，標榜賣客家菜，不過d野唔得啦，兩餸飯廿九蚊，飯盒比一般更細，唔捨得比人食。我選左個梅菜扣肉及咸雞兩餸飯，扣肉切到好細，梅菜得幾啖，單計味道還可以。雞就斬到好碎，仲要比雞背冇肉位的，碎骨又多，味就得的咸字。其他眼見的菜，都係冇色水唔吸引。總而言之就係冇誠意，冇下次，要買兩餸三餸飯，區內都有其他選擇，而一定好過呢檔。…查看更多

位於劍橋廣場內，相信只有附近工友或者水貨客才路過幫襯。午飯很多選擇，但去了幾星期都是那張卡牌，但好味道就可以。是日選了黑椒雞扒飯，大碗上，有菜心及雞蛋伴碟。雞扒有炸過但不乾，黑椒汁也夠味道。位處偏僻，連凍飲才$38，不錯了。…查看更多

週末原想試另一間西餐，但接近落場時間不接生意。結果路經大統領，門口掛着"營業中"，就入去試下啦。其實又幾好彩，此店到三點又到落場時間，但店員說可以落單，因為仲有幾分鐘至到三點，我就立刻點了鰻魚飯定食。之後都見有人想入，但店員都禮貌表示落場不做生意。店內走懷舊日本風，位子不多，但坐得舒服。等了一會食物到，正常水平啦，98蚊來說是恰如其分。此店不收信用咭，若想大吃一頓就先預備定銀両喇。…查看更多

週日放假，間間爆滿就梗架喇，次次路經多多，都係夾唔啱時間而冇試。今云見有位又未吃午餐，點都要試返次咪。今次就選左牛腩，豬大腸，豬扒拼幼麵。湯就冇特別，剔左小辣的四川辣汁是一點辣味都冇。豬扒就見門口推介，分上，出黎個樣都不錯，唔係死實實果隻。豬大腸冇縮得好勁，牛腩亦不是太碎。幼麵煮得一般，浸耐d比較好，未夠淋。菜脯味冇大埔墟另一間咁入味，我特登將吉樽擺出黎，但冇員工望到去加，或者佢地太忙啦。環境就和上手檔四川野差不多，只是牆身換張海報而已，冷氣夠，我特登坐近廚房邊張枱，冇地板好滑的感覺。整體就一般啦，推介豬扒。…查看更多

去到美孚先至知冇飯開，唯有去附近解決，最尾揀呢間試下我同女友選了鰻魚飯，壽司定食，炸蝦天婦羅同蟹籽沙律。整體水準麻麻，壽司定食包括有三文魚，鰻魚，蟹籽壽司各四件，仿蟹柳巻六件，但係相比平時食開的就太細件，仲細過惠康果d，唔捨得比人食，雖然話五十五蚊有十幾件仲想點，不過話哂日本舖連壽司都唔得就那個一點吧。天婦羅蝦漿分離，蝦毛咁細夾硬加一pet漿去炸，外觀冇問題，但食落去心照啦，仲要食得出唔脆果下至失望。係沙律同鰻魚飯較正常，沙律用蛋黃醬去撈，廿八蚊算還好。加埋二百三十五蚊，是失望的一餐，事頭婆在門外點宣傳都冇用了，冇下次。本來第一稿被話"建議閣下更多有關食物的味道或賣相等的描述"而不被刊登，我真係好嬲! 打算刪左去算鬼數! 但我認為善意的批評是可以改善餐廳的水平所以一定要寫，又打回頭的話算了吧…查看更多

好耐冇寫過食評，今次有咩值得我要寫返篇野呢?是咁的，呢檔野都陪伴唔少學生哥成長，價錢又相宜，除左樓下燒味飯，冇幾多間做午餐可以低過$30~你話食物質素，坦白講就好一般，焗飯永遠唔似焗飯，叫阿華田呢類落粉的飲品永遠淡過咩咁~坐位永遠都係咁迫~伙記又粗聲粗氣的~話雖說回頭，呢檔野由朝到下午茶都好鬼多人，正正就因為夠平，同埋街坊街里都咁多年，總儲落不了熟客。今次下午茶叫左個炸魚柳搭拉麵，分上的。連凍飲廿四蚊仲想點。期間聽到d食客唔多likey，嫌迫嫌杯野冇味，又話要老細要改善云云，呢檔野就黎比領滙收返，揸數位大嬸就有態度喇:「就執笠，唔改架喇!」講返個炸魚柳，大大件抵囉; 個拉麵冇咩特別，唔通係手打咩~宜家香港地太多怪獸，一種係租金怪，殺雞取卵，不知殺了幾多老店; 另一種係食客怪，口味刁得愈來愈離譜，去間餐廳仔就要貴賓享受，咁去大酒店丫笨! 順帶一提，檔野執笠前清倉，新杯具跳樓價發售，路過可以昅昅。…查看更多