pokheiyung的個人專頁

喺一個閒日嘅晚上，再黎九井食過，話說上次壽司飯怪怪地，今次好正常無問題，今之用嘅海膽亦唔係上次果種細海膽，無腥味苦味，另外叫左個海膽魷魚壽司，兩個至愛溝埋一齊，正，要彈就係個比目裙邊好un, 火炙得唔夠。不過整體已好過上次好多。…查看更多

算係慕名而來，之前路過好幾次都無位，咁啱放假早啲黎食。魚生係新鮮嘅，但掐飯就掐得麻麻，魚生黐唔實舊飯，飯嘅份量亦比較少。料理哥哥亦不太細心，以一般普通嘅放壽司方向，俾一個用左手揸筷子嘅人，係唔方便夾起壽司，要知道喺得吧台食，都希望與料理人有多少交流，但今次比較失望。一向喜歡三文魚子，但呢個配埋少少柚子皮，多左啲清新嘅aftertaste.海膽無苦味，但份量亦唔算多，感覺唔係好夠喉。有機會，還係試試佢附近嘅另一間立食壽司店。…查看更多

星期六訓到自然醒，兩點幾心血來潮想食壽司，就特登走去Megabox九井，勝在唔使等位，食完仲可以周圍逛下。講返野食，魚生係新鮮嘅，而且夠厚身，食到魚生嘅口感。蝦、赤貝、油甘魚、帆立貝、魷魚都無問題，十分好食，吞拿魚切得較薄身又帶筋，一般，比目魚裙邊厚身夠油香不過有啲韌。好野講完就到衰野喇。飯都係壽司重要嘅一環，今次嘅壽司飯太硬，而且有點鞋口，感覺啲飯浪費左啲魚生，可惜!另外有個更大問題，就係個海膽!!!（三文魚子係無辜的，佢好好）海膽聞落有腥味，食落去無甜味仲要係苦嘅。難怪坐我旁邊嘅女士叫左個帆立貝海膽飯，食唔到一半就放棄左走人。十四件壽司再加碗飯，二百頭加一，價錢中等，希望下次去有改善。…查看更多

一個人晚餐，打算草草了事。走到附近有車仔麵，點知滿座，就行到隔離嘅一碗試試，反正新開至現在都未食過。坐低第一個感覺，係光猛乾淨，無一般車子麵檔常有嘅豬大腸羶味，十分舒服。員工亦禮貌招待。點左牛筋豬大腸魚皮餃米線。十分欣賞腩汁湯底，濃郁唔油膩。豬大腸滷得夠透, 冧滑，無嗰種倒胃口嘅羶臭味，一就有滷水香走出黎，讚! 牛筋亦入味，不過嫌有點太冧欠咬口。魚皮餃爽身亦不錯。連凍飲先卅零蚊，有咁嘅食物質素同環境招待，係超值了。…查看更多

中午與同事午餐，叫左壽司定食。魚生質素一般，唔算特出。侍應服務更一般，放茶放沙律喺佢自己面前，要個客自己分? 整體感覺就係一般……建議揀刺身定食，多十蚊，個樣吸引d。…查看更多

素來對煙韌嘅烏東著迷，甚至瘋狂到自己打烏東。現在懶了，可幸附近還有手打烏東，可以久不久治療我嘅饞嘴病。已經第三次回頭此小店，食物質素如一。今次點左鰹魚半湯烏東配天婦羅加流心蛋。揀左粗烏東，口感更煙韌。烏東吸收左鰹魚湯，散發出濃濃嘅鰹魚香。建議唔好加太多天婦羅碎，會蓋過湯嘅原味。天婦羅係新鮮炸起，有蝦、沙椎魚、多春魚、茄子、冬菇。尤其欣賞沙椎魚，鮮嫩唔腥。蝦嘅麵衣亦十分鬆脆。仲有流心蛋，忘了拍照。呈膏狀嘅蛋黃加醬油味嘅蛋白，來配烏東又係一絕。美中不足，係烏東送到，但天婦羅還未預備好。對住新鮮嘅烏東，唔立即食係種怠慢；食得太豪快，又怕遲來嘅天婦羅會孤身一人。所以為左避免吃貨們嘅內心矛盾，店家最好能夠統一出菜嘅時間，那就完美了。…查看更多

約左朋友去尖沙咀，意外search到呢間餐廳，決定試下。侍應好好，幫我地換左張大枱。叫左人參雞，蒜香炸雞，小丸子，紫菜飯卷。食物份量超多！炸雞夠味，鮮嫩多汁，旁邊有醃蘿蔔，可以清下味蕾。人參雞忘記食之前影，太心急。唔太苦，但又好濃味，拆開雞肉配軟綿綿嘅糯米飯，食得舒服。呢個小丸子有趣，可以自己落手玩。可能侍應妹妹見我好呢hea，就示範左次俾我地睇。有得玩有得食，唔錯嘅體驗。紫菜飯卷有大量醃紅蘿蔔，本身好怕陣紅蘿蔔味，醃左嘅又接受到喎。份量之多，兩個人完全食唔晒，多到要打包走。但見到隔離枱有豬手同鐵板芝士飯，都好想試！…查看更多

下午點左順化番茄牛尾河粉， 味道中規中矩，只係奇怪點解會有紅腰豆喺入面。裝粉嘅碗亦太深太窄，食時唔太方便。但主要問題喺侍應度，黑口黑面，無黎反應，之後又有另一位大大力咁換支醋， 啪一聲咁擺喺台，其實有必要喺個客面前換嗎? 換又可否輕手點呢? 不過，要讚下收碟位姐姐，有笑容，會問過唔要先收野。希望其他侍應多多學習。…查看更多