QQ YAN的個人專頁

近兩年都幫襯咗葵興分店好多次，開頭都覺得食物、飲品質素唔錯，以該區嚟講，辦館嘅價錢唔算便宜但我覺得都仲值得幫襯嘅，但近兩次都真係好失望……食物質素越來越差，上次焗長通粉焗得太硬太乾，食完臨走輕輕同店員反映下就算。但今次，真係令我決定唔會再嚟喇。:(落單時，飲品嗌玫瑰Latte，睇番張單發現落錯就同收銀講番，佢話：頭先我聽到先生係講熱Latte個喎。我話：唔係，頭先我哋係講玫瑰Latte嘅。我明白當時客多環境嘈聽唔清楚，唔緊要，但個收銀再重覆：但我頭先真係聽到先生係講熱Latte。而家又唔係鬧你，係咪需要同個客人咁堅持？Anyway，最後佢改番，但感覺係令我覺得唔太舒服。食物方面，我哋幫襯好多次都有叫“紅酒燴澳洲和牛臉頰配薯蓉”，今次上檯發現冇薯蓉，我就以為漏咗啦，問下店員冇薯蓉得蔬菜嘅，佢話：係呀，轉咗呀～明明之前食咁多次，薯蓉同蔬菜兩樣都有，轉咗，唔緊要，但點解落單唔講？另外，大蝦魷魚辣椒蒜片意粉好乾，附近有間專食意粉嘅質素好好多，而價錢亦都值好多。呢個價錢，呢個質素，係唔相應嘅，我決定算啦，唔再嚟唔再失望。…查看更多

閒日下午1：00前嚟到，好在唔駛等好耐，等咗大約15分鐘就有位喇，用餐時間限時90分鐘。之前已經食過 lunch menu 嘅意粉、意大利飯，係未食過呢度嘅漢堡🍔，見到【北京烤鴨蒸包漢堡+薯條+沙律】呢個咁 fusion 嘅組合，真係要試一試。個包睇落 size 好細，但一打開，絕對係啖啖肉🦆，啲皮唔會好肥膩，配搭埋裡面嘅烤鴨汁、少少洋蔥、西芹，係好味嘅～本來計劃食完個 main couse 就 +$25 食甜品，但食哂個包同埋沙律、薯條之後，真係飽到食唔落。連埋杯 Iced Americano，埋單$97，呢個質素係物有所值，推介！…查看更多

第一次幫襯，lunch time 去食叫咗個麻辣牛脷飯(小辣)，麻辣唔算好麻，辣度適中，小辣啱哂米線食10小辣嘅我。牛脷份量都幾多，每片牛脷薄薄的唔韌，幾好食!飯嘅份量都好多食唔哂，下次要叫少飯。係爭在飲品冇乜選擇，飲品另計，但只有啤酒、罐裝汽水，如果有杯凍檸茶就一流喇!$50 有呢個質素我覺得都唔錯~期待夜晚嚟試下小菜。…查看更多

想喺中環搵間平民價錢嘅茶記食個下午茶餐並不容易，幸好還有美華~下午茶餐普遍三十幾蚊，選擇都算多，叫咗碗餐蛋麵 + 熱華田，轉出前一丁要 + $5，覺得貴咗啲，冇轉。麵質唔會煮到太“林”，啱啱好，個味精湯就真係淡咗啲，坦白講唔算係一碗好好食嘅餐蛋麵，可以接受啦～熱華田唔錯，夠味又夠甜。整體嚟講，味道就唔算出色㗎喇，係勝在價錢夠平民囉～…查看更多

第一次嚟 DK Cuppa Tea，星期日中午 12:00 打去訂位，最快下午 4:30 有枱，於訂位時店員會問埋要邊一款 afternoon tea set，今期是「飄雪樂園」和「綠野遊踪」，因為我酷愛貓貓嘅關係，就揀咗「綠野遊踪」。DK Cuppa Tea 係一間售賣香薰用品和花茶為主的餐廳，一入到去已聞到陣陣清麗淡雅的香薰氣味，如果對香薰產品有興趣和疑問，店內有香薰治療師給予客人專業意見。店員先端上用小貓木夾夾著的 Magic Card 和 tea set 指定的茶「Smoothing Love」- 朱古力+薰衣草茶，呢個配搭出奇地夾，甜甜地嘅朱古力味加上薰衣草嘅香味，一流！喜歡嘅話亦可於店內選購。而 Magic Card 係一個小遊戲，5張 Magic Card 分別係：Secure，Tonic，Peaceful，Possiblity 和 Inspire，店員會反轉 5 張 Magic Card 然後叫客人抽一張，好似玩塔羅牌咁，再同您講下您同張卡嘅關係，估唔到食個下午茶咁有互動！而支筆就係俾客人喺茶杯上嘅紙蝴蝶寫野，再夾喺餐廳的牆上，彷彿許願牆一樣。玩完遊戲，就係開餐嘅時間～客人需要親自去櫃檯搬個籐籃去自己張枱，好明顯係希望顧客對個「過程」感受更深刻，老實說，由自己親手去搬個籐籃上枱再慢慢打開呢個「過程」係非常興奮的！好靚呀～影哂相之後，店員會請客人將整盤食物攞出嚟放喺枱面然後收走個籃，冇錯，隻貓貓碟係要嚟睇同影相 only，會另外準備咗紙碗同膠嘅餐具俾客人用餐。店員會介紹每一款嘅食物，仲有「救救小貓」環節，食物造型非常可愛，鹹點同甜點都同樣出色！上面呢兩隻糖霜貓貓都係食得㗎～如果您忍心嘅話～（店員係咁講嘅）份量對女士嚟講係絕對足夠有餘，因為食唔哂嘅關係，所以我最後打包咗幾件 cup cake 回家～而隻貓貓杯就係送嘅，只要即時在 facebook 和 Instagram 上載食物相片加上 hashtag，再 tag 三位朋友，就可以獲得呢隻杯同埋一個 coin 扭蛋，我今次扭到嘅係貓貓嘅小飾物。成個過程真係大滿足！每人$298 + 10%，價錢雖然拍得住5星酒店，但覺得物有所值！食完呢個 afternoon tea，懷著愉快嘅心情離開，確實係抒壓嘅一天～:)一定會再嚟試下其他主題嘅 tea set！…查看更多

記得電視都有介紹過，去過咁多次澳門都遇唔到呢個阿叔，今次見到真係要試下!叫咗一波三色雪糕，$20................食落去，冇乜特別，就算佢個selling point係新鮮生果製成都好，都唔值...... :(真係試過就算!…查看更多

下午茶時間，見到個門面幾靚就入咗去，果陣得一枱客。因為唔知質素如何，兩個人都只係叫咗一煲「中翅客」試一試，其實一煲都分到一人一碗多D ga~ 如果一人一煲，我就覺得多咗D，飲水飲到飽。 煲翅一上枱新鮮滾熱!! D料方面都算足，$45都好合理!但味道方面就淡咗少少，要自己加番D醋同麻油釣釣味先好食D。成條福隆街咁多間食翅，我下次會試下第二間。…查看更多

去過澳門好多冇試過，「公雞」又好似幾出名，就試下喇!中午入去就冇乜人，一兩枱客，可能時間尚早吧! 我幾鍾意裡面個環境，有一點懷舊色彩，好多代表葡國嘅公雞擺設。 :)基於之後嘅行程都會不斷食野，所以我地兩個人只係叫咗以下兩樣野:青菜薯蓉湯 $20芝士汁牛聊粒 $100 青菜薯蓉湯都幾好呀，不過都係青菜同薯仔呢D簡單野，咁都唔好味就死得啦~芝士汁牛聊粒真係幾好味呀~! 個芝士汁正，牛聊粒叫咗五成熟，肉質軟硬適中，good! 不過真係唔抵囉~ $100!!! 份量又唔係多~ 我真係覺得唔值呢個價...服務就係真係冇乜ga咋，水都冇杯，食都好口乾叫佢俾兩杯水，佢俾兩杯熱水，真係唔得...仲要10% service charge，service 在哪??? 真係試過就算啦...…查看更多

見旅遊書同之前D食評都大讚，就試一試!入到去香港人多，個個都嚟食，睇嚟冇介紹錯。叫咗一個熱姜汁撞奶$16 & 雙皮奶$16:姜汁撞奶真係姜味十足，幾滑流! 記得真係趁熱食，攤凍咗就覺得有少少苦...:)雙皮奶就真係有D失望，點解會咁皺皮嘅... 而且唔太滑... 完全唔覺特別好食喎~ :(間舖頭裡面掛咗好多佢地自家養殖牛嘅照片，不過我覺得自唔自家養殖真係唔係最重要，最重要係好食。總體上，冇乜特別，同香港義順係差唔多嘅野，唔會專登再去食。…查看更多

見旅遊書有介紹過下，所以嚟一試!晚上6點幾食客唔算多，裡面環境一般，茶餐廳咁嘅服務質素，唔緊要~ ~ 最緊要D野好食!兩個人叫咗:生蝦: 約$60，真係好鮮!! 點埋泰式酸辣汁真係正到不得了! 冬蔭公: 約$55，每人分到兩碗，都幾足料，夠香，唔太辣，啱唔食得辣嘅人。:)泰式炒蜆: 約$40，呢個價好抵!! 一大碟，隻隻蜆都有肉，唔似香港成日多殼少肉，味道與份量都唔錯，而且冇乜沙，good!! 其實如果好肚餓，叫以上幾樣當然唔夠啦，不過我地之前都周圍食咗好多野，個肚冇乜位剩，同埋要趕船，所以就快食快閃喇。7點幾開次多少少食客，遊客少，當地居民多。我覺得始終個location唔太方便遊客，距離新葡京果頭要行起碼20-30分鐘，距離碼頭又係咁多時間，睇地圖好似近近地，但最終行到死下死下... :( 所以走嘅時候都係搭番的士返碼頭上船。總體嚟講，幾好，都值得再嚟! :)…查看更多