Mannyyuk的個人專頁

去左尼間荃灣區都算出名嘅湯店食晚餐，叫左雞臘腸煲仔飯，靈芝烏雞湯，湯好足料好好飲，又唔貴。雞夠滑，飯吸左汁好好食，熱辣辣好食。美中不足嘅係上面嘅菜係凍嘅，所以有少少怪，因為飯同肉都係熱，可能菜煮左一段時間，建議菜加番熱會食得開心d。…查看更多

第3或第4次來食7080，次次黎服務態度都好好，隨時注意到你個燒爐架要換，馬上黎換，連叫都唔駛，配菜好食，任添。之前食幾次又叫牛又叫薄餅又叫年糕又叫過湯，次次食唔哂，今次就主攻牛，食牛食飽佢啦！我地叫左醃牛肋骨（$248）超好食，牛味濃，醃得剛剛好，唔會過咸。雪花牛（$188）都好食，份量唔夠，之後再叫一碟烤牛肋骨（$158）尼個就普通左，唔太好食，我地一邊食牛一邊食左兩碗飯，好正，坐又坐得舒服唔迫。加埋飲品，價錢就每次食都係$300-$400一個人，不過覺得物有所值，好過去尖沙咀食過幾次韓燒都中哂伏。…查看更多

我同友人去尼間店時，友人忍唔住笑左，我問佢笑咩，佢話個店名好搞鬼，以前粵語殘片既一首歌詞，仲唱埋畀我地，我唔同年代，無代入感😂😂。店鋪位於條內街，唔難搵，地鐵站行過去7-10分鐘。一入店無咩客人，可能時間尚早，6點左右，牆上印哂必食推介，就係肉骨茶同喇沙。店不大，店員一個，似乎都係佢入廚房裝肉骨茶。我地就叫左肉骨茶、海鮮喇沙油麵、泰式米腸同椰皇啫哩。肉骨茶份量剛剛好，配碗油飯好好食，湯底濃，肉香好食，尼個肉骨茶好重藥材味，唔會好重胡椒味，果然係店鋪主打，價錢算抵食👍🏼👍🏼海鮮喇湯油麵，最正係個油麵，出面食通常係喇沙米粉或麵線，尼個油麵令我諗起福建既油麵，睇下餐枱張介紹紙，尼間店係馬拉福建人開既，果然😂😂至於個小食泰式米腸，入面係米粉，有點似福建豬肉腸，不過有泰式香料，個皮仲係又脆又薄，好好食。食左3樣野已飽了，不過天氣熱口渴都係要叫番杯野，我地叫左杯柑仔水，似台式夜市飲到既，好清爽幾好飲。甜品叫左椰重啫哩，諗住試下，出乎意料好得，個椰皇堅甜，店舖講明無額外加糖，好好飲，個啫哩滑捋捋配埋香爽椰肉好夾👍🏼👍🏼👍🏼外賣個椰皇啫哩番家都好，夏天夠消暑。…查看更多

放佛誕假，天氣勁熱，黎到銅鑼灣行街，想飲杯台式飲品，梗係去試下最近好出名既迷客夏，台灣十大珍珠奶茶店。新開張都預左好多人，地點又係銅記，排隊一定要，落單排左5分鐘，等野飲排左15分鐘，共20分鐘可以接受既，不過32度排在小街上都係好辛苦，熱死左。由於已無哂珍珠、冬瓜茶、芋圓、奶蓋，加上佢飲品唔多選擇，所以可以叫既更少了。叫左兩杯，一杯係主打柳丁綠茶，味道一般，香精味，唔係鮮橙汁，似濃縮果汁咁，綠茶味唔出，$26咁既價錢細細杯，幾失望。第2杯叫紅茶拉鐵，味道正常，無話特別好飲或唔好飲，貢茶及sharetea都飲到既味，不過見到佢用印尼greenfield盒裝奶沖，滴左汗，greenfield奶都唔好飲既，做咩揀greenfield ,同埋我以爲係台灣牧場直送奶，所以都係失望左，可能期望太大，睇左新假期話佢台灣自設牧場有鮮奶，令我有錯覺。2杯細杯裝價錢唔平，又少野揀，連珍珠都無哂，我都係飲貢茶/Sharetea好過，起碼有仙草、寒天、愛玉之類加，價錢又平d, 又大杯d, 同埋大家都用盒裝奶既話，咁尼間有咩咁特別呢？…查看更多

好幾年前去過昭柏耶，印象十分好，食物美味，價廉物美。今次去九龍城再食泰菜就想搵番尼間食，發現佢在南角道開左分店，今次我地去原店食，感覺鋪頭光左，乾淨企理。我地去時仲係6點，未有太多顧客，唔駛等位就可入座。我地兩個人叫左原隻豬手、拼盤、豬肉咖哩加白飯。印象中之前食既豬手係有切片，今次係整隻豬手上，比較難分，味道十分好，多汁唔咸好入味，外皮軟綿綿好鬆化，食左半塊已飽飽地。豬肉咖哩配白飯好正，佢既咖哩好香，唔太辣，因為尼個咖哩我再叫多碗白飯，太好食啦，👍🏼👍🏼推介。 反而拼盤一般般，炸蝦炸魚，其實幾普通，不過佢個醬好食，酸酸甜甜少少辣，兩個人差點清唔哂成盤拼盤，其實一個人食左幾塊炸野都夠飽了。見到兩枱叫南瓜咖哩軟殻蟹時先醒起尼個係好食，上次都有叫，好好食，今次忘記左叫，等我地下次再來食😋…查看更多

今日去坑口foodlane, 好似今年年頭先開，熱熱地飲番杯野先，叫左杯芝麻抹奶茶，同益力多綠茶加蜂蜜，另外叫左個原味烤麻糬。芝麻抹奶茶好香芝麻味，味道好豐富，抹茶味濃，的確好飲，怪唔之得係店員推介👍🏼👍🏼👍🏼。益力多綠茶都好清新，下次可以試下叫加檸檬先，夏天飲應該好爽。而烤麻糬味道ok, 有其他味，今次試個最平既原味，要等15分鐘，見住店員係咁烤同按壓，我諗夏天烤麻糬應該熱到抽筋，對住個爐係咁烤。不過如果趕時間，唔好叫烤麻糬，因為聽到幾個叫麻糬既，店員話要等15-20分鐘。野飲等候時間正常，5分鐘內攞得走，下次會再來試下佢熊貓抹奶茶，雙思Q抹茶，都多人叫，似係主打飲品。…查看更多

雖然住開尼區，不過都係第一次食尼間泰國菜，因為係最近OpenRice 睇到食評先知尼度有泰國菜食😂😂。平時去開天后食泰菜，太遲知道尼間好野了。 睇門牌先搵到，因為門面唔係裝修得好光鮮，好易miss左，其實佢係電車總站附近，或者坐地鐵去既，可以揀渣華道出口出，都好近，一條直路就到。間店係泰國人做廚，侍應係泰妹，不過廣東話我要專心聽先聽到，一來細聲，二來開放式廚房鑊聲好嘈，三來唔算講得好正？（個人認為，無貶意），不過泰妹態度十分好。睇左食評，知道要叫牛丸湯粉同串燒，咁我地兩人就叫左牛丸湯金邊粉，勁正👍🏼👍🏼👍🏼除左牛丸仲有幾片牛肉，最好味係尼碗無咩味精既湯粉，平時食開南記、譚仔，湯底會係得個咸字，尼個湯底係甜同鮮，應該用牛肉煮成，好好飲呀！驚為天人，估唔到食到去泰國時食既味道，仲要$43only! 咁多餸，抵到呢👍🏼👍🏼。又叫左雞肉及豬肉各一串，$15一串，一點都唔貴，肉嫰多醬，椰醬加左花生粒，好好食，肉大塊，唔係求其零丁幾塊仔，好食，佢既豬肉串係好食過雞肉串。炒椰菜苗都好好食，蒜同辣椒爆到好香，不過本人食到流鼻水，都辣辣地，雖然鍾意泰國菜，但本人其實唔係太食得辣🙈。泰式豬肉煎蛋飯，都好食，豬肉粒好香唔會咸過頭，撈埋香料食一流。 另外叫左兩杯飲品，青檸梳打水及泰式咖啡。同行人叫咖啡時以為是熱咖啡，黎左先知係凍既，menu無寫熱定凍，大家注意番。埋單$220左右，捧住個肚好滿足咁走。走時我同朋友傾番附近起緊兩個豪宅盤，成5-6萬一尺，跟住我地好擔心間店會被狂加租，希望尼間野keep住做落去，我地會好快番來encore .…查看更多

細細間餐廳，lunch 一遲去就要等位。之前似係越南人一家人打骰，而家唔知係咪轉左手，成班後生仔，食物味道差左。食物價錢以深水埗來講，算係貴，$4x湯麵唔包野飲，不過之前食開好食所以keep住有幫襯。佢既招牌係蟹膏蕃茄湯河，好多人叫，以前好多料，湯河好食，湯底濃味好香。尼兩三次食，湯底加多左水，無咩味，d麵又斷開一截截，撈極唔起。米紙蝦卷，一般般，淡味，都係覺得差左。仲有個越南咖啡，係特別少少，幾好飲，微苦但香濃。食物真係差左，比多2次機會了，唔會再幫襯，希望佢地有心機d做啦！…查看更多

我地一行4人睇戲前來到EXP食lunch , 門口超多人排隊，因為尼間餐廳唔接受訂枱，在門口等了半小時可以入座，餐廳都幾大間所以雖然多人排但又唔算等得耐。我地叫左燒帶子墨魚忌廉汁意粉，尼個係必叫，好好食，有3粒帶子，上面加左少少魚子，忌廉汁好味👍🏼👍🏼。仲有叫左蜆肉意粉，一開頭我唔記得先攪拌一下意粉，將sauce 攪均，所以有點咸，之後攪拌完味道好鮮，唔會好咸，掛住食唔記得影墨魚麵🙈仲有炸蝦餅，尼個味道都唔錯，不過得三塊，入面有栗米粒。另外叫左水牛城雞翼，味道ok，仲有叫左香草肉腸pizza有兩款腸，新鮮熱辣好好食😋我見附近枱好多都叫pizza , 果然pizza係得既，勁多芝士，又唔會漏，味道好正。 雖然餐牌選擇少，不過款款味道都好好，而且價錢平，叫了5碟才4百頭，每人百幾蚊，在九龍塘黎講算係平價之選。…查看更多

睇到有食評寫到尼間野同北角梅花邨有關連，同朋友食過梅花邨兩次，印象唔錯，反正黎到坑口尼區都無咩野好食，就試下潮饗。餐牌價錢唔貴，我同朋友兩個人又想試多點款，唔小心叫多左，4道菜，無諗過咁大份，結果都係食唔哂，眼闊肚窄。叫左咸菜豬肚湯、蠔仔粥、橙花骨、沙爹牛肉煲。咸菜豬肚湯好飲，大大煲又足料，係有點辣口，因為胡椒味重，不過飲多兩碗覺得有點咸左少少。蠔仔粥，入潮洲店必叫既，蠔仔幾鮮，清得哂成煲粥。橙花骨酸酸甜甜幾好食，不過我地食唔哂😂😂太大碟了。沙爹牛肉煲惹味好香，不過都係咸左少少。總括來講係值得推介，不過多一兩個人食會好d, 價錢唔貴又可試多點野又唔會好似我地浪費左d食物。👍🏼👍🏼…查看更多