貪食兔的個人專頁

啱啱澳洲返嚟，朋友介紹咗我去尖沙咀呢間Charcoal bar，果然冇令我失望😍我哋3個人叫咗2個主菜加幾個小食。小食想健康啲，食少啲肉，所以揀咗燒粟米🌽、燒茄子、西蘭花苗🥦同青椒。燒茄子🍆好味好香口，點埋汁仲好食好多，平時唔係特別食茄子都覺得好食，個人覺得茄子同青椒🫑最出色😋主菜一個叫咗牛扒，我同另外個friend就share燒雞🍗。燒雞入面放咗辣肉腸，辣辣地幾惹味，雞皮燒得好脆唔油。雖然我唔食牛，但牛扒一上枱，就聞到超香嘅炭燒味，朋友話牛肉質好juicy 好嫩～最後點少得甜品：Apple crumble🥧 加vanilla ice-cream，份量好大，crumble 好香好脆，好好食😋Chocolate cake 中間有流心朱古力，又唔係好甜，啱晒香港人口味😙呢度嘅 service都好好，所有 staff 都好 nice，特別係Leo（希望冇記錯）好有耐性咁介紹嘢食比我哋。下次返香港一定再嚟👍…查看更多

之前無睇清楚營業時間摸門釘，今次終於食到喇！星期日晏晝兩點幾嚟到，人唔多，又啱啱有下午茶餐。一開始叫咗一份西多士、炸雞脾配紅豆冰，同埋什扒湯通粉。之後再追加個炸雞翼腸仔公仔麵，本身想叫叉燒，但係賣哂🥲 法蘭西多士 — 冰室名物，點都要試一試。熱度夠，上枱嚿牛油已經半溶，不過偏薄身，味道正常 炸雞脾配紅豆冰茶餐 — 炸雞脾細隻咗啲啲，生炸嚟講幾夠香脆，唔會好油膩，又唔會太乾身，係爭咁少少鹹味；紅豆冰睇落有啲稀稀地，攪勻哂嗰味又OK唔錯嘅什扒湯通粉 — 豬扒、炸雞翼、腸仔同火腿片各一件，豬扒夠味唔鞋、腸仔應該沾咗層粉先前煎/炸，幾香口，係個通粉質地偏淋 炸雞翼腸仔湯公仔麵 — 後加呢個都算有個完美作結，掛住食所以無影到相🤪公仔麵係我鍾意嘅硬身質地，最驚食啲發漲麵，湯底清得嚟又夠味，同上面湯通粉一樣，唔係平時一丁嗰種；炸雞翼有4隻，香口又唔乾，夠哂簡單好味😋 呢種香港舊情懷真係買少見少，特登帶埋小朋友嚟感受一下，好好記住💛…查看更多

經朋友介紹下，嚟到上環呢間上樓私竇，試試手沖咖啡。有別於一般咖啡店，呢度嘅裝潢好raw好簡約，枱都幾乎無張，一入到去最吸晴嘅就係咖啡吧上嘅唱碟機。預約咗下午三點一節，咖啡師先問我哋想飲手沖咖啡、冷泡咖啡定冰滴咖啡，我哋揀咗手沖咖啡，之後佢再介紹有邊幾款咖啡豆可以揀，因應你想試嘅味道沖調。前後試咗兩款，一款係深焙咖啡豆，味道帶點果仁味，aftertaste帶少少酸；另一款淺焙咖啡豆，味道相對無咁濃，略帶花香。睇住整個沖調嘅過程非常治癒，由量度咖啡豆份量、研磨咖啡豆、準備適當溫度同容量嘅熱水、澆濕濾紙到濾沖咖啡，每個步驟都係咖啡師嘅心機，亦直接影響到咖啡嘅味道，所以就算用同一款豆，每次沖調嘅味道都會有所不同。最後再試埋cold brew，口感好順滑，無一般凍咖啡嘅酸澀，感覺好似飲緊冷泡茶。…查看更多

所謂懷舊冰室嘅人情味，係呢間華樂完全搵唔到，阿姐大支嘢唔俾影舖頭入面，驚死影蝕咁食物款式唔算太多，同家姐各叫咗個豬扒炒意粉同雞翼炒意粉，唔駛兩分鐘已經上枱，感覺係一早已經整好哂，一有人落單就即出。理解豬扒同雞翼一般都會煎定，但無諗過炒意粉都咁快上枱。豬扒同雞翼味道其實都okay，豬扒食得出有用香茅醃製，都幾香口亦唔會好乾，而且size都算大塊。但個炒意粉完全唔掂，未試過食咁難嘅炒意粉😣 通常餐記都會烚定意粉先，之後有人order就會即炒，但好明顯佢哋係一早炒定個意粉，所以勁快可以上枱同埋溫度係微溫，而且成個口感係勁粉，啲豉油汁俾啲意粉吸到乾晒，成碟嘢乾爭爭，食咗兩啖完全食唔落去🤢好在個餐跟一份多士，有別於一般餐記/冰室，呢度有得揀唔同嘅口味，例如奶油多、奶醬多，我哋咁啱都想食油占多。多士用一般方包，唔係厚多士，味道okay，但唔太香脆。算好有塊包可以食下，唔係真係唔夠飽😣飲品就叫咗茶走，都達一般standard，但食物真係唔掂，都好難會再幫襯第二次。…查看更多

次次經過伊利近街小巷，都見到好多人排緊隊等食呢間小店，仲話閒閒地要等粒半鐘😣 難得放假特登約埋家姐去試吓，咁啱呢日唔多人等咗20分鐘就有位，不過要坐outdoor，夏天真係💦💦家姐一向都食素，所以呢度都有好多啱佢嘅選擇，最後佢揀咗Hipsters Say Hello(HK$105)，清新creamy嘅牛油果配搭酸酸甜甜嘅Salsa非常開胃，啱晒夏天食😋 當然唔少得sourdough係底，外脆內軟配埋Salsa食夠晒惹味！而我就揀咗其中一款非常signature嘅open sandwich — Big Boss (HK$198)! 平時睇見人哋啲相都流晒口水🤤 Sourdough上面先舖一大片半溶嘅車打芝士，然後排滿一片片嘅新西蘭西冷牛扒，大約6成熟，再上面就有大大粒嘅portobello，滿滿嘅肉汁加埋焦糖化洋蔥，最後最頂仲有一大堆勁fresh嘅火箭菜，完全係my favourite！牛扒軟腍，配搭芝士大啡菇一齊食口感超豐富，sourdough沾滿香濃肉汁，但唔會搞到淋bat bat，加埋火箭菜同洋蔥超夾超好味！雖然價錢略貴，但真心好食，同埋份量十足👍不過飲品方面就爭少少，Iced Earl Grey($30) 非常普通，仲要冰都無粒，而Iced Coconut Latte($40)就略甜，椰子味亦唔算香濃。家姐最後仲外賣咗個Sourdough Cinnamon Bun ($60)，佢食完都話超正，好味過啲open sandwich，下次有機會都要買嚟試吓😋…查看更多

西營盤除咗阿元來了，近期又開多咗間台灣小店，就係位於英華台嘅請坐。短短兩星期我已經幫襯咗兩次，小店裝潢簡約，目測都有十幾張枱，兩次都係排咗15分鐘左右。台灣菜又點少得滷肉飯同紅燒牛肉麵！滷肉飯雖然只係＄28，但份量絕對唔少，女仔食一定夠飽！滷肉肥瘦參半，撈埋菜埔食唔會油膩，仲好有口感！而紅燒牛肉麵嘅份量都唔細，湯底夠晒香濃，但麵嘅質感就稍為淋咗少少，可以煙韌啲！留意番飯同埋麵係可以添架！一般香港台灣嘢食比較少有嘅蛋餅呢度都有，仲有成八款口味咁多！一路食呢個肉鬆蛋餅，一路就覺得自己去咗台灣咁！不過個蛋餅可以再香脆啲，但都好好味！另外就再叫咗兩款小食—皮蛋豆腐同埋椒鹽雞腿，不過椒鹽雞腿嘅味道就比較普通。呢度飲品嘅選擇都有好多，價錢都係廿零蚊左右，而且都算大杯！小區難得搵到嘅台灣古早味，仲有正宗台灣嬸嬸坐鎮！…查看更多

有一段時間無去D2 Place，發現二期個邊多咗好多新餐廳，間間都有好feel好chill。行到近街尾發現呢間叫Si Simply Italian嘅意大利餐廳，開揚簡約，就決定入去試一試！雖然都有set lunch揀，不過我地一行4人可以散叫幾款唔同菜式share。嚟得食意大利菜，cold cut platter又點少得呢！點咗個「全有機意大利火腿拼盤」，一見到就覺得不得了喇！首先價錢唔貴，以$228嚟講有咁大盤咁多塊，簡直係非常抵食！Platter有3款火腿，左邊帶有少少肥嘅係Mora火腿，係一種非常矜貴嘅火腿，因為呢種豬全球得唔夠1000隻，所以一般香港嘅意大利餐廳係唔會食到。味道比平時Parma Ham濃同嫩滑，非常好味！另外兩款火腿都係用天然材料腌製，雖然味道無Mora咁香濃，但搭配頭盤麵包一齊食都十分好味！另外點咗「牛肉薄切配吞拿魚水瓜柳沙律醬」($118)，用上牛仔腰肉，以中溫浸煮，肉質非常鮮嫩，完全唔鞋口，加埋吞拿魚、水瓜柳攪蓉做醬汁，味道清新帶少少酸味，做前菜非常適合！主菜極度推介「焗千層意大利茄子配水牛芝士」($88)，eggplant parmigiana係一道好傳統嘅意菜，同一般做法唔同，餐廳相反將茄子薄切，沾上薄薄麵粉，配以新鮮意大利蕃茄同水牛芝士整成千層再焗，口感唔覺膩之餘，仲食到每層茄子嘅香脆，清甜蕃茄同香濃芝士味再為呢道菜加分！Must try dish!其他意菜餐廳較少有嘅牛骨髓呢度都有，價錢親民而且份量足。呢個「牛仔骨髓番紅花意大利飯」賣相非常特別，除咗中間嚿牛骨髓，risotto都用番紅花同牛骨髓嘅湯烹調，每啖飯都食到陣陣牛香，口感又夠彈牙，飯面仲擺咗幾片金箔裝飾，$178真係好抵食！最後點埋大廚親手炮製嘅鳥結糖，質感非常軟熟，唔會太痴牙，糖面仲加上一片薄薄威化，配埋香口果仁，口感非常豐富！今餐真係大滿足，難得搵到間性價比咁高嘅意大利餐廳，材料仲要全部由意大利入口，夠哂正宗原味！下次晚餐都可以再嚟一試！…查看更多

雖然唔係特別食得辣，但我就係鍾意食口水雞呀棒棒雞，總之四川風味的辣我就好buy! 今次咁啱有朋友仔帶咗我去四川菜大平伙食brunch set! 真係無諗過連川菜都可以有呢個玩法! 不過留意番嘞又係只限weekend!同一般川菜餐廳唔同，四川菜大平伙本身係一間私房菜，晚市會為客人度身訂做唔同款式的川菜，就連辣度都可加可減。除此之外，呢度個環境非常有格調，牆身掛有多幅由前老闆所畫的畫，細心留意餐廳仲會播放remix版的經典懷舊歌曲，好似何日君再來、等著你回來等等….以中環黎講$180 的brunch set 都算好抵食，頭盤有酸辣粉同賣飛佛口水雞，主菜就有紅燒牛肉、炒手撕椰菜同埋招牌擔擔麵，當然仲有甜品同飲品喇，飲品可以揀豆漿同酸梅湯!咁多道菜我認為酸辣粉算係最辣，不過我覺得還okay，再辣多少少都仲頂到。略嫌質感太淋，不過我係鍾意食煙韌D既~口水雞好食，雞肉夠嫩滑，味道夠濃，但唔算太辣。王太太紅燒牛肉係我覺得最好食的一道菜，係前老闆娘的招牌菜，牛肉肉質軟腍，非常入味，好鍾意個陣花椒八角的麻香，「紅燒」味香濃!炒手撕椰菜睇落無咩特別，亦唔係辣，不過剛好可以中和返之前幾道辣菜。招牌擔擔麵賣相非常吸引，重點係可以無限追加!!! 比較大食的朋友絕對唔驚會食唔飽! 不過麵質偏軟同扁身，唔似平時食開個D，同埋麻醬味可以再濃D! 不過任添係堅抵食既!最後甜品又係驚喜! 超級冰凍的雪耳豆腐花，解辣一流! 豆花非常香滑，堅係瀡入喉嚨，除咗雪耳仲有糖冬瓜的甜味，非常好食，不過對我黎講就甜咗些少，但好消暑解辣!!可能平時行過嘉咸街都未必會留意到呢間私房菜，仲要行落地牢，所以當日我食個陣都係得兩三枱人。鍾意食川菜的朋友不妨去試下喇~~…查看更多

近年手工啤熱潮越吹越勁，本土日本美國等的手工啤酒吧越開越多，包括呢間位於中環Soho的The Roundhouse Taproom﹗雖然舖仔細細，不過深受一眾鬼佬同中環白領OL的歡迎，一放工就黎happy hour啤啤佢~The Roundhouse Taproom有超過20款來自世界各地的手工精釀啤酒供應，其中更與本地手工啤品牌「少爺麥啤」合作釀製。20幾款啤酒咁多唔知點揀，可以試點Beer Platter，係啤酒menu任揀6款，細細杯試下味。如果女士們飲得唔多，點個platter share又得~店員會比張紙仔你mark低個啤酒number幫你落單，之後就會比返張紙仔你等你可以對返個menu，知道邊杯打邊杯。除咗一系列的手工啤之外，當然唔少得送酒美食喇﹗係The Roundhouse Taproom就可以一嚐多款充滿美國南部風味的小食﹗比較signature的就有德州BBQ烤肉，可以揀牛肉、豬肉同煙燻肉腸，portion分為1/4磅、1/2磅同1磅，唔太大食可以每樣點少少試下，過下口癮~ 今次點咗烤手撕豬肉同smoked sausage，伴碟仲有我最鍾意的酸瓜同生洋蔥圈，店員亦會擺低6款唔同口味的醬汁比你搭配﹗烤手撕豬肉肉味濃郁又夠juicy，略帶少少肥膏，唔會太鞋太乾，點埋hot spicy sauce加埋酸瓜一齊食，夠哂惹味﹗煙燻肉腸味道就一般，唔特別有驚喜~美式小食當然要食Buffalo wings喇﹗呢度供應的係Boneless Chicken Wings ($88)，除咗Buffalo，仲可以揀Lemon Pepper、Honey Garlic同Explosive 的口味。Boneless wings食落比較似炸雞塊多過雞翼，而且Buffalo辣醬汁太少，唔係嚿嚿都平均沾到，同埋亦稱唔上辣，下次可以要食Explosive至得﹗仲有肥仔到爆的Brisket Fries ($68)，熱辣辣的溶芝士加上德州烤牛肉粒粒配埋香脆薯條，實在太太太evil喇﹗不過真係好好味 份量都唔細架﹗…查看更多

踏入炎炎夏日，女士們都唔敢留係室外咁耐，最怕成身汗笠癡癡又曬黑哂，但最矛盾係又想涼浸浸咁感受夏日陽光與海灘的氣氛。如果係咁呢，不妨可以約埋三五閨蜜去W Hotel食返個「Gaile Kisses Roxy」的周末自助下午茶，嘆住10款以滑浪為設計靈感既精緻又色彩繽紛的甜點小吃喇﹗Woobar x Roxy 呢個周末自助下午茶款式唔算特別多，不過勝在鹹甜點比例平均，啱哂大眾口味，而且價錢商宜(HK$268加一/位)。而咖啡茶的選擇比起其他afternoon tea多同特別，一位一壺可以慢慢飲，又可以互相試下唔同味﹗今次揀咗呢個Prince Vladimir的俄羅斯風味茶，earl grey茶底帶少少citrus同香料味，又香又好飲﹗除此之外，tea buffet仲有一款alcoholic drink同無酒精的peach tea任飲架﹗以下呢幾款就係今次聯乘的Roxy下午茶系列︰滑浪板木糠布甸 – 顧名思義布甸上面就有塊朱古力的小滑浪板，非常得意﹗利用木糠扮沙粒，加埋又香又滑的忌廉，細細杯唔會太漏柑橘蛋黃醬蟹肉多士 – 厚厚的竹碳包夾著柑橘蛋黃醬蟹肉，麵包鬆軟，蟹肉份量十足，非常滋味~熱吻馬卡龍 – 賣相夠哂誘人惹火，鮮艷朱唇啱哂一眾女士selfie﹗配上多款口味的macaron，完全係女生最愛﹗個人最鍾意朱古力味﹗另外仲有兩款鹹點都非常好食，包括三文魚芒果甜菜籃同芝麻芒果雞肉撻，我尤其鍾意雞肉撻，味道似芝麻手撕雞，配埋waffle撻底非常fusion，又惹味﹗當然除咗呢幾款Roxy系列，仲有其他好味的下午茶茶點喇﹗其中一個吞拿魚牛油果蓉杯都係我的推介，兩款食材非常夾，味道清新。另外，朱古力éclair都好好味，外層放上朱古力豆碎粒，內層加入朱古力mousse，非常香濃﹗W酒店 x Gaile Kisses Roxy夏日下午茶由即日起至到6月30日咋﹗平日就會serve afternoon tea set，周末就係自助下午茶，要試就快D訂位喇~…查看更多

食all day breakfast 或者點心all-you-can-eat brunch就食得多，K-brunch都係第一次食﹗開業一年的新派韓國菜餐廳MOMOJEIN早排推出半自助形式weekend K-brunch，仲有型男Oppa大廚坐陣，經已加哂分﹗加上餐廳位於灣仔旺中帶靜的QRE Plaza，23樓高層望住靚景，自然陽光照入餐廳，令人心情大佳兼胃口大增﹗半自助形式的早午餐($350)由中午12點開始，25款韓式fusion頭盤任食，主菜就6揀1，最後仲有甜品拼盤﹗每款頭盤的賣相都非常精緻吸引，連擺放都超有心思，Oppa大廚仲會出黎親自擺放頭盤架﹗咁多款我就最鍾意韓式炸年糕串燒，年糕質感夠哂煙韌，外層脆口但唔油膩，加埋肉鬆碎碎，非常可口，追加咗好幾串架﹗ 為咗配合港人口味，MOMOJEIN特別加入三文魚刺身，而同平時唔同的係大廚特登用香菇同醃菜調製韓式醬汁，代替豉油同wasabi，令三文魚刺身的味道更加鮮甜﹗另一款非常欣賞的小食就係三文魚刺身配辣醬八爪魚粒炒飯，口感軟糯的八爪魚粒同意大利米(好似係)混合再加微辣韓式辣醬，夠哂惹味開胃，salmon lovers一定岩食。特別鍾意佢地每款小食都細細份，客人可以每樣試D﹗好似韮菜煎餅同泡菜煎餅咁，細細塊唔會食到好膩好飽﹗鍾意飲湯的朋友，記住試埋呢度的牛肉蘿蔔湯呀，牛肉味非常濃郁﹗其實食下食下D頭盤已經開始飽，不過仲有主菜架﹗因為多人一齊食的關係，可以每款主菜都食到D。6款主菜包括︰韓燒牛肋肉、燒鯧魚、韓式烤牛肉、香燒羊排(另加$80)、鮑魚石頭窩飯同埋韓式慢煮豬腩肉。個人認為牛肋肉同豬腩肉係必食的﹗用美國上等牛肋肉配秘製韓式烤汁，肉質軟腍，肉味香濃。豬腩肉唔算太肥膩，配埋醃菜同惹味醬汁非常好食。反而鮑魚石頭窩飯對我來講就最麻麻，味道略太清淡。最後甜品拼盤都好有驚喜，有棉花糖、水果、芝麻雪糕、mochi、脆焦糖蕃薯等，賣相十分精美。如果有邊款覺得好食仲可以同店員講追加架﹗加埋$400有找呢個K-brunch絕對抵食，淨係食頭盤都值回票價喇﹗如果想豪D可以加多$120任飲韓國米酒、soju sangria同啤酒添﹗…查看更多

Lobster Roll熱潮席捲香港，梗係要試試中環新開兩個月的Lobster Central。選用足一磅重的鮮活波士頓龍蝦，Lobster Central每日拆肉製成足料啖啖肉的招牌龍蝦包 ($138)，以檸檬汁、蛋黃醬同香草簡單調味，保持龍蝦肉的鮮味之餘，味道夠哂清新，麵包塗上牛油煎香，外脆內軟，夾著啖啖鮮龍蝦肉一D都唔覺得膩，仲好好味添呀﹗招牌果然係招牌!Lobster Central另外仲有兩款海鮮包Crab Roll同Shrimp Roll! Crab Roll ($118) 用上蟹箝肉，加入蛋黃醬同黑椒等調味料，味道較為濃郁，不過分量係咁足﹗我自己就鍾意Lobster Roll多D，龍蝦肉夠哂清新鮮甜又唔會鞋口，反而蟹肉包的調味太濃，唔係好食到蟹肉的味。除咗海鮮包之外，仲有其他sides﹗我梗係唔會錯過試龍蝦湯喇，不過就有少少失望。雖然龍蝦味都好香濃，質感都幾creamy，不過就一粒龍蝦肉都無>< 售價雖然只係$48，但人家老麥的小龍蝦湯都有幾粒肉食下呀! 同埋湯的調味可以濃少少，如果可以加返D黑椒同brandy就更加好飲嘞! Truffle Fries的松露蛋黃醬濃郁好味，為薯條添加唔少分數，不過我個人就prefer食粗薯條多D﹗想一次過試哂3款包就可以點The EasyOption，套餐包半份3款海鮮包、2隻蟹拑、1包薯片同一杯汽水!不過Lobster Central舖位細細，以自助快餐形式經營，所以座位唔多得靠牆bar枱座位，所以要食就最好避開lunch hour喇!最不得不提係個個黑面收銀男，態度、語氣其差，好似個個都得罪咗佢咁，仲要呼喝D客人，完全唔想撈咁=.=…查看更多

最近西營盤區越開越多新食肆，其中呢間高街麵霸的車仔麵小店開業三個月，已經迅速成為天后Sammi 同容祖兒熱捧的麵店！雖然幫襯當日無捕獲明星，不過店內的牆上都掛上唔少明星幫襯幫襯後的留影。麵店設計簡約帶點懷舊，以灰色、紅色為主調，樓底又夠高，同一般麵舖好唔同！除咗一般車仔麵店都有的配料之外，呢度最特別就係有多款滷水的餸揀選，好似滷水雞子、滷水糖心蛋同滷水坑腩等等，仲有長洲大魚蛋添！不過一款餸都要$9起，最少要點3款，麵底亦要另外加錢。講開麵底最正係刀削麵都有，不過幫襯當日咁啱賣哂><同男友一人點咗一碗，我就無要麵，揀咗豬紅、魚蛋、蘿蔔同滷水豬頸肉。我認為睇間車仔麵舖好唔好食，就要食最基本的餸。不過黎到見到碗餸勁細、勁少咁，都覺得唏噓== 好似食神星爺話齋魚蛋無魚味，又唔彈牙，完全唔知佢係邊度入貨，另外個幾款就普通，無咩特別。湯底點咗腩汁加咖哩小辣，但係咖哩味唔夠突出。男友揀咗豬大腸、雞子同坑腩配粗麵、腩汁加麻辣，基本上3款餸都係滷水，3款都好味，特別係雞子，夠入味又唔會太淋，極度建議大家揀滷水餸！鍾意食雞子既不妨叫一碟做小食！不過就算男友個碗加埋個麵感覺都係好細碗。可能因為份量較少的原故，所以呢度都有好幾款小食提供，等大家可以叫多d野掛∼ 所以我地另外都叫咗懷舊蛋花炒腸粉同七味雞槌，老闆特別推介腸粉，因為佢話個醬係佢唧上去架喎！但係呢味腸粉可以話係全店最好食既，雖然都好難唔好食，不過起碼腸粉有口感，唔會煎到太淋pat pat散收收咁。而雞槌就非常普通，同一般炸雞槌無分別，食唔出七味粉的味。我諗要淨係食碗車仔麵要食得飽的話，都要起碼5、60蚊喇，如果唔係就要叫小食，因為份量真係少得有點離譜。如果想撞下明星都可以黎碰碰運氣，但真係想食碗親民地道的車仔麵都係食番新記/榮記開心d!…查看更多

聽咗好耐的層層疊雪糕店上週終於由波士頓殺到黎香港喇﹗全店貫徹外國分店裝潢以紫色為主調，店內擺設同設計style都非常hippie﹗Emack & Bolio's 的雪糕、雪果、乳酪全部由當地直送到港，口味超過30款，色彩夠哂繽紛夢幻，仲有多款配料自由配搭，最正係僭建雪糕球的數量基本上係無上限，不過現場見到多數人都係疊咗4球左右，睇起來已經覺得好危危乎﹗今次揀咗serious chocolate同peanut butter oreo，朱古力味尚算香滑濃郁，仲有粒粒朱古力碎，而peanut butter oreo質感非常rich加埋oreo碎更加有咬口，感覺相當肥仔﹗因為唔係好多地方有peanut butter味，不過真係食一啖都覺得肥XD 單球雪糕價錢由$43起，每加一球就extra加多$20。而呢度另一個特別的地方就係連個脆皮甜筒的口味都有得揀﹗除咗原味waffle cone之前，仲有彩虹朱古力針、彩虹粟米脆片、果仁粒、Oreo脆脆味等等的甜筒選擇，為成杯雪糕增加口感之餘，仲增加埋視覺效果，絕對啱哂鍾意影相呃Like的港人﹗不過因為剛開業的關係，唔係款款特色甜筒都有齊貨，所以啱啱都係得返彩虹粟米脆片可以揀，我就覺得味道太甜，反而影響本身個脆皮cone的味道，建議大家揀返普通waffle cone，或者下次有機會就試試朱古力杏仁，味道應該無咁甜同漏﹗留意番影相的時候記得快手少少，唔係影完之後杯雪糕都溶咗一半架喇﹗…查看更多

觀塘工廈的cafe越開越多，越開越有特色同賣點！就好似呢間位於巧明工廠大廈5樓新開的Oldish，相信一班蒲開觀塘的潮人文青一定去過呢個單位，因為之前久唔久都會搞d pop-up sale，好似start from zero呢d品牌等。宜家呢度就變身成為潮玩復古同工業風的cafe，集手作工作室、時裝店同咖啡店於一身，將vintage融合cafe。Oldish面積過萬呎，比起一般咖啡店寬敞得多，用上唔同設計同款式的木系枱櫈，raw味十足。廚房設計亦非常開揚，坐正沿邊位置仲可以望住店員為你烹調美食添﹗暫時只做午市的Oldish lunch menu就有6款選擇，價錢大約$120-150左右，當然食材同質素都有番咁上下喇，仲配餐湯同套餐飲品，非常實惠。是日餐湯係周打蜆湯，一向唔太鍾意飲白湯的我係好怕D湯開粉煲/沖，會食到D一嚿嚿的未溶粉團，不過呢個湯就完全唔會，而且用料十足，啖啖蜆肉，好好喝喔~男友點咗Oldish All Day Breakfast，當然係signature加穩陣之選喇﹗份量亦非常足秤，基本炒蛋、煙肉、蕃茄、蘑菇、腸同薯餅都有齊，最正係有埋煙三文魚，雖然唔係話好大片，不過過下口癮都幾happy呀﹗另外，想特別一提的係嚿Ciabatta包，微溫唔乾，夠哂鬆軟，仲有應該係開心果的果仁碎，令個意大利包更香更有口感﹗而我就揀咗香煎澳洲肉眼扒配薯條迷你沙律，點咗5成熟，來到一睇到已經「嘩」一聲，因為塊扒的size唔細，而且明顯厚切。之後切開見到中間D肉仲帶點血紅紅，仲有血色肉汁流出來，出面一般café或西餐廳通常都會煎得過熟，而呢度就做到啱啱好，非常有驚喜﹗肉質非常鮮嫩帶少少煙韌，但唔會太淋或鞋口，不過牛肉味就唔係好濃，但呢個價錢完全係合乎水準兼夾係喜出望外之選﹗食完野飽飽地可以去埋後面的工作室同時裝店行下睇野，鍾意vintage的潮人們千祈唔好錯過呀，話唔定會搵到心頭好添架﹗…查看更多