請坐 (已搬遷) 新店位置

西營盤除咗阿元來了，近期又開多咗間台灣小店，就係位於英華台嘅請坐。短短兩星期我已經幫襯咗兩次，小店裝潢簡約，目測都有十幾張枱，兩次都係排咗15分鐘左右。台灣菜又點少得滷肉飯同紅燒牛肉麵！滷肉飯雖然只係＄28，但份量絕對唔少，女仔食一定夠飽！滷肉肥瘦參半，撈埋菜埔食唔會油膩，仲好有口感！而紅燒牛肉麵嘅份量都唔細，湯底夠晒香濃，但麵嘅質感就稍為淋咗少少，可以煙韌啲！留意番飯同埋麵係可以添架！一般香港台灣嘢食比較少有嘅蛋餅呢度都有，仲有成八款口味咁多！一路食呢個肉鬆蛋餅，一路就覺得自己去咗台灣咁！不過個蛋餅可以再香脆啲，但都好好味！另外就再叫咗兩款小食—皮蛋豆腐同埋椒鹽雞腿，不過椒鹽雞腿嘅味道就比較普通。呢度飲品嘅選擇都有好多，價錢都係廿零蚊左右，而且都算大杯！小區難得搵到嘅台灣古早味，仲有正宗台灣嬸嬸坐鎮！