wince12的個人專頁

好耐冇去牛頭角，原來得寶果邊而家咁多人，可能入面有個街市老婆想食西多，仲要一口果隻，搵到呢間新野就去試一試時間啱啱好，落完單5點20，應該趕得切6點禁令前食完叫左個雞扒印尼撈麵比小朋友，唔醒起有辣，冇走辣，不過兩個細路都照食，即係唔差得去邊，否則佢地食半啖即刻吐番出黎，有剩當然我包底，麵爽，唔會煮過腍，應該有兩個麵，不過呢啲都係基本野，冇乜難度，雞扒正常發揮，下午茶黎講，size合理，加埋兩個麵其實都幾飽，仲有一大堆滑蛋，有圖有真相，滑唔滑自己睇一口西多，我地轉左糖漿，唔要煉奶，落煉奶賣相應該會討好啲，因為有撞色，疊高兩層，都幾大份，每一粒都唔細，女仕應該好難一口，外脆內鬆軟，有明顯花生醬，因為食過有啲落醬落得好孤寒，甚至冇醬最後仲叫多左份雞肶薯條外賣，襯熱襯脆偷食左幾條佢地啲小菜好似唔錯，下次有機會試試疫情之下，要多啲支持街坊小店…查看更多

元朗最好味嘅雞蛋仔格仔餅，嘉發小食，續約失敗，即將結業今次食呢個係朱古力花生格仔餅，咩餡都唔重要，餅底極鬆脆，但係又唔會太多空氣感，即係外脆內軟，實實在在朱古力醬係比較搶味，所以唔會點食到蛋香，花生碎增加層次感，咬落卜卜脆據聞係業主租左比集團，無可口非。希望老闆快啲搵到合適舖位…查看更多

試新野系列連鎖泰菜，裝修幾靚，坐得舒服呢度有我最憎嘅自助落單，叫少少野食都要用好多時間試左個泰式豬扒肉丸船河，主要係想食下船河，其他餐廳做嘅船河好似唔止得河粉底，呢度好似雲吞麵咁，得河粉，較單調。豬扒冇特別，反而肉丸細細粒，幾爽彈。炸豬皮一大堆，喧賓奪主順帶一提，門口啲零食區幾吸引，下次路過會幫襯…查看更多

新餐廳，試一試Clam and mussel 未到我鍾意嘅水平，因為我比較鍾意食海鮮，要求高啲，不過個汁好味，點garlic bread或成個pizza浸落去，都勁開胃，停唔到口點左Kids menu入面個 cheese pizza，竟然上regular size，$60 仲要送一球vanilla 或chocolate 雪糕，又係抵，pizza啲芝士同茄醬啱我口味，厚薄適中。Kids menu都多選擇，又啱小朋友口味，價錢合理有一款Fajitas 似係墨西哥菜，未食過，鐵板牛肉，百幾蚊竟然有兩塊扒，應該係西冷，肉味唔濃，不過除左筋位，其他部份都唔韌，其實個味有啲似黑椒牛柳絲炒意，仲跟埋4塊peter bread 同埋3款醬，超抵，即刻飽左Spaghetti都煮得al dente，我地叫果個好似係香草雞肉意粉，配料就唔太特別，對比其他食物，性價比亦唔高，勝在小朋友都鍾意食，不錯吃飲品獨立叫，都明白呢啲係賺錢位，$78杯mango smoothie，貴過兒童餐，都好飲嘅，唔太冰感，實實在在，有芒果香，唔酸，thickness剛好雖然新開，位置唔太就腳，星期日都full house，最好提早黎或book定位，好似可以坐到6人一枱，冇fact check…查看更多

今日停一停，唔寫懷舊系列住，因為今日8嘅風球，唔係你想舊就有得舊，有得食已經執到意外發現，人龍熱店竟然有開，平時又要齊人，又要早到先有得食，見到有位唔洗等，即入啦其實我唔明點解8號風球仲有人返工，咁危險，香港人真係好鍾意返工必食嘅一定係牛骨汁炸雞，依然好好食，外脆內嫩又juicy，汁醬同調味都好啱我口味Pizza今次試左個未食過嘅蟹肉pizza，我都金精火眼望清楚個menu，係蟹柳定係蟹肉，confirm係蟹肉先嗌，佢幅圖啲配料鋪滿成個pizza面，我仲加錢轉埋金芝邊。但係上枱一睇，啲料只係得中心部分有料，外圍只得芝士，如果係因為轉金芝邊而減少配料，咁我真係捉蟲。最慘係啲蟹肉冇乜味，啲木魚碎又好難咬，個配搭好似有啲問題。講番條邊，金芝邊啲芝士真係超多，冇食飯，食3塊pizza係極限，鍾意芝士嘅人應該好滿足，我就怕怕。…查看更多

懷舊系列路過深水埗，抽起條筋想食餃子，二話不說就走去圓方，深水埗都有唔少賣餃子食店，食過幾間，都係圓方煎餃最啱我因為當飯食，叫左兩份，即係6隻。大大隻，皮薄且脆，餡鮮爆汁，韭菜咬落索索聲，有足夠水份又唔老，肉餡比例啱啱好。6隻餃當然唔夠飽，所以叫多碟炒麵。炒麵比較普通，印象中應該係用上生麵炒，唔係即炒當然預左，而佢翻熱用微波爐，偏乾。我食過有啲舖頭用煎pan炒熱，感覺完全唔一樣。而且呢碟配料比較少。下次食餃子配粉麵好似更穩陣。…查看更多

呢間唔知算唔算懷舊，佢開第一間舖我就有幫襯，要經歷咁多年都仲生存到，已經唔簡單。早幾年冇食開，突然有一次去樂富，見朝早11點幾冇乜人，走入去輕食，然後又比我見到有大大個焦糖燉蛋，都只係賣三十幾蚊，又買左黎試，一試就上左癮，非常高質，超多呍呢嗱籽，焦糖脆，燉蛋輕身滑溜，自此間中就去食一食。不過早幾個月，佢停左一排冇賣，最近又有番，今日諗起，就去食番個，價錢貴左，份量不變，但係入面一粒呍呢嗱籽都見唔到，質感依舊輕滑，焦糖面好厚，食到中段已經覺得太甜，又痴牙，似乎退步左，不過都仲係above average嘅質量午餐叫左素食百寶pizza半份，即叫即焗，熱辣辣，餅底同邊都脆，配料唔乾，蕃茄醬微酸，開胃，滿意…查看更多

延續香港地特色餐廳系列而家啲天氣真係難攪，過埋中秋都咁熱，行街行都標哂汗，就近呢間深深啱哂心水，裝修都比較懷舊，入面牆身仲有啲九龍皇帝字裝飾，九龍皇帝真心經典，不過我諗會逐漸被人遺忘，00後可能見都未見過真跡，少啲共鳴要清熱，當然揀凍綠豆，古人智慧，清熱解毒，入面嘅海帶更加偏寒涼，寒底嘅我，唔食得太多，適可而止，呢碗綠豆夠冰凍，煲到爆哂花，唔會水還水渣還渣，帶臭草香，海帶爽口，高質，但係真係唔敢食太多除左清熱，仲見到有清心丸，呢味野真係懷舊到不得了，細細個喺酒樓飲茶推車仔食過，我知九龍城有得食，但係比較少去果頭，其他區好似冇乜見過，店員推介我配搭馬蹄爽，聽到個爽字就唔洗諗，即叫，爽一爽。清心丸透明，好似粒骰仔，超級彈牙，帶微甜，同埋馬蹄一齊食，好有口感層次，清唔清心我唔知，食完真係清涼左，因為冷氣夠涼咋…查看更多

以年計冇寫食評好耐，係咩令到我突然寫番食評呢？係愛定係責任？其實係決定要舉家移民，好快離開出生地，所以好好紀錄一下香港比較地道或有特色嘅食店光榮，簡樸裝潢，地道感覺，係幾十年前，香港最光輝一段日子嘅產物。黎呢度，唔係要食靚野貴野，主要係食個快飯，醫肚為主，以冰室黎講，佢都算多選擇。叫左個沙嗲牛滑蛋飯。。。我叫左少飯，其實佢見唔見到？仲係咁大份，蛋都算多算滑，沙嗲牛唔韌，有肉感，沙嗲汁唔會過咸，個白飯就相對差啲，偏乾硬，有啲真係好難咬杯凍奶茶就合格，茶奶都平衡，亦唔會過多冰而冇味…查看更多

中午點半鐘，見佢個名同個常餐，有啲同佐敦名店有啲似，所以入去中個伏叫左個$58午市套餐，炭燒鰻魚炒飯先黎一碗老火湯，南北杏霸王花蘿蔔豬骨湯，首先餐具係問先比我囉，我對住果枱都係一樣，食物到左餐具都未有，而個湯係ok，夠火喉跟住等左好耐個飯都未到，點知見到隔兩個位個女人，遲黎先上岸，食緊鰻魚炒飯，而佢湯都未有，好明顯落錯枱，咁我問staff，佢兩分鐘就比番我個飯呢，就太濕，一堆堆痴埋，亦唔夠熱，應該唔係即炒，鰻魚得十粒左右，都好細粒，仲有啲粟米粒生菜絲，味道黎講中規中舉，唔會太甜太鹹，醫肚就冇所謂，唔會太高要求，到我乾哽完成個飯，杯熱檸水都未到，好彩啲飯炒得唔夠乾啫跟住就火都黎，黎杯熱檸水，個staff唔知比個女人定比我，我話我黎先，佢都係照比個女人，話好快比番我，點解呢？我冇錢比咩？所以先忍唔住要寫食評P.S. 對面枱叫左個午市叉燒滑蛋飯，話得三舊薄叉燒，即刻投訴…查看更多

老婆話要開始減肥計劃, 咁開始之前, 梗係要食餐好啦誤打誤撞, 搵到呢間唔太起眼嘅日料店, 其實佢個位又唔係好差, 因為正正係名店永年車仔麵隔離, 所以應該好多人知, 上網一睇, 啲評價都唔錯, 就決定喺度食"最後的晚餐"7點鐘, 冇乜客, 任坐每次食日料, 我多數都會食飛機貨, 牆上有個牌寫啲特色推介, 呢度嘅飛機貨唔多, 小店的確難做呢類, 萬一滯銷要掉就好傷, 產地直送刺身有幾款, 大拖羅、深池、油甘, 幾款都係我地嘅心頭好, 仲有馬糞海膽, 見到呢個牌已經好心急想食打頭陣當然係刺身, 先食油甘魚, 因為比池魚王淡味, 肉質實淨, 鮮味同油份中規中舉, 始終未到時節, 未係最肥美嘅時候。再食深海池魚王, 魚味超濃, 如果你鍾意食濃味野, 呢個o岩哂。跟住到北海道珍寶帶子, 多數日料都會一開二, 而我地鍾意厚身, 一大啖咬落去, 所以吩咐唔好切, 原粒上。咁樣食係可以食到帶子最真實嘅質感, 呢粒都爽彈, 但係我食過更爽嘅, 至於帶子鮮味, 就真係讚! 鮮甜當然係基本, 最緊要係個回甘, 咬完吞完, 個味道仲留o係口入面一段時間, 咁先叫高質。我地太專注個刺身, 冷落左另外兩樣野, 兩樣都係老婆日料必點。燒雞泡魚干, 我覺得比較死實難嚼, 應該係台灣貨。蕃薯天婦羅個粉漿都ok薄同埋脆, 份量剛剛好, 用黎補充澱粉質。呢個芒果雙龍卷應該係招牌貨,賣相吸引, 我點之前都問清楚店員隻蝦係咪即叫即炸, 新鮮同唔新鮮真係差好遠, 隻蝦唔脆我一定唔食。而呢一個, 我係連蝦頭都食埋。特別一提佢地用左秋田小町米做壽司飯, 咬落煙韌帶少少黏性, 至於點解係啡紅色我又冇特登問。但係呢個啡紅色撞番搶眼嘅蟹籽橙色同埋沙律醬奶白色又幾靚。雪花肥牛牛舌心, 老老豆豆, 睇哂成條脷我都未必會分到隻牛肥唔肥, 同埋肥牛同瘦牛條脷到底有冇分別呢? 呢串牛舌厚薄適中, 彈牙得黎唔會韌到咬唔開, 好食嘅牛舌最緊要咬落爽口, 呢度都做到, 不過黑椒重手左, 同埋跟舊檸檬會開心啲。魷魚刺身, 千祈唔好睇小呢樣野, 新鮮嘅魷魚係爽口, 唔會一pat野, 可以睇到店家點樣處理食材, 我食過好多間都唔爽, 而呢個係合格北海道馬糞海膽, 店員話佢地日日入貨, 保證新鮮。呢個我真係推介, 海膽鮮甜濃味又creamy, 我仲留意到一個細節, 就係佢地啲青瓜絲走皮, 因為如果有皮, 入口會有陣青澀味, 影響左海膽嘅味道, 而佢地嘅青瓜非常爽甜多汁, 同海膽嘅鮮味混和真係停唔到口, 而且定價親民, 回頭率極高最後係壽司, 赤貝都係老婆食, 佢話冇腥味, 都新鮮。灸燒焦糖鵝肝壽司, 大大件, 又厚身, 油脂爭少少, 應該係東歐貨, 不過個焦糖面加分, 薄薄地脆脆地, 又唔會有苦味, 燒得啱啱好, 增加口感, 食落有啲似甜品, 幾得意灸燒左口魚壽司, 左口魚邊又係我必食嘅野, 因為鍾意果陣魚油香, 唔知係咪我睇錯, 呢個係左口魚, 唔係魚邊, 所以有肉, 但係又唔錯喎, 塊魚有一半肉, 一半油, 滑得黎有口感, 雙重享受, 就咁成為我嘅新歡。食到8點鐘, 基本上爆埸要等位, 今日只係星期三, 周末應該更多人, 以呢個價錢, 同區應該搵唔到呢個質素, 要食記得訂位。仲有佢地有個打卡PO相優惠, 送$50現金劵, 唔好錯過…查看更多

之前食左間唔好食嘅餃子，我嘅習慣一向都係用好回憶抹走舊回憶，所以短時間內要搵間好味餃子黎食呢間新開左幾個月嘅餃子店，上網一睇個湯我就知同荃灣人氣爆燈餃子屋有啲關係，再睇埋個餐牌就更加肯定韮菜湯餃＋紫菜湯餃＋上海麵，花膠豬骨湯，落足料，好清甜，食到准山花膠紅蘿蔔粟米，內心暗爽以後唔洗去荃灣排長龍食餃子屋，啲餃子皮薄餡靚兼大隻，韮菜鮮爽，肉餡係滑同彈牙，仲要有肉汁流出黎，呢啲先係好食嘅餃子嘛，正常人食6隻餃基本上都飽左八九成，加埋上海麵真係捧住個肚，不過記得要飲埋啲湯，仲有千祈唔好錯過佢地嘅辣菜舖，爽脆唔過辣，同埋啲麵一齊食係唔錯，我埋單時都買左一杯菜舖返屋企，一杯係豆漿杯size $30…查看更多

開張時有傳媒做下勢，門口擺個人手包餃子吸下睛，初時都唔少人幫襯，但係元朗人心水清，好唔好食過一排就一目了然有啲野呃唔到人，早排停活豬，佢地竟然仲有得賣，咁就係人都知你用咩貨今日咁啱路過就入去試下，唔超過十個客，叫左個三拼餃菠菜麵，菠菜麵ok嘅，但係啲餃唔得，肉餡又梅又嚡，唔彈牙，冇肉香，比較好嘅係西洋菜餃，韮菜最差，唔嫩又有陣怪味成班老細還是高級staff喺尾枱試食，我心諗你咁都食唔出有問題真係失敗仲有牆上面嘅手繪裝飾，其中一張不敢恭維，要出位唔需要語帶冒犯性，死鬼佬都寫得出我真係幾好食都唔會再幫襯你…查看更多

到底路德圍有幾多間茶飲？連烈日當空嘅日子，老虎堂都唔見人龍，其他就更慘淡東喜茶一死，另一間又補位，真正一雞死一雞鳴珍煮丹齋睇個名好似有啲料到，吸引我去試，叫左$30嘅黑糖珍珠鮮奶半糖少冰，睇住佢整，用碎冰，有啲驚喜，因為啲冰粒成日都會攪到啜唔到啲珍珠拎上手第一個感覺係罪惡，隻膠杯好厚，好唔環保，講番內涵，因為少冰，搖幾下啲冰都溶得八八九九，其實我鍾意，冰凍感剛好，又唔會溝淡杯野，所以飲到鮮奶味，珍珠滑，煲得透，但係太甜，已經半糖，難以想像正常糖有幾甜，同埋唔係波霸size，同老虎堂比有啲距離，叫我點樣再幫襯你…查看更多

睇iger介紹呢款墨魚鬚頭麵好似幾得意，$30 唔貴，份量有番咁上下幾欣賞個幼麵，麵夠幼，但係做到爽口之餘又冇鹼水味，湯底清得黎帶鮮，上枱時一股蔥粒香氣湧過黎墨魚鬚頭爽脆，鬚腍滑，口感豐富，沾些少魚露更好，佢地啲魚露唔會死鹹，好似將墨魚鬚回歸海洋一樣，食到鹹鮮味，食完飲埋啲湯，完全冇口渴…查看更多