為食龍少奶的個人專頁

少奶呢排真係好懶，懶得寫，所以呢篇食評其實係幾日之前食落攤到而家先寫。呢間拉麵館位置其實唔算方便，地鐵站出嚟都差唔多要行五分鐘（可能因為少奶行得慢啦＝ｗ＝），不過少奶好多時落坑口食飯都會嚟呢度，貪佢唔貴又夠大碗一定食得飽。唔算大嘅舖面，好似家庭式經營嘅感覺（雖然間唔中會漏單，尤其嘢飲），都算幾舒服。少幼每次嚟都鍾意叫手擀麵，因為有口感過拉麵，又唔似刀削麵咁厚，成舊粉咁對於少奶嚟講太heavy了。今次就叫咗酸辣湯手擀麵。湯底濃度啱啱好，又足料，如果嫌唔夠辣可以自己加辣，因為其實個酸辣湯唔多辣。不過雖然少奶好鍾意食辣，但總係覺得酸辣湯好似都係唔好太辣先食得到啲料嘅味，所以都係由得佢原汁原味就算。重有一點令少奶好鍾意叫呢個麵就係叫得呢個預咗會成碗湯飲哂，比起其他麵好似抵食啲咁囉哈哈。少奶友人就叫咗餃子刀削麵，湯底係清湯嚟。佢呢度個清湯都幾鮮味，不過少奶就冇問過用咩嚟煲。雖然今次冇叫到，但少奶想推介埋佢呢度有幾個叫麻辣ｘｘ拉麵嘅，都係清湯底，之後俾一碟用麻辣汁浸住嘅豬耳／肚絲／牛展，少奶每次都會成碟倒落個清湯度溝埋佢，勁惹味！另一個推介就係呢度嘅醉雞。醉雞亦都係少奶每次嚟呢度都會叫嘅小食。個汁好夠酒香，雞亦都好滑，只係略嫌有時會失手有少少黐骨。佢個醉雞重送一碟唔係豉油定咩汁點雞嘅，不過少奶試過一次之後都冇再用嗰隻汁嚟點雞，因為少奶覺得個汁實在太鹹喇，而且亦都蓋過咗酒味，好似唔太match咁。題外話：少奶差唔多每次叫餐飲都係叫凍豆漿，但差唔多每次都會漏單，反而其他嘢就一次都冇漏過，真係奇奇怪怪．．． …查看更多

話說少奶同友人尋日去完半月灣之後全部變成餓狼，想話搵啲任食嘅嘢做晚餐，於是揀咗呢間應該係同區最平嘅自助火鍋諗住平平地擦返餐。揀百好嘅令一個原因係因為每一次去都唔駛等位，對於餓狼嚟講呢一點非常重要，因為已經餓到癲，如果去啲多人嘅地方（例如上篇講嘅Saizeriya．．．）應該餓死都未有得食。但勢估唔到竟然連呢間嘢都要等位，八條餓狼唯有認命。等咗廿分鐘左右啦，終於入得。老實講今次係我嚟呢頭咁多次第一次見到呢度坐滿，暑假加星期五晚嘅威力真係大。一坐低就梗係即刻拎嘢飲，餓狼們即時拎到成台都係飲品，再極速填order紙，點知結果係等咗成十幾分鐘個湯都未到，之後有個類似部長嘅埋嚟問少奶落咗湯底未，話可能漏單，激死。最刺激係呢個時候竟然聽到隔離台有個男人投訴話成個鐘都未有嘢食，少奶即時心諗：呢鑊領嘢！尤幸嘅係，湯底嚟咗冇耐啲嘢食都跟住到。之前睇過食評話呢度啲嘢食堆埋一堆感覺好差，少奶反而覺得咁樣重好，慳返好多位嘛。食物亦都唔算太差，最起碼少奶同友人都覺得個豬潤比想像中好好多（用豬潤做標準係因為太多地方啲豬潤都好難食．．．）。總括嚟講啲食物都還可以啦，88蚊真係算抵。學友人話齋，自助火鍋啲嘢食度度都差唔多，最緊要係同邊個食。不過少奶想講嘅係琴晚漏單情況超嚴重，本來佢話冇入到個湯底，我哋重以為連第一round嘅order都會冇哂，點知佢最後又照嚟，但有好多都唔見咗囉。於是由於驚啲嘢唔嚟嘅關係我哋有好多都重覆入咗好多次，最後就係某幾款食物嚟咗勁多，另外有幾款就成晚都冇得食。同友人比算細食嘅少奶食到一半已經投降，飽哂重望住成盤肉心情即刻大跌，最後重因為去完沙灘太攰而瞓著咗＝ｗ＝漏單情況都重可以用太多人服務唔切嚟解釋，少奶都明星期五晚好多地方都係咁，之但係呢間嘢有時啲服務都真係幾衰。試過有幾次夜少少，全場剩返幾台客啦，佢哋真係會熄哂燈熄哂冷氣剩返你頭頂嗰盞好似spotlight咁，熱到你走為止，同時重要聽住入面成堆staff打麻雀等收工冇人得閒serve你，可幸尋晚少奶算好早去所以冇遇到咁嘅情況，不過見佢突然多咁多客，希望係因為服務有改善啦。2009-08-02 為食龍少奶…查看更多

由於住得近嘅關係，呢間嘢少奶其實都嚟過幾次，等咁耐就真係第一次嘞。因為少奶第一次嚟係閒日臨收工，等咗十張台就有，呢二次都係閒日，好似都等左兩張紙。不過尋晚就誇張喇，大大話話等咗六七十張台，中途周圍行去買下嘢都得。好嘞最後等咗粒幾鐘，終於等到，可以入去喪食嚕！入正題。由於少奶最愛嘅北海甜蝦沙律賣哂，所以前菜就揀咗第二最愛海藻沙律。（按：少奶幾經辛苦先喝得住幾位狼虎友人等少奶影完相先起筷，所以呢堆相真係得來不易．．．）個醬真係好好味，生嘅生菜可能好多人都唔太鍾意食，但加咗呢個醬簡直變咗另一回事。海藻好彈牙，比例可以再多啲，不過以廿幾蚊價位嚟講有呢個質素已經賺咗。第二個前菜就係洋蔥焗青口。老實講少奶其實比較鍾意呢度個田螺。青口肉地其實唔錯，亦有青口鮮味，但少奶硬係覺得隻青口同啲洋蔥同兜酸汁唔多夾。至於點解會叫咗呢個而唔叫田螺，其實係因為一個好白痴嘅原因：因為我哋五個人分唔勻六隻田螺．．．飯來了。少奶係海鮮意大利飯嘅擁躉。所以零考慮就落order。個汁底同啲海鮮真係好夾，又足料，有青口有蜆有蝦有魷魚圈重有好多櫻花蝦仔。份量都唔少，但因為佢濕濕地所以好快食哂，食完先知出事原來咁快食咗咁多嘢。我記得有人話過呢個飯似湯飯多過似意大利飯，少奶其實都有啲認同，印象中意大利飯真係冇咁濕嘅，但咁樣反而更開胃，尤其夏天真係唔多想食啲杰撻撻嘅飯，呢個就啱哂。（其實話說我哋五個人有三個叫呢個飯，之但係落單時講得唔清楚，侍應覆單我哋又冇聽清楚，所以最後搞咗好耐先嚟齊，真係唔好意思喇友人們．．．）頭先講咗話三個人叫海鮮意大利飯，咁另外兩個人食咩呢？答案就係兩客多利亞焗飯，一個叫肉醬，另一個就叫咗雞肉。少奶細細啖試咗啲啲雞肉嗰個，芝味十足，不過對少奶嚟講就漏咗少少，最啱芝士怪同餓男嘞，我諗食完呢個應該會飽到冇朋友，所以當少奶見到兩位友人食完呢兩碟焗飯竟然重放得落兩件pizza嘅時候面上不禁露出驚嘆嘅表情．．．最後少奶一行五人重叫咗兩客pizza，一個係海鮮pizza，一個係芝士pizza。相比起個意大利飯，海鮮pizza就略嫌唔夠多料，味道亦都只屬一般，相反芝士pizza就真係食幾多次都覺得好好味。成個pizza面都鋪滿焗到燶燶地嘅芝士，真係香到不得了，咬落口就軟淋淋，唔需要落其他材料都已經好夠味。題外話：其實呢度加十三蚊就可以任飲飲品吧嘅嘢，不過以少奶所見其實冇乜幾多選擇，所以三次嚟都係飲水算，如果唔想淨飲水都可以一試嘅。2009-08-01 為食龍少奶…查看更多

Happy Lemon就係有種咁嘅魔力，無論失望咗幾多次，少奶每次經過見到都會手痕買一杯。尋晚喺等候Saizeriya嘅時候行過坑口連理街，友人們入咗萬寧買今日去半月灣用嘅太陽油，少奶就出左出面，再次向Happy Lemon進貢嘞。今次叫咗未試過嘅新產品蔓越苺晶球果漾，大杯十四蚊。初頭唔記得攪勻先飲，甜到暈左，飲到一半先開始覺得有苺香同苺味。不過講真你叫少奶形容杯嘢咩味，少奶就只可以講其實呢啲飲品杯杯其實都係差唔多，大概就係糖漿咁嘅味啦，其他部分就視乎佢落咗咩而有少少分別咁囉，所以今次呢杯都算係咁，起碼少奶都飲得出有苺味。至於啲晶球就大粒咗啲，有啲要好大力啜先食到。於是啜呢啲粒粒晶球就變成咗少奶等位嘅餘興活動嘞！ 01-08-2009 為食龍少奶…查看更多

暑假中嘅少奶真係得閒到非常，於是日日都周圍去。而最近少奶就多咗樣新嗜好，就係行博物館嘞！皆因學生價25蚊買張半年入場証就可以任入香港咁多間博物館，實在係炎炎夏日消暑好方法。話說今日少奶同友人又再無聊閒逛歷史博物館，行完大家都有啲口乾想坐低食個tea，行吓行吓就行咗嚟呢間嘢。一坐低就見到menu上有個好似好吸引嘅棉花冰，點知原來尖東分店冇得賣，失望嘅少奶頓時覺得唔知食咩好。最後同友人一人叫咗個茶餐。友人叫嘅係奶油吐司配風沙雞翼，少奶就貪得意叫咗個唔知咩嚟嘅金蠔卷配一口蘿蔔糕。可能呢個時間真係好少人，都唔算等好耐嘢飲就嚟。少奶叫咗薄荷綠茶，友人就飲青蘋果綠茶。青蘋果冇飲過唔知啦，但個薄荷綠茶嘅薄荷味太搶（至少連平日酷愛薄荷嘅少奶都係咁覺得），令到個茶冇哂茶味，重覺得有少少苦，不過用嚟消暑解渴都okay嘅。之但係嘢食就真係慢左啲啲，後面嗰台明明遲過我哋嚟又遲過我哋落單都快過我哋，好彩少奶都唔係趕時間，如果唔係實燥佢。好嘞，終於等到兩個茶餐嚟，友人話佢個餐如果唔太高要求的話都算okay。至於少奶嗰個呢，一上台嘅時候已經聞到蠔豉味，搞到少奶對佢嘅味道都有少少期待。試吓個蘿蔔糕先，嘩好熱，算你啦唔係攤凍哂嘅貨色，不過就熱到唔係好食到佢咩味，總之就係一般細細粒蘿蔔糕冇咩特別咁。金蠔卷其實都係冇咩特別，味道同香味唔成比例咁囉。如果冇咩期望的話其實都算中規中矩嘅。又嚟題外話：其實作為一間位處尖東嘅餐廳tea time得咁少客真係怪怪哋，返嚟一睇先知原來呢度都幾多劣評，不過講句公道說話，至少我呢餐我覺得未去到難食嘅地步嘅，不過見到佢寫明繁忙時間卡位要搭台真係有啲想笑＝ｖ＝2009-07-30 為食龍少奶…查看更多

話說少奶其實每個星期日都會去黃埔學琴，之前已經嚟過時新幾次，本來諗住今日搵第二間試下嘅，點知竟然搵唔到想食嗰間。天氣又熱，行左一陣，算，都係去時新啦=]之前食過時新嘅漢堡飽，老實講，並唔係少奶杯茶，可能因為少奶不嬲都唔多好豬牛羊啦。最得少奶歡心嘅就係呢度嘅魚扒包。嘩～兩塊包夾住成塊juicy石斑，諗起都流口水。不過今日唔知點解覺得個包怪怪地，其實明知時新都係用靚麵包，總係覺得今日個包硬過平時，同埋魚唔多夾。不過整體都算好好味，尤其係食完之後成隻碟都係秘製沙律汁，真係唔係講笑～之不過更令少奶冇辦法唔寫呢篇食評嘅並唔係呢個包，而係時新嘅炸髀。話說少奶今日為左食早餐其實預早左好多，食完睇左陣電視都未夠鐘，為食嘅少奶於是encore左一隻炸雞髀。一望，嘩，不得了！呢隻金黃色嘅炸髀同少奶學校canteen果隻實在差太遠＞ｏ＜（尤其佢地價錢只係差一蚊！！！）一咬落去更加係滑到唔信，每咬一啖都見到啲肉反光，証明幾多肉汁。（本來影左幾張咬開咗之後隻髀嘅相，不過太核突都係唔post喇＝ｗ＝）題外話：食到途中見到一對廿零歲嘅男女入嚟，唔夠一分鐘就因為坐邊而嗌左交，女嘅重即刻拂袖而去。少奶心諗，咁嘅女人，勁；咁都忍到嘅男人，重勁！2009-07-26 為食龍少奶…查看更多